Monthly Horoscope October 2023: ഒക്ടോബര്‍ മാസത്തെ നക്ഷത്രഫലം, അശ്വതി മുതൽ രേവതി വരെ

October Month 2023 Astrological Predictions for stars Aswathi to Revathi: സൂര്യൻ കന്നിരാശിയിലും തുലാം രാശിയിലുമായി സഞ്ചരിക്കുന്നു. അത്തം, ചിത്തിര, ചോതി എന്നീ ഞാറ്റുവേലകളിലൂടെ സൂര്യൻ കടന്നുപോകുകയാണ് എന്നതും സ്മരണീയം. തുലാം സൂര്യന്റെ നീചരാശിയാണ്. അക്കാര്യവും പ്രാധാന്യമർഹിക്കുന്ന വിഷയമത്രെ

ഒക്ടോബർ ഒന്നിന് ചന്ദ്രൻ അശ്വതി നക്ഷത്രത്തിലാണ്. ഒക്ടോബർ 31 ന് ഒരുവട്ടം രാശിചക്രഭ്രമണം പൂർത്തിയാക്കി ചന്ദ്രൻ രോഹിണി നക്ഷത്രത്തിലെത്തുന്നു. ഒക്ടോബർ ഒന്നിന് കൃഷ്ണപക്ഷദ്വിതീയയാണ്. ഒക്ടോബർ 14 ന് കറുത്തവാവും ഒക്ടോബർ 28 ന് വെളുത്തവാവും വരുന്നു. അന്ന് രാത്രി അശ്വതി നക്ഷത്രത്തിൽ രാഹുഗ്രസ്ത ചന്ദ്രഗ്രഹണവും സംഭവിക്കുന്നു. രേവതി, അശ്വതി, ഭരണി, മകം, മൂലം എന്നീ നാളുകാർക്ക് ഗ്രഹണദോഷം പറയപ്പെടുന്നു.

ശനി കുംഭം രാശിയിൽ വക്രഗതിയിൽ തുടരുകയാണ്. ചതയം ഒന്നാം പാദത്തിൽ നിന്നും, മാസാന്ത്യത്തിൽ ശനി അവിട്ടം നാലാം പാദത്തിലേക്ക് നിഷ്ക്രമിക്കുന്നുണ്ട്. വ്യാഴം മേടം രാശിയിൽ ഭരണി നക്ഷത്രത്തിൽ വക്രഗതി തുടരുകയാണ്.

മേടം രാശിയിൽ തുടരുന്ന രാഹു ഒക്ടോബർ 29 ന് മേടം രാശിയിൽ നിന്നും മീനം രാശിയിലേക്ക് പകരുന്നു. അനുബന്ധമായി തുലാം രാശിയിൽ തുടരുന്ന കേതു കന്നിരാശിയിലേക്കും അപസവ്യഗതിയായി (Anti Clock wise) മാറുന്നു. ഒന്നര വർഷത്തിലൊരിക്കലാണ് രാഹു- കേതു രാശിമാറ്റം എന്നതിനാൽ ഇത് ഒക്ടോബർ മാസത്തിലെ മുഖ്യഗ്രഹസംഭവമായി കണക്കാക്കാം.

ഒക്ടോബർ ഒന്നിന് അർദ്ധരാത്രിയിൽ ശുക്രൻ ചിങ്ങം രാശിയിലേക്ക് പ്രവേശിക്കുകയാണ്. ചൊവ്വ ഒക്ടോബർ 3 ന് കന്നിയിൽ നിന്നും തുലാം രാശിയിലേക്ക് മാറുന്നു. ബുധൻ അന്നു തന്നെ കന്നിയിലേക്ക് സംക്രമിക്കുന്നു. ബുധന് ക്രമമൗഢ്യം ഉണ്ടെങ്കിലും കന്നിരാശി ബുധന്റെ ഉച്ചരാശിയാണെന്നത് പ്രസ്താവ്യമാണ്.

ഇങ്ങനെയുള്ള നവഗ്രഹങ്ങളുടെ വിവിധ രാശിസ്ഥിതികളേയും ഉച്ചനീചാദി അവസ്ഥകളെയും മുൻനിർത്തി അശ്വതി മുതൽ രേവതി വരെയുള്ള ഒന്‍പത് നക്ഷത്രങ്ങളിൽ ജനിച്ചവരുടെ
2023 ഒക്ടോബർ മാസത്തെ സമ്പൂർണ്ണമാസഫലം ഇവിടെ അപഗ്രഥിക്കുന്നു.

അശ്വതി

ഉപരിപഠനം, ഗവേഷണം, സാങ്കേതിക വിദ്യ എന്നിവയ്ക്ക് കാലം അനുകൂലമാണ്. സിനിമ, നാടകം, ഗാനം സാഹിത്യം തുടങ്ങിയ രംഗങ്ങളിൽ പ്രവർത്തിക്കുന്നവർക്ക് പുതിയ അവസരങ്ങൾ ലഭിക്കും. ആശയപരമായ സംവാദ-വിവാദങ്ങളിൽ വിജയിക്കാനാവും. സർക്കാർ സംബന്ധിച്ച കാര്യങ്ങളിലും ചില നേട്ടങ്ങൾ, കരാറുകൾക്ക് തുടർച്ച എന്നിവ ഭവിക്കാം. ദാമ്പത്യത്തിൽ സൗഖ്യവും സംതൃപ്തിയും കുറയാം. മാസാന്ത്യത്തിൽ അശ്വതി നക്ഷത്രത്തിൽ ചന്ദ്രഗ്രഹണം സംഭവിക്കുന്നു. മനക്ലേശം, കാര്യതടസ്സം, വൈഷമ്യങ്ങൾ എന്നിവയ്ക്ക് ഗ്രഹണം കാരണമാകാറുണ്ട്.

ഭരണി

തൊഴിൽ രംഗത്ത് പലതരം നേട്ടങ്ങൾ ഉണ്ടാകും. ഉദ്യോഗസ്ഥർക്ക് വേതന വർദ്ധന, സ്ഥാനക്കയറ്റം ഇവ സാധ്യതകളാണ്. ഗവേഷണ പ്രബന്ധം പൂർത്തിയാക്കാനാവും. പുതിയ ഭാഷ പഠിക്കാനുള്ള അവസരം സംജാതമാകും. മക്കൾക്ക് ഉപരിവിദ്യാഭ്യാസത്തിന് അന്യദേശത്ത് അവസരം ലഭിച്ചേക്കാം. സാമ്പത്തികമായ ആവശ്യങ്ങൾ തൃപ്തികരമാവും. പ്രണയത്തിൽ തടസ്സങ്ങൾ ഉണ്ടാവാം. ഭാര്യാഭർത്താക്കന്മാർക്കിടയിൽ ചില അനൈക്യങ്ങൾ തലനീട്ടാം. മാസാന്ത്യത്തിൽ ജന്മരാശിയിൽ ചന്ദ്രഗ്രഹണം നടക്കുന്നത് മാനസിക പിരിമുറുക്കം, അലച്ചിലുകൾ ഇവയ്ക്ക് കാരണമായേക്കാം.

കാർത്തിക

ഗ്രഹങ്ങളുടെ ആനുകൂല്യം കുറയുന്ന കാലമാണ്. കർമ്മരംഗത്ത് മന്ദഗതിയുണ്ടാവും. സാമ്പത്തിക സുസ്ഥിതി തെല്ല് ദുർബലമായേക്കാം. ഊഹക്കച്ചവടത്തിൽ ആദായം കുറഞ്ഞെന്ന് വരാം. മക്കളെ സംബന്ധിച്ച കാര്യങ്ങളിൽ നേട്ടങ്ങൾ ഉണ്ടാകുന്നതാണ്. അവർക്ക് പുതിയ കോഴ്സുകളിൽ ചേരാൻ സാധിച്ചേക്കും. വീടുവിട്ടു നിൽക്കേണ്ട സാഹചര്യം ഉണ്ടായി എന്നുവരാം. വിവാഹാലോചനകൾ വീണ്ടും പ്രതീക്ഷയേകും. വ്യായാമം, യോഗ പോലെയുള്ള കാര്യങ്ങളിൽ താല്പര്യമേറുകയും പരിശീലനം തുടങ്ങുകയും ചെയ്തേക്കും.

രോഹിണി

വാഹനം / വീട്, ഓഫീസ് മോടിപിടിപ്പിക്കാൻ സാധ്യതയുണ്ട്. ബൗദ്ധിക കാര്യങ്ങൾ, പഠനം എന്നിവയിൽ ശോഭിക്കുന്നതാണ്. റിസർച്ച് ചെയ്യുന്നവർക്ക് ഗവേഷണപ്രബന്ധം പൂർത്തിയാക്കാനാവും. കലാപ്രവർത്തനത്തിന് പുത്തനുണർവ്വ് ഉണ്ടാകുന്നതാണ്. സ്വയംതൊഴിൽ ചെയ്യുന്നവർക്ക് മെച്ചമുണ്ടാകും. വിശേഷിച്ചും സാമ്പത്തികമായി. കർമ്മരംഗത്തെ ഉദാസീനത നീങ്ങുമെന്നത് പ്രസ്താവ്യമാണ്. സുഹൃത്തുക്കളുടെ ഭവനം സന്ദർശിക്കും. ദാമ്പത്യത്തിൽ അനുരഞ്‌ജനത്തിന്റെ പാത പിന്തുടരും.

മകയിരം

സഹപ്രവർത്തകരുടെ ഏകപക്ഷീയമായ തീരുമാനങ്ങളെ ചോദ്യം ചെയ്യും. അന്യദിക്കുകളിൽ കഴിയുന്നവർക്ക് നാട്ടിലേക്ക് മടങ്ങാൻ ഏതെങ്കിലും വിധത്തിലുള്ള തടസ്സങ്ങൾ വന്നുചേരാം. വിമർശനങ്ങൾക്ക് തക്ക മറുപടി നൽകും. വായ്പാ തിരിച്ചടവുകൾക്ക് മുടക്കം വരില്ല. സാമ്പത്തികമായി കരുതൽ വേണ്ട കാലമാണ്. എന്നാൽ ന്യായമായ ആവശ്യങ്ങൾ നടന്നുകിട്ടുകയും ചെയ്യും. മക്കളുടെ വിവാഹകാര്യം തീരുമാനിക്കപ്പെടുന്നതാണ്. തൊഴിൽരംഗത്തും വ്യക്തിജീവിതത്തിലും ഉള്ള എതിർപ്പുകളെ അവഗണിച്ച് മുന്നേറും.

തിരുവാതിര

രാശിനാഥനായ ബുധന് ഉച്ചരാശിസ്ഥിതി വരികയാൽ അത്മശക്തി വർദ്ധിക്കും. സാമൂഹ്യജീവിതത്തിൽ ബഹുമാനിതരാവും. കുടുംബത്തിന്റെ പ്രശ്നങ്ങൾക്ക് കൃത്യമായ പോംവഴി കണ്ടെത്തുവാൻ സാധിക്കുന്നതാണ്. മാസാവസാനം നക്ഷത്രനാഥനായ രാഹുവിന് രാശിമാറ്റം വരികയാൽ തൊഴിൽ/ താമസസ്ഥലം/ നിലവിലെ അവസ്ഥ തുടങ്ങിയവക്ക് ഏതെങ്കിലും വിധത്തിൽ മാറ്റം വരാൻ സാധ്യതയുണ്ട്. ഉടനടിയായിട്ടല്ല എങ്കിൽ പോലും. ദാമ്പത്യജീവിതത്തിൽ സുഖാനുഭവങ്ങൾ ഉണ്ടാവുന്നതാണ്. ആരോഗ്യകാര്യത്തിൽ ശ്രദ്ധ വേണ്ടതുണ്ട്.

പുണർതം

മിഥുനക്കൂറുകാർക്ക് സാമ്പത്തിക സുസ്ഥിതി വന്നുചേരും. സ്ത്രീകളുടെ പിന്തുണ ലഭിക്കും. തൊഴിലിലെ ശത്രുക്കളെ മറികടന്ന് കുതിപ്പ് തുടരാനാവും. വലിയ കരാറുകൾ അനുകൂലമാകാം. കർക്കടകക്കൂറുകാർക്ക് സർക്കാർ അനുമതി, പ്രവർത്തനത്തിന് ലൈസൻസ്സ് എന്നിവ ലഭിച്ചേക്കാം. സഹോദരരുടെ സഹായവും ഉണ്ടാകും. മാനസികക്ലേശത്തിന് സാധ്യത കാണുന്നു. വാഹനം ഉപയോഗിക്കുന്നതിൽ നല്ലജാഗ്രത വേണം. നാലാം ഭാവത്തിൽ ചൊവ്വയുള്ളതിനാൽ മാതാവിന്റെ ആരോഗ്യത്തിൽ അലംഭാവമരുത്.

പൂയം

ജന്മരാശിയിൽ ഗ്രഹങ്ങളൊന്നും സഞ്ചരിക്കുന്നില്ല. ശുഭന്മാരുടെയോ പാപഗ്രഹങ്ങളുടെയോ ദൃഷ്ടിയും ഭവിച്ചിട്ടില്ല. ചിലർക്ക് സ്വാശ്രയത്വം വളർത്താനും സ്വന്തം കാലിൽ നിൽക്കാനും സന്ദർഭമൊരുങ്ങുന്നതാണ്. നക്ഷത്രനാഥനായ ശനിക്ക് വക്രത തുടരുകയാൽ എല്ലാക്കാര്യങ്ങളും ശരിയായ മുന്നേറ്റത്തിലാണ് എന്ന് പറയാനുമാവില്ല. രണ്ടാം ഭാവത്തിൽ ശുക്രൻ സഞ്ചരിക്കുകയാൽ മധുരമായി സംസാരിക്കാനാവും. വിലകൂടിയ മുഖാഭരണങ്ങൾ പാരിതോഷികമായി ലഭിച്ചേക്കാം. ഭാര്യാഭർത്താക്കന്മാർക്കിടയിൽ പാരസ്പര്യം വർദ്ധിക്കുന്നതാണ്.

ആയില്യം

ദീർഘവീക്ഷണത്തോടെയുള്ള പ്രവർത്തനങ്ങൾ ഫലം കണ്ടുതുടങ്ങും. പ്രത്യുല്പന്നമതിത്വത്താൽ വിഘ്നങ്ങളെയും വിരോധികളെയും പരാജയപ്പെടുത്തും. മുഖം നോക്കാതെ സംസാരിക്കുകയും പെരുമാറുകയും ചെയ്യേണ്ടിവരാം. ഏല്പിച്ച ദൗത്യം വിജയിക്കുന്നത് സന്തോഷമേകും. നാലിൽ ചൊവ്വയുള്ളതിനാൽ ഭൂമി സംബന്ധിച്ച തർക്കങ്ങൾക്കോ വ്യവഹാരങ്ങൾക്കോ സാധ്യതയുണ്ട്. ജന്മരാശ്യധിപനായ ചന്ദ്രന് രാഹുഗ്രസ്ത ഗ്രഹണം വരികയാൽ ചില പ്രതികൂല ഫലങ്ങൾ മാസാന്ത്യത്തിൽ ഉണ്ടായേക്കാം.

മകം

ജന്മരാശിയിൽ ശുക്രൻ സഞ്ചരിക്കുന്നതിനാൽ സുഖഭോഗങ്ങൾ ഭവിക്കുന്നതാണ്. മനസ്സിനിഷ്ടപ്പെട്ട പാരിതോഷികങ്ങൾ ലഭിക്കാം. പഠനത്തിൽ മികവേറും. പണ്ഡിതോചിതമായി സംസാരിക്കും. പദവികളും അധികാരങ്ങളും കിട്ടാം. ആജ്ഞാശക്തി വർദ്ധിച്ചേക്കും. ഉറച്ചനിലപാടുകൾ കൈക്കൊള്ളുന്നതാണ്. പിണങ്ങിനിന്ന സഹോദരരുമായി ഇണക്കത്തിലാവും. പിതാവിന്റെ ആരോഗ്യത്തിൽ ശ്രദ്ധ വേണം. അടുക്കളത്തോട്ടം/ മട്ടുപ്പാവ് കൃഷി ഇവയിൽ നിന്നും ആദായുണ്ടാകുന്നതാണ്.

പൂരം

മനസ്സ് സുഖാലസ്യത്തിൽ മുഴുകും. ഉദ്യോഗസ്ഥർ അവധിയെടുത്ത് സകുടുംബം സുഖവാസകേന്ദ്രങ്ങളിൽ പോകും. കച്ചവടത്തിൽ ഭാഗികമായി വിജയം നേടുവാൻ കഴിയും. ചെറുപ്പക്കാരുടെ നവസംരംഭങ്ങൾക്ക് ആശാവഹമായ തുടക്കം ലഭിച്ചേക്കാം.വിജ്ഞാനാന്വേഷണത്തിൽ വിജയിക്കാൻ കഴിയുന്നതാണ്. സദസ്സുകളിൽ പണ്ഡിതോചിതമായ പ്രസംഗം നടത്തും. വിദ്യാർത്ഥികൾക്ക് കലാപരിശീലനത്തിന് അവസരം വന്നുചേരുന്നതാണ്. പ്രണയികളുടെ ഹൃദയബന്ധം സുദൃഢമായിത്തീരും. ഭാര്യാഭർത്താക്കന്മാർക്കിടയിൽ എല്ലാക്കാര്യങ്ങളെക്കുറിച്ചും തുറന്ന ആശയ വിനിമയം നടക്കും.

ഉത്രം

ചിങ്ങക്കൂറുകാർക്ക് ആശ്വാസത്തിന് വകയുണ്ട്. പഠനപുരോഗതി, ധനപരമായ ഉയർച്ച എന്നിവ പ്രതീക്ഷിക്കാം. ആത്മാഭിമാനം ഉയർത്തിപ്പിടിക്കുന്നതാണ്. കന്നിക്കൂറുകാർക്ക് അല്പം സമ്മർദ്ദവും ആരോഗ്യപ്രശ്നങ്ങളും ഉണ്ടായേക്കും. ഉദ്യോഗസ്ഥർ ചില പദവികളിൽ നിന്നും ഒഴിവാക്കപ്പെടാം. മുന്നൊരുക്കം നടത്താതെ പുതുസംരംഭങ്ങൾക്ക് തുടക്കം കുറിക്കരുത്. ബന്ധുക്കളോട് വിരോധം തോന്നുകയും അത് പ്രകടിപ്പിക്കുകയും ചെയ്യാനിടയുണ്ട്. ക്ഷോഭങ്ങളെ നിയന്ത്രിക്കണം.

അത്തം

ജന്മരാശിയിൽ നിന്നും ചൊവ്വ മാറുന്നതിനാൽ ആരോഗ്യഗുണം പ്രതീക്ഷിക്കാം. ദാമ്പത്യത്തിൽ തുടർന്നു പോന്ന അനൈക്യം അവസാനിക്കും. ആദിത്യൻ ജന്മരാശിയിൽ തുടരുകയാൽ അലച്ചിലുണ്ടാകും. സാമ്പത്തികക്ലേശം വരാം. രാശിനാഥനായ ബുധൻ ഉച്ചത്തിലാവുകയാൽ പ്രശസ്തി വർദ്ധിക്കും. സാഹിത്യം, ഗണിതം, ഭാഷ, കരകൗശലം എന്നിവയിൽ നൈപുണ്യം ഉണ്ടാകുന്നതാണ്. ബന്ധുക്കളുടെ സ്നേഹവും പിന്തുണയും ലഭിക്കും. സാമ്പത്തിക കാര്യങ്ങളിൽ ശ്രദ്ധയുണ്ടാവണം.

ചിത്തിര

പാപഗ്രഹങ്ങൾ ജന്മരാശിയിൽ സഞ്ചരിക്കുന്നത് ദോഷപ്രദമാണ്. കന്നിരാശിയിൽ ആദിത്യനും തുലാരാശിയിൽ ചൊവ്വയും സഞ്ചരിക്കുകയാൽ ചിത്തിര നാളുകാർ സങ്കീർണ്ണ പ്രശ്നങ്ങളെ നേരിട്ടുകൊണ്ടിരിക്കുകയാണ് എന്ന് വ്യക്തം. സാമ്പത്തികമായി ഞെരുക്കം അനുഭവപ്പെടും. ആരോഗ്യപ്രശ്നങ്ങളെയും നേരിടേണ്ടി വരാം. പ്രധാനകാര്യങ്ങളിൽ ഉചിതതീരുമാനം കൈക്കൊള്ളുന്നതിൽ ആശയക്കുഴപ്പം ഉണ്ടാവുന്നതാണ്. ബുധന് ഉച്ചസ്ഥിതിയുള്ളതിനാൽ കന്നിക്കൂറുകാർക്ക് വൈക്ലബ്യങ്ങളെ പരിഹരിക്കാൻ സാധിക്കും. പതിനൊന്നാമെടത്തിലെ ശുക്രന്റെ ശുഭത്വം തുലാക്കൂറുകാർക്കും ഗുണാനുഭവങ്ങൾ സമ്മാനിക്കും.

ചോതി

ജന്മരാശിയിൽ കേതു, ചൊവ്വ എന്നിവരും മാസത്തിന്റെ രണ്ടാം പകുതി മുതൽ ആദിത്യനും സഞ്ചരിക്കുകയാൽ പൊതുവേ ആരോഗ്യപ്രശ്നങ്ങൾ ഉടലെടുക്കാം. വ്യക്തിത്വപ്രതിസന്ധി, വീഴ്ച, മുറിവ് , ധനക്ലേശം എന്നിവ ചില സാധ്യതകളാണ്. നിലവിലെ ജോലി ഉപേക്ഷിക്കുന്നത് ആശാസ്യമാവില്ല. മുതൽമുടക്കുകൾക്കും ഇപ്പോൾ കാലാനുകൂല്യം ഇല്ല. ജന്മരാശ്യധിപനായ ശുക്രന്റെ ലാഭഭാവസ്ഥിതി കുറച്ചൊക്കെ ദോഷ നിവൃത്തികരമാണ്.

വിശാഖം

ചെറുതും വലുതുമായ യാത്രകൾ വേണ്ടിവരുന്നതാണ്. എന്നാൽ അവ ലക്ഷ്യം നേടും എന്ന് പറയാനാവില്ല. പല കാര്യങ്ങളും ചിന്തിച്ചുറപ്പിക്കുമെങ്കിലും അവ പ്രാവർത്തികമാക്കുന്നത് എളുപ്പമല്ലെന്നറിയും. വീട്ടുകൃഷിക്കായി നേരം മാറ്റി വെക്കുന്നതാണ്. സാങ്കേതിക ജ്ഞാനം സമാർജിക്കുക അനിവാര്യമാണെന്നറിയും. വിദ്യാർത്ഥികൾക്ക് ഏകാഗ്രത കുറയാനിടയുണ്ട്. വ്യാപാര ചർച്ചകകൾ പുരോഗമിക്കും. ദാമ്പത്യരംഗം കലുഷമാകാൻ സാധ്യതയുണ്ട്. പ്രണയികൾക്കും
നല്ല കാലമല്ല.

അനിഴം

പത്തും പതിനൊന്നും ഭാവനാഥന്മാർ ഒരുമിച്ച് പതിനൊന്നാം ഭാവത്തിൽ സ്ഥിതി ചെയ്യുകയാൽ തൊഴിലിൽ വലിയ നേട്ടങ്ങൾ ഉണ്ടാകും. ഉദ്യോഗസ്ഥർക്ക് സ്ഥാനോന്നതി, വേതന വർദ്ധനവ് മുതലായവ പ്രതീക്ഷിക്കാം. പരീക്ഷകളിലും അഭിമുഖങ്ങളിലും നേട്ടമുണ്ടാകും. ധനവരവ് അധികരിക്കും. ന്യായമായ ആഗ്രഹങ്ങൾ സഫലമാകുന്നതാണ്. ഒക്ടോബർ 20 വരെ ഈ സ്ഥിതി തുടരാം. അതിനുശേഷം ഗുണം കുറഞ്ഞേക്കും. പാദരോഗങ്ങൾ, യാത്ര, പാഴ്ച്ചെലവുകൾ എന്നിവ സാധ്യതകൾ.

തൃക്കേട്ട

പതിനൊന്നാം ഭാവത്തിലെ ബുധാദിത്യയോഗം ഏറ്റവും അനുകൂലമാണ്. വ്യാപാരത്തിൽ പ്രതീക്ഷിച്ചതിലധികം ലാഭം ഉണ്ടാവും. ഉപഭോക്താക്കളെ ആകർഷിക്കും വിധം വ്യാപാരതന്ത്രങ്ങൾ ആവിഷ്കരിക്കും. ഉദ്യോഗത്തിലിരിക്കുന്ന വർക്ക് അധികാരം വർദ്ധിക്കും. വേതനം ഉയരാം. വിദ്യാർത്ഥികൾക്ക് പഠനത്തിൽ ഏകാഗ്രതയുണ്ടാവും. നല്ല സ്വപ്നങ്ങൾ സാക്ഷാല്ക്കരിക്കാൻ സാധിക്കുന്നതാണ്. രാഷ്ട്രീയത്തിൽ വിജയം നേടാനാവും. ദാമ്പത്യം ശോഭനമാകുന്നതാണ്. മാസാന്ത്യത്തിൽ ആരോഗ്യപ്രശ്നങ്ങൾ, സർക്കാരിൽ നിന്നും പ്രതികൂലത, പാഴ്‌ച്ചെലവുകൾ ഇവയും സാധ്യതകൾ.

മൂലം

കർമ്മരംഗത്ത് ഉണർവും ഉയർച്ചയുമുണ്ടാവും. സ്വന്തം തൊഴിലിൽ വിജയിക്കാനാവും. സാമ്പത്തിക സ്വാശ്രയത്വമുണ്ടാവുന്നതാണ്. തൊഴിൽ തേടുന്നവർക്ക് അവസരം ലഭിച്ചേക്കാം. ഭൂമിയുടെ വ്യാപാരം ഊർജ്ജിതമാകും. സഹോദരരുമായുള്ള കലഹം രമ്യതയിലായേക്കും. വായ്പകളുടെ തിരിച്ചടവിന് ക്ലേശിക്കേണ്ടി വരില്ല. കുടുംബജീവിതത്തിൽ സ്വസ്ഥതയുണ്ടാവും. കുടുംബത്തിലെ വൃദ്ധജനങ്ങളുടെ പിന്തുണ കരുത്തേകും.

പൂരാടം

ഈമാസം ഉദ്യോഗസ്ഥർക്കും വ്യാപാരികൾക്കും മെച്ചം പ്രതീക്ഷിക്കാം. പ്രൊഫഷണലുകൾക്ക് ഉയർച്ച ഉണ്ടാകും. സ്വന്തം കഴിവുകൾ അംഗീകരിക്കപ്പെടും. സാമ്പത്തികമായി ലാഭം വന്നുചേരുന്നതാണ്. വസ്തു സംബന്ധിച്ച വ്യവഹാരങ്ങൾക്ക് അനുകൂലവിധി വരാം. നല്ല അവസരങ്ങൾ കിട്ടാതെ വിഷമിച്ചവർക്ക് ഇത് അനുകൂലമായ സന്ദർഭമാണ്. പഠന മികവ് അനുമോദനം നേടും. കലാവാസനകൾക്കും പോഷണം ലഭിക്കുന്നതാണ്. മുതിർന്ന അംഗങ്ങൾക്ക് ആരോഗ്യപരമായ ക്ലേശങ്ങൾ കുറയും.

ഉത്രാടം

തൊഴിൽപരമായി വലിയ മാറ്റം ഉണ്ടാവുമെന്ന് പറയാനാവില്ല. ഏറ്റെടുത്തിട്ടുള്ള ചുമതലകൾ നൽകുന്ന സമ്മർദ്ദം തുടർന്നേക്കും. ബിസിനസ്സ് വിപുലീകരിക്കാൻ തൽകാലം മുതിരാതിരിക്കുകയാണ് നന്ന്. പ്രസ്തുത ആവശ്യത്തിനായി വായ്പ വാങ്ങുന്നതായാൽ തിരിച്ചടക്കാൻ വിഷമിക്കും. കുടുംബാംഗങ്ങൾ നൽകുന്ന പിന്തുണ വലിയ മാനസികോർജ്ജം പകരും. സന്താനങ്ങളുടെ വിവാഹകാര്യത്തിൽ അന്വേഷണം പുരോഗമിക്കും. ധനുക്കൂറുകാർക്ക് മെച്ചപ്പെട്ട ഫലം പ്രതീക്ഷിക്കാം.

തിരുവോണം

നിശ്ചയിച്ചുറപ്പിച്ച കാര്യങ്ങൾ ഒന്നൊന്നായി പൂർത്തീകരിക്കും. തൊഴിൽ രംഗത്ത് പുതിയ ചില പ്രശ്നങ്ങൾ ഉദയം ചെയ്തേക്കാം. പ്രതീക്ഷിച്ച കേന്ദ്രങ്ങളിൽ നിന്നും പറയത്തക്ക സാമ്പത്തിക സഹായം ലഭിച്ചില്ലെന്ന് വരാവുന്നതാണ്. മക്കളുടെ വിവാഹകാര്യത്തിൽ നല്ല തീരുമാനത്തിന് സാധ്യതയുണ്ട്. വിരുന്നുകളിലും പൂജകളിലും പങ്കെടുക്കും. ഭൗതികസാഹചര്യങ്ങൾ മാസത്തിന്റെ പകുതി മുതൽ കൂടുതൽ മെച്ചപ്പെടുന്നതാണ്. ഗൃഹത്തിന് / തൊഴിലിടത്തിന് മോടിപിടിപ്പിക്കൽ ഉണ്ടായേക്കും.

അവിട്ടം

പ്രവൃത്തി സ്ഥലത്ത് കൂടുതൽ സമയം ചെലവഴിക്കേണ്ട സ്ഥിതിയുണ്ടാകാം. പുതിയ ചുമതലകൾ ഏറ്റെടുക്കേണ്ടി വരുന്നതാണ്. വിദ്യാർത്ഥികൾ പ്രോജക്ടുകൾ പൂർത്തീകരിക്കാൻ അധികസമയം എടുത്തേക്കും. വിദേശ പഠനത്തിന് അനുമതി ലഭിക്കുക എളുപ്പമായേക്കില്ല. തൊഴിൽ അവസരങ്ങൾ തേടുന്നവർക്ക് അല്പകാലം കൂടി കാത്തിരിക്കേണ്ടിവരും. കുടുംബ കാര്യങ്ങളിൽ ആശ്വാസമനുഭവപ്പെടുന്നതാണ്. ഭാര്യാഭർത്താക്കന്മാർ അനുരഞ്ജനത്തോടെ പ്രവർത്തിക്കും. സാമ്പത്തിക സ്ഥിതി ഒട്ടൊക്കെ അനുകൂലമാവും.

ചതയം

സങ്കീർണ്ണവിഷയങ്ങളിൽ ബുദ്ധിപൂർവ്വം ഇടപെടുന്നതാണ്. പ്രശ്നങ്ങളുടെ കുരുക്കുകളെ സമർത്ഥമായി അഴിക്കും. വിദ്യാഭ്യാസത്തിൽ പുരോഗതി കാണാനാവും. ബന്ധുപ്രീതിയുണ്ടാവും. പണവരവ് പ്രതീക്ഷിച്ചത്ര ഉണ്ടാവണമെന്നില്ല. ആദിത്യൻ അഷ്ടമത്തിൽ തുടരുകയാൽ ഉദ്യോഗസ്ഥർക്ക് മനക്ലേശമേറുന്നതാണ്. അധികാരികളുമായി പൊരുത്തപ്പെടാൻ വിഷമിക്കും. കുടുംബത്തിലും ചില അസംതൃപ്തികൾ നിഴലിക്കാം. പിതാവിന്റെ ആരോഗ്യകാര്യത്തിൽ ജാഗ്രത വേണം. സ്വന്തം ആരോഗ്യപരിപാലനത്തിലും അലംഭാവമരുത്.

പൂരൂരുട്ടാതി

ഉറപ്പുകൾ പാലിക്കപ്പെടുകയില്ല. കിട്ടും എന്ന് കരുതിയവ അവസാനനിമിഷം നഷ്ടപ്പെടാം. ധനവരവ് സാമാന്യമായിരിക്കും. വ്യാപാരികൾക്ക് കടം, വായ്പ ഇവ അധികരിക്കാം. അന്യനാട്ടിൽ തൊഴിൽ തേടുന്നവർക്ക് പ്രതീക്ഷക്ക് വകയുണ്ട്. പ്രണയികൾക്ക് ഇച്ഛാഭംഗത്തിനിടയുണ്ട്. ദാമ്പത്യജീവിതത്തിലും പൊരുത്തക്കേടുകൾ ഉണ്ടാവാം. പഠനത്തിൽ ശ്രദ്ധ പുലർത്താൻ സാധിക്കുന്നതാണ്. ചെറിയ കോഴ്സുകളിൽ ചേർന്നെന്നു വരാം. സ്ഥിരോത്സാഹവും സഹിഷ്ണുതയും നഷ്ടപ്പെടുത്തരുത്. പിതാവുമായുള്ള ബന്ധം രമ്യമാവണമെന്നില്ല.

ഉത്രട്ടാതി

യാത്രകൾ വേണ്ടിവരുന്നതാണ്. വ്യാപാര കരാറുകൾ പുതുക്കപ്പെടാം. ഉദ്യോഗത്തിൽ ശ്രദ്ധ കുറയുന്നതിന് മേലധികാരികളുടെ അപ്രീതി സമ്പാദിക്കും. ശത്രുക്കളുടെ എതിർപ്പുകളെ മറികടക്കാൻ ക്ലേശിക്കുന്നതാണ്. സാമ്പത്തികസ്ഥിതി മോശമാവില്ല. കുടുംബ ബന്ധങ്ങളുടെ ശക്തി ദുർബലപ്പെടുന്നതായി തോന്നാം. ഊഹക്കച്ചവടത്തിൽ നിന്നും നേരിയ ആദായം കൈവന്നേക്കും. സുഹൃത്തുക്കളുടെയും ബന്ധുക്കളുടെയും പിന്തുണ കരുത്തേകും. വാഹനം, വൈദ്യുതി, അഗ്നി തുടങ്ങിയവ ഉപയോഗിക്കുമ്പോൾ ഏറ്റവും കരുതൽ വേണ്ടതുണ്ട്.

രേവതി

നക്ഷത്രനാഥനായ ബുധൻ ഉച്ചക്ഷേത്രത്തിൽ സഞ്ചരിക്കുകയാൽ ആത്മവിശ്വാസവും അധൃഷ്യതയും ഏറും. സമൂഹത്തിൽ സമാദരിക്കപ്പെടും. പഠിതാക്കൾക്കും ഗവേഷകർക്കും ഉത്സാഹം വർദ്ധിക്കും. വാദപ്രതിവാദങ്ങളിൽ വിജയിക്കുവാൻ കഴിയും. വ്യാപാരത്തിൽ ലാഭം കൂടുന്നതാണ്. നിക്ഷേപങ്ങൾ ആദായകരമായേക്കും. അഷ്ടമത്തിൽ കുജനുള്ളതിനാൽ ആരോഗ്യകാര്യത്തിൽ ശ്രദ്ധയുണ്ടാവണം. പാഴ്ച്ചെലവുകളെ നിയന്ത്രിക്കേണ്ടതുണ്ട്. കുടുംബജീവിതത്തിൽ പിണക്കങ്ങളും ഇണക്കങ്ങളും ആവർത്തിക്കാം. ഉദ്യോഗസ്ഥർക്ക് സ്ഥലം മാറ്റം, ജോലിക്കൂടതൽ തുടങ്ങിയ സാധ്യതകളും കാണുന്നു.