October 15 - 21, 2023: വാരഫലം, അശ്വതി മുതൽ രേവതി വരെ: Weekly Horoscope, Astrological Predictions

October 15 - October 21, 2023, Weekly Horoscope Astrological Predictions Aswathi to Revathi: ആദിത്യൻ കന്നി-തുലാം രാശികളിൽ, ചിത്തിര ഞാറ്റുവേലയിൽ സഞ്ചരിക്കുന്നു. ഒക്ടോബർ 17/ കന്നി 30 ചൊവ്വാഴ്ച അർദ്ധരാത്രിയിലാണ് സൂര്യന്റെ തുലാം രാശിയിലേക്കുള്ള സംക്രമം. ചന്ദ്രൻ ശുക്ലപക്ഷ പ്രഥമ മുതൽ സപ്തമി വരെയുള്ള തിഥികളിലും ചിത്തിര മുതൽ മൂലം വരെയുള്ള നക്ഷത്രങ്ങളിലും സഞ്ചരിക്കുന്നു. ചന്ദ്രൻ പക്ഷബലത്തിലേക്ക് നീങ്ങിത്തുടങ്ങുന്ന വാരം കൂടിയാണിത്.

ബുധൻ ഒക്ടോബർ ഒന്നാം തീയതി കന്നിയിൽ നിന്നും തുലാത്തിലേക്കു പ്രവേശിക്കുന്നു. ചൊവ്വ തുലാം രാശിയിൽ തുടരുന്നു. ബുധനും ചൊവ്വയും മൗഢ്യത്തിലാണ്. ശുക്രൻ ചിങ്ങത്തിലും വ്യാഴം മേടത്തിലുമാണ്. ശനി കുംഭം രാശിയിൽ തുടരുന്നു. വ്യാഴം, ശനി എന്നീ ഗ്രഹങ്ങൾ അതാത് രാശികളിൽ വക്രഗതിയിൽ ആണ് എന്നതും ഓർക്കേണ്ട യാഥാർത്ഥ്യമാണ്.

രാഹു മേടത്തിലും കേതു തുലാത്തിലുമാണ്. രാശിസന്ധിയിൽ പ്രവേശിച്ച് കഴിഞ്ഞതിനാൽ രാഹുവും കേതുവും നൽകുന്ന ദോഷഫലങ്ങൾ അധികരിക്കാനാണ് സാധ്യത. ഏതൊക്കെ കൂറുകാർക്കാണ് ഈയാഴ്ച അഷ്ടമരാശിക്കൂറ് എന്നുനോക്കാം. ഞായർ, തിങ്കൾ ദിവസങ്ങളിൽ മീനക്കൂറുകാർക്കും, തുടർന്ന് വ്യാഴം സായാഹ്നം വരെ മേടക്കൂറുകാർക്കും, തുടർന്ന് ശനിയാഴ്ച രാത്രി വരെ ഇടവക്കൂറുകാർക്കും ചന്ദ്രൻ അഷ്ടമരാശിയിൽ സഞ്ചരിക്കുന്നു. ശുഭകാര്യങ്ങൾക്ക് അഷ്ടമരാശി ഒഴിവാക്കണം. ധനപരമായ ഇടപാടുകളിൽ കൃത്യത വേണം. പൊതുവേ എല്ലാക്കാര്യത്തിലും കരുതൽ പുലർത്തുകയാണ് നല്ലത്.

മുകളിൽ വിശദമാക്കിയ ഗ്രഹനിലയുടെ പഞ്ചാത്തലത്തിൽ അശ്വതി മുതൽ രേവതി വരെയുള്ള നക്ഷത്രങ്ങളിൽ ജനിച്ചവരുടെ സമ്പൂർണ്ണ വാരഫലം പരിശോധിക്കാം.

അശ്വതി

ആഴ്ചയുടെ തുടക്കവും ഒടുക്കവും മെച്ചപ്പെട്ടതാവും. സാമ്പത്തിക ഇടപാടുകളിൽ മെച്ചം ഭവിക്കും. വിദ്യാർത്ഥികൾക്ക് ഉന്മേഷത്തോടെ പഠനം തുടരാൻ കഴിയുന്നതാണ്. ഗാർഹികരംഗം സംതൃപ്തവും സന്തോഷഭരിതവുമാവും. വിരുന്നുകാർക്ക് ആതിഥ്യമരുളേണ്ടി വന്നേക്കും. ബന്ധങ്ങൾ ദൃഢമാകും. ബുധൻ, വ്യാഴം ദിവസങ്ങൾക്ക് മേന്മ കുറയുന്നതാണ്. അശുഭവാർത്തകൾ കേൾക്കാം. ചെലവുകൾ അല്പം അനിയന്ത്രിതമാവും. ശകാരം കേൾക്കുവാനിടയുണ്ട്.

ഭരണി

സൽകാര്യങ്ങൾ ചെയ്യാൻ സാഹചര്യം ഉണ്ടാവും. പ്രതിസന്ധികളെ ഭംഗിയായി തരണം ചെയ്യും. അനുഭവത്തിൽ നിന്നും അറിഞ്ഞ ‘വിജയമന്ത്രം’ ഫലപ്രദമായി ഉപയോഗിക്കും. ബന്ധുക്കളുടെ പിന്തുണ ലഭിക്കും. വ്യാപാരക്കരാറുകൾ നേടും. യാത്രകൾ കൊണ്ട് നേട്ടം ഭവിക്കുന്നതാണ്. ദാമ്പത്യം മധുരതരമാവും. വിദ്യാസത്തിൽ പുരോഗതി പ്രതീക്ഷിക്കാം.ആഴ്ച മധ്യത്തിൽ എല്ലാക്കാര്യത്തിലും സൂക്ഷ്മത വേണം. ക്ഷോഭവാസനകളെ നിയന്ത്രിക്കേണ്ടതുണ്ട്.

കാർത്തിക

ചുമതലകൾ ഭംഗിയായി നിർവഹിക്കും. സ്വന്തം തൊഴിൽ നേർവഴിക്ക് തന്നെയാണ് നീങ്ങുന്നത് എന്ന തോന്നൽ ഉണ്ടാവും. സർക്കാരിൽ നിന്നും ലഭിക്കേണ്ട അനുമതി / ലൈസൻസ് ഇവ ലഭിക്കുന്നതാണ്. നക്ഷത്രനാഥനായ ആദിത്യന് വാരമധ്യം മുതൽ നീചം, പാപയോഗം ഇവ വരുന്നു. അതിനാൽ ചിലരുടെ ദുഷ്പ്രേരണകൾക്ക് വഴിപ്പെടാം. ആരുടെയെങ്കിലും ഉപദേശം ചെവിക്കൊള്ളുന്നതിന് മുൻപ് അവയുടെ ശരിതെറ്റുകൾ സ്വയം വിലയിരുത്തുന്നത് ഗുണകരമാവും.

രോഹിണി

കാര്യതടസ്സം, തൊഴിൽ പ്രശ്നങ്ങൾ, അനാരോഗ്യം എന്നിവയാൽ വിഷമിച്ചവർക്ക് ഭേദപ്പെട്ട സമയം തുടങ്ങുകയാണ്. അധികാരികളുടെ അംഗീകാരം ലഭിക്കും. സഹപ്രവർത്തകരിൽ അസൂയ ഉണ്ടാക്കുന്ന പുതിയ ചുമതലകൾ വന്നുചേരുന്നതാണ്. പൊതുപ്രവർത്തകർക്ക് ജനങ്ങളുടെ അംഗീകാരം ലഭിക്കും. ഗവേഷണത്തിൽ നവോന്മേഷം കൈവരും. കച്ചവടത്തിൽ നിന്നും ധനവരവ് ഉയരുന്നതാണ്. പുതുവായ്പകൾക്കുള്ള ശ്രമം വിജയിക്കാം. വാരാന്ത്യത്തിൽ മനോവാക്കർമ്മങ്ങളിൽ നല്ലശ്രദ്ധ വേണ്ടതുണ്ട്.

മകയിരം

ഇടവക്കൂറുകാർക്ക് എതിർപ്പുകളെ പ്രതിരോധിക്കാനാവും. മനസ്സിന് സ്വസ്ഥതയുണ്ടാവാം. ജോലിസ്ഥലത്തുണ്ടായിരുന്ന സമ്മർദ്ദം കുറയുന്നതാണ്. മക്കളുടെ ഉപരിപഠന കാര്യത്തിലെ ആശങ്കകൾ ഒഴിഞ്ഞേക്കും. മിഥുനക്കൂറുകാർ അനാവശ്യ കാര്യങ്ങൾ ആലോചിച്ച് കൂട്ടും. തീരുമാനങ്ങൾ കൈക്കൊള്ളാൻ വിഷമിച്ചേക്കാം. ഉപദേശം കേൾക്കാത്തതിനാൽ മക്കളോട് നീരസം ഉണ്ടാവുന്നതാണ്. ചന്ദ്രന് പക്ഷബലം ഉണ്ടാവുകയാൽ വാരാന്ത്യത്തിൽ മനസ്സന്തോഷം, തരക്കേടില്ലാത്ത ആദായം, ദാമ്പത്യസൗഖ്യം തുടങ്ങിയവ പ്രതീക്ഷിക്കാം.

തിരുവാതിര

സാമ്പത്തികമായി മുറുക്കമുള്ള വാരമാണ്. ബിസിനസ്സിന്റെ സുഗമതയ്ക്ക് ചില തടസ്സങ്ങൾ ഉണ്ടാവാം. ഉല്പന്നങ്ങൾ ഉപഭോക്താക്കളിൽ എത്തിക്കുന്നതിൽ കൂടുതൽ ശ്രദ്ധയുണ്ടാവേണ്ട സന്ദർഭമാണ്. ഉദ്യോഗസ്ഥർ ജോലിയിലെ സമ്മർദ്ദം മൂലം നിലവിലെ തൊഴിൽ ഉപേക്ഷിച്ചാലോ എന്നു വിചാരിക്കും. കുടുംബത്തിന്റെ സപ്പോർട്ട് സമാശ്വാസമേകും. ബുധനാഴ്ച മുതൽ ചില മെച്ചങ്ങൾ പ്രതീക്ഷിക്കാം. ധനപരമായി ഉയർച്ചയുണ്ടാകും.

പുണർതം

നക്ഷത്രനാഥനായ വ്യാഴത്തിന് വക്രഗതി, കൂറിന്റെ അധിപനായ ബുധന് മൗഢ്യം എന്നിവ ഉള്ളതിനാൽ ഗ്രഹാനുകൂല്യം കുറവാണ്. സുലഭമായി നേടുന്ന വസ്തുക്കൾ ദുർലഭമായിത്തീരാം. ശത്രുക്കളുടെ പ്രവർത്തനങ്ങളെ തിരിച്ചറിയുമെങ്കിലും പ്രതിരോധം വിഷമകരമാവും. വാരമധ്യം മുതൽ സാമ്പത്തിക സ്ഥിതി മെച്ചപ്പെടാം. പഠനത്തിലെ ആലസ്യം നീങ്ങുന്നതാണ്. ബുദ്ധിപരമായ ഉണർവ്വ് ഉണ്ടാവാം. സുഹൃത്തുക്കളുടെ പിന്തുണ മനക്കരുത്തേകും. വായ്പകൾ ഭാഗികമായി തിരിച്ചടക്കാൻ ശ്രമം തുടരുന്നതാണ്. ആരോഗ്യപരമായി നല്ല ശ്രദ്ധ വേണ്ടതുണ്ട്.

പൂയം

രാശിനാഥനായ ചന്ദ്രന്റെ വെളുത്ത പക്ഷത്തിലെ പ്രയാണം പ്രശ്നങ്ങളുടെ പരിഹാരത്തിലേക്ക് നയിക്കും. മണ്ണിൽ ചവിട്ടി നിന്നുകൊണ്ടു തന്നെ സ്വപ്നം കാണും. വാരാദ്യത്തിൽ സുഹൃൽസമാഗമം, ബന്ധുഗൃഹസന്ദർശനം ഇവയുണ്ടാവാം. അമ്മയുടെ ആരോഗ്യകാര്യത്തിൽ അലംഭാവമരുത്. വാഗ്ദാനങ്ങൾ നിറവേറുന്നതിൽ വിജയിക്കുന്നതാണ്. യാത്രകൾ ഉണ്ടായേക്കും. പ്രണയികൾക്ക് അത്ര നല്ലവാരമാണെന്ന് പറഞ്ഞുകൂടാ. ഭൂമിയിന്മേലുള്ള തർക്കം വ്യവഹാരമാകാനുള്ള സാധ്യത കാണുന്നു.

ആയില്യം

സമ്മിശ്രമായ അനുഭവങ്ങൾ പ്രതീക്ഷിക്കാം. സുഹൃത്തുക്കൾക്കായി കൂടുതൽ സമയം നീക്കിവെച്ചേക്കും. ഗാർഹിക കാര്യങ്ങൾ നിർവഹിക്കാനും മറ്റും കുറെ ഊർജ്ജം ചെലവാകും. വിദ്യാഭ്യാസത്തിൽ പുരോഗതി ദൃശ്യമാകും. ശാസ്ത്രീയ അന്വേഷണത്തിൽ മുഴുകുന്നതാണ്.
നവമാധ്യമങ്ങളിൽ സജീവമായ ഇടപെടൽ നടത്തും. കർമ്മരംഗത്ത് ഉദാസീനത ഉണ്ടായേക്കാം. ഏൽപ്പിക്കപ്പെട്ട ദൗത്യങ്ങൾ സമയബന്ധിതമായി പൂർത്തീകരിച്ചേക്കില്ല.

മകം

ചില സഹായ വാഗ്ദാനങ്ങൾ ഇപ്പോൾ അനുഭവത്തിൽ വരും. ദുർഘടങ്ങളെ നേരിടാൻ കരുത്തുണ്ടാകും. സഹോദരരുമായി വീണ്ടും ഇണങ്ങും. കുടുംബവിഷയങ്ങൾ ചർച്ച ചെയ്ത് കൂട്ടായ തീരുമാനത്തിലെത്തും. സ്വന്തം ബിസിനസ്സിൽ പങ്കാളികളെ ചേർക്കുന്ന കാര്യം സജീവ പരിഗണനയിലെത്തും. ഭൂമി വില്പനയിൽ വിചാരിച്ചത്രയല്ലെങ്കിലും ലാഭം ഉണ്ടാകുന്നതാണ്. മക്കളുടെ ഉപരിപഠനം, ജോലി, വിവാഹം തുടങ്ങിയ കാര്യങ്ങളിൽ ചില ആശയക്കുഴപ്പങ്ങൾ വരാം. വാരാന്ത്യത്തിൽ മനസ്സിന്റെ പ്രവർത്തനം മന്ദഗതിയിലാവും. നിരുന്മേഷത വരാം.

പൂരം

സാമ്പത്തിക കാര്യങ്ങളിൽ നല്ല അച്ചടക്കം ആവശ്യമാണ്. വിദ്യാർത്ഥികൾക്ക് പഠനത്തിൽ താത്പര്യം കുറയും. കുടുംബത്തിലെ ഇളമുറക്കാരും മുതിർന്നവരുമായി മാനസിക ഐക്യം ദുർബലമാകാം. തൊഴിലിൽ സ്ഥാനക്കയറ്റത്തിനായുള്ള ശ്രമങ്ങൾ വിജയിച്ചേക്കില്ല. ആത്മീയ കാര്യങ്ങളിൽ ശ്രദ്ധയുണ്ടാകും. ബന്ധുക്കളുടെ പിന്തുണ ഉറപ്പിക്കാനാവില്ല. വാരാന്ത്യത്തിൽ സ്ഥിതി പൊതുവേ മെച്ചപ്പെടുന്നതായി തോന്നാം.

ഉത്രം

നക്ഷത്രനാഥനായ സൂര്യന് ചൊവ്വ, കേതു എന്നീ പാപഗ്രഹങ്ങളുമായി ബന്ധം വരികയാൽ ദുഷ്പ്രേരണകൾ ഉണ്ടാവാം. കൂട്ടുകെട്ടുകൾ സ്വഭാവത്തിന് ചേർന്നതാവണമെന്നില്ല. അനാവശ്യ വിവാദങ്ങളിൽ നിന്നും അകന്നു നിൽക്കുകയാവും ഉത്തമം. കച്ചവടം നടത്തുന്നവർക്ക് പ്രതീക്ഷിച്ചിടത്തോളം വരുമാനം വന്നുചേരാനിടയില്ല. ഉദ്യോഗത്തിലിരിക്കുന്നവർക്ക് വെല്ലുവിളികളാവുന്ന ചുമതലകൾ ഏറ്റെടുക്കേണ്ടി വന്നേക്കും. കുടുംബസമേതമുള്ള തീർത്ഥാടനത്തിന് തയ്യാറെടുപ്പുകൾ നടത്തും.

അത്തം

ഗ്രഹപ്പിഴകൾ തുടരുന്ന കാലമാകയാൽ സാഹസങ്ങൾക്ക് മുതിരരുത്. മനക്ലേശം തുടരാം. ഉദ്യമങ്ങളിൽ നേട്ടം ഒച്ചിനെപ്പോലെ ഇഴഞ്ഞെന്നുവരാം. ബുദ്ധിപരമായ ഉണർവ്വ് പ്രതിസന്ധികളെ തരണം ചെയ്യുന്നതിൽ വലിയ തോതിൽ സഹായകമാവും. ബുധൻ, വ്യാഴം ദിവസങ്ങളിൽ സാമ്പത്തിക മേന്മയുണ്ടാവുന്നതാണ്. സുഹൃത്തുക്കളുടെയും ബന്ധുക്കളുടെയും പിന്തുണ പുതിയ ഊർജ്ജമേകും. വിദ്യാഭ്യാസ കാര്യങ്ങളിൽ ശുഷ്കാന്തി കുറയുന്നതാണ്.

ചിത്തിര

പാപഗ്രഹങ്ങൾ ജന്മനക്ഷത്രത്തിലൂടെ സഞ്ചരിക്കുന്ന കാലമാണ്. വ്യക്തിത്വത്തിന്റെ സന്തുലിതത്വം നഷ്ടമാകാം. ക്ഷോഭം അധികരിച്ചേക്കാം. ചെറിയ കാര്യങ്ങളെ വലുതാക്കുന്ന പ്രവണത ദോഷമുണ്ടാക്കും. ചെലവ് അധികരിക്കുന്നത് നിയന്ത്രിക്കേണ്ടതാണ്. കുടുംബജീവിതത്തിൽ സുഖവും സ്വൈരവും കുറയാനിടയുണ്ട്. ചെറുകരാറുകൾ ഉറപ്പിച്ചു കിട്ടാം. വസ്തുകച്ചവടത്തിൽ കരുതിയ ലാഭം ഉണ്ടായേക്കില്ല. തിടുക്കവും ഉൽക്കണ്ഠയും കുറയ്ക്കുന്നത് നന്നായിരിക്കില്ല.

ചോതി

അപ്രതീക്ഷിത യാത്രകളുണ്ടാവാം. ദേഹത്തിന് ആയാസവും ആരോഗ്യപ്രശ്നങ്ങളും വരാം. വേണ്ടാത്ത കാര്യങ്ങൾക്കായി വീറും വാശിയും കാട്ടും. ഭൗതിക നേട്ടങ്ങൾ നാമമാത്രമായിട്ടാവും അനുഭവത്തിൽ വരിക. വിദ്യാർത്ഥികൾ, ഗവേഷകർ എന്നിവർക്ക് ഈ ആഴ്ച പഠനത്തിൽ മുഴുകാൻ കഴിഞ്ഞേക്കില്ല. വ്യാപാരത്തിൽ ചെറിയ നേട്ടം പ്രതീക്ഷിക്കാം. പതിനൊന്നിൽ ശുക്രൻ ഉള്ളതിനാൽ ഭോഗവും ഭോജ്യസുഖവും ഉണ്ടായേക്കാം. കലാകാരന്മാർക്ക് പുതിയ അവസരങ്ങൾ തുറന്നുകിട്ടുന്നതാണ്.

വിശാഖം

മനസ്സ് പല കാര്യങ്ങളിലേക്ക് പായും. ബഹുകാര്യങ്ങൾ ഏറ്റെടുക്കും. പക്ഷേ വാരാന്ത്യത്തിൽ വാഗ്ദാനങ്ങൾ ഒന്നും പൂർത്തിയാക്കാൻ കഴിയില്ല എന്നതാവും വൈപരീത്യം. കർമ്മരംഗം നവീകരിക്കാൻ വായ്പാ സഹായം തേടും. സർക്കാർ / ബാങ്ക്/ രാഷ്ട്രീയം എന്നിവയുമായി ബന്ധപ്പെട്ട കാര്യങ്ങളിൽ അനുകൂലത ഉണ്ടാവുക എളുപ്പമാവില്ല. സാഹചര്യങ്ങളുടെ സമ്മർദ്ദത്താൽ അകർമ്മണ്യതയിലേക്ക് നീങ്ങുക എന്നതും ഒരു സാധ്യതയാണ്. കലാകാരന്മാർക്ക് ചില നേട്ടങ്ങൾ ഉണ്ടാവും.

അനിഴം

വാരാദ്യത്തിൽ നല്ല അനുഭവങ്ങൾ ഉണ്ടാവും. വിശിഷ്ട വ്യക്തിത്വങ്ങളുമായി പരിചയപ്പെടും. മുൻപ് നടന്ന മത്സരങ്ങളിൽ അനുകൂല വിധി വന്നുചേരും. ഉപരിപഠനത്തിന് അന്യനാട്ടിലെ കലാശാലകളിൽ അനുമതി ലഭിക്കുന്നതാണ്. ഉദ്യോഗസ്ഥർക്ക് ചില സങ്കീർണ്ണമായ ചുമതലകൾ ഏറ്റെടുക്കേണ്ടി വരാം. ദിനചര്യകൾക്ക് നേരനീക്കം വരുന്നതാണ്. പണമിടപാടുകളിൽ കണക്ക് സൂക്ഷിക്കാൻ മറക്കരുത്. കച്ചവട സ്ഥാപനം സൗന്ദര്യവൽക്കരിക്കാൻ ശ്രമം തുടങ്ങും. പാചകനൈപുണ്യം അതിഥികളുടെ പ്രശംസ നേടും.

തൃക്കേട്ട

പതിവിലധികം നേരം ഓഫീസ് കാര്യങ്ങൾക്കായി ചെലവഴിക്കപ്പെട്ടേക്കും. ഉയർന്ന അധികാരികളുമായി ഔദ്യോഗിക യാത്രകൾ വേണ്ടി വരാം. മക്കളുടെ പ്രൊഫഷണൽ വിദ്യാഭ്യാസത്തിലെ തടസ്സങ്ങൾ നീങ്ങുന്നതാണ്. സാമ്പത്തിക ഞെരുക്കം ആഴ്ചയുടെ രണ്ടാം പകുതി മുതൽ കൂടുവാൻ സാധ്യതയുണ്ട്. ചൊവ്വയും കേതുവും പന്ത്രണ്ടാം ഭാവത്തിൽ തുടരുകയാൽ പൊതുവേ മാനസിക ക്ലേശമേറുന്നതാണ്. പാദരോഗങ്ങൾ വിഷമിപ്പിച്ചേക്കാം. കലഹ പ്രേരണകളിൽ നിന്നും ഒഴിഞ്ഞു നിൽക്കുകയാവും ഉചിതം. ആരോഗ്യ കാര്യങ്ങളിൽ അലംഭാവം അരുത്.

മൂലം

സ്വയം തൊഴിൽ ചെയ്യുന്നവർക്ക് മനസ്സന്തോഷം, ആദായവർദ്ധനവ് എന്നിവ ഭവിക്കും. ഐ.ടി. മേഖലയിലുള്ളവർക്ക് പുതിയ അവസരങ്ങൾ ലഭിച്ചേക്കാം. പ്രോജക്ടുകളുടെ നവീനത അഭിനന്ദിക്കപ്പെടാം. എതിർപ്പുകളെ കൃത്യമായി പ്രതിരോധിക്കുവാനാവുന്നതാണ്. യാത്രകൾ കൊണ്ട് നേട്ടങ്ങൾ ഉണ്ടാവും. കരാറുകൾ അനുകൂലമാം വിധം ഉറപ്പിക്കാൻ കഴിഞ്ഞേക്കും. കുടുംബാംഗങ്ങൾ പിന്തുണയുമായി ഒപ്പമുണ്ടാവും. ആരോഗ്യപരിശോധനകൾ ആശ്വാസമേകുന്നതാണ്.

പൂരാടം

പുതിയ സുഹൃത്തുക്കളെ ലഭിക്കും. കൂട്ടുകച്ചവടം ലാഭകരമാവുന്നതാണ്. വ്യാപാരത്തിൽ നവീന സാങ്കേതികവിദ്യകൾ പ്രയോജനപ്പെടുത്തും. ഉദ്യോഗസ്ഥർക്ക് അധികാരം വർദ്ധിക്കുന്നതാണ്. സഹപ്രവർത്തകരുടെ മുഴുവൻ പിന്തുണയും പ്രതീക്ഷിക്കാം. കുടുംബ ബന്ധങ്ങൾ കൂടുതൽ ഊഷ്മളമാവും. മക്കളുടെ ശ്രേയസ്സ് സന്തോഷമേകുന്നതാണ്. കലാകായിക മത്സരങ്ങളിൽ വിജയിക്കാനാവും. പണവരവ് പ്രതീക്ഷിച്ചതിലും കൂടാം. ബുധൻ, വ്യാഴം ദിവസങ്ങളിൽ ചെലവ് വർദ്ധിച്ചേക്കാം.

ഉത്രാടം

കഷ്ടങ്ങളെ ഭാഗികമായി മറികടക്കാൻ കഴിയും. ദുരിതങ്ങളുടെ കാരണം കണ്ടെത്താനാവുമെന്നതാണ് മുഖ്യം. കച്ചവട പുരോഗതിക്കായി വിദഗ്‌ദ്ധരുടെ സേവനം പ്രയോജനപ്പെടുത്തും. വായ്പാ തിരിച്ചടവ് ഭാഗികമായി അടയ്ക്കാൻ വഴി തേടുന്നതാണ്. കുടുംബാംഗങ്ങളുടെ സർവ്വാത്മനാ ഉള്ള പിന്തുണ കരുത്തേകും. കിടപ്പ് രോഗികൾക്ക് ആശ്വാസം ഉണ്ടാവുന്നതാണ്. മക്കളുടെ വിവാഹകാര്യത്തിൽ നല്ല തീരുമാനം ഭവിക്കാം. വെള്ളി, ശനി ദിവസങ്ങളിൽ അലച്ചിൽ വരാം.

തിരുവോണം

നല്ലകാര്യങ്ങൾ അനുകൂലമാവുന്ന വാരമാണ്. കർമ്മരംഗം പുഷ്ടിപ്പെടും. അഭിവൃദ്ധിക്കാവശ്യമായ മുന്നൊരുക്കങ്ങൾ നടത്തുവാൻ സന്നദ്ധത വന്നുചേരും. ഗൃഹത്തിൽ മംഗളകർമ്മങ്ങൾ നടക്കാം. വിദ്യാർത്ഥികൾക്ക് പഠനത്തിൽ ഏകാഗ്രതയുണ്ടാവുന്നതാണ്. കലാകായികമത്സരങ്ങളിൽ വിജയിക്കുവാൻ സാധിക്കും. പൊതുപ്രവർത്തകർക്ക് ആത്മവിശ്വാസം ഉയരും. വിദേശത്ത് പഠനം / തൊഴിൽ ഇവയ്ക്കുള്ള ശ്രമം വിജയം കാണുന്നതാണ്. വാരാവസാനത്തിൽ ചില മനക്ലേശങ്ങൾ ഉണ്ടായെന്നുവരാം.

അവിട്ടം

ചന്ദ്രസഞ്ചാരം ഒട്ടൊക്കെ അനുകൂല രാശികളിലാവുകയാൽ മനസ്സന്തോഷവും ആത്മസംതൃപ്തിയും ഉണ്ടാവും. മുൻപ് ചെയ്ത ജോലികൾക്ക് ഉചിതമായ പ്രതിഫലം കിട്ടുന്നതാണ്. തൊഴിൽ മേഖലയിൽ ഉണർവ്വ് ഉണ്ടാവും. പുതിയ ഉല്പന്നങ്ങൾ കച്ചവടം ചെയ്യാനുള്ള കരാറുകൾ നേടുവാനാവും. ഉദ്യോഗസ്ഥർക്കും പ്രതീക്ഷയുള്ള കാലമാണ്. അധികാരമുള്ള ചുമതലകൾ വന്നുചേരാം. സഹപ്രവർത്തകരുടെ ആലോചനാ യോഗങ്ങളിൽ നന്നായി കാര്യങ്ങൾ അവതരിപ്പിച്ച് സംസാരിക്കാൻ സാധിക്കുന്നതാണ്. ഉപാസനകൾ മുടങ്ങില്ല. ക്ഷേത്രാടനങ്ങൾക്ക് സമയം കണ്ടെത്തുവാൻ കഴിയുന്നതാണ്.

ചതയം

ഗുണപ്രദമായ വാരമാണ്. ലക്ഷ്യം നേടാനാവും. തടസ്സങ്ങൾ നീക്കാൻ സ്ഥൈര്യം പുലർത്തും. കുടുംബകാര്യങ്ങളിൽ യോജിച്ച തീരുമാനമുണ്ടാവും. ശുഭവാർത്തകൾ തേടി വരുന്നതാണ്. സ്വന്തം ഇഷ്ടാനിഷ്ടങ്ങൾ ശക്തമായി പ്രകടിപ്പിക്കുന്നതിനാൽ ബന്ധുക്കൾക്ക് നീരസം തോന്നാം. ഇതേ കാരണത്താൽ സഹപ്രവർത്തകരും അകലം പുലർത്തിയേക്കും. സാമ്പത്തികമായി നേട്ടങ്ങൾ പ്രതീക്ഷിക്കാം. പാരിതോഷികങ്ങൾ ലഭിച്ചേക്കാം.

പൂരൂരുട്ടാതി

ഭൂമിയിൽ നിന്നും ആദായമുണ്ടാകും. സുഹൃത്തുക്കളുടെ സഹകരണത്തോടെ പുതിയ പ്രവർത്തനങ്ങൾക്ക് തുടക്കം കുറിക്കും. വലിയ മുതൽ മുടക്കുകൾക്ക് മുതിരാതിരിക്കുകയാവും അഭികാമ്യം. പഠന ഗവേഷണാദികളിൽ പ്രതീക്ഷിച്ച മുന്നേറ്റമുണ്ടാക്കാനായേക്കും. കലാകായികമത്സരങ്ങളിൽ വിജയിക്കാൻ സാധിക്കുന്നതാണ്. ഗൃഹനിർമ്മാണത്തിന്റെ രൂപരേഖ തയ്യാറാവും. അവധിക്കാലത്ത് സകുടുംബം വിനോദയാത്രയ്ക്ക് വേണ്ട തയ്യാറെടുപ്പുകൾ നടത്തും. ജീവിതശൈലീരോഗങ്ങൾ കുറച്ചൊന്ന് ക്ലേശിപ്പിക്കാം.

ഉത്രട്ടാതി

ഞായർ, തിങ്കൾ ദിവസങ്ങൾക്ക് ഗുണം കുറയും. അഷ്ടമരാശിയാകയാൽ മനോവാക്കർമ്മങ്ങളിൽ ശ്രദ്ധ വേണം. കടബാധ്യതകൾ വിഷമിപ്പിക്കാനിടയുണ്ട്. പ്രതീക്ഷിച്ച വാഗ്ദാനങ്ങൾ നിറവേറപ്പെടണം എന്നില്ല. ഒപ്പം മറ്റുള്ളവർക്ക് നൽകിയ വാക്കുറപ്പും പാലിക്കാൻ ക്ലേശിക്കും. ചെറിയ ആവശ്യങ്ങൾ നടന്നുകൂടും. സന്താനങ്ങൾ മത്സരങ്ങളിൽ വിജയിക്കുന്നതാണ്. നവീനസാങ്കേതിക വിദ്യ പഠിക്കാൻ താല്പര്യമുണ്ടാകും. വാരാന്ത്യത്തിൽ കൂടുതൽ സൽഫലം വന്നെത്തുന്നതാണ്.

രേവതി

വാരത്തിന്റെ തുടക്കത്തിൽ ചില തിരിച്ചടികൾ വിഷമിപ്പിക്കാം. പണം കൈമോശം വന്നേക്കാം. നടക്കും എന്ന് കരുതിയവ അവസാന നിമിഷം വഴുതിമാറാം. അനാവശ്യ കാര്യങ്ങളിൽ തലയിട്ട് പുലിവാൽ പിടിക്കാതിരിക്കാനും ശ്രദ്ധിക്കണം. ചൊവ്വാഴ്ച മുതൽ ഭേദപ്പെട്ട ഫലങ്ങൾ പ്രതീക്ഷിക്കാവുന്നതാണ്. വേണ്ടപ്പെട്ടവരുടെ പിണക്കം തീർന്നേക്കും. ദാമ്പത്യത്തിൽ വീണ്ടും സ്വരലയം ഉണ്ടാകാം. ന്യായമായ ആവശ്യങ്ങൾ നടന്നുകിട്ടും. ഉന്നതരുടെ സഹകരണം കാര്യസാധ്യത്തിന് ഉതകുന്നതായിരിക്കും.