October 1-7, 2023: വാരഫലം, അശ്വതി മുതൽ രേവതി വരെ: Weekly Horoscope, Astrological Predictions

October 01- October 07, 2023: Weekly Horoscope Astrological Predictions Aswathi to Revathi: സൂര്യൻ കന്നിരാശിയിൽ അത്തം ഞാറ്റുവേലയിൽ. ചന്ദ്രൻ കൃഷ്ണ പക്ഷ ദ്വിതീയ മുതൽ നവമി വരെയുള്ള തിഥികളിലും അശ്വതി മുതൽ പുണർതം വരെയുള്ള നക്ഷത്രങ്ങളിലുമാണ്. ഒക്ടോബർ 1 ന് ശുകൻ ചിങ്ങം രാശിയിലേക്കും മൂന്നിന് ചൊവ്വ തുലാം രാശിയിലേക്കും ബുധൻ കന്നി രാശിയിലേക്കും സംക്രമിക്കുന്നു. ബുധന്റെ ഉച്ചരാശിയാണ് കന്നി. ബുധന് മൗഢ്യവും ഉണ്ട്.

കുംഭം രാശിയിൽ ശനിയും മേടം രാശിയിൽ വ്യാഴവും വക്രസഞ്ചാരത്തിലാണ്. രാഹുവും കേതുവും യഥാക്രമം മേടം-തുലാം രാശികളിൽ അപസവ്യഗതി തുടരുന്നു.

ഒക്ടോബർ 1, 2 തീയതികളിൽ കന്നിക്കൂറുകാർക്കും 3, 4 തീയതികളിൽ തുലാക്കൂറുകാർക്കും 5, 6 തീയതികളിൽ വൃശ്ചികക്കൂറുകാർക്കും ഏഴാം തീയതിയിൽ തുടങ്ങി അടുത്തവാരാദ്യം വരെ ധനുക്കൂറുകാർക്കും ചന്ദ്രാഷ്ടമം അഥവാ അഷ്ടമരാശിക്കൂറാണ്. അവരവരുടെ ജനിച്ച കൂറിന്റെ എട്ടാം രാശിയിൽ ചന്ദ്രൻ സഞ്ചരിക്കുന്ന രണ്ടേകാൽ ദിവസങ്ങളാണ് അഷ്ടമരാശിക്കൂറ്. പ്രായേണ ദോഷഫലങ്ങൾക്കും കർമ്മവിഘ്നത്തിനും ഇടവരാം. ജാഗ്രത പുലർത്തേണ്ട ദിവസങ്ങളാണവ.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള നക്ഷത്രക്കാരുടെ വാരഫലം പരിശോധിക്കാം.

അശ്വതി

വാരാദ്യം മനസ്സന്തോഷം ഉണ്ടാകുന്നതാണ്. ക്ഷേത്ര ദർശനം നടത്തും. ബന്ധുസമാഗമം ഉണ്ടാവും. വിശിഷ്ട ഭോജ്യങ്ങൾ ഇവ ലഭിക്കാനിടയുണ്ട്. കൂട്ടുകാരുമൊത്ത് വിനോദനിമിഷങ്ങൾ ചെലവഴിക്കാനവസരം കൈവരും. വരവ് മോശമാകില്ല. ഏഴിലേക്ക് ചൊവ്വ വരുന്നതിനാൽ ദാമ്പത്യത്തിൽ ചില പൊരുത്തക്കേടുകൾ അനുഭവപ്പെടാം. മുഖരോഗങ്ങൾ ഒരു സാധ്യതയാണ്. ആറാം ഭാവത്തിൽ സഞ്ചരിക്കുന്ന ആദിത്യൻ ക്ലേശങ്ങളിൽ നിന്നും രക്ഷയേകും. ബുധൻ പഠിത്തത്തിൽ ഉയർച്ചയുണ്ടാക്കുന്നതാണ്.

ഭരണി

ആത്മവിശ്വാസം ഉയരുന്നതാണ്. കാര്യങ്ങൾ വരുതിയിലാവും. ദുഷ്കരങ്ങളായ എന്ന് തോന്നിയവ പോലും സുകരമായേക്കും. വിദ്യാഭ്യാസത്തിലെ തടസ്സങ്ങൾ നീങ്ങുന്നതാണ്. പ്രതിസന്ധികളെയും പ്രശ്നങ്ങളേയും ബൗദ്ധികശക്തിയാൽ മറികടക്കും. സർക്കാർ സംബന്ധിച്ച കാര്യങ്ങളിൽ പുരോഗതിയും നേട്ടവുമുണ്ടാകും. സാമ്പത്തികസ്ഥിതി മോശമാവില്ല. പ്രണയികൾക്ക് ഇച്ഛാഭംഗം ഭവിക്കാം. ഭാര്യാഭർത്താക്കന്മാർക്കിടയിൽ തർക്കങ്ങൾ ഉടലെടുത്തേക്കും.

കാർത്തിക

വാരാരംഭം ശുഭകരമാവും. പ്രതീക്ഷിച്ചിരുന്ന വസ്തുക്കൾ കൈവശം വന്നുചേർന്നേക്കും. ആശയ വിനിമയം സുഖകരമാകുന്നതാണ്. പ്രസംഗം, സംവാദം എന്നിവയിൽ തിളങ്ങാനാവും. പണവരവ് ഉയരുന്നതാണ്. കിട്ടാക്കടങ്ങൾ വസൂലാക്കാൻ ശ്രമം തുടങ്ങും. ചെറുപ്പക്കാരുടെ വിവാഹകാര്യത്തിൽ തടസ്സങ്ങൾ അനുഭവപ്പെടുന്നതായിരിക്കും. അപ്രതീക്ഷിത യാത്രകൾ വേണ്ടിവന്നേക്കും.

രോഹിണി

ഞായർ, തിങ്കൾ, വ്യാഴം ദിവസങ്ങൾക്ക് മേന്മ കുറയും. ഈ ദിവസങ്ങളിൽ അലർജി, ഉദരരോഗം ഇവ ക്ലേശിപ്പിക്കാം. വരവിനെക്കാൾ ചെലവേറുകയും ചെയ്യും. മറ്റു ദിവസങ്ങളിൽ കർമ്മഗുണം പ്രതീക്ഷിക്കാം. സ്വന്തം തൊഴിലിൽ നിന്നും ലാഭമുണ്ടാകും. ഉപഭോക്താക്കളുടെ ആവശ്യങ്ങൾ മനസ്സിലാക്കി പ്രവർത്തിക്കും. കുടുംബാംഗങ്ങളുടെ പൂർണ്ണ പിന്തുണ ലഭിക്കുന്നതാണ്. ഉദ്യോഗസ്ഥർക്കും ജോലിയിൽ സംതൃപ്തി അനുഭവപ്പെടും. എതിർപ്പുകളെയും വിയോജിപ്പുകളെയും യുക്തിസഹമായ വാക്ചാതുര്യത്താൽ പരാജയപ്പെടുത്തുവാൻ സാധിക്കുന്നതാണ്.

മകയിരം

ഗുണവും ദോഷവും സമ്മിശ്രമായി അനുഭവപ്പെടുന്ന ആഴ്ചയാണ്. ആരംഭത്തിൽ ചെലവ് കൂടും. അനിഷ്ട വാർത്തകൾ കേൾക്കും.
ആഴ്ചയുടെ മധ്യത്തിലെ ദിവസങ്ങൾക്കാവും മേന്മ കൂടുതൽ. സ്വാദിഷ്ഠ ഭക്ഷണം കഴിക്കാനും ഇഷ്ടജനങ്ങളുമായി ഒത്തുകൂടാനും സാധിക്കും. പൊതുവേ വിദ്യാർത്ഥികൾക്ക് ഏകാഗ്രതയും പഠനമികവും കൈവരിക്കാനാവും. വിരോധികളുടെ പ്രവർത്തനങ്ങൾ മുൻകൂട്ടി കാണാനും പ്രതിരോധിക്കാനും സാധിച്ചേക്കും. വാഹനം / വീട് മോടിപിടിപ്പിക്കാൻ ചെലവുണ്ടാകും.

തിരുവാതിര

നല്ലതുടക്കം കിട്ടുന്ന ആഴ്ചയാണ്. ഉണർവും ഉന്മേഷവും ഭവിക്കും. കർമ്മരംഗത്തും വ്യക്തിജീവിതത്തിലും സ്വാധികാരം മേൽക്കൈ നേടും. ധനവരവ് ശരിയായ പാതയിലാവും. മറ്റു ദിവസങ്ങളിലും ആ രീതി തുടരപ്പെടുമെങ്കിലും ആ ആയത്തിൽ തന്നെ മുന്നേറാൻ മാനസികവും ബൗദ്ധികവുമായ അദ്ധ്വാനം വേണ്ടിവരും. സഹപ്രവർത്തകർ, കൂട്ടുകാർ, വീട്ടുകാർ ഇവരുടെ മേൽ സ്നേഹസമ്മർദ്ദം ചെലുത്തേണ്ട സ്ഥിതി ഉണ്ടാവുന്നതാണ്.

പുണർതം

വിജയസാഹചര്യം എപ്പോഴും ഉണ്ടാവണമെന്നില്ല. ഇപ്പോൾ ഗ്രഹങ്ങളുടെ ആനുകൂല്യം ഉള്ളതിനാൽ ആലസ്യം ഒഴിവാക്കി മുന്നോട്ട് കുതിക്കാൻ സന്നദ്ധത വേണ്ടതുണ്ട്. പണവരവ് മോശമാവില്ല. വായ്പാ സൗകര്യം ലഭിക്കുന്നതാണ്. തൊഴിൽ രംഗം ഉന്മേഷകരമായിരിക്കും. ആസൂത്രണമികവും കർമ്മശക്തിയും ഒരുമിപ്പിക്കണം. മിഥുനക്കൂറുകാർക്ക് അഞ്ചാം ഭാവത്തിൽ കുജ-കേതു യോഗം ഉള്ളതിനാൽ ഉദരരോഗത്തിന് സാധ്യതയുണ്ട്.

പൂയം

മുടങ്ങിക്കിടന്ന കാര്യങ്ങൾ പൂർത്തീകരിക്കാനാവും. സ്ഥായിയായ നേട്ടങ്ങൾ ഉണ്ടാവും. കുത്തഴിഞ്ഞുകിടന്ന കാര്യങ്ങളിൽ അടുക്കും ചിട്ടയും ഏർപ്പെടുത്തും. ധനസ്ഥിതി ഉയർന്നേക്കും. പിതാവിന്റെ സ്വത്തുക്കൾ സംബന്ധിച്ച വ്യവഹാരത്തിൽ നല്ല തീർപ്പ് വന്നേക്കും. ഗൃഹനിർമ്മാണം ഇടക്കിടെ മുടങ്ങാം. വാരാന്ത്യത്തിൽ ചെലവുകൾ കൂടുന്നതാണ്. പ്രയോജനരഹിതമായ യാത്രകൾ വേണ്ടിവരാം.

ആയില്യം

നക്ഷത്രനാഥനായ ബുധന് ഉച്ചം വരികയാൽ അഭിമാനിക്കത്തക്ക കാര്യങ്ങൾ ചെയ്യും. ഇഴഞ്ഞുനീങ്ങിയ വിഷയങ്ങളിൽ വേഗത്തിലുള്ള തീരുമാനം കൈക്കൊണ്ടേക്കും. ഗണിതം, സാഹിത്യം, നിയമം, മാധ്യമം, വിനോദം തുടങ്ങിയ മേഖലകളിൽ പ്രവർത്തിക്കുന്നവർക്ക് അനുമോദനങ്ങൾ / അംഗീകാരം ലഭിക്കാം. ബന്ധുക്കളുടെ പ്രശ്നങ്ങളിൽ ഇടപെട്ട് അവയ്ക്ക് സമർത്ഥമായ പരിഹാരം കണ്ടെത്താനാവും. രാഷ്ട്രീയനേതാക്കൾക്ക് അണികൾക്കിടയിൽ പിന്തുണ ഏറുന്നതാണ്. ക്ഷോഭം നിയന്ത്രിക്കപ്പെടേണ്ടതുണ്ട്.

മകം

ഈയാഴ്ച നേട്ടങ്ങൾ തന്നെയാണ് അധികവും. ന്യായമായ ആഗ്രഹങ്ങൾ തടസ്സം കൂടാതെ നടന്നുകിട്ടും. സ്വന്തം തൊഴിലിനോട് അഭിമാനം തോന്നും. ആദായം വർദ്ധിക്കുന്നതാണ്. അലോസരങ്ങളൊന്നും തൊഴിലിടത്തെ ബാധിക്കുകയില്ല. കുടുംബ ജീവിതത്തിലും സംതൃപ്തിയുണ്ടാവും. ജന്മരാശിയിൽ ശുക്രൻ സഞ്ചരിക്കുന്നതിനാൽ സുഖഭോഗങ്ങൾ അനുഭവത്തിൽ വരാം. കലാപ്രവർത്തകർക്ക് പ്രതിഭാ വിലാസം തെളിയിക്കാൻ അവസരമുണ്ടാകാം.

പൂരം

വാക്ചാതുര്യം ശ്രദ്ധേയമാകും. പഠനം, ഗവേഷണം എന്നിവയിൽ ഏകാഗ്രതയുണ്ടാവുന്നതാണ്. എതിർചേരിയിലിരുന്ന വർ പോലും പിന്തുണക്കുന്ന സാഹചര്യം വന്നെത്തും. ന്യായമായ കാര്യങ്ങൾ ഭംഗിയായി നിർവഹിക്കാനാവശ്യമായ ധനം കൈവശമെത്തിച്ചേരും. പ്രണയികൾക്കിടയിൽ ഹൃദയൈക്യം ദൃഢമാകും. ദാമ്പത്യ ജീവിതത്തിൽ സുഖഭോഗങ്ങൾ വർദ്ധിക്കുന്നതാണ്. ആഢംബര വസ്തുക്കൾ പാരിതോഷികമായി ലഭിക്കാം.

ഉത്രം

തടസ്സങ്ങളെ തട്ടിനീക്കി മുന്നോട്ട് നീങ്ങാൻ സാഹചര്യം സഞ്ജാതമാകുന്നതാണ്. തൊഴിലിൽ പുരോഗതി ദൃശ്യമാകും. സാമ്പത്തിക കാര്യങ്ങളിൽ അനുഭവപ്പെട്ടിരുന്ന പിരിമുറുക്കം മാറുന്നതായിരിക്കും. അഭിമുഖങ്ങളിലും മത്സരങ്ങളിലും വിജയിക്കാൻ സാധിക്കുന്നതാണ്. ബന്ധുക്കളുടെ പിണക്കം അകലുകയും പിന്തുണയുമായി രംഗത്തെത്തുകയും ചെയ്യും. വാരാദ്യത്തിൽ കാര്യതടസ്സമോ ആരോഗ്യപ്രശ്നങ്ങളോ ഭവിക്കാം.

അത്തം

ഞായർ, തിങ്കൾ അഷ്ടമരാശിക്കൂറാകയാൽ കരുതൽ വേണ്ട ദിവസങ്ങളാണ്. ജന്മരാശിയിൽ ആദിത്യനും രണ്ടിൽ ചൊവ്വയും സഞ്ചരിക്കുകയാൽ ആരോഗ്യകാര്യങ്ങളിൽ കരുതലുണ്ടാവണം. പഠനം, ഗവേഷണം, ഗ്രന്ഥരചന, എന്നിവയ്ക്ക് സമയം കണ്ടെത്തുവാൻ സാധിക്കും. സദസ്സുകളിൽ പ്രസംഗിക്കാൻ അവസരം ലഭിച്ചേക്കാം. വീട്ടിൽ നിന്നും മാറി നിൽക്കേണ്ടി വരാം. ആദ്യം കയ്പും പിന്നെ മധുരവുമായി മാറും വിധമാവും ഈയാഴ്ചയിലെ അനുഭവങ്ങളെല്ലാം.

ചിത്തിര

വിനോദയാത്ര, ബിസിനസ്സ് ചർച്ചകൾ, കുടുംബ സംഗമം എന്നിവ സാധ്യതകൾ.
പഴയ തൊഴിൽ കരാറുകൾ പുതുക്കാൻ സാധിച്ചേക്കും. വിദ്യാർത്ഥികൾക്ക് കലാപഠനത്തിന് അവസരം സിദ്ധിക്കുന്നതാണ്. വ്യാപാരത്തിൽ ലാഭം കുറച്ചെങ്കിലും ഉയരാം. വ്യക്തിപരമായ ആവശ്യങ്ങൾക്ക് ചെലവധികരിക്കും. ചൊവ്വ ജന്മനക്ഷത്രത്തിലുടെ കടന്നുപോവുകയാൽ ആരോഗ്യകാര്യത്തിൽ ശ്രദ്ധ വേണം. തിങ്കൾ, ചൊവ്വ ദിവസങ്ങൾക്ക് മേന്മ കുറയാം.

ചോതി

വാരാദ്യം പ്രണയികളെ തേടി നല്ല വാർത്തയെത്തും. കുടുംബ ജീവിതത്തിലും സുഖവും സംതൃപ്തിയും ഉണ്ടാവും. സുഹൃത്തുക്കൾ മനസ്സറിഞ്ഞ് പ്രവൃത്തിക്കും. ആർത്ഥികമായ ക്ലേശങ്ങൾ കുറയാം. പൊതുവേ പറഞ്ഞാൽ ഭൗതികമായ നേട്ടങ്ങൾ അനുഭവിക്കാനാവും. പഠനത്തിൽ അലസതയുളള വിദ്യാർത്ഥികൾക്ക് ഏകാഗ്രതയുണ്ടാകുന്നതാണ്. നഷ്ടപ്പെട്ട പദവികളും സമൂഹത്തിന്റെ അംഗീകാരവും തിരികെ ലഭിക്കാം. ചൊവ്വ, ബുധൻ ദിവസങ്ങളിൽ അഷ്ടമരാശിക്കൂറ് ആകയാൽ ശുഭകാര്യങ്ങൾ തുടങ്ങരുത്. സാഹസങ്ങൾ ഒഴിവാക്കുകയും വേണം.

വിശാഖം

സൗഹൃദമായാലും ബന്ധുത്വമായാലും മെച്ചപ്പെടുന്ന കാലമാണ്. ബിസിനസ്സിൽ അഭിവൃദ്ധിയുണ്ടാവും.
വലിയ തോതിലുള്ള ക്രയവിക്രയങ്ങളിൽ ശ്രദ്ധ വേണ്ടതുണ്ട്. ആഢംബരത്തിനും അനാവശ്യത്തിനും ചെലവ് ചെയ്യാൻ മടിക്കില്ല. മുറിവോ ചതവോ സംഭവിക്കാനിടയുണ്ട്. പൊതുപ്രവർത്തനത്തിൽ പാളിച്ച പറ്റാതെ നോക്കണം. പെട്ടെന്ന് യാത്ര ചെയ്യേണ്ട സാഹചര്യം ഉണ്ടാവാം. സർക്കാർ ആനുകൂല്യങ്ങൾ/അനുമതി പ്രതീക്ഷിച്ച നേരത്ത് ലഭിക്കണമെന്നില്ല.

അനിഴം

കഴിവുകൾക്ക് അംഗീകാരം സിദ്ധിക്കും. അതിനുപരി സ്വന്തം കഴിവുകളെക്കുറിച്ച് തിരിച്ചറിവിനും അവസരം ഉണ്ടാകും. കർമ്മരംഗത്ത് ഉന്മേഷം പ്രകടമാവും. ചെയ്യേണ്ട കാര്യങ്ങൾ മുൻഗണനാ ക്രമമനുസരിച്ച് നിർവഹിക്കാൻ സാധിക്കും. കുടുംബ ജീവിതത്തിന്റെ സ്വാച്ഛന്ദ്യം ആസ്വദിക്കാനാവും. തീരുമാനങ്ങൾ ബുദ്ധിപരമായിരിക്കും. ഒന്നിലധികം മാർഗങ്ങളിലൂടെ ധനാഗമം ഉണ്ടാവും. പിതാവിന് പ്രശസ്തി, അധികാരം എന്നിവ വന്നുചേരുന്ന കാലമാണ്. വെള്ളി, ശനി ദിവസങ്ങൾക്ക് മികവ് കുറയും.

തൃക്കേട്ട

പഠന മികവുണ്ടാകും. തൊഴിലിനൊപ്പം ചില ചെറുകോഴ്സുകളിൽ ചേരും. കായികരംഗത്ത് പ്രവർത്തിക്കുന്നവർക്കും നേട്ടങ്ങൾ പ്രതീക്ഷിക്കാം. വായ്പാ തിരിച്ചടവിന് പണം വന്നെത്തും. പുതിയ ജോലിയിൽ പ്രവേശിക്കാൻ സാഹചര്യമൊരുങ്ങും. വസ്തു വില്പനയിൽ ക്ഷീണം സംഭവിച്ചേക്കാം. പിതാവിന്റെ ഉപദ്ദേശം ഹിതകരമായിത്തീരുന്നതാണ്. ഞായർ മുതൽ വ്യാഴം വരെയുള്ള ദിവസങ്ങൾക്ക് മേന്മയേറുന്നതാണ്.

മൂലം

മനസ്സ് ഉദാസീനമാവും. പഴയ കാര്യങ്ങൾ മനസ്സിൽ നിറയും. പരിശ്രമിച്ചാൽ കർമ്മരംഗത്ത് പുതിയ ചലനങ്ങൾ സൃഷ്ടിക്കാൻ സാധിക്കുന്നതാണ്. കർമ്മാധിപനായ ബുധൻ ഉച്ചനായി സഞ്ചരിക്കുന്നത് ഗുണപരമാണ്. ചെറുകിട സംരംഭകർ, നവമാധ്യമങ്ങളിൽ പ്രവർത്തിക്കുന്നവർ എന്നിവർക്കും നേട്ടം പ്രതീക്ഷിക്കാം. സാമ്പത്തികമായി തരക്കേടില്ലാത്ത കാലമാണ്. കുടുംബഭദ്രത സന്തോഷമേകും. ഉപരിപഠനാർത്ഥം മക്കൾ അന്യനാട്ടിലേക്ക് പോവാം.

പൂരാടം

സൂര്യബുധന്മാർ പത്താം ഭാവത്തിൽ സഞ്ചരിക്കുകയാൽ തൊഴിൽപരമായി വളർച്ചയുണ്ടാവും. പതിനൊന്നാം ഭാവത്തിലേക്ക് കുജനും വരികയാൽ അദ്ധ്വാനത്തിന് അർഹമായ അംഗീകാരവും ഉയർന്ന വേതനവും സിദ്ധിക്കും. കർമ്മരംഗത്ത് അപ്രമാദിത്വം ഉണ്ടാവും. ഇഷ്ടജനങ്ങളെ കാണാനും സൽകാരങ്ങളിൽ പങ്കെടുക്കാനുമാവും. കുടുംബ ജീവിതത്തിൽ സന്തോഷം പുലരും. മക്കളുടെ വിവാഹ കാര്യത്തിൽ നല്ല തീരുമാനം വന്നെത്തും.

ഉത്രാടം

ധനുക്കൂറുകാർക്ക് ഈയാഴ്ച നേട്ടങ്ങൾ കൂടും. കർമ്മരംഗത്ത് ഉയരാൻ സാധിക്കുന്നതാണ്. സാമ്പത്തികസ്ഥിതി അനുകൂലമാവും. കടം വാങ്ങിയ തുക മടക്കിക്കൊടുക്കാൻ സാധിച്ചേക്കാം. വസ്തുവിന്റെ വില്‌പന സാധ്യതകൾ ആരായും. മകരക്കൂറുകാർക്ക് അദ്ധ്വാനം വർദ്ധിക്കുന്നതാണ്. ഔദ്യോഗിക യാത്രകൾ ഉണ്ടാവും. സഹപ്രവർത്തകരുടെ പിന്തുണ കുറയാം. ആഢംബര വസ്തുക്കൾ വാങ്ങും. സാമ്പത്തിക കാര്യങ്ങളിൽ മിതത്വം പാലിക്കാനായേക്കില്ല. ആരോഗ്യത്തിൽ ശ്രദ്ധ പുലർത്തണം.

തിരുവോണം

വാക്കും പ്രവൃത്തിയും പൊരുത്തപ്പെടണമെന്നില്ല. ആഗ്രഹങ്ങൾ നേടാൻ വലിയ അദ്ധ്വാനം ആവശ്യമായി വരുന്നതാണ്. ചെലവുകൾ കൂടും. ബന്ധുക്കളുടെ നിലപാടുകൾ അറിയാൻ കഴിയില്ല. മക്കളുടെ കാര്യത്തിൽ ചില വിഷമങ്ങൾ ഉണ്ടാകാം. വ്യാഴം മുതൽ അനുഭവങ്ങൾ മെച്ചപ്പെട്ടേക്കും. സാമ്പത്തികമായ തടസ്സങ്ങൾ നീങ്ങുന്നതാണ്. ഗാർഹികാവശ്യങ്ങൾ സുഗമമായി നടക്കും. പ്രോജക്ടുകൾ പൂർത്തീകരിക്കാൻ തീവ്രശ്രമം ആരംഭിക്കും.

അവിട്ടം

പ്രതീക്ഷിക്കാത്ത വ്യക്തികളിൽ നിന്നും പിന്തുണ കിട്ടും. ചില തീരുമാനങ്ങൾ ഏകപക്ഷീയമായിപ്പോയെന്ന് പരാതിയുയരാം. കർമ്മരംഗത്ത് ഉണർവ്വും ഉന്മേഷവും വേണ്ടത്ര ഉണ്ടായി എന്ന് വരുന്നതല്ല. പഠനത്തിൽ പൂർണമായ ഏകാഗ്രത കിട്ടാതെ വിഷമിക്കും. കുടുംബ കാര്യങ്ങൾക്കായി യാത്രകൾ വേണ്ടി വന്നേക്കും. വഴിത്തർക്കങ്ങളിൽ മനസ്സ് വ്യാകുലമാവാം. തൊഴിൽ തേടുന്നവർക്ക് അല്പം കൂടി കാത്തിരിക്കേണ്ട സാഹചര്യമാണ്. സാമ്പത്തികസ്ഥിതി മോശമാവില്ല

ചതയം

വ്യക്തിപരമായും തൊഴിൽപരമായും മാറ്റങ്ങൾ പലതും ആഗ്രഹിക്കുമെങ്കിലും സാഹചര്യങ്ങൾ ഒത്തുവരാത്തതിന്റെ സമ്മർദ്ദം തുടരും. ജോലിയോടൊപ്പം പുതിയ കോഴ്സുകൾക്ക് ചേരാൻ സന്ദർഭം ലഭിക്കുന്നതാണ്. ബന്ധുക്കളുടെ പ്രശ്നങ്ങൾ പരിഹരിക്കാൻ മുന്നിട്ടിറങ്ങും. ഏഴാം ഭാവത്തിൽ ശുക്രൻ ഉള്ളതിനാൽ പ്രണയാനുഭവങ്ങൾ ഉണ്ടാവാം. ആഴ്ചയുടെ ആദ്യം സാമ്പത്തിക മെച്ചം പ്രതീക്ഷിക്കാം. പിതാവിന്റെ ആരോഗ്യകാര്യത്തിൽ ശ്രദ്ധ വേണ്ടതുണ്ട്.

പൂരൂരുട്ടാതി

പലകാര്യങ്ങളിൽ വ്യാപൃതരാവേണ്ട സ്ഥിതിയുണ്ടാവാം. ഉദ്യോഗസ്ഥർ ദുഷ്കരങ്ങളായ ദൗത്യങ്ങളെ അഭിമുഖീകരിച്ചേക്കും. ഉപാസനകൾക്കും ആത്മീയ കാര്യങ്ങൾക്കും തടസ്സം സംഭവിക്കാനിടയുണ്ട്. കുടുംബത്തിലെ വയോജനങ്ങളുടെ ആരോഗ്യപ്രശ്നങ്ങൾക്ക് പെട്ടെന്നുള്ള വൈദ്യസഹായം വേണ്ടി വരാം. വായ്പകൾ നേടാനുള്ള ശ്രമം തുടരേണ്ട നിലയുണ്ടാകും. പ്രായോഗിക പരിചയവും പ്രത്യുല്പന്നമതിത്വവും കൊണ്ട് ചില ദുർഘടങ്ങളെ മറികടക്കാനാവും.
ആഴ്ചയുടെ തുടക്കം കൂടുതൽ മെച്ചപ്പെട്ടതാവും.

ഉത്രട്ടാതി

ഗ്രഹങ്ങളുടെ അനിഷ്ടസ്ഥിതി തുടരുകയാൽ ആരോഗ്യം, സാമ്പത്തികം എന്നീ കാര്യങ്ങളിൽ കരുതൽ വേണം. അനാവശ്യമെന്ന് തോന്നുന്ന ചെലവുകൾ ഒഴിവാക്കേണ്ടതാണ്. പുതുസംരംഭങ്ങൾക്ക് മുതിരരുത്. കരാറുകളിലും ഉടമ്പടികളിലും ഏർപ്പെടുമ്പോൾ വലിയ ജാഗ്രത വേണം. വാരമധ്യത്തിലെ രണ്ടുമൂന്നു ദിവസങ്ങൾക്ക് മേന്മയേറും. അന്യദേശത്ത് പഠനം, തൊഴിൽ എന്നിവയ്ക്ക് സാധ്യതയുണ്ട്. യാത്രാരേഖകൾ ലഭിച്ചേക്കും.

രേവതി

വചോവിലാസം പ്രശംസിക്കപ്പെടും. സിമ്പോസിയങ്ങളിൽ പുതിയ ആശയങ്ങൾ അടുക്കും ചിട്ടയോടും അവതരിപ്പിക്കാൻ സാധിക്കും. ഇഷ്ടവസ്തുക്കൾ പ്രയത്നത്തിലൂടെ നേടാനായേക്കും. ഗണിതം, വ്യാകരണം, കല, മാധ്യമരംഗം, നിയമം, ജ്യോതിഷം എന്നിവയുമായി ബന്ധപ്പെട്ടവർക്ക് അവരുടെ കർമ്മരംഗത്ത് തിളങ്ങാനായേക്കും. ബന്ധുക്കളുടെ പിണക്കം പരിഹൃതമാവും. വരവുണ്ടാവുന്നതിന് അനുസരിച്ച് ചിലവും വരാം. ആരോഗ്യപരിശോധനകളിൽ അലംഭാവമരുത്..