Monthly Horoscope November 2023: നവംബർ മാസത്തെ നക്ഷത്രഫലം, അശ്വതി മുതൽ രേവതി വരെ

November Month 2023 Astrological Predictions for stars Aswathy to Revathi: സൂര്യൻ തുലാം - വൃശ്ചികം രാശികളിലൂടെ സഞ്ചരിക്കുന്നു. നവംബർ 16 വരെ മലയാള മാസമായ തുലാം തുടരും. തുലാം രാശി സൂര്യന്റെ നീചരാശിയാണെന്നത് ഓർമ്മിക്കാം. നവംബർ 17 ന് വൃശ്ചിക മാസം തുടങ്ങുന്നു. ഈ രണ്ട് മലയാള മാസങ്ങളിൽ ചോതി, വിശാഖം, അനിഴം എന്നീ ഞാറ്റുവേലകളിലൂടെയാണ് ആദിത്യന്റെ യാത്ര.

നവംബർ 1 ന് കൃഷ്ണ ചതുർത്ഥിയാണ്. നവംബർ 13നാണ് തുലാവാവ് (അമാവാസി). തുടർന്ന് വെളുത്തപക്ഷം തുടങ്ങുന്നു. നവംബർ 27 നാണ് വൃശ്ചികത്തിലെ വെളുത്തവാവ്. നവംബർ 1 ന് മകയിരം നക്ഷത്രമാണ്. നവംബർ 30 ന് ചന്ദ്രൻ ഒരു വട്ടം രാശിചക്രഭ്രമണം പൂർത്തിയാക്കി തിരുവാതിര നക്ഷത്രത്തിലെത്തുന്നു. ശനി കുംഭം രാശിയിൽ അവിട്ടം നക്ഷത്രത്തിൽ വക്രഗതിയിലാണ്. നവംബർ 7 മുതൽ ശനി നേർഗതിയിൽ സഞ്ചാരം തുടങ്ങും. വ്യാഴം മേടം രാശിയിൽ വക്രഗതിയിൽ തന്നെയാണ്.

നവംബർ 24 മുതൽ ഭരണിയിൽ നിന്നും അശ്വതിയിലാവും സഞ്ചാരം. രാഹു, മീനം രാശിയിൽ രേവതിയിലും, കേതു കന്നി രാശി ചിത്തിര നക്ഷത്രത്തിലും അപസവ്യഗതിയിൽ ഭ്രമണം തുടരുന്നു. ബുധൻ നവംബർ ആദ്യ ആഴ്ചയിൽ തുലാം രാശിയിൽ നിന്നും വൃശ്ചികം രാശിയിലേക്കും മാസാന്ത്യത്തിൽ ധനുവിലേക്കും സംക്രമിക്കുകയാണ്. നവംബർ 12 ന് ബുധമൗഢ്യം തീരുന്നു.

ചൊവ്വ, നവംബർ 16 വരെ തുലാത്തിലും തദനന്തരം വൃശ്ചികത്തിലും സഞ്ചരിക്കുന്നു. ചൊവ്വ മൗഢ്യാവസ്ഥയിൽ തന്നെയാണ്. ശുക്രൻ നവംബർ 2 ന് കന്നിരാശിയിൽ പ്രവേശിച്ച് നവംബർ 29 വരെ അവിടെ തുടരുന്നു. കന്നി, ശുക്രന്റെ നീചരാശിയാണെന്നത് പ്രസ്താവ്യമാണ്. ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള 27 നാളുകാരുടേയും 2023 നവംബർ മാസത്തെ സമ്പൂർണ്ണ നക്ഷത്രഫലം ഇവിടെ വിശകലനം ചെയ്യപ്പെടുന്നു.

അശ്വതി

ആദിത്യൻ 7,8 രാശികളിലായി സഞ്ചരിക്കുകയാൽ സർക്കാർ സംബന്ധിച്ച കാര്യങ്ങൾക്ക് തടസ്സമോ കാര്യവിളംബമോ വരാം. രാഷ്ട്രീയത്തിൽ പ്രവർത്തിക്കുന്നവർക്ക് മുന്നേറാൻ കടമ്പകൾ ഉണ്ടായേക്കും. വിദ്യാർത്ഥികൾക്ക് പഠനത്തിൽ ഏകാഗ്രത വീണ്ടെടുക്കാൻ സാധിക്കുന്നതാണ്. സ്വന്തം തൊഴിൽ ചെയ്യുന്നവർക്ക് അതിൽ ആത്മവിശ്വാസത്തോടെ മുഴുകാനാവും. വരുമാനത്തിൽ നേരിയ വർദ്ധനവ് കണ്ടുതുടങ്ങുന്നതാണ്. ദാമ്പത്യത്തിൽ ചില ഇച്ഛാഭംഗങ്ങൾ ഉണ്ടായേക്കാം. രോഗക്ലേശങ്ങൾ അനുഭവിക്കുന്നവർക്ക് രാഹു ജന്മനക്ഷത്രത്തിൽ നിന്നും നീങ്ങിയതിനാൽ തെല്ല് ആശ്വാസം വരാം.

ഭരണി

ജന്മരാശിയിൽ നിന്നും രാഹുമാറിയതിനാലും മാസാന്ത്യത്തോടെ വ്യാഴം ജന്മനക്ഷത്രത്തിൽ നിന്നും നിഷ്ക്രമിക്കുകയാലും ശനിയുടെ വക്രഗതി തീരുകയാലും ഗുണാനുഭവങ്ങൾ വർദ്ധിക്കുന്നതാണ്. മാനസികപിരിമുറുക്കവും കുറഞ്ഞുതുടങ്ങും. സംരംഭങ്ങൾ ഒരുവിധം ഭംഗിയായി മുന്നോട്ട് കൊണ്ടുപോകാൻ കഴിയുന്നതാണ്. ഉദ്യോഗസ്ഥർ മേലധികാരികളുടെ അപ്രീതിസമ്പാദിക്കാനോ, അമിതാദ്ധ്വാനത്താൽ വിഷമിക്കാനോ ഇടയുണ്ട്. സംഘടനാപ്രവർത്തനങ്ങളിൽ പ്രതീക്ഷിച്ച സ്ഥാനലബ്ധി കിട്ടണമെന്നില്ല. പ്രണയികൾക്ക് ഹൃദയൈക്യം കുറയുന്നതായി തോന്നാം. സാമ്പത്തികമായ പരാധീനതകൾ ഒഴിയുന്നതാണ്.

കാർത്തിക

മേടക്കൂറുകാർക്ക് ഈ മാസം സമ്മിശ്രമായ അനുഭവങ്ങളാവും ഉണ്ടാവുക. ഇടവക്കൂറുകാർക്ക് നവംബർ പകുതിവരെ ഗുണാനുഭവങ്ങൾക്കാവും മുൻതൂക്കം. ശത്രുക്കളുടെ പ്രവർത്തനങ്ങളെ പ്രതിരോധിക്കാൻ കഴിയും. ബിസിനസ്സ് സംബന്ധിച്ച കൂടിയാലോചനകൾ വിജയിക്കുമെങ്കിലും തീരുമാനങ്ങൾ പ്രാവർത്തികമാക്കുക എളുപ്പമാവില്ല. തൊഴിൽ മാറുന്നതിനോ വലിയ മുതൽ മുടക്കുള്ള പുതുസംരംഭങ്ങൾക്കോ കാലം അനുകൂലമല്ല. കുടുംബ ജീവിതത്തിൽ സംതൃപ്തിയുണ്ടാവും. മക്കളുടെ വിദേശ യാത്ര സംബന്ധിച്ച തടസ്സങ്ങൾ നീങ്ങുന്നതാണ്. ആരോഗ്യപരമായി ആശ്വാസം ഉണ്ടാവും.

രോഹിണി

എല്ലാ രംഗത്തും ശക്തമായ മുന്നേറ്റം നടത്താനാവും. വിശേഷിച്ചും മാസത്തിന്റെ ആദ്യ പകുതിയിൽ. അധികാര മത്സരത്തിൽ നേട്ടമുണ്ടാക്കും. ഊഹക്കച്ചവടത്തിൽ ലാഭം വരും. ഉപഭോക്താക്കളെ ആകർഷിക്കുന്നതിൽ വിജയിക്കുന്നതാണ്. വ്യവഹാരത്തിൽ നേരിയ ആനുകൂല്യം ഉണ്ടായേക്കും. വിദ്യാർത്ഥികൾക്ക് ഉപരിപഠനാവസരം, കലാ - കായിക മത്സരങ്ങളിൽ മെഡൽ നേട്ടം എന്നിവ ഭവിക്കും. തൊഴിൽ തേടുന്നവർക്കും ശുഭകാലമാണ്. മാസത്തിന്റെ
രണ്ടാം പകുതിയിൽ ലക്ഷ്യത്തിലെത്താൻ കൂടുതൽ വിയർക്കേണ്ടതായി വന്നേക്കും. പ്രതീക്ഷിച്ച ധനം കൈവശം വരാൻ താമസമുണ്ടാകും. കുടുംബപരമായി ചില പ്രശ്നങ്ങൾ ഉദയം ചെയ്യാം.

മകയിരം

ഇടവക്കൂറുകാർക്ക് നവംബർ ആദ്യപകുതിയും മിഥുനക്കൂറുകാർക്ക് രണ്ടാം പകുതിയും അനുകൂലമാവും. പ്രധാന കാര്യങ്ങളിൽ തീരുമാനമെടുക്കുന്നത് ഇപ്രകാരമായാൽ ഗുണപ്രദമാകുന്നതാണ്. ഇടവക്കൂറുകാർക്ക് രാഹു പതിനൊന്നിൽ സ്ഥിതി ചെയ്യുകയാൽ ബിസിനസ്സിൽ ലാഭമേറും. ചില വളഞ്ഞ വഴികളിലൂടെയും വരുമാനം ഉണ്ടാകുന്നതാണ്. എന്നാൽ കണ്ടകശനിക്കാലം തുടരുകയാണെന്നതിനാൽ തൊഴിലിൽ ചില അപ്രതീക്ഷിത തടസ്സങ്ങൾ സൃഷ്ടിക്കപ്പെടാം എന്നതും ഓർക്കേണ്ടതുണ്ട്. പഠനകാര്യത്തിൽ തപ്പിതടഞ്ഞ് മുന്നേറും. മിഥുനക്കൂറുകാർക്ക് തടസ്സപ്പെട്ട കാര്യങ്ങളിൽ വലിയ മുന്നേറ്റം സാധ്യമാകുന്നതാണ്. എന്നാൽ നാലാമെടത്തിലെ കേതുവാൽ മനക്ലേശത്തിനും സാധ്യതയുണ്ട്.

തിരുവാതിര

ജോലിത്തിരക്കുകൾ കൂടാനിടയുണ്ട്. പൊതുവേ ഉദ്യോഗസ്ഥർക്ക് തങ്ങളുടെ കർമ്മത്തിൽ ഗുണപരമായ മാറ്റം ഉണ്ടാകും. മാസത്തിന്റെ രണ്ടാം പകുതിക്ക് മികവേറുന്നതാണ്. വരവ് അധികരിക്കാം. ചില കടബാധ്യതകൾ വീട്ടാൻ കഴിഞ്ഞേക്കും. പിതാവിൽ നിന്നും സ്വത്ത്, സമ്പാദ്യം ഇവ സംബന്ധിച്ച അനുകൂലമായ നിലപാട് പ്രതീക്ഷിക്കാവുന്നതാണ്. ഭൂമിയിൽ നിന്നും ആദായം ഉയർന്നേക്കും. ഗവേഷണത്തിലും ശാസ്ത്രസാങ്കേതിക പഠനങ്ങളിലും പുരോഗതി ദൃശ്യമാകുന്നതാണ്. കാര്യങ്ങൾ വരുതിയിലാവുന്ന സ്ഥിതി ഭവിച്ചേക്കും. മാസത്തിന്റെ ആദ്യപകുതിയിൽ ആരോഗ്യപ്രശ്നങ്ങൾ വലക്കാം. കുടുംബാംഗങ്ങളുടെ നിലപാടുകളോട് വിയോജിക്കേണ്ട സ്ഥിതി വരുന്നതാണ്.

പുണർതം

കർമ്മരംഗത്ത് ശ്രദ്ധ വേണ്ട കാലമാണ്. പുതിയ കരാറുകൾ ഒപ്പിടും മുൻപ് അവ സംബന്ധിച്ച ഉള്ളടക്കം ശരിയാംവിധം മനസ്സിലാക്കിയിരിക്കേണ്ടതുണ്ട്. പതിനൊന്നാം ഭാവാധിപനായ ചൊവ്വയ്ക്ക് മൗഢ്യവും പതിനൊന്നിലെ വ്യാഴത്തിന് വക്രതയും പതിനൊന്നിലേക്ക് ശനി ദൃഷ്ടിയും വരികയാൽ ലാഭം കുറയും; വരവ് ശോഷിക്കാം. പുതുസംരംഭങ്ങൾ ഇപ്പോൾ തുടങ്ങാതിരിക്കുക ഉത്തമം. ഉദ്യോഗസ്ഥർക്ക് അപ്രതീക്ഷിത സ്ഥലംമാറ്റലോ മറ്റോ ഉണ്ടാവാനിടയുണ്ട്. മാസത്തിന്റെ ആദ്യ പകുതിക്കുശേഷം സ്ഥിതി മെച്ചപ്പെടാം. ന്യായമായ ആവശ്യങ്ങൾ ഭംഗിയായി നടന്നുകിട്ടും. പ്രബലരുടെ പിന്തുണ ശക്തി പകരുന്നതാണ്.

പൂയം

നവഗ്രഹങ്ങളിൽ കേതുവൊഴികെ മറ്റുള്ള ഗ്രഹങ്ങൾ അനുകൂലമല്ലാത്ത ഭാവങ്ങളിലാകയാൽ തീരുമാനങ്ങൾ എത്ര സുചിന്തിതങ്ങളാണെങ്കിലും അവ നടപ്പാക്കുന്നതിൽ ക്ലേശമുണ്ടാകും. സുലഭം എന്ന് കരുതിയ വസ്തുക്കളും വിഷയങ്ങളും ദുർലഭങ്ങളായേക്കാം. ഗാർഹികമായി ചില സ്വൈരക്കേടുകൾ ഉണ്ടാവാം. വിവാദങ്ങളും തർക്കങ്ങളും ഒഴിവാക്കുക കരണീയം. സാമ്പത്തികമായി അല്പം മെച്ചം വന്നേക്കും. കച്ചവടത്തിൽ നേരിയ ലാഭം ഉണ്ടാകുന്നതാണ്. സന്താനങ്ങളുടെ ഉപരിപഠനത്തിന് പണം കണ്ടെത്താനാവും. യാത്രകൾ ഗുണപ്രദമായേക്കാം.

ആയില്യം

മൂന്നിൽ കേതു സഞ്ചരിക്കുകയാൽ സാഹസികതയുണ്ടാവും. മറ്റുള്ളവർ അസാധ്യമെന്ന് കരുതിയവ സാധ്യമാക്കിയേക്കും. നാലിൽ സൂര്യകുജന്മാർ സഞ്ചരിക്കുകയാൽ മനസ്സ് കഠിനമാവും. പ്രവൃത്തികളിൽ വിജയതൃഷ്ണമൂലം അല്പം പാരുഷ്യം കലരുന്നതായി ആക്ഷേപിക്കപ്പെടാം. ധനവരവ് ഏറിയും കുറഞ്ഞുമിരിക്കും. ഭൂമിയുടെ ക്രയവിക്രയം നടന്നുകിട്ടുക എളുപ്പമാവില്ല. വിദ്യാർത്ഥികൾക്ക് അന്യദിക്കിൽ ഉപരിപഠനം , ഗവേഷണം ഇവയ്ക്കവസരം ലഭിക്കാം. കച്ചവടം വിപുലീകരിക്കാനുള്ള ശ്രമം ഫലം കാണണമെന്നില്ല. ദാമ്പത്യത്തിൽ പിണക്കവും ഇണക്കവും ആവർത്തിക്കുന്നതാണ്.

മകം

മാസത്തിന്റെ ആദ്യപകുതി കൂടുതൽ അനുകൂലവും ഗുണകരവുമാവും. അദ്ധ്വാനത്തിന് അർഹതയിലധികം പ്രതിഫലം കിട്ടിയേക്കാം. സ്വന്തം അധികാരവും അവകാശവും എതിർപ്പുകളെ അവഗണിച്ച് നടത്തിയെടുക്കും. പുതുപദവികൾ ലഭിക്കാം. ഉദ്യോഗസ്ഥർക്ക് മേലധികാരികളുടെ പ്രീതിലഭിക്കാം. മാസത്തിന്റെ രണ്ടാം പകുതിയിൽ മനക്ലേശങ്ങൾക്ക് സാധ്യത കാണുന്നു. കുടുംബാംഗങ്ങൾ നിസ്സഹകരിക്കും. കർമ്മരംഗത്ത് വെല്ലുവിളികൾ ഉണ്ടായേക്കാം. മക്കളുടെ പഠനത്തിൽ പ്രതീക്ഷിച്ച പുരോഗതി കണ്ടെന്നു വരില്ല. ചെറുപ്പക്കാരുടെ വിവാഹാലോചനകൾ നീണ്ടേക്കും. ആരോഗ്യപരമായി നല്ല ശ്രദ്ധ ആവശ്യമാണ്.

പൂരം

നക്ഷത്രനാഥനായ ശുക്രന് നീചവും കേതുയോഗവും വരുകയാണ്. മാസാദ്യം മുതൽ ഒടുക്കം വരെ അത് തുടരും. രണ്ടിൽ ശുക്രൻ സ്ഥിതിചെയ്യുകയാൽ മധുരമായി സംസാരിക്കാനും സാമ്പത്തികമായി തെല്ല് മെച്ചം ഉണ്ടാവാനും സാധിച്ചേക്കും. എന്നാൽ ആത്മവിശ്വാസം ബാധിക്കപ്പെടാം. വ്യക്തിത്വം പരിഹസിക്കപ്പെടാം. ദുർജനസംസർഗം ഉണ്ടായെന്നും വരാം. പൊതുവേ മാസത്തിന്റെ ആദ്യ പകുതിയിൽ പല മെച്ചങ്ങളും പ്രതീക്ഷിക്കാവുന്നതാണ്. അധ്വാനം അംഗീകരിക്കപ്പെടുന്നതായിരിക്കും. മത്സരങ്ങളിൽ തിളക്കം കുറഞ്ഞാലും വിജയം ഭവിക്കും. കച്ചവടത്തിൽ പുരോഗതി വന്നെത്തുന്നതാണ്. രണ്ടാം പകുതിയിൽ സ്ത്രീകളിൽ നിന്നും വിരോധവും ഉദ്യമങ്ങളിൽ വിളംബവും മനക്ലേശവും സാധ്യതകൾ.

ഉത്രം

നക്ഷത്രനാഥനായ ആദിത്യന് നീചം തുടരുകയാൽ ലക്ഷ്യം നേടാൻ ഏറെ പരിശ്രമം വേണ്ടിവരും. വിജയത്തിന് തിളക്കം കുറഞ്ഞേക്കാം. ചിങ്ങക്കൂറുകാർക്ക് മാസത്തിന്റെ ആദ്യപകുതിയും കന്നിക്കൂറുകാർക്ക് മാസത്തിന്റെ രണ്ടാം പകുതിയും ഗുണകരമാവുന്നതാണ്. ഏജൻസികൾ / ഫ്രാഞ്ചൈസികൾ ഇവ തുടങ്ങാൻ സാധിച്ചേക്കും. ബാങ്കിൽ നിന്നും വായ്പ ലഭിക്കുന്നതാണ്. സഹോദരാനുകൂല്യം പ്രതീക്ഷിക്കാം. വസ്തുസംബന്ധിച്ച കുടുംബ തർക്കത്തിന് അയവ് വന്നേക്കും. സുഖഭോഗങ്ങൾക്കും ആഢംബരങ്ങൾക്കും വേണ്ടി ചെലവുണ്ടാകാം. രാഹു-കേതുക്കളുടെ പ്രതികൂലത മനക്ലേശം, ദേഹസൗഖ്യക്കുറവ് ഇവ സൃഷ്ടിക്കാനിടയുണ്ട്.

അത്തം

ജന്മത്തിൽ കേതു നിൽക്കയാൽ ചെറിയ വലിയ കാര്യങ്ങളിലെല്ലാം ജാഗ്രത പുലർത്തണം. ജന്മത്തിലേക്ക് നീചശുക്രൻ വരികയാൽ ഭൗതിക തൃഷ്ണകളേറും. ചിലതൊക്കെ അനുഭവിക്കാനുമാവും. പൊതുവേ മാസത്തിന്റെ ആദ്യപകുതി അശാന്തമാവും. അനായാസം ഒന്നും നേടാനായേക്കില്ല. അധികാരികൾ എതിർപക്ഷത്താകയാൽ സമ്മർദ്ദം ഭവിക്കും. അനാരോഗ്യം വിഷമിപ്പിക്കാനിടയുണ്ട്. സാമ്പത്തികമായും ചില സമ്മർദ്ദങ്ങളെ നേരിടേണ്ടതായി വരാം. മാസത്തിന്റെ രണ്ടാം പകുതിയിൽ ക്ഷേമാനുഭവങ്ങൾ വർദ്ധിക്കും. സ്വസ്ഥതയുണ്ടാവും, അകത്തും പുറത്തും. നവസംരംഭങ്ങളിൽ മുന്നേറ്റമുണ്ടാകുന്നതായിരിക്കും.

ചിത്തിര

കേതു ജന്മനക്ഷത്രത്തിൽ തുടരുന്നതിനാൽ സാഹസങ്ങൾ, മുതൽമുടക്കുകൾ എന്നിവയ്ക്ക് മുതിരാതിരിക്കുകയാവും നല്ലത്. എന്നാൽ ജീവിതനിലവാരം ഉയരുന്നതായി അനുഭവപ്പെടും. വരവ് അധികരിച്ചേക്കാം. സമൂഹത്തിൽ നിന്നും മാന്യതയും അംഗീകാരവും ലഭിക്കാം. ഭോഗസുഖങ്ങളും അനുഭവിക്കാനാവും. പക്ഷേ അവയെല്ലാം നിലനിർത്തുകയാണ് യഥാർത്ഥ വെല്ലുവിളി. സുഹൃത്തുക്കളിൽ നിന്നും പ്രതീക്ഷിച്ചത്ര പിന്തുണ കിട്ടിയെന്നു വരില്ല. ബന്ധുക്കൾ ചെറുകാര്യങ്ങളുടെ പേരിൽ പിണങ്ങാം. വിദേശയാത്രയ്ക്ക് കൃത്യ സമയത്ത് അനുമതി കിട്ടാത്തതുമൂലം തൊഴിൽ പ്രശ്നങ്ങൾ ഉടലെടുക്കാം. ചെലവിൽ നിയന്ത്രണം അനിവാര്യമാണ്.

ചോതി

ആദിത്യകുജന്മാർ ജന്മരാശിയിലും ജന്മനക്ഷത്രത്തിലും ഒക്കെയായി തുടരുകയാൽ ചില പ്രതിസന്ധികളെയും പ്രശ്നങ്ങളെയും അഭിമുഖീകരിക്കേണ്ടി വരാം. ആരോഗ്യപ്രശ്നങ്ങൾ വന്നേക്കാം. അപവാദങ്ങൾക്ക് ശരവ്യരാവാനിടയുണ്ട്. അദ്ധ്വാനം വിലമതിക്കപ്പെടുന്നില്ല എന്ന ദുരവസ്ഥയും സംജാതമായേക്കാം. എന്നാൽ നവംബർ 16 നു ശേഷം കാര്യങ്ങൾക്ക് മാറ്റം വരാം. സമ്മർദ്ദങ്ങൾ താനേ അയയുന്നതാണ്. കച്ചവടത്തിൽ പുരോഗതി വരും. ന്യായമായ ആവശ്യങ്ങൾ നടന്നുകിട്ടാം. തടസ്സപ്പെട്ടിരുന്ന ഗൃഹനിർമ്മാണം പുനരാരംഭിക്കാൻ സാഹചര്യങ്ങൾ ഒരുങ്ങും. ഈശ്വരാധീനം ഉണ്ടെന്ന തോന്നൽ ശക്തമാവുകയും ചെയ്യും.

വിശാഖം

പല പ്രശ്നങ്ങളിലും കൃത്യമായ തീരുമാനം കൈക്കൊള്ളാൻ കഴിയാത്ത സ്ഥിതി വരാം. മാനസികമായി പൊരുത്തമില്ലാത്തവരെ ആശ്രയിക്കേണ്ട സാഹചര്യം ഭവിക്കാം. വായ്പാതിരിച്ചടവുകൾ വലിയക്ലേശത്തിന് ഇടവരുത്തും. ഏജൻസി, കരാർ പണികൾ ഇവയിൽ ചെറിയ വരുമാനമുള്ള ജോലി ലഭിച്ചേക്കാം. വിദ്യാർത്ഥികൾക്ക് പഠനത്തിൽ ആലസ്യം ഉണ്ടാവുന്നതാണ്. സ്വന്തം കാലിൽ നിൽക്കാനുള്ള ശ്രമം ഭാഗികമായി വിജയിക്കും. കുടുംബസമേതമുളള വിനോദയാത്രകൾക്ക് പണം കൈവായ്പ വാങ്ങാം. ഗവേഷണത്തിൽ ഏർപ്പെട്ടവരെ ആലസ്യം പിടികൂടാം. കുടുംബാംഗങ്ങളുടെ അനാരോഗ്യം മനസ്സിനെ വിഷമിപ്പിച്ചേക്കാം.

അനിഴം

പതിനൊന്നിലെ ശുക്രനും കേതുവും ഊഹക്കച്ചവടത്തിൽ വിജയമേകും. സ്ത്രീകളിൽ നിന്നും ധനം ലഭിച്ചേക്കാം. ഭാഗ്യപരീക്ഷണങ്ങളിൽ ചില നേട്ടങ്ങൾ ഉണ്ടാവാനിടയുണ്ട്. പ്രണയികൾക്ക് സന്തോഷിക്കാൻ അവസരം ലഭിക്കുന്നതാണ്. ഭോഗസുഖമുണ്ടാകും. എന്നാൽ ഉദ്യോഗത്തിൽ പ്രതിബന്ധങ്ങൾ വരാം. പാദരോഗം വിഷമിപ്പിക്കും. പൊടുന്നനേ ചില യാത്രകൾ വേണ്ടിവരാം. വരവിനനുസരിച്ച് ചിലവും വർദ്ധിക്കുന്നതാണ്. വൈകാരിക പ്രതികരണങ്ങൾ ശത്രുക്കളെ ക്ഷണിച്ചു വരുത്തിയേക്കും. അപക്വമായ തീരുമാനങ്ങളെടുക്കാൻ സാധ്യതയുണ്ട്.

തൃക്കേട്ട

നാലാമെടത്തിൽ കണ്ടകശനി, പന്ത്രണ്ടിലും ജന്മരാശിയിലും സൂര്യകുജന്മാർ, പഞ്ചമരാഹു എന്നിങ്ങനെ പാപഗ്രഹങ്ങളാൽ ദൂഷിതരും വലയിതരുമാണ് വൃശ്ചികക്കൂറുകാർ ഇപ്പോൾ. ആയതിനാൽ കരുതലോടെ വേണം ഓരോ നീക്കവും. സഹിഷ്ണുതയും അനിവാര്യമാണ്. നിലവിലെ തൊഴിൽ ഉപേക്ഷിക്കുന്നത് അഭിലഷണീയമായിരിക്കില്ല. സാമ്പത്തികമായ അച്ചടക്കം പാലിക്കേണ്ടതുണ്ട്. പലകാര്യങ്ങളിൽ ഏർപ്പെട്ട് എല്ലാം പകുതിയിൽ മതിയാക്കുന്ന പ്രവണത ഉണ്ടായേക്കാം. ഭൂമിയുടെ ക്രയവിക്രയത്തിൽ ഉദ്ദേശിച്ച ലാഭം കിട്ടിയില്ലെന്ന് വരാം. 'പലതുള്ളി പെരുവെള്ളം' എന്ന് പറഞ്ഞതുപോലെ ചെറിയ ചെറിയ കാര്യങ്ങളിൽ മനസ്സർപ്പിച്ച് അവ ഭംഗിയായി നിർവ്വഹണത്തിലെത്തിക്കുക എന്നതാവും ഇപ്പോൾ തൃക്കേട്ട നാളുകാർക്ക് ഏറ്റവും കരണീയമായിട്ടുള്ള കാര്യം.

മൂലം

നവംബർ ആദ്യപകുതിക്ക് മെച്ചമേറും. തടസ്സങ്ങളെ മറികടന്ന് കർമ്മമേഖല ഉന്മേഷകരമാവും. തൊഴിലിൽ ആത്മ സംതൃപ്തിയോടെ മുഴുകനാവും. സാമ്പത്തിക ക്ലേശങ്ങൾ കുറച്ചൊക്കെ പരിഹൃതമാവും. പാരമ്പര്യവഴിയിൽ ധനം വന്നുചേരും. ഭൂമിയിൽ നിന്നും മെച്ചമുണ്ടാകും. ബന്ധുക്കളുടെയും അധികാരികളുടെയും പിന്തുണ ലഭിക്കുന്നതാണ്. ശനിയുടെ വക്രസഞ്ചാരം തീരുകയാൽ മടിച്ചു നിന്ന ദൗത്യങ്ങൾ ഏറ്റെടുക്കാനും അവയിൽ വിജയിക്കാനും കഴിയുന്നതാണ്. മക്കളുടെ ശ്രേയസ്സിൽ സന്തോഷിക്കാനാവും. യുവാക്കളുടെ വിവാഹകാര്യത്തിൽ ശുഭതീരുമാനം ഭവിക്കുന്നതാണ്. ദാമ്പത്യസൗഖ്യം ഉണ്ടാകും. നവംബർ രണ്ടാം പകുതിയിൽ വ്യക്തിപരമായും ധനപരമായും അച്ചടക്കം പുലർത്തണം.

പൂരാടം

മാസാദ്യം മുതൽ നക്ഷത്രനാഥനായ ശുക്രന് നീചം വരുകയും കേതുവുമായി യോഗം ഭവിക്കുകയും ചെയ്യുന്നു. അതിനാൽ മറ്റു ഗ്രഹങ്ങളുടെ ആനുകൂല്യം വേണ്ടത്ര അനുഭവത്തിൽ വരണമെന്നില്ല. വിശ്വസിച്ചവർ ആ വിശ്വാസത്തെ കാറ്റിൽ പറത്താം. ആശിച്ച പദവികൾ ലഭിക്കുവാൻ ക്ലേശിക്കുന്നതാണ്. ഉദ്യോഗസ്ഥർക്ക് തരംതാഴ്ത്തൽ, കാരണം കാണിക്കൽ നോട്ടീസ് ഇവ ഉണ്ടായേക്കും. എന്നാലും സാമ്പത്തികമായ ഉയർച്ചയും കുടുംബൈശ്വര്യവും പ്രതീക്ഷിക്കാം. മക്കളെ സംബന്ധിച്ച് ശുഭവാർത്തകൾ കേൾക്കാനിടവരും. നേട്ടങ്ങളധികവും നവംബർ പകുതിവരെയാവും. മാസാന്ത്യം ചില സമ്മർദ്ദങ്ങൾ ഉണ്ടാവാം.

ഉത്രാടം

മുൻപ് ശ്രമിച്ച് പരാജയപ്പെട്ട കാര്യങ്ങൾ ഇപ്പോൾ ശ്രമിക്കുന്നപക്ഷം വിജയിക്കുന്നതായിരിക്കും. തൊഴിൽ രംഗത്തെ താങ്കളുടെ മികവ് മറ്റുപലർക്കും പ്രയോജനപ്രദമാവും. കുടുംബസമേതം യാത്രകൾ ഉണ്ടാവും. സാമ്പത്തികമായ ക്ലേശങ്ങൾ കുറച്ചൊക്കെ കുറയുന്നതാണ്. തൊഴിൽ തേടുന്നവർക്ക് എന്തെങ്കിലും അവസരങ്ങൾ തുറന്നു കിട്ടാതിരിക്കില്ല. നാലിൽ രാഹു സ്ഥിതി ചെയ്യുന്നതിനാൽ ഉത്രാടം ഒന്നാം പാദക്കാർക്ക് ഗാർഹികമായ സ്വൈരം അല്പം കുറയാനിടയുണ്ട്. ഇക്കാര്യത്തിൽ മെച്ചപ്പെട്ട സ്ഥിതിയാവും മകരക്കൂറുകാർക്ക്. ധനുക്കൂറുകാർക്ക് മാസത്തിന്റെ ആദ്യപകുതിയും മകരക്കൂറുകാർക്ക് രണ്ടാം പകുതിയും കൂടുതൽ ഗുണകരമാവാം.

തിരുവോണം

പലകാലത്തെ അദ്ധ്വാനത്തിന് ഭാഗികമായോ മുഴുവനായോ ഫലം ലഭിച്ചുതുടങ്ങും. ആശിച്ച വസ്തുക്കൾ കൈവശം .വന്നെത്തുന്നതാണ്. വിദ്യാർത്ഥികൾ പഠനത്തിനൊപ്പം കലാകായികമത്സരങ്ങളിലും മികവ് കാട്ടും. കലാകാരന്മാർക്ക് ധാരാളം അവസരം ലഭിക്കുന്നതാണ്. നിക്ഷേപങ്ങളിൽ വർദ്ധനവ് ഭവിക്കും. സുഹൃത്തുക്കളിൽ നിന്നും മനസ്സന്തോഷമുണ്ടാക്കുന്ന അനുഭവങ്ങൾ പ്രതീക്ഷിക്കാം. വീട് മോടി പിടിപ്പിച്ചേക്കാം. അമ്മയുടെ ആരോഗ്യസ്ഥിതിയിൽ മെച്ചം ഉണ്ടായേക്കും. തെരഞ്ഞെടുപ്പുകളിൽ വിജയിക്കുന്നതാണ്. പുതിയ പദവികൾ ലഭിക്കാനിടയുണ്ട്.

അവിട്ടം

നക്ഷത്രനാഥനായ ചൊവ്വയ്ക്ക് മൗഢ്യം തുടരുകയാൽ ചില സങ്കോചങ്ങളും ആശയക്കുഴപ്പങ്ങളും ഒക്കെയുണ്ടാവും. സർവകാര്യങ്ങളും ആലോചിച്ചും പുനരാലോചിച്ചും പ്രവർത്തിക്കുകയാവും ഉചിതം. മകരക്കൂറുകാരായ അവിട്ടം നാളുകാർക്ക് പ്രായേണ നേട്ടങ്ങൾ അധികരിക്കാം. മനസ്സിനെ മഥിച്ചിരുന്ന പ്രശ്നങ്ങൾക്ക് പരിഹാരം ലഭിച്ചേക്കും. ജീവിതനിലവാരം ഉയരാം. കുംഭക്കൂറുകാരായ അവിട്ടം നാളുകാർക്ക് അഷ്ടമ കേതു, ജന്മശനി എന്നിവ ആധിവ്യാധികൾക്ക് ഹേതുവായക്കാം. ആരോഗ്യകാര്യങ്ങളിൽ ഉദാസീനതയരുത്. കർമ്മരംഗത്ത് നാമമാത്രമായ നേട്ടങ്ങൾ വന്നണയും. കുടുംബത്തിന്റെ പിന്തുണ പ്രതിസന്ധികളിൽ കരുത്തേകും.

ചതയം

രാഹുകേതുക്കൾ, ശനി ഇവയുടെ അനിഷ്ടസ്ഥിതി മൂലം പ്രവർത്തനത്തിൽ ആലസ്യം വരാം. ലക്ഷ്യത്തിൽ നിന്നും വ്യതിചലിക്കാനും ഇടയുണ്ട്. ശാരീരിക ഊർജ്ജവും സമയവും പാഴാകാം. സർക്കാരിൽ നിന്നും ലഭിക്കേണ്ട അനുമതി അല്പം വൈകാം. പിതാവ്, സഹോദരൻ എന്നിവർ പ്രതികൂല നിലപാടെടുത്തേക്കും. നവംബർ രണ്ടാം പകുതി മുതൽ കാര്യവിജയം പ്രതീക്ഷിക്കാം. ബിസിനസ്സ് യാത്രകൾ ഭാഗികമായി ഗുണകരമാവും. ചെറിയ കരാറുകൾ നേട്ടങ്ങൾ സൃഷ്ടിക്കും. ഏജൻസി ഏർപ്പാടുകളിൽ ലാഭം വന്നെത്തും. ആരോഗ്യകാര്യത്തിൽ അലംഭാവമരുത്.

പൂരൂരുട്ടാതി

നക്ഷത്രനാഥനായ വ്യാഴം വക്രഗതി തുടരുകയാൽ മനസ്സിന്റെ ചാഞ്ചല്യം തുടരാം. പുതിയ കാര്യങ്ങൾ നടപ്പിലാക്കാൻ കാലവിളംബം വരുന്നതാണ്. അത്യാവശ്യങ്ങൾക്ക് പണം വന്നുചേരും. മിതവ്യയം ശീലമാക്കേണ്ടതുണ്ട്. കുടുംബാംഗങ്ങളുടെ പ്രശ്നങ്ങൾ പരിഹരിക്കുന്നതിൽ വിജയിക്കും. എന്നാൽ സ്വന്തം പ്രശ്നങ്ങൾ പോംവഴി കാണാതെ തുടരപ്പെടും. മീനക്കൂറുകാർക്ക് പ്രണയത്തിൽ ഇച്ഛാഭംഗം ഉണ്ടാകാം. അന്യനാട്ടിൽ പഠനത്തിനോ ജോലിക്കോ ശ്രമിക്കുന്നവർക്ക് ശുഭസൂചനകൾ സിദ്ധിക്കുന്നതാണ്. സ്ഥിരോത്സാഹം അനിവാര്യമാണ്. ക്ലേശങ്ങൾ നീങ്ങി പുതുകാലം പിറക്കാൻ കർമ്മപരാങ്മുഖത്വമല്ല, കർമ്മോത്സുകതയാണ് അവലംബിക്കേണ്ടത്.

ഉത്രട്ടാതി

ഏഴിലെ കേതു-ശുക്ര യോഗം ദാമ്പത്യക്ലേശത്തിന് കാരണമായേക്കാം. അതുപോലെ അഷ്ടമത്തിലെ സൂര്യ- കുജയോഗം വിഷമങ്ങൾക്കും തടസ്സങ്ങൾക്കും വഴിവെക്കുന്നതാണ്. ജന്മരാഹു, പന്ത്രണ്ടിലെ ശനി എന്നിവയും വിപരീതഫലങ്ങൾ സൃഷ്ടിക്കാം. രണ്ടിലെ വ്യാഴം കുറച്ചൊക്കെ ദൈവാധീനവും സാമ്പത്തികമായ മെച്ചവും നൽകിയേക്കും. അന്യദേശത്ത് പോയി പഠിക്കാനോ തൊഴിലെടുക്കാനോ ചിലർക്ക് അവസരം ലഭിക്കുന്നതാണ്. വിസാ പ്രശ്നങ്ങൾ, അർഹമായ ജോലി ലഭിക്കാതിരിക്കുക എന്നതും പ്രശ്നമാകാറുണ്ട്. ദുഷ്പ്രേരണകൾക്ക് വിധേയരാകാതെ സ്വയം സംരക്ഷിക്കേണ്ട സന്ദർഭമാണ്. ആരോഗ്യപരിപാലനത്തിൽ അലംഭാവമരുത്.

രേവതി

രാഹു, ജന്മനക്ഷത്രത്തിൽ സഞ്ചരിക്കുന്നതിനാൽ മുൻ തീരുമാനങ്ങളിൽ നിന്നും ഒരു തിരിച്ചുപോക്കുണ്ടായേക്കാം. സമയബന്ധിതമായി നിർവഹിക്കേണ്ട കാര്യങ്ങൾ പിന്നീടത്തേക്ക് മാറ്റി വെക്കാൻ പ്രേരണയുണ്ടാവുന്നതാണ്. പ്രണയികൾക്കിടയിൽ അനൈക്യം പൊട്ടിമുളച്ചേക്കാം. തെറ്റായ തീരുമാനങ്ങൾ എടുക്കുക എന്നതും ഒരു സാധ്യതയാണ്. വിദ്യാർത്ഥികൾ അലസരാവാനിടയുണ്ട്. രണ്ടിൽ വ്യാഴം സ്ഥിതി ചെയ്യുകയാൽ ധനപരമായി ചില നേട്ടങ്ങൾ ഭവിക്കുന്നതാണ്. നിക്ഷേപങ്ങളിൽ നിന്നും നേട്ടം വന്നെത്തും. കുടുംബബന്ധം ദൃഢമാകും. പുതുസംരംഭങ്ങൾ തുടങ്ങാൻ വ്യക്തമായ ആസൂത്രണം കൂടിയേ കഴിയൂ. മാസം മുഴുവൻ സൂര്യകുജന്മാർ അനിഷ്ടന്മാരാകയാൽ സർവ്വകാര്യങ്ങളിലും ജാഗ്രതയുണ്ടാവണം.