Mercury transit to Virgo 2023 Star Predictions, Aswathi to Revathi Stars: ബുധൻ കന്നിയിലേക്ക്, അശ്വതി മുതൽ രേവതി വരെയുള്ളവരെ എങ്ങനെ ബാധിക്കും?

Mercury transit to Virgo 2023 Star Predictions Aswathi  to Revathi Stars: 2023 ഒക്ടോബർ 3-ാം തീയതി മുതൽ 18-ാം തീയതി വരെ (1199 കന്നി 16 മുതൽ തുലാം 1 വരെ) ബുധൻ തന്റെ ഉച്ചരാശിയായ കന്നിയിൽ സഞ്ചരിക്കുന്നു. ഏകദേശം പതിനാറ് ദിവസം മാത്രമാണ് ബുധന് ഇത്തവണ ഉച്ചസ്ഥിതി വന്നിരിക്കുന്നത്. പക്ഷേ കവി പാടിയതുപോലെ "കാലം കുറഞ്ഞദിനമെങ്കിലും അർത്ഥദീർഘം" എന്ന അനുഭവമാണ് ഇവിടെ സംഭവിക്കുക. കുറഞ്ഞ കാലത്തേക്കാണ് എങ്കിലും ഒരു ഗ്രഹത്തിന് ഉച്ചസ്ഥിതി (Exalted position) വരിക എന്നത് ജ്യോതിഷത്തിലെ മുഖ്യവസ്തുതകളിൽ ഒന്നാണ്.

ഒക്ടോബർ 4 മുതൽ നവംബർ 12 വരെ ബുധന് മൗഢ്യവുമുണ്ട് (combustion). സൂര്യന്റെ ഒപ്പം ഒരേ രാശിയിൽ നിശ്ചിതമായ അടുപ്പത്തിൽ ബുധൻ സഞ്ചരിക്കുന്നതുകൊണ്ടാണ് ഈ ക്ഷീണാവസ്ഥ. മൗഢ്യത്തിലാകയാൽ ബുധൻ ഉച്ചരാശിയിൽ സഞ്ചരിക്കുമ്പോൾ കിട്ടേണ്ട മുഴുവൻ ഗുണങ്ങളും ഉണ്ടാവുന്നില്ല എന്നത് ഇവിടെ സ്മരണീയം.

ബുധന്റെ നക്ഷത്രങ്ങൾ ആയില്യം, തൃക്കേട്ട, രേവതി എന്നിവയാണ്. ഈ നാളുകാർക്ക് ബുധൻ ഉച്ചത്തിൽ സഞ്ചരിക്കുന്ന ഇക്കാലം ഒട്ടൊക്കെ ഗുണകരമാവും. മിഥുനവും കന്നിയും ബുധന്റെ രാശികൾ. പ്രസ്തുത രാശികൾ കൂറായവർക്ക് - മകയിരം 3, 4 പാദങ്ങൾ, തിരുവാതിര, പുണർതം 1,2,3 പാദങ്ങൾ, ഉത്രം 1,2,3 പാദങ്ങൾ, അത്തം, ചിത്തിര 1,2 പാദങ്ങൾ എന്നിവ ജന്മ നക്ഷത്രമായിട്ടുള്ളവർക്ക്- താരതമ്യേന മെച്ചപ്പെട്ട ഫലങ്ങൾ പ്രതീക്ഷിക്കാം.

ഗ്രഹകുടുംബത്തിൽ യുവരാജാവിന്റെ പദവിയാണ് ബുധനുള്ളത്. പാണ്ഡിത്യം, ബൗദ്ധികത, കവിത്വം, വിനോദരസികത്തം, രജോഗുണം, കളികളിൽ ഇഷ്ടം, ഹാസ്യശീലം, വാഗ്വൈഭവം, എന്നിവ ബുധന്റെ സഹജപ്രകൃതങ്ങളാണ്. ബുധൻ ബന്ധുബലം, കച്ചവട താത്പര്യം, എന്നിവയേയും കുറിക്കുന്നു.
ഈ വസ്തുതകളുടെ പശ്ചാത്തലത്തിൽ മേടം മുതൽ മീനം വരെയുള്ള പന്ത്രണ്ട് കൂറുകളിലും അവയ്ക്കുള്ളിലായി വരുന്ന അശ്വതി മുതൽ രേവതി വരെയുള്ള നക്ഷത്രങ്ങളില്‍ ജനിച്ചവരുടെ 'ബുധന്റെ ഉച്ചരാശിഫലം' ഇവിടെ രേഖപ്പെടുത്തുന്നു.

മേടക്കൂറിന്

(അശ്വതി, ഭരണി, കാർത്തിക ഒന്നാം പാദം) മേടക്കൂറിന് 3,6 എന്നീ ഭാവങ്ങളുടെ അധിപതിയാണ് ബുധൻ. ആറാം ഭാവമായ കന്നിയിൽ ഇപ്പോൾ ഉച്ചം പ്രാപിച്ചിരിക്കുകയാൽ തൊഴിലിൽ വലിയ മുന്നേറ്റമുണ്ടാകും. സഹപ്രവർത്തകരുടെ സർവ്വാത്മനാ ഉള്ള സഹായം വന്നുചേരും. സഹോദരീസഹോദരരാൽ അനുകൂലതയുണ്ടാവും. എതിർപക്ഷത്തെ നിശബ്ദരാക്കുന്ന കരുനീക്കങ്ങൾ നടത്തും. കടം മടക്കാനായേക്കും. വ്യാപാരത്തിൽ മുന്നേറാൻ സാധിക്കും. രോഗത്തിന് ചികിൽസ ഫലപ്രദമാവും. മക്കളെ സംബന്ധിച്ച ചില നല്ല തീരുമാനങ്ങളിലേക്ക് നീങ്ങാനാവും. വിരുന്നുകളിലും വിനോദങ്ങളിലും സംബന്ധിക്കുന്നതാണ്.

ഇടവക്കൂറിന്

(കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ):- രണ്ട്, അഞ്ച് എന്നീ ഭാവങ്ങളുടെ അധിപനായ ബുധൻ അഞ്ചാം ഭാവത്തിൽ ഉച്ചസ്ഥനാകയാൽ ധനപരമായി നേട്ടങ്ങൾ ഉണ്ടാവും. കച്ചവടത്തിൽ വരുമാനം വർദ്ധിക്കുന്നതാണ്. വിദ്യാർത്ഥികൾക്ക് പഠനത്തിൽ ഏകാഗ്രതയുണ്ടാവും. പുതിയ കോഴ്സുകളിൽ ഉപരിപഠനം, പരീക്ഷകളിൽ മികച്ച വിജയം എന്നിവ പ്രതീക്ഷിക്കാം. കലാകാരന്മാർക്കും സാഹിത്യകാരന്മാർക്കും ഭാവനാവിലാസം ഉയരുന്നതാണ്. മുഖാഭരണങ്ങൾ സമ്മാനമായി ലഭിച്ചേക്കാം. മക്കളെച്ചൊല്ലി സന്തോഷിക്കാൻ സാധിക്കുന്നതാണ്. കുടുംബ ജീവിതത്തിൽ സംതൃപ്തിയുണ്ടാകും. അദ്ധ്യാപകർക്ക് വിദ്യാർത്ഥികളുടെ ആദരം ലഭിക്കുന്നതാണ്.

മിഥുനക്കൂറിന്

(മകയിരം 3,4 പാദങ്ങൾ, തിരുവാതിര, പുണർതം 1,2,3):- ജന്മരാശി, നാലാംരാശി എന്നിവയുടെ അധിപനായ ബുധൻ നാലാം ഭാവത്തിൽ ഉച്ചനായി സഞ്ചരിക്കുകയാൽ കുറച്ചുനാളായി മനക്ലേശത്തിന് കാരണമായിരുന്ന പ്രശ്നങ്ങൾ പരിഹൃതമാവും. വീട് / വാഹനം ഇവ പുതുക്കുകയോ പുതിയവ വാങ്ങാൻ സാധിക്കുകയോ ചെയ്യും. അമ്മയുടെ ആരോഗ്യസ്ഥിതി മെച്ചപ്പെടുന്നതാണ്. തൊഴിൽരംഗത്ത് നേട്ടങ്ങളുണ്ടാവും. ഉദ്യോഗസ്ഥർക്ക് പുതുപദവികൾ ലഭിക്കാം. തൊഴിലന്വേഷകർക്കും നല്ലകാലമാണ്. ബന്ധുക്കൾ, സുഹൃത്തുക്കൾ എന്നിവരെക്കൊണ്ട് നേട്ടങ്ങൾ ഉണ്ടാകുന്നതാണ്.

കർക്കടകക്കൂറിന്

(പുണർതം നാലാം പാദം, പൂയം, ആയില്യം) കർക്കടകക്കൂറുകാർക്ക് മൂന്ന്, പന്ത്രണ്ട് എന്നീ ഭാവങ്ങളുടെ നാഥനാണ് ബുധൻ. മൂന്നാം ഭാവത്തിൽ സ്ഥിതി ചെയ്യുന്നു. സ്വതേ മൂന്നിലെ ബുധൻ അനുകൂല ഫലത്തെ നൽകുന്ന ഗ്രഹമല്ല. സമ്മിശ്രമായ രോഗങ്ങളാലുള്ള ക്ലേശങ്ങളും കാര്യതടസ്സങ്ങളും തസ്കരഭയവും ശത്രുക്കളെ കൊണ്ടുള്ള ഉപദ്രവവും ഒക്കെയാണ് മൂന്നിലെ ബുധന്റെ ഫലമായി പറയുക. എന്നാൽ സ്വന്തം വീട്ടിൽ ഉച്ചസ്ഥനായി നിൽക്കുകയാൽ ചില ആനുകൂല്യങ്ങളും ബുധൻ നൽകാതിരിക്കില്ല. ബന്ധുഗുണം, സഹോദര പിന്തുണ, കച്ചവടത്തിൽ ലാഭം, സ്ഥാനമാനങ്ങൾ എന്നിവ നേട്ടങ്ങളിൽ ഉൾപ്പെടും. നല്ല കാര്യങ്ങൾക്കു വേണ്ടിയുള്ള യാത്ര, തൽസംബന്ധമായ ചിലവുകൾ എന്നിവയും ഫലങ്ങളിൽ ഉൾപ്പെടും.

ചിങ്ങക്കൂറിന്

(മകം, പൂരം, ഉത്രം ഒന്നാം പാദം): ചിങ്ങക്കൂറുകാർക്ക് അവരുടെ രണ്ടാമെടം, പതിനൊന്നാമെടം എന്നിവയുടെ അധിപനാണ് ബുധൻ. രണ്ടാം ഭാവത്തിൽ തന്നെ ഭാവനാഥൻ ആയിട്ടുള്ള ബുധൻ ഉച്ചസ്ഥനായി നിൽക്കുകയാൽ സാമ്പത്തിക നേട്ടങ്ങൾ കൈവരിക്കാനാവും. വിദ്യാഭ്യാസം, ഗവേഷണം മുതലായ മേഖലകളിൽ പ്രവർത്തിക്കുന്നവർക്ക് മികവ് തെളിയിക്കാൻ സന്ദർഭം ഉണ്ടാകും. പ്രസംഗകലയിൽ ശ്രദ്ധിക്കപ്പെടുന്നതാണ്. ന്യായമായ കാര്യങ്ങൾ മിക്കതും ലഘുപ്രയത്നത്തിലൂടെ നേടിയെടുക്കാനാവും. രാശിയുടെ നാഥനായ ആദിത്യനുമായി ഒത്തുചേർന്ന് സഞ്ചരിക്കുകയാൽ ചെയ്യുന്ന പ്രവൃത്തി ചെറുതോ വലുതോ ആവട്ടെ അതിൽ വിജയിക്കുന്നതുമാണ്.

കന്നിക്കൂറിന്

(ഉത്രം 2,3,4 പാദങ്ങൾ, അത്തം, ചിത്തിര 1,2, പാദങ്ങൾ): ജന്മരാശിയുടെയും പത്താമെടത്തിന്റെയും അധിപനാണ് ബുധൻ. അതിനാൽ ബുധന്റെ ഉച്ചരാശിസ്ഥിതി കന്നിക്കൂറുകാർക്ക് തൊഴിൽപരമായ നേട്ടങ്ങൾക്ക് കാരണമാകുന്നതാണ്. സ്ഥാനക്കയറ്റമോ ചില ഉത്തരവാദിത്വങ്ങളോ ഉണ്ടാകും. നവസംരംഭങ്ങളുടെ ആലോചനകളുമായി മുന്നോട്ടു നീങ്ങാനാകും. തീർത്ഥാടനം / വിനോദയാത്ര ഇവയ്ക്ക് സാധ്യത. കലാകായിക മത്സരങ്ങളിൽ വിജയിക്കുന്നതാണ്. ബന്ധുക്കളുടെ പൂർണ്ണ പിന്തുണ പ്രതീക്ഷിക്കാം ദാമ്പത്യത്തിൽ സുഖവും സംതൃപ്തിയും അനുഭവപ്പെടും.

തുലാക്കൂറിന്

(ചിത്തിര 3, 4 പാദങ്ങൾ, ചോതി, വിശാഖം 1,2,3 പാദങ്ങൾ): തുലാക്കൂറിന്റെ ഒമ്പതാമെടമായ മിഥുനം പന്ത്രണ്ടാമെടം ആയ കന്നി എന്നിവയുടെ അധിപനാണ് ബുധൻ. പന്ത്രണ്ടാം ഭാവത്തിൽ ഉച്ചസ്ഥനായിരിക്കുന്ന ബുധൻ തുലാക്കൂറിന് വളരെയധികം ഗുണാനുഭവങ്ങൾ നൽകും. സജ്ജനങ്ങളെ / ഗുരുജനങ്ങളെ കാണാനും അവരുടെ അനുഗ്രഹം ലഭിക്കാനും സാധിക്കും. ജീവകാരുണ്യ പ്രവർത്തനത്തിൽ മുഴുകാനിടയുണ്ട്. ഭാഗ്യാനുഭവങ്ങൾ വർദ്ധിക്കുന്നതാണ്. പിതാവിന്റെ ആരോഗ്യസ്ഥിതിയിൽ ഗണ്യമായ മാറ്റം ഉണ്ടാകും. യാത്രകൾ പ്രയോജനം ചെയ്യും. സൽകർമ്മങ്ങൾക്കു വേണ്ടി ചെലവ് ചെയ്യേണ്ടി വന്നേക്കാം.

വൃശ്ചികക്കൂറിന്

(വിശാഖം നാലാം പാദം, അനിഴം, തൃക്കേട്ട): എട്ടാമെടം, പതിനൊന്നാമെടം എന്നിവയുടെ അധിപനാണ് ബുധൻ. പൊതുവേ വൃശ്ചികക്കൂറുകാർക്ക് അനിഷ്ടഗ്രഹമാണ് ബുധൻ. എന്നാൽ പതിനൊന്നാമെടത്തിൽ സ്വക്ഷേത്രമായ കന്നിരാശിയിൽ ഉച്ചനായി സഞ്ചരിക്കുകയാൽ ഗുണങ്ങൾക്കാവും മുൻതൂക്കം. അപകടങ്ങളെയും പ്രതിസന്ധികളെയും അത്ഭുതകരമായി അതിജീവിക്കും. പുതിയ ആദായമാർഗ്ഗങ്ങൾ കണ്ടെത്തുവാനുള്ള ശ്രമങ്ങൾ വിജയിക്കും. സാമ്പത്തിക സ്ഥിതി മെച്ചപ്പെടുന്നതാണ്. തൊഴിലിൽ സംതൃപ്തിയുണ്ടാവും. കടബാധ്യതക്ക് അയവുണ്ടാകും. പിണക്കം തീർന്ന് ബന്ധുക്കൾ ഇണങ്ങരാവുന്നതാണ്. ബൗദ്ധിക വിനോദങ്ങളിൽ വിജയിക്കുവാൻ കഴിയും. ഭോഗസുഖം പ്രതീക്ഷിക്കാം.

ധനുക്കൂറ്

(മൂലം, പൂരാടം, ഉത്രാടം ഒന്നാം പാദം) ഏഴാമെടം, പത്താമെടം എന്നിവയുടെ അധിപനാണ് ബുധൻ. പത്താം ഭാവത്തിൽ സ്ഥിതി ചെയ്യുന്നു. ശുഭഗ്രഹങ്ങൾ കേന്ദ്രരാശികളുടെ അധിപന്മാരാവുന്നത് അശുഭകരമാണ്. എന്നാലും ബലവാനാകയാൽ തൊഴിൽ രംഗത്തനുഭവപ്പെട്ടിരുന്ന മാന്ദ്യത്തെ മറികടക്കുവാൻ സാധിക്കും. ബിസിനസ്സ് യാത്രകൾ വർദ്ധിക്കും. അന്നന്നത്തെ കണക്കുകൾ കൃത്യമായി എഴുതി സൂക്ഷിക്കുക, ഡയറി എഴുതുക തുടങ്ങിയ ശീലങ്ങൾ പുനരാരംഭിച്ചേക്കും. ദാമ്പത്യപ്രശ്നങ്ങൾക്ക് പരിഹാരം തെളിയും. ധനസ്ഥിതി മോശമാവില്ല.

മകരക്കൂറ്

(ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ) ആറാമെടം, ഒമ്പതാമെടം എന്നീ ഭാവങ്ങളുടെ അധിപനായ ബുധൻ ഒമ്പതാമെടത്തിൽ ഉച്ചനായി നിൽക്കുകയാൽ ഭാഗ്യാനുഭവങ്ങൾ പുഷ്ടിപ്പെടും. ചില കാര്യങ്ങളിൽ വേണോ വേണ്ടയോ എന്ന സന്ദേഹം നീങ്ങി വ്യക്തമായ തീർപ്പിലെത്തും. പിതാവിൽ നിന്നുള്ള സ്നേഹവും ആനുകൂല്യങ്ങളും നിർബാധം ലഭിക്കുന്നതാണ്. പഠനത്തിൽ ശരാശരിക്കാരായ വിദ്യാർത്ഥികൾക്ക് പോലും മികവ് തെളിയിക്കാൻ സാധിച്ചേക്കും. ബുദ്ധിശക്തികൊണ്ട് പ്രതിസന്ധികളെ മറികടക്കാൻ സാധിക്കുന്നതാണ്.

കുംഭക്കൂറ്

(അവിട്ടം 3,4 പാദങ്ങൾ, ചതയം, പൂരുരുട്ടാതി 1,2,3 പാദങ്ങൾ):- പഞ്ചമം, അഷ്ടമം എന്നീ ഭാവങ്ങളെ നിയന്ത്രിക്കുന്ന ഗ്രഹമാണ് ബുധൻ. ഉച്ചസ്ഥനായ ബുധൻ ഗുണാനുഭവങ്ങൾ പലതും സമ്മാനിക്കുന്നതാണ്. ആത്മശക്തി ഉജൃംഭിതമാകും. പലരും പിൻവാങ്ങുന്ന കർമ്മങ്ങൾ ഭംഗിയായി ഏറ്റെടുത്ത് നടത്തും. പരാശ്രയത്വം കുറയും. ബന്ധുക്കളുടെ പ്രശ്നങ്ങൾ പരിഹരിക്കാൻ സക്രിയമായ ഇടപെടലുകൾ നടത്തും. വരവുചെലവുകൾ എഴുതി സൂക്ഷിക്കും. ആശയ വിനിമയത്തിലൂടെയും തുറന്ന ചർച്ചകളിലൂടെയും സ്വന്തം നിലപാടുകൾ സുതാര്യവും സുവ്യക്തവുമാക്കും.

മീനക്കൂറ്

(പൂരൂരുട്ടാതി നാലാം പാദം, ഉത്രട്ടാതി, രേവതി) കേന്ദ്രരാശികളായ മിഥുനം, കന്നി എന്നിവയുടെ ആധിപത്യം വഹിക്കുന്ന ഗ്രഹമാണ് ബുധൻ. മീനത്തിന്റെ ഏഴാമെടമായ കന്നിയിൽ സഞ്ചരിക്കുന്നു. ബുധൻ പ്രതികൂല ഗ്രഹമാണെങ്കിലും ചില നേട്ടങ്ങളെങ്കിലും നൽകാതിരിക്കില്ല. ചർച്ചകളിൽ സജീവമായ പങ്കാളിത്തം വഹിക്കും. സംഘടനകളുടെ നേതൃപദവിയിലേക്ക് ഉയർത്തപ്പെടും. കച്ചവടത്തിന്റെ വിപുലീകരണം സാധ്യമാകും. പ്രണയസാഫല്യത്തിന് കാത്തിരിപ്പ് വേണ്ടി വരുന്നതാണ്. ബുദ്ധിപൂർവ്വം കൈക്കൊള്ളുന്ന തീരുമാനങ്ങൾ കുടുംബജീവിതത്തിന്റെ സ്വസ്ഥതയ്ക്ക് കാരണമായേക്കാം.