മകരക്കൂറുകാർക്ക് തൊഴിലിടത്തിൽ സംതൃപ്തി കുറയാം, കുംഭക്കൂറുകാർക്ക് അവസരങ്ങൾ നഷ്ടമാകും, മീനക്കൂറുകാർക്ക് സാഹസങ്ങൾക്ക് മുതിരരുത്

Mars Transit To Thulam Rashi: ചൊവ്വയുടെ തുലാം രാശിയിലെ സഞ്ചാരം മകരക്കൂറു മുതൽ മീനക്കൂറുവരെയുള്ള നാളുകളിൽ ജനിച്ചവരെ എങ്ങനെ സ്വാധീനിക്കുന്നു എന്നു നോക്കാം

Written byS. Sreenivas Iyer

Mars Transit To Thulam Rashi: ചൊവ്വയുടെ തുലാം രാശിയിലെ സഞ്ചാരം മകരക്കൂറു മുതൽ മീനക്കൂറുവരെയുള്ള നാളുകളിൽ ജനിച്ചവരെ എങ്ങനെ സ്വാധീനിക്കുന്നു എന്നു നോക്കാം

S. Sreenivas Iyer

25 Sep 2025 12:00 IST

New Update

1/6

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

ഒമ്പതാമെടത്തിൽ നിന്നും പത്താം ഭാവത്തിലേക്ക് ചൊവ്വ സംക്രമിക്കുന്നു. തൊഴിലിടത്തിൽ സംതൃപ്തി കുറയാനിടയുണ്ട്. കരുതിയ കാര്യങ്ങൾ ചെയ്യാൻ കഴിഞ്ഞേക്കില്ല. ആസൂത്രണ മികവ് ഫലിച്ചുകൊള്ളണമെന്നില്ല. പുതിയ കാര്യങ്ങളുടെ നിർവഹണത്തിൽ വിഘ്നം ഭവിക്കും. ബിസിനസ്സ് യാത്രകൾ കൊണ്ട് പ്രതീക്ഷിച്ച നേട്ടം കൈവന്നേക്കില്ല. സരളമായും സുഗമമായും അനുഭവപ്പെട്ടിരുന്ന കാര്യങ്ങൾ സങ്കീർണ്ണമായി തോന്നും.

2/6

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

വിദ്യാർത്ഥികളുടെയും പഠന നിലവാരത്തിൽ അദ്ധ്യാപകർ ആശങ്കരേഖപ്പെടുത്താം. ഗവേഷകർക്ക് 'ഇരുട്ടിൽ തപ്പുന്ന' പ്രതീതിണ്ടാവുന്നതാണ്. തീർത്ഥാടനത്തിൽ നിന്നും പിന്മാറാനിടയുണ്ട്. എത്ര കിണഞ്ഞു ശ്രമിച്ചാലും ഭൗതികസാഹചര്യങ്ങൾ മെച്ചപ്പെടാത്തതിൽ വിഷമമുണ്ടാവും. ഭൂമിവാങ്ങാനോ/ ഗൃഹനിർമ്മാണം ആരംഭിക്കാനോ കാത്തിരിക്കേണ്ടി വരുന്നതാണ്. അനുരാഗികൾക്കിടയിൽ 'ego' യുണ്ടാവും. തന്മൂലം താത്കാലികമായെങ്കിലും ശൈഥില്യം ഏർപ്പെടാം.

3/6

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

അഷ്ടമത്തിൽ നിന്നും ചൊവ്വ മാറുന്നത് വലിയ ആശ്വാസമാണ്. എങ്കിലും ചിലദോഷഫലങ്ങൾ ഭവിക്കാം. ഒമ്പതിലെ ചൊവ്വ ഭാഗ്യഭ്രംശം ഉണ്ടാക്കും. സ്വയം പ്രതീക്ഷിച്ച സ്ഥാനക്കയറ്റം സഹപ്രവർത്തകന് ലഭിക്കുന്നതിൽ വിഷമിക്കും. നല്ല അവസരങ്ങൾ 'കപ്പിനും ചുണ്ടിനുമിടയിൽ' ഊർന്നുപോകാം. കലാകാരന്മാരുടെ കഴിവുകൾക്ക് അർഹിക്കുന്ന അംഗീകാരം ലഭിച്ചേക്കില്ല. സാമ്പത്തിക തട്ടിപ്പുകളിൽ പെടാതിരിക്കാൻ ശ്രദ്ധിക്കണം. തറവാടിൻ്റെ ഭാഗം നടന്നേക്കും. എന്നാൽ അർഹതയുള്ളത് ലഭിക്കാൻ തർക്കിക്കേണ്ടി വരുന്നതാണ്.

Advertisment

4/6

കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

മാതാപിതാക്കളുടെ ആരോഗ്യകാര്യത്തിൽ കരുതലുണ്ടാവണം. ഉപാസനാദികൾ തടസ്സപ്പെടുന്നതിന് സാധ്യത കാണുന്നു. പൊതുപ്രവർത്തകർ അപവാദങ്ങളെ നേരിടും. ബിസിനസ്സിൽ ഉണർവുണ്ടായേക്കില്ല. വിദ്യാർത്ഥികൾക്ക് പരീക്ഷകളിൽ പ്രതീക്ഷിച്ചത്ര മാർക്ക് ലഭിക്കില്ല. കരാർ പണികളിൽ സന്ദിഗ്ധതയുണ്ടാവും. സഹോദരാനുകൂല്യം കുറയാം. പരുക്കൻ സ്വഭാവത്താൽ സുഹൃത്തുക്കൾ വിരോധികളായേക്കും. വരുമാനമാർഗങ്ങൾ വിപുലീകരിക്കാനുള്ള ശ്രമങ്ങൾക്ക് മാന്ദ്യം നേരിടും.

5/6

മീനക്കൂറിന് (പൂരൂരുട്ടാതി നാലാംപാദം, ഉത്രട്ടാതി, രേവതി)

ചൊവ്വ തുലാംരാശിയിൽ സഞ്ചരിക്കുമ്പോൾ ദോഷഫലങ്ങൾ കൂടുതലായി വന്നുചേരുക തുലാക്കൂറുകാർക്കും വൃശ്ചികക്കൂറുകാർക്കും പിന്നെ മീനക്കൂറുകാർക്കും ആണ്. മീനക്കൂറിൽ ജനിച്ചവർ ഇപ്പോൾ ഒരുവിധത്തിലുള്ള സാഹസങ്ങൾക്കും മുതിരരുത്. മൗനം ഭൂഷണം എന്നത് ആപ്തവാക്യം പോലെ മുറുകെ പിടിക്കണം.

6/6

മീനക്കൂറിന് (പൂരൂരുട്ടാതി നാലാംപാദം, ഉത്രട്ടാതി, രേവതി)

വാഹനം, അഗ്നി, യന്ത്രം, വൈദ്യുതി ഇവ ഉപയോഗിക്കുമ്പോൾ നല്ലവണ്ണം കരുതൽ വേണ്ടതുണ്ട്. ആരോഗ്യപരിരക്ഷ യ്ക്ക് പ്രാമുഖ്യം നൽകണം. ചെറുതോ വലുതോ ആയ കാര്യങ്ങളിൽ പോലും ആസൂത്രണവും ഏകോപനവും കുറ്റമറ്റതാവണം. എങ്കിൽ തന്നെയും തടസ്സങ്ങൾ ഉണ്ടായേക്കാം. നവസംരംഭങ്ങൾ തുടങ്ങരുത്. നവജാതശിശുക്കൾക്ക് ബാലാരിഷ്ടയേറും. നിയമ വ്യവസ്ഥകൾ ഉറപ്പായും പാലിക്കണം. കളവ് പോകാനിടയുള്ളതിനാൽ പേഴ്സ്, ബാങ്കിംഗ് കാർഡുകൾ, മൊബൈൽ ഇത്യാദികൾ സൂക്ഷിക്കണം. ജാതകമനുസരിച്ച് അനുകൂലമായ സമയമാണെങ്കിൽ ചൊവ്വയുടെ ഗോചരഫലത്തിലുള്ള ദോഷങ്ങൾ ലഘൂകരിക്കപ്പെടും.

Horoscope Astrology

Stay updated with the latest news headlines and all the latest Lifestyle news. Download Indian Express Malayalam App - Android or iOS.