മകരക്കൂറുകാർക്ക് പലതരം സമ്മർദങ്ങൾ, കുംഭക്കൂറുകാർക്ക് തൊഴിലിൽ അതൃപ്തി, മീനക്കൂറുകാർക്ക് വാക്കുകൾ ശത്രുത്വത്തിന് കാരണമാകാം

മകരക്കൂറിന് (ഉത്രാടം 2,3,4 പാദങ്ങൾ, തിരുവോണം, അവിട്ടം 1,2 പാദങ്ങൾ)

നാലാമെടം, പത്താമെടം എന്നിവയുടെ അധിപനാണ് മകരക്കൂറുകാർക്ക് ചൊവ്വ. ഭൂമി വ്യവഹാരം നീളാം. കെട്ടിടത്തിന് വാടകക്കാരെ കിട്ടാൻ വൈകിയേക്കും. പുതുക്കിപ്പണിക്ക് പ്രതീക്ഷിച്ചതിലും ചെലവുണ്ടാവും. ബന്ധുക്കൾ തമ്മിലുള്ള പ്രശ്നങ്ങളിൽ ഇടപെടാതിരിക്കുക ഉത്തമം. സുഹൃത്തുക്കളുടെ വാഗ്ദാനം പാഴാകാനിടയുണ്ട്. പുതിയ വാഹനം വാങ്ങുന്ന കാര്യത്തിൽ കുടുംബത്തിൽ തന്നെ ഭിന്നാഭിപ്രായം ഉണ്ടാവുന്നതാണ്. 

സ്വന്തം പണം മുടക്കി ചെയ്യുന്ന ബിസിനസ്സിൽ ലാഭം കുറയാം. നിലവിലെ ജോലി ഉപേക്ഷിക്കുന്നത് ആശാസ്യമല്ല. ഉദ്യോഗസ്ഥർക്ക് പലതരം സമ്മർദ്ദങ്ങൾ ഉയരും. പൊതുപ്രവർത്തനത്തിൽ ദുരാരോപണങ്ങൾ ഉന്നയിക്കപ്പെടും. സാമ്പത്തികമായ ജാഗ്രത അനിവാര്യമാണ്. സാമൂഹിക മാധ്യമങ്ങളിലെ നിലപാടുകൾക്ക് നേരെ കടുത്ത വിമർശനം തൊടുത്തുവിടപ്പെടും. ആരോഗ സംരക്ഷണത്തിൽ ഉപേക്ഷയരുത്.

Also Read: നവംബർ മാസഫലം, അശ്വതി മുതൽ രേവതിവരെ

കുംഭക്കൂറിന് (അവിട്ടം 3, 4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)

കുംഭക്കൂറുകാർക്ക് 3, 10 ഭാവങ്ങളുടെ അധിപനാണ് ചൊവ്വ. മൂന്നാം ഭാവത്തിലെ വിഷയങ്ങളിൽ സാഹസം, ധൈര്യം, സഹായം, സാഹോദര്യം ഇവ ഉൾപ്പെടുന്നു.  കുജൻ്റെ മൗഢ്യാവസ്ഥയാൽ സഹോദരരുമായി സകാരണ/ അകാരണ പിണക്കം വരും. സ്വത്തുതർക്കം മൂലം വ്യവഹാരം ഭവിക്കാം. ദുർബുദ്ധിയുണ്ടാവും. സാഹസങ്ങൾക്ക് ഒരുമ്പെടുന്നതാണ്. പ്രതീക്ഷിച്ച സഹായം കിട്ടിയേക്കില്ല. മറ്റുള്ളവരെ സഹായിക്കാമെന്ന് വാക്കുകൊടുത്തിട്ടുണ്ടെങ്കിൽ അതും പരാജയപ്പെടും. 

പത്താമെടം കർമ്മഭാവമാകയാൽ തൊഴിലിൽ അതൃപ്തി തുടരും. പുതുതുടക്കങ്ങൾക്ക് പ്രതീക്ഷിച്ചത്ര വരവേൽപ്പ് ലഭിക്കണമെന്നില്ല. കലാകാരന്മാർക്ക് പറഞ്ഞുവെച്ച അവസരങ്ങൾ നഷ്ടമാകാനിടയുണ്ട്. പറഞ്ഞുറപ്പിച്ച പ്രതിഫലം കിട്ടിയെന്നുവരില്ല. പൊതുരംഗത്ത് വിമർശിക്കപ്പെടും. സഹപ്രവർത്തകരുടെ ജോലി കൂടി ചെയ്യേണ്ടി വരാം. കർമ്മരംഗത്ത് സുതാര്യത കുറയാം. എന്തോ രഹസ്യങ്ങൾ സൂക്ഷിക്കുകയാണെന്ന തോന്നലുണ്ടാവും.

Also Read: ബുധകുജയോഗം തുടരുമ്പോൾ ദോഷം ആർക്കൊക്കെ? അശ്വതി മുതൽ രേവതിവരെ

മീനക്കൂറിന് (പൂരൂരുട്ടാതി നാലാംപാദം, ഉത്രട്ടാതി, രേവതി)

രണ്ടും ഒമ്പതും ഭാവങ്ങളുടെ അധിപനാകയാൽ മീനക്കൂറുകാർക്ക് ചൊവ്വയുടെ മൗഢ്യം ദോഷകരമാണ്. വാക്കുകൾ ശത്രുത്വത്തിന് കാരണമാകാം. വാക്കുകൾ കൊണ്ട് അവമാനിതരാവുന്നതിനും സാധ്യതയുണ്ട്. വാഗ്ദാനലംഘനം വിഷമിപ്പിക്കുന്നതാണ്. പുതിയ കാര്യങ്ങൾ തുടങ്ങുന്നതിന്  തടസ്സങ്ങളേർപ്പെടും. കുടുംബത്തിനൊപ്പം സമയം ചെലവഴിക്കാൻ സാധിച്ചേക്കില്ല. വീട്ടുകാര്യങ്ങളിൽ ഉദാസീനരാവും. പുതിയ ബിസിനസ്സിൽ കടമ്പകൾ കാണും. 

Also Read: തുലാം മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ

ഭാഗ്യാനുഭവങ്ങൾ ഇടയ്ക്ക് ശുഷ്കമാകുന്ന സ്ഥിതിയുണ്ടാവും. തൊഴിൽ തേടുന്നവർ അവസരങ്ങൾക്കായി കാത്തിരിക്കേണ്ടി വരുന്നതാണ്. പിതാവിന്റെ രാഷ്ട്രീയ സ്വാധീനം കുറയുന്നതായി തോന്നും. നിസ്വാർത്ഥത അംഗീകരികപ്പെടില്ല. സുഗമമായിരുന്നവ ദുർഗമങ്ങളാവും. ഭിന്നനിലപാടുകളിൽ പെട്ടവരുമായി ഒത്തിണങ്ങി പ്രവർത്തിക്കാൻ ക്ലേശിച്ചേക്കും. പാരമ്പര്യസ്വത്തിൻ്റെ അനുഭവാവകാശം നേടിയെടുക്കുക ദുഷ്കരമാവും.

Read More: ശുക്രൻ നീചരാശിയിൽ; ദോഷം ആർക്കൊക്കെ? അശ്വതി മുതൽ രേവതി വരെ