1198 കർക്കടക മാസത്തിലെ സമ്പൂർണ നക്ഷത്രഫലം

KollaVarsham 1198 Karkidakam Malayalam Month Horoscope Astrological Predictions Aswathi to Revathi: 1198 മിഥുനമാസം 31 ന് ഞായാഴ്ച വൈകിട്ട് 5 മണി 7 മിനിട്ടിനാണ് കർക്കടകരവിസംക്രമം. ഉത്തരായനം അവസാനിക്കുകയും ദക്ഷിണായനം ആരംഭിക്കുകയും ചെയ്യുന്ന വേളയാണത്. 1198 ൽ കർക്കടകമാസം 31 തീയതിയുണ്ട്. 2023 ജൂലൈ 17 തിങ്കളാഴ്ചയാണ് കർക്കടകം ഒന്നാം തീയതി വരുന്നത്. 2023 ആഗസ്റ്റ് 16 ബുധനാഴ്ച കർക്കടകം 31-ാം തീയതിയും ഭവിക്കുന്നു.

വാമൊഴിയുടെ വഴക്കത്തിൽ മലയാളിയുടെ ക്ലേശത്തെ കാണിക്കുന്ന ‘പഞ്ഞമാസം’ ആണ് കർക്കടകം. ‘കർക്കടകം ദുർഘടം’ എന്ന ചൊല്ല് അങ്ങനെ പരന്നു. രാമായണമാസം എന്ന പ്രത്യേകതയുമുണ്ട്, കർക്കടകത്തിന്. കാലപുരുഷന്റെ (Time personified) ഹൃദയമാണ് കർക്കടകം രാശി. രാശിനാഥൻ ചന്ദ്രൻ. ഇത്തവണ അമാവാസിയിൽ തുടങ്ങി അമാവാസിയിൽ അവസാനിക്കുന്നു എന്നത് കർക്കടകത്തിന്റെ പ്രത്യേകത. ജ്യോതിഷ നിയമപ്രകാരം ഇത് ‘അധിമാസം’ ആണ്. രണ്ട് സൂര്യസംക്രമങ്ങൾക്കിടയിൽ രണ്ട് അമാവാസകൾ വരുമ്പോഴാണ് ‘അധിമാസം’ സംഭവിക്കുന്നത്. അതിനാൽ ഇത്തവണ ആഷാഢമാസം ഇരട്ടിക്കുന്നു.

1199 ചിങ്ങം ഒന്നിന് ശ്രാവണമാസവും സമാരംഭിക്കുകയാണ്. പുണർതം ഞാറ്റുവേലയുടെ അവസാന ഭാഗത്ത് തുടങ്ങി ആയില്യം ഞാറ്റുവേല തീരുന്നതുവരെയാണ് കർക്കടകമാസത്തെ സൂര്യഗതി. പുണർതം നക്ഷത്രത്തിൽ തുടങ്ങി ഒരുവട്ടം രാശിചക്രഭ്രമണം പൂർത്തിയാക്കി ആയില്യം നക്ഷത്രത്തിൽ അവസാനിക്കും വിധമാണ് ചന്ദ്രന്റെ കർക്കടക മാസത്തിലെ സഞ്ചാരം.

ശനി കുംഭം രാശിയിൽ ചതയം നക്ഷത്രത്തിൽ വക്രഗതിയിൽ തുടരുന്നു. വ്യാഴം മേടം രാശിയിൽ ഭരണി നക്ഷത്രത്തിൽ സഞ്ചരിക്കുകയാണ്. രാഹു കേതു യഥാക്രമം മേടത്തിലും (അശ്വതിയിലും), തുലാത്തിലും (ചിത്തിരയിലും) അപസവ്യഗതി തുടർന്നുകൊണ്ടിരിക്കുന്നു. കുജൻ ചിങ്ങം രാശിയിൽ തന്നെയാണ്. ബുധൻ മാസാദ്യം കർക്കടകത്തിലാണ്. പത്താം തീയതി ചിങ്ങത്തിലേക്ക് പകരുന്നു. ശുക്രൻ ചിങ്ങത്തിലാണ്, മാസത്തിന്റെ ആരംഭത്തിൽ. എന്നാൽ കർക്കടകം എട്ടാം തീയതി വക്രഗതി തുടങ്ങി കർക്കടകം രാശിയിലേക്ക് പോകുന്നു. ഈ മാസം അവസാന ആഴ്ച മുതൽ ശുക്രന് മൗഢ്യം വരുന്നുമുണ്ട്. ഇവ്വിധമാണ് നവഗ്രഹങ്ങളുടെ കർക്കടകമാസത്തിലെ രാശിസ്ഥിതി.

ഇതെങ്ങനെയാണ് മേടം മുതൽ മീനം വരെയുള്ള പന്ത്രണ്ട് രാശികളിലായി വരുന്ന, അശ്വതിയിൽ തുടങ്ങി രേവതിയിൽ അവസാനിക്കുന്ന, 27 നാളുകാരെ സ്വാധീനിക്കുന്നത് എന്ന യാഥാർത്ഥ്യമാണ് ഇവിടെ അപഗ്രഥിക്കുന്നത്.

അശ്വതി: സമൂഹത്തിൽ സ്വാധീനശക്തി കൂടുന്നതായിരിക്കും. അധികാരസ്ഥാനത്തിരിക്കുന്നവർക്ക്‌ നന്നായി ശോഭിക്കുവാനാവും. മത്സരങ്ങളിൽ അനായാസ വിജയം കൈവന്നേക്കും. ഉന്നതരുടെ ഒത്താശയുണ്ടാവുന്നതാണ്. വ്യാപാരത്തിൽ ലാഭം ഉണ്ടായില്ലെങ്കിൽ തന്നെയും നഷ്ടം വരാനിടയില്ല. കുടുംബസ്ഥാനാധിപനായ വ്യാഴം രാഹുവിൽ നിന്നും അകന്ന് സഞ്ചരിക്കുന്നതിനാൽ കുടുംബത്തിൽ ക്ഷേമം പുലരുന്നതാണ്. മക്കളുടെ പഠനകാര്യത്തിന് ബാങ്ക് വായ്പ പ്രയോജനപ്പെടുത്തിയേക്കും. ദേഹക്ലേശം കുറയുന്നതാണ്. സഞ്ചാരവും തീർത്ഥാടനവും അധികരിക്കും.

ഭരണി: ജന്മനക്ഷത്രത്തിൽ വ്യാഴവും ഏഴാം നക്ഷത്രമായ പൂയത്തിൽ സൂര്യനും സഞ്ചരിക്കുന്നത് കുറച്ച് മാനസികവും തൊഴിൽ പരവുമായ സമ്മർദ്ദങ്ങൾക്ക് വഴിവെച്ചേക്കാം. വിജയത്തിന് തിളക്കം കുറഞ്ഞുപോയതായി തോന്നാം. രണ്ടാം ഭാവാധിപനായ ശുക്രന് വക്രഗതി വരികയാൽ പ്രതീക്ഷിച്ച ധനം കൈയ്യിൽ എത്തിച്ചേരാൻ താമസമുണ്ടായേക്കാം. ഇതൊക്കെയാണെങ്കിലും ന്യായമായ ആവശ്യങ്ങൾ നിറവേറാൻ സാധിക്കും. തൊഴിൽ യാത്രകൾ ഗുണപ്രദമാവാം. ഗാർഹികമായി സന്തോഷവും സംതൃപ്തിയും അനുഭവപ്പെടുന്നതാണ്

കാർത്തിക: ശക്തമായ നിലപാടുകൾ കൈക്കൊള്ളും. ഇത് ഔദ്യോഗികമായി കുറേ ശത്രുക്കളെ സൃഷ്ടിച്ചേക്കാം. മൂന്നിലെ സൂര്യസ്ഥിതി രാഷ്ട്രീയമായ പിൻബലം ഉണ്ടാവും എന്നതിന്റെ സൂചനയാണ്. വിദ്യാർത്ഥികളുടെ പഠനനിലവാരം ഉയരാം. ഗ്രന്ഥപാരായണത്തിലൂടെ വിജ്ഞാന സമ്പത്ത് വളർത്താൻ സാധിക്കും. ഭൂമിയിടപാടുകൾ അത്ര ഗുണകരമായി വരണമെന്നില്ല. മക്കളുടെ വിവാഹത്തിന് തയ്യാറെടുപ്പുകൾ തുടങ്ങിയേക്കും. വരുമാനം മോശമാവില്ല. കിടപ്പ് രോഗികൾക്ക് തെല്ലെങ്കിലും ആശ്വാസം ഉണ്ടാവുന്നതാണ്.

രോഹിണി: യാത്രകൾ മനസ്സന്തോഷത്തിന് വഴിവെക്കും. മനക്ലേശവും ആലസ്യവും നീങ്ങി തൊഴിലിൽ പൂർണശ്രദ്ധ ചെലുത്താൻ സാധിക്കുന്നതാണ്. വ്യാപാരവിപുലീകരണത്തിന് വായ്പാ സഹായം ലഭ്യമായേക്കും. ഗൃഹനവീകരണത്തിന് പണച്ചെലവ് ഉണ്ടാകുന്നതാണ്. നാലിലെ ചൊവ്വയാൽ സുഹൃത്തുക്കളുമായി കലഹിച്ചേക്കാം. മാതാവിന്റെ ആരോഗ്യസ്ഥിതിയിൽ ജാഗ്രത വേണം. റിയൽ എസ്റ്റേറ്റ് തൊഴിലിൽ നഷ്ടസാധ്യത കാണുന്നു. പൊതുവേ നേട്ടങ്ങൾക്ക് മുൻതൂക്കം ഉണ്ടെങ്കിലും എല്ലാക്കാര്യത്തിലും കരുതൽ വേണ്ട കാലമാണ്.

മകയിരം: മാനസികോർജ്ജവും ശരീരശക്തിയും ഉണ്ടാവും. സൽകാര്യങ്ങളിൽ പങ്കാളിയാകും. ഉദ്യോഗസ്ഥർക്ക് ചുമതലകൾ കൂടാം. വ്യാപാരത്തിലെ മാന്ദ്യം നീങ്ങി പുരോഗതി പ്രതീക്ഷിക്കാം. യാത്രകൾ കൊണ്ട് നേട്ടങ്ങൾ വന്നെത്തും. ഗവേഷകർക്ക് പ്രബന്ധം സമർപ്പിക്കാൻ സാധിക്കുന്നതാണ്. പ്രണയികളുടെ ഹൃദയബന്ധം ദൃഢമാകും. ബന്ധുജനങ്ങൾ പിണങ്ങുമെങ്കിലും കുടുംബജീവിതത്തിലെ പ്രശ്നങ്ങൾക്ക് പോംവഴി കണ്ടെത്തുവാൻ കഴിയുന്നതാണ്.

തിരുവാതിര: അഭ്യുദയം പല വഴികളിലൂടെ കരഗതമാവും. സ്ഥാനോന്നതി കർമ്മമേഖലയെ ചരിതാർത്ഥമാക്കും. ലക്ഷ്യം നേടാൻ കുറഞ്ഞസമയം മാത്രമേ വേണ്ടിവരികയുള്ളു. പുതിയ പങ്കാളികളെ ചേർത്ത് ബിസിനസ്സ് വിപുലീകരിക്കുന്നതാണ്. ദാമ്പത്യജീവിതത്തിൽ സമാധാനവും ശ്രേയസ്സുമുണ്ടാവുന്നതാണ്. മക്കളുടെ പഠനപുരോഗതി സന്തോഷമേകും. സഹോദരരുടെ ഉറച്ച പിന്തുണ ഭൗതികമായും വൈകാരികമായും കരുത്ത് പകരും. ധനസ്ഥിതി മെച്ചപ്പെടുന്നതാണ്. കൃത്യമായ ആരോഗ്യപരിശോധനകൾ ആത്മവിശ്വാസം വളർത്തും.

പുണർതം: നേരത്തെ എടുത്ത തീരുമാനങ്ങൾ ഇപ്പോൾ സാർത്ഥകമാവും. പരിശ്രമത്തോടൊപ്പം ദൈവാധീനവും ഭവിക്കുന്നതാണ്. അസാധ്യമെന്ന് കരുതി ശ്രമം ഉപേക്ഷിച്ചവയിൽ വിജയം ഉണ്ടാകുന്നതാണ്. നിക്ഷേപങ്ങളിൽ നിന്നും ആദായം വർദ്ധിച്ചേക്കും. തൊഴിലന്വേഷകർക്ക് നിരാശപ്പെടേണ്ടിവരില്ല. നവസംരംഭങ്ങൾ തുടങ്ങാൻ കാത്തിരിക്കുന്നവർക്ക് സർക്കാരിന്റെ അനുമതി ലബ്ധമാകുന്നതാണ്. തുടർ പഠനം സംബന്ധിച്ച പ്രശ്നങ്ങൾ നേരിട്ടിരുന്നവർക്ക് ആഗ്രഹ സഫലീകരണം ഭവിക്കും. ചെറുപ്പക്കാരുടെ വിവാഹകാര്യത്തിൽ നല്ല തീരുമാനം വന്നെത്തും. തീർത്ഥാടനത്തിലൂടെ ആത്മീയമായ ഉണർവുകളും സംഭവിക്കാം.

പൂയം: സൂര്യൻ ജന്മരാശിയിൽ സഞ്ചരിക്കുകയാൽ ആലസ്യവും വിഭവനാശവും അലച്ചിലുമേറും. ലക്ഷ്യപ്രാപ്തി ഏറ്റവും ദുഷ്കരമാവാം. തൊഴിലിടത്തിലെ വിയോജിപ്പുകൾ എങ്ങനെ കൈകാര്യം ചെയ്യണമെന്നറിയാതെ വിഷമിക്കുന്നതാണ്. പരുഷവാക്കുകൾ പറയേണ്ട സാഹചര്യം സഞ്ജാതമാകുന്നതാണ്. മാസത്തിന്റെ രണ്ടാം പകുതി മുതൽ ഗുണാനുഭവങ്ങൾ വന്നുചേരും. വരുമാനത്തിൽ വളർച്ച പ്രതീക്ഷിക്കാം. കലാമത്സരങ്ങളിൽ പാരിതോഷികം കിട്ടാം. കുടുംബാംഗങ്ങളുടെ ഭാവി സംബന്ധിച്ച ഉചിത തീരുമാനങ്ങൾ കൈക്കൊള്ളാനാവും.

ആയില്യം: സഹപ്രവർത്തകരുടെ കുതന്ത്രങ്ങളെ പ്രതിരോധിക്കും. കുത്സിതകർമ്മങ്ങളെ മറികടക്കും. ഔദ്യോഗിക കാര്യങ്ങളിൽ അതൃപ്തി തോന്നാം. വ്യാപാര കാര്യങ്ങൾക്ക് യാത്രയുണ്ടായേക്കും. ദേഹാലസ്യം, ആരോഗ്യപ്രശ്നങ്ങൾ എന്നിവ സാധ്യതകളാണ്. പല വഴികളിലൂടെ പണം വരാം. മിതവ്യയശീലം വഴിമാറാനിടയുണ്ട്. ദാമ്പത്യത്തിൽ അലോസരങ്ങൾ ഉയർന്നേക്കാമെങ്കിലും അത് താൽകാലികമായിരിക്കും. വിദ്യാഭ്യാസത്തിൽ ഉയർച്ച ഉണ്ടാകുന്നതാണ്. വയോധികരുടെ ആരോഗ്യകാര്യത്തിൽ കരുതൽ വേണ്ടതുണ്ട്.

മകം: മാസത്തിന്റെ തുടക്കത്തിൽ ക്ലേശങ്ങൾക്കാണ് ആധിക്യം. പന്ത്രണ്ടിൽ ആദിത്യൻ സഞ്ചരിക്കുകയാൽ അലച്ചിലും സർക്കാർ വിഷയങ്ങളിൽ കാര്യവിഘ്നവും വരാം. മകം നക്ഷത്രത്തിൽ ചൊവ്വ സഞ്ചരിക്കുകയാൽ ആരോഗ്യപ്രശ്നങ്ങളും, ആത്മവിക്ഷോഭങ്ങളും വരാം. പലതരം നേട്ടങ്ങൾ ഉണ്ടാവുമെങ്കിലും അവയ്ക്ക് മികവ് കുറയും. ധനവരവ് പ്രതീക്ഷിച്ചതുപോലെ തന്നെയാവും. പുതുജോലി കിട്ടാം; എന്നാൽ പഴയ ജോലി ഉപേക്ഷിക്കുന്നത് ഉചിതമാവില്ല. സാഹസങ്ങൾ ഒഴിവാക്കണം.

പൂരം: പല കാര്യങ്ങളിലും നിലവിലെ സ്ഥിതി തന്നെ തുടരും. വലിയ മാറ്റങ്ങൾ ഉണ്ടാവണമെന്നില്ല. തൊഴിൽപരമായി സമ്മർദ്ദം ഉണ്ടാകാം. മേലധികാരികളുടെ അനിഷ്ടം നേരിടേണ്ടി വന്നേക്കും. ഏറ്റെടുത്ത ദൗത്യങ്ങൾ പൂർത്തീകരിക്കാൻ സാധിക്കണമെന്നില്ല. കുടുംബജീവിതത്തിൽ പിണക്കങ്ങളും ഭിന്നതകളും ഉണ്ടാവാം. വിദ്യാർത്ഥികൾക്ക് പഠനത്തിൽ ഏകാഗ്രത കുറയുന്നതാണ്. ആരോഗ്യപ്രശ്നങ്ങൾക്ക് വൈദ്യ സഹായം പ്രയോജനപ്പെടുത്തേണ്ടതുണ്ട്. വ്യവഹാരങ്ങളിൽ അനുരഞ്ജനത്തിന് മുതിരുകയാവും നല്ലത്.

ഉത്രം: ഉന്മേഷത്തോടെ കർമ്മമേഖലയിൽ വ്യാപരിക്കുവാനുള്ള ശ്രമങ്ങൾ കുറച്ചൊക്കെ വിജയിക്കുന്നതാണ്. പുതുസംരംഭങ്ങളിൽ നിന്നും ചെറുനേട്ടങ്ങൾ വരാതിരിക്കില്ല. ചിങ്ങക്കൂറുകാരായ ഉത്രം നാളുകാരെക്കാൾ കർക്കടക മാസത്തിൽ കൂടുതൽ നല്ല ഫലങ്ങൾ അനുഭവിക്കുക കന്നിക്കൂറുകാരായ ഉത്രം നാളുകാരാവും. വിവാഹാലോചനകളിൽ അനുകൂല തീരുമാനം ഉണ്ടാവുന്നതാണ്. ദൂരദിക്കുകളിലുള്ളവർക്ക് നാട്ടിലേക്ക് മടങ്ങാൻ സാധിച്ചേക്കും. വ്യാപാരകാര്യത്തിൽ ലോണോ ചിട്ടികളോ ഗുണം ചെയ്തേക്കാം. ആരോഗ്യപ്രശ്നങ്ങൾ ചികിൽസയിലൂടെ നിയന്ത്രിക്കാൻ സാധിക്കുന്നതാണ്.

അത്തം: ആദർശങ്ങൾ മടക്കി പോക്കറ്റിലിട്ട് പ്രായോഗികമായി ചിന്തിക്കും. വിജയം നേടാനുള്ള വഴികൾ തെളിയും. വ്യാപാരക്കരാറുകൾ പുതുക്കപ്പെടാം. തൊഴിൽ തേടുന്നവർക്ക് നിരാശപ്പെടേണ്ടി വരില്ല. വിദ്യാഭ്യാസം, ഗവേഷണം എന്നിവയിൽ മുന്നേറ്റമുണ്ടാകും. കലാകാരന്മാരുടെ പ്രതിഭാവിലാസം അംഗീകരിക്കപ്പെടാം. കൃത്യമായ കരുനീക്കങ്ങളിലൂടെ പ്രതിദ്വന്ദ്വികളെ മറികടക്കാൻ സാധിക്കുന്നതാണ്. പന്ത്രണ്ടിലെ ചൊവ്വയുടെ സ്ഥിതി അനുകൂലമല്ല. ആരോഗ്യത്തിൽ ജാഗ്രത വേണ്ടതുണ്ട്.

ചിത്തിര: കൃത്യതയുണ്ടാവും, പ്രവർത്തനത്തിൽ. ആകയാൽ മേലധികാരികളുടെ പ്രീതിയുണ്ടാവും. ദൗത്യങ്ങൾ വേഗത്തിൽ പൂർത്തിയാക്കുകയും ചെയ്യും. കുടുംബാംഗങ്ങൾക്കൊപ്പം ദീർഘയാത്രകളിൽ പങ്കെടുത്തേക്കും. ആഢംബരവസ്തു ക്കൾ വാങ്ങുന്നതാണ്. പ്രിയപ്പെട്ടവർക്ക് അവ സംഭാവന ചെയ്തേക്കും. വിനോദപരിപാടികൾ ആസ്വദിക്കാൻ നേരം കണ്ടെത്തും. കുടുംബാംഗങ്ങളുമായി ഒന്നും കൂടിയാലോചിക്കുന്നില്ലെന്ന് പരാതി ഉയരാം. സൂര്യൻ, ചൊവ്വ, ശനി, കേതു, രാഹു എന്നീ പാപഗ്രഹങ്ങൾ പ്രായേണ പ്രതികൂലികളാവുകയാൽ സാഹസകർമ്മങ്ങൾക് മുതിരരുത്. ഇടപാടുകളിൽ സൂക്ഷ്മതയും വേണം.

ചോതി: കാലം അനുകൂലമാണ്, പുതുസംരംഭങ്ങൾ തുടങ്ങാനും നിലവിലുള്ളതിനെ വിപുലീകരിക്കാനും ഒക്കെ. ഉദ്യോഗസ്ഥർക്ക് സ്ഥാനക്കയറ്റം, വേതനവർദ്ധന എന്നിവ പ്രതീക്ഷിക്കാം. ഭൂമിവാങ്ങുക, വിൽക്കുക തുടങ്ങിയവയുമായി ബന്ധപ്പെട്ടവർക്കും പതിനൊന്നാം ഭാവത്തിലെ കുജസ്ഥിതിയാൽ ഗുണമുണ്ടാവും. നിക്ഷേപങ്ങളിൽ നിന്നും ഊഹക്കച്ചവടത്തിൽ നിന്നും ആദായം വർദ്ധിക്കുന്നതാണ്. കുടുംബജീവിതത്തിൽ സ്വസ്ഥതയും സമാധാനവും പുലരും. കുടുംബാംഗങ്ങൾക്കിടയിലെ പാരസ്പര്യം ദൃഢമാകും.

വിശാഖം: ഗുണാനുഭവങ്ങൾ പലതും അനുഭവത്തിലെത്തുന്ന മാസമാണ്. ഉദ്യോഗാർത്ഥികൾക്ക് പുതിയ അവസരങ്ങൾ ലഭിക്കുന്നതാണ്. നിലവിലെ തൊഴിലിൽ അധികാരമുളള പദവികൾ വന്നുചേരാം. ബിസിനസ്സിൽ ആദായം ഉയരുന്നതാണ്. ഉപഭോക്താക്കളെ ആകർഷിക്കുന്നതിനായി നടത്തുന്ന പരിഷ്കാരങ്ങൾ പ്രയോജനം ചെയ്യും. വിദ്യാർത്ഥികൾക്ക് പ്രോജക്ടുകൾ വിജയകരമായി പൂർത്തീകരിക്കാനാവും. ദാമ്പത്യരംഗം വിശേഷിച്ചും ഗാർഹിക ജീവിതം പൊതുവേയും ശ്രേയസ്കരമാവും. ആർത്ഥികമായ സുസ്ഥിതി വന്നെത്തും.

അനിഴം: ഗുണദോഷസമ്മിശ്രമായ മാസമാണ്. കച്ചവടത്തിൽ നിന്നും ന്യായമായ ലാഭം പ്രതീക്ഷിക്കാം. വിപുലീകരണത്തിനും കൂടുതൽ മുതൽമുടക്കിനും ഈ മാസം അത്ര അനുകൂലമല്ല. ഉദ്യോഗസ്ഥർക്ക് ചില ദുർഘട ദൗത്യങ്ങൾ ഏറ്റെടുക്കേണ്ടി വരാം. വിദ്യാർത്ഥികൾ ഇടക്കാല പരീക്ഷകൾ, അഭിമുഖങ്ങൾ എന്നിവയിൽ ശോഭിക്കും. മക്കളുടെ ഭാവികാര്യങ്ങളിൽ കൃത്യമായ തീരുമാനം കൈക്കൊള്ളാൻ ക്ലേശിക്കും. ഭൂമി സംബന്ധിച്ച ഇടപാടുകളിൽ നഷ്ടം വരാൻ സാധ്യത കാണുന്നു. സ്വന്തം ആരോഗ്യപരിപാലനത്തിൽ അലംഭാവമരുത്.

തൃക്കേട്ട: കാര്യവിളംബം വരാം. പ്രവൃത്തികളിൽ ശ്രദ്ധ കുറഞ്ഞേക്കും. വിജയഘടകങ്ങളെക്കുറിച്ച് ചിലപ്പോൾ ധാരണയുണ്ടാവണം എന്നില്ല. ഔദ്യോഗിക ജീവിതത്തിൽ അധികാരികളുടെ അപ്രീതി നേടിയേക്കും. സ്വന്തം നിലയ്ക്ക് ചെയ്യുന്ന തൊഴിലുകളിൽ ഉന്നമനം കഷ്ടിയാവും. വീടുവിട്ടുനിൽക്കേണ്ട സാഹചര്യം വരാം. പഴയ ചില വഴക്കുകളോ വ്യവഹാരങ്ങളോ വീണ്ടും തലവേദനയ്ക്ക് കാരണമായേക്കാം. ഗാർഹിക ജീവിതത്തിൽ പിണക്കവും ഇണക്കവും തുടരപ്പെടും. നിത്യച്ചെലവുകൾ നടന്നുകൂടുന്നതാണ്.

മൂലം: ദാമ്പത്യത്തിലും തൊഴിലിലുമൊക്കെ പലതരം പ്രശ്നങ്ങളെ അഭിമുഖീകരിക്കാം. എന്നാലും അവയെ അതിജീവിക്കാനുള്ള സഹജശക്തിയും ഉണർന്ന് പ്രവർത്തിക്കും. കടബാധ്യതകൾ അലട്ടാം. അതേസമയം പുതിയ ചിട്ടി, വായ്പ എന്നിവയിലൂടെ ധനം സമാഹരിക്കാനും സാധിക്കുന്നതാണ്. പുതുസംരംഭങ്ങൾ സമാരംഭിക്കാൻ കർക്കടകം കഴിയുന്നതുവരെ കാക്കുകയാവും ഉചിതം. ചിലരുടെ അപ്രതീക്ഷിത പിന്തുണ കരുത്തേകും. അനാവശ്യ വിവാദങ്ങളിൽ നിന്നും ഒഴിയുകയാവും ഉചിതം. ആരോഗ്യപാലനത്തിൽ ശ്രദ്ധ വേണം.

പൂരാടം: സ്വന്തം ശക്തിയിൽ വിശ്വാസം കുറയാം. അതിനാൽ പല കാര്യങ്ങൾക്കും പരാശ്രയത്വമേറും. കൃത്യനിഷ്ഠ പാലിക്കുന്നതിൽ വീഴ്ചവന്നേക്കും. വിദ്യാർത്ഥികൾക്ക് പഠനത്തിൽ സ്വതസ്സിദ്ധമായ കഴിവ് പുറത്തെടുക്കാൻ കഴിഞ്ഞെന്നു വരുന്നതല്ല. തൊഴിലിൽ അനുഭവപ്പെടുന്ന ധനപരമായ ഏറ്റക്കുറച്ചിലുകൾ വിഷമം ഉണ്ടാക്കിയേക്കാം. വൈകാരികപ്രതികരണങ്ങൾ ശത്രുക്കളെ സൃഷ്ടിക്കുമെന്ന് ഓർക്കേണ്ടതുണ്ട്. ക്ഷമയാണ് ഏറ്റവും വലിയ ആയുധം എന്ന പാഠം പ്രാവർത്തികമാക്കേണ്ട സന്ദർഭമാണ്. പതിവ് ആരോഗ്യപരിശോധനകളിൽ മുടക്കം വരുത്തരുത്.

ഉത്രാടം: പ്രൊഫഷണലുകൾക്ക് തൊഴിൽ രംഗത്ത് മത്സരങ്ങളെ നേരിടേണ്ടി വന്നേക്കാം. കരാറുകൾ പുതുക്കി കിട്ടുവാൻ സാധ്യത കുറവാണ്. സാമ്പത്തിക സ്വാശ്രയത്വം പരീക്ഷിക്കപ്പെടാം. ഭൂമിയിൽ നിന്നും ആദായം നാമമാത്രമായിരിക്കും. ഉദ്യോഗം തേടുന്നവർക്ക് കൂടുതൽ കാത്തിരിക്കേണ്ടതായി വന്നേക്കാം. മറ്റുള്ളവർക്ക് നിസ്സാരം എന്നു തോന്നുന്ന പ്രശ്നങ്ങൾ വലുതായിട്ട് അനുഭവത്തിൽ വരാം. കച്ചവടത്തിൽ നിന്നും വരവ് സാധാരണ പോലെ പ്രതീക്ഷിക്കാം. പ്രണയ ജീവിതത്തിൽ ചില വഴിത്തിരിവുകൾ ഉണ്ടാവാം. സാഹസങ്ങൾക്ക് മുതിരാതിരിക്കുക ഉത്തമം.

തിരുവോണം: പാപഗ്രഹങ്ങൾ സുപ്രധാന ഭാവങ്ങളിൽ സഞ്ചരിക്കുന്നതിനാൽ വളരെ ജാഗ്രത വേണ്ട കാലഘട്ടമാണ്. കരാറുകളിലും ഉടമ്പടികളിലും പങ്കാളിയാവും മുൻപ് എല്ലാവശങ്ങളും മനസ്സിലാക്കണം. കടബാധ്യത വിഷമിപ്പിക്കാം. ദാമ്പത്യത്തിൽ അസ്വാരസ്യങ്ങൾ ഉണ്ടാവാനിടയുണ്ട്. ആരോഗ്യപ്രശ്നങ്ങൾക്ക് സത്വര ചികിൽസ തേടേണ്ടത് അനിവാര്യമാണ്. വ്യവഹാരങ്ങളിൽ അനുരഞ്ജനത്തിന് ശ്രമിക്കുകയാവും ഉചിതം. ഗൃഹനവീകരണാദികൾക്ക് പ്രതീക്ഷിച്ചതിലുമധികം ചെലവ് വന്നേക്കും.

അവിട്ടം: കുംഭക്കൂറുകാരായ അവിട്ടം നാളുകാർക്ക് കൂടുതൽ ഗുണാനുഭവങ്ങൾ വരാം. പ്രതികൂലസാഹചര്യങ്ങളെ അനുകൂലമാക്കി മാറ്റാൻ സാധിച്ചേക്കും. തൊഴിൽപരമായി വളർച്ചയുണ്ടാകുന്നതാണ്. പുതിയ അവസരങ്ങൾ സൃഷ്ടിക്കപ്പെടാം. കിട്ടാക്കടങ്ങൾ കിട്ടിയേക്കും. വാദപ്രതിവാദങ്ങളിൽ വിജയിച്ചേക്കാം. മകരക്കൂറുകാർ ഊഹക്കച്ചവടത്തിന് മുതിരാതിരിക്കുകയാവും അഭികാമ്യം. കുടുംബാംഗങ്ങളെ സമരസപ്പെടുത്തി മുന്നോട്ടു കൊണ്ടുപോകുന്നതിൽ ക്ലേശങ്ങളുണ്ടാവാം. സാഹസങ്ങൾക്ക് തുനിയരുത്. ആരോഗ്യ പരിരക്ഷക്ക് മുൻഗണന നൽകണം.

ചതയം: ബിസിനസ്സിലെ മാന്ദ്യം മാറുന്നതാണ്. കാലത്തിന്റെ അഭിരുചിക്കനുസരിച്ച് വ്യാപാരം നവീകരിക്കാൻ ശ്രമം തുടങ്ങും. സൽകർമ്മങ്ങൾ ചെയ്യാൻ സാഹചര്യം ഒരുങ്ങുന്നതാണ്. ഏഴാംഭാവത്തിലെ കുജൻ ദാമ്പത്യപ്രശ്നങ്ങൾക്ക് കാരണമാകാം. ദീർഘയാത്രകൾക്ക് കാലം അനുകൂലമല്ല. മക്കളുടെ വിവാഹകാര്യത്തിൽ തടസ്സം അനുഭവപ്പെടാം. ധനസ്ഥിതി സന്തോഷമേകും. പഠനം, ഗവേഷണം തുടങ്ങിയവയിൽ വേണ്ടത്ര ഏകാഗ്രത ചെലുത്താനാവില്ലെന്ന് വരാം. പിതാവിന്റെ ആരോഗ്യസ്ഥിതി മെച്ചപ്പെടുന്നതാണ്. രാഷ്ട്രീയലക്ഷ്യങ്ങൾ ഭാഗികമായി വിജയിക്കും.

പൂരുരുട്ടാതി: നേട്ടങ്ങൾക്ക് മുൻതൂക്കം ഉണ്ടാവുന്ന മാസമാണ്. ദുർഘട പ്രശ്നങ്ങൾക്ക് പോംവഴി കണ്ടെത്താനുള്ള ശ്രമം വിജയിക്കും. ഒപ്പമുള്ളവരെ സഹകരിപ്പിക്കുകയും അവരുടെ പിന്തുണ നേടുകയും ചെയ്യും. സാമ്പത്തികമായി ഞെരുക്കം ഉണ്ടാവാം. എന്നാൽ കർശനമായ മിതവ്യയത്തിലൂടെ അതിനെ മറികടക്കാൻ സാധിക്കും. ഔദ്യോഗികമായി പുതിയ ചുമതലകൾ ലഭിക്കുകയോ അതിന്റെ സൂചനകൾ കിട്ടുകയോ ചെയ്യുന്നതാണ്. ഗാർഹിക ജീവിതത്തിൽ പൊരുത്തക്കേടുകൾ വരാം. സംയമനം പാലിക്കുന്നത് നല്ല പോംവഴിയായേക്കും. ആരോഗ്യകാര്യങ്ങളിൽ ജാഗ്രത വേണം.

ഉത്രട്ടാതി: നക്ഷത്രാധിപന് വക്രം തുടങ്ങിയിരിക്കുകയാൽ ക്ലേശങ്ങൾക്ക് ഭാഗികമായിട്ടെങ്കിലും ശമനം വരും. രോഗാവസ്ഥയിൽ ആശ്വാസമുണ്ടാകും. സാമ്പത്തികമായ ദുസ്ഥിതി മാറി, ന്യായമായ വരുമാനം വന്നെത്തും. കൃത്യമായ ലക്ഷ്യബോധത്തോടെ തൊഴിൽ രംഗത്ത് പ്രവർത്തിക്കാനുള്ള മാനസികോർജ്ജം ഉണ്ടാവുന്നതാണ്. വ്യവഹാരങ്ങളിൽ വിജയം പ്രതീക്ഷിക്കാം. കുടുംബബന്ധങ്ങൾ കൂടുതൽ ദൃഢമായി മാറും. വിവാഹ കാര്യങ്ങളിലെ തടസ്സം നീങ്ങിയേക്കും.

രേവതി: ജീവിതത്തിന്റെ നഷ്ടവസന്തങ്ങൾ തിരികെ കിട്ടാം. പരാജയഭീതി അകലുന്നതാണ്. സധൈര്യം ജീവിതമത്സരത്തിൽ അണിചേരാനാവും. സംരംഭങ്ങളിൽ സാമ്പത്തികലാഭം പ്രതീക്ഷിക്കാം. ഊഹക്കച്ചവടത്തിൽ നേട്ടമുണ്ടാകും. എതിർപക്ഷത്തെ നിശബ്ദരാക്കാൻ കഴിഞ്ഞേക്കും. വിദ്യാർത്ഥികൾക്ക് പഠിപ്പിൽ ഉത്സാഹമേറും. പുതിയ തൊഴിൽ തേടുന്നവർക്ക് നിരാശപ്പെടേണ്ടി വരില്ല. മനപ്പൂർവ്വമല്ലാതെ നിയമക്കുരുക്കിൽ അകപ്പെട്ടവർക്ക് മോചനത്തിന് വഴിതെളിയുന്നതാണ്. ഗാർഹികസൗഖ്യം പ്രതീക്ഷിക്കാം.