കൊല്ലവർഷം 1199: അശ്വതി മുതൽ രേവതി വരെയുള്ള നാളുകളുടെ സമ്പൂർണ വർഷഫലം: Malayalam New Year Astrology

കൊല്ലവർഷം 1199 ചിങ്ങമാസം ഒന്ന് (2023 ആഗസ്റ്റ് 17) വ്യാഴാഴ്ച പകൽ 1 മണി 32 മിനിറ്റിനാണ് ചിങ്ങരവി സംക്രമം. മകം ഞാറ്റുവേലയിൽ സൂര്യന്റെ നക്ഷത്ര സഞ്ചാരം തുടങ്ങുന്നു. ചാന്ദ്രമാസമായ ശ്രാവണത്തിന്റെ തുടക്കവും അന്നാണ്. ആഷാഢത്തിനുശേഷമുള്ള അധിമാസമവസാനിക്കുന്നു എന്ന പ്രത്യേകതയുമുണ്ട്. മകം നക്ഷത്രത്തിലാണ് കൊല്ലവർഷത്തിന്റെ ആരംഭം എന്നതും പ്രസ്താവ്യമാണ്.

ഈ വർഷം ശനിക്ക് രാശിപ്പകർച്ചയില്ല. ശനി കുംഭരാശിയിൽ തുടരും. മേടം രാശിയിൽ സഞ്ചരിക്കുന്ന വ്യാഴം 1199 മേടം 18 ന്, (2024 മേയ് 1ന്) ഇടവം രാശിയിൽ പ്രവേശിക്കുന്നു. വ്യാഴത്തിന്റെ രാശിമാറ്റം വാർഷികമായിട്ടാണെന്നത് ഓർമ്മിക്കാം. രാഹുകേതുക്കൾക്ക് ഈ വർഷം രാശിമാറ്റം സംഭവിക്കുന്നുണ്ട്.
1199 തുലാം 13ന് (2023 ഒക്ടോബർ 30ന്) രാഹു മേടത്തിൽ നിന്നും മീനത്തിലേക്കും കേതു തുലാത്തിൽ നിന്നും കന്നിയിലേക്കും നിഷ്ക്രമിക്കും. രാഹുവും കേതുവും അപസവ്യഗതിയിൽ (Anti Clockwise) സഞ്ചരിക്കുന്ന ഗ്രഹങ്ങളാണ് എന്നത് സ്മരണീയം.

ചൊവ്വ വർഷത്തിന്റെ ആരംഭത്തിൽ ചിങ്ങത്തിൽ നിന്നും കന്നിയിലേക്ക് സംക്രമിക്കുന്നു. വർഷാവസാനം ചൊവ്വ ഇടവം രാശിയിൽ നിൽക്കുന്നതായി കാണാം. ബുധൻ വർഷാരംഭത്തിൽ ചിങ്ങത്തിലാണ്; പന്ത്രണ്ട് രാശികളും പിന്നിട്ട് വർഷാന്ത്യം ചിങ്ങത്തിൽ തന്നെ എത്തിനിൽക്കുന്നു. ശുക്രൻ വർഷാരംഭത്തിൽ കർക്കടകത്തിലും, പന്ത്രണ്ട് രാശികളും ഒരുവട്ടംചുറ്റി വർഷാവസാനമാവുമ്പോൾ വീണ്ടും ചിങ്ങത്തിലും തുടരുകയാണ്. ഇതിൽ ശനിയുടെ മൗഢ്യം (combustion) മകരം 30 മുതൽ മീനം 5 വരെയും (2024 ഫെബ്രുവരി 13 മുതൽ മാർച്ച് 18 വരെയും) വ്യാഴത്തിന്റെ മൗഢ്യം മേടം 21 മുതൽ ഇടവം 21 വരെയും (2024 മേയ് 4 മുതൽ ജൂൺ 4 വരെയും) ആകുന്നു. ഗ്രഹയുദ്ധം എന്ന പ്രതിഭാസം അടുത്ത വർഷം പതിവിലും കൂടുതൽ സംഭവിക്കുന്നുണ്ട്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള ഒന്‍പത് നക്ഷത്രങ്ങളിൽ ജനിച്ചവരുടെ വാർഷിക ഫലം ഇവിടെ അപഗ്രഥിക്കുകയാണ്.

അശ്വതി

വർഷത്തിന്റെ മുക്കാൽപ്പങ്കും വ്യാഴം ജന്മരാശിയിൽ തുടരുകയാൽ ഈ വർഷം ഗുണദോഷസമ്മിശ്രമാണ്. കാര്യതടസ്സം, അമിതാദ്ധ്വാനം, ധനക്ലേശം എന്നിവയുണ്ടാവാം. എന്നാൽ ശനി അഭീഷ്ടഭാവമായ പതിനൊന്നിൽ തുടരുന്നതിനാൽ പൂർവ്വിക സ്വത്തുക്കൾ അധീനത്തിലാവും. നിയമപ്പോരാട്ടങ്ങളിൽ വിജയിക്കും. നീണ്ടുനിൽക്കുന്ന രോഗങ്ങൾക്ക് ഫലപ്രദമായ ചികിൽസ ലഭിച്ചേക്കും. രാഹു ജന്മരാശിയിൽ നിന്നും, വിശേഷിച്ചും ജന്മനക്ഷത്രമായ അശ്വതിയിൽ നിന്നും മാറുന്നതിനാൽ ത്വഗ്രോഗം, വാതം, പകർച്ചവ്യാധികൾ എന്നിവയ്ക്ക് ശമനം ഉണ്ടാകുന്നതാണ്. വിദ്യാർത്ഥികൾക്ക് പഠനത്തിൽ ശ്രദ്ധ പുലർത്താൻ സാധിക്കും. അവിവാഹിതരുടെ വിവാഹകാര്യത്തിൽ തീരുമാനമാകും. വിദേശ യാത്രകൾ, തൊഴിലിൽ നേട്ടം, തീർത്ഥാടനം എന്നിവ സഫലമാകുന്നതാണ്. വൃശ്ചിക മാസം മുതൽ നല്ല ഫലങ്ങൾക്ക് മുൻതൂക്കം പ്രതീക്ഷിക്കാം.

ഭരണി

ജന്മനക്ഷത്രാധിപനായ ശുക്രന്റെ വക്രമൗഢ്യാദികളോടെ വർഷം തുടങ്ങുന്നു. ആദ്യമാസങ്ങളിൽ യാത്രകൾ കൂടും. നേട്ടങ്ങളിലെത്താൻ കിണഞ്ഞു പരിശ്രമിക്കേണ്ട സ്ഥിതിയുണ്ടാവും. ബന്ധുക്കളുടെ കാര്യത്തിൽ ചില മനപ്രയാസങ്ങൾ വരാം. ജോലി തേടുന്നവർ കുറച്ചുകാലം കാത്തിരിക്കേണ്ടതുണ്ട്. ആരോഗ്യപ്രശ്നങ്ങൾ പൂർണമായും മാറുമെന്ന് പറയാനാവില്ല.

രാഹു കേതു രാശിമാറ്റം തുലാമാസത്തിൽ സംഭവിക്കുന്നതിനാൽ തദനന്തരം ഗുണാനുഭവങ്ങൾ മെല്ലെമെല്ലെ കണ്ടുതുടങ്ങും. തുണി, ഗൃഹോപകരണം, ഹോട്ടൽ, ആഭരണം, അലങ്കാരം, നിത്യോപയോഗ വസ്തുക്കൾ, ഇലക്ട്രോണിക് വസ്തുക്കൾ എന്നിവയുടെ വിപണനത്തിൽ ഏർപ്പെട്ടവർക്ക് ലാഭം വർദ്ധിച്ചു തുടങ്ങും. കലാവാസന അംഗീകരിക്കപ്പെടും. സ്വാശ്രയത്വത്തിൽ അഭിമാനിക്കാറാവും. ജീവിതശൈലീ രോഗങ്ങളുടെ കാര്യത്തിൽ പ്രത്യേകമായ ശ്രദ്ധ വേണം.

കാർത്തിക

കർമ്മരംഗത്തെ തടസ്സങ്ങളും ക്ലേശങ്ങളും തുടരുന്നതാണ്. ആരോഗ്യപരമായ വിഷമങ്ങൾ കൂടുക, കുറയുക എന്നിങ്ങനെ ആവർത്തിക്കാം. വർഷാരംഭത്തിൽ മനപ്രയാസവും കാര്യവിഘ്നവും തുടർന്നേക്കും. എന്നാൽ വൃശ്ചികമാസം മുതൽ കാര്യങ്ങൾക്ക് മാറ്റം വരാം. ചെലവുണ്ടാകുമെങ്കിലും അത് നല്ലകാര്യങ്ങൾക്കാവും. മക്കളുടെ ഉപരിപഠനം, വിവാഹം, ഗൃഹനിർമ്മാണാരംഭം തുടങ്ങിയ കാര്യങ്ങൾ ശക്തമായ സാധ്യതയാണ്.

വസ്തുവ്യാപാരത്തിൽ ഏർപ്പെട്ടിട്ടുള്ളവർക്ക് ലാഭം അധികരിക്കും. സർക്കാർ / ബാങ്ക് ഇവയിലൂടെ ലഭിക്കുന്ന വായ്പ, ചിട്ടി മുതലായവ നല്ല കാര്യങ്ങൾക്കായി പ്രയോജനപ്പെടുത്താൻ സന്ദർഭമുണ്ടാകും. പൂർവ്വസുഹൃത്തുക്കളെ കാണാനാവും. ചിലർക്ക് വീട്ടിൽ നിന്നും / നാട്ടിൽ നിന്നും മാറിത്താമസിക്കേണ്ടതായി വരാം. ദാമ്പത്യ ജീവിതത്തിലെ അലോസരങ്ങൾക്ക് രമ്യമായ തീർപ്പുണ്ടാവും. വാതരോഗം വിഷമിപ്പിച്ചേക്കാം. സംഘടനാ പ്രവർത്തനത്തിൽ ശ്രദ്ധ കേന്ദ്രീകരിക്കും.

രോഹിണി

വ്യാഴത്തിന്റെയും ശനിയുടെയും ആനുകൂല്യം കുറയുകയാൽ ജീവിതത്തിൽ വലിയ പരിവർത്തനങ്ങളോ ഗുണപരമായ മാറ്റങ്ങളോ ഉണ്ടാവണം എന്നില്ല.
വ്യാപാരത്തിൽ വലിയ മുതൽ മുടക്കുകൾക്ക് തുനിയരുത്. ചെറിയസംരംഭങ്ങൾ ഒരുവിധം നടന്നുപോകുന്നതാണ്. കരാറുപണികൾ പുതുക്കിക്കിട്ടിയേക്കും. ഉദ്യോഗസ്ഥർക്ക് സ്ഥാനക്കയറ്റം എളുപ്പമാവില്ല. സ്ഥലംമാറ്റം പോലുള്ളവയ്ക്ക് സാധ്യതയുണ്ടുതാനും.

വിരോധികളുടെ പ്രവർത്തനങ്ങളെ ഒട്ടൊക്കെ പ്രതിരോധിക്കാനാവും. പ്രണയബന്ധം ദുർബലമാവാം. അവിവാഹിതരുടെ വിവാഹകാര്യം നീളാൻ സാധ്യത കാണുന്നു. ചെറുവായ്പകൾ കൊണ്ട് അത്യാവശ്യങ്ങൾ നിറവേറ്റാനാവും. അന്യനാട്ടിൽ തൊഴിൽ നേടാൻ വൃശ്ചിക മാസം മുതൽ അവസരമൊരുങ്ങും. രാഹുവിന്റെ ദശാപഹാരങ്ങൾ നടക്കുന്നവർക്ക് നല്ലമാറ്റം വന്നുചേരും. ധനപരമായ ക്ലേശങ്ങൾ കുറച്ചൊക്കെ പരിഹൃതമാവുന്നതാണ്.

മകയിരം

ഇടവക്കൂറുകാരായ മകയിരം നാളുകർക്ക് വ്യാഴം, രാഹു എന്നീ ഗ്രഹങ്ങൾ പന്ത്രണ്ടിലും ശനി കണ്ടകസ്ഥാനമായ പത്താം ഭാവത്തിലുമാകയാൽ ഗുണാനുഭവങ്ങൾ കുറയും. നിലവിലെ ജോലി ഉപേക്ഷിക്കുന്നത് ആശാസ്യമല്ല. ആരോഗ്യപരമായി നല്ലശ്രദ്ധയുണ്ടാവണം. വിദ്യാർഥികളുടെ കാര്യത്തിൽ മാതാപിതാക്കൾ ജാഗരൂകരാവണം.

മിഥുനക്കൂറുകാരായ മകയിരം നാളുകാർക്കാവും നേട്ടങ്ങൾ കൂടുതൽ. വ്യവസായം അഭിവൃദ്ധിപ്പെടുന്നതാണ്. മുതൽമുടക്കിന് നഷ്ടം വരാനിടയില്ല. ഉല്പന്നങ്ങൾക്ക് സ്വീകാര്യത ലഭിക്കുന്നതാണ്. ധനോന്നതിയുണ്ടാകും. അവിവാഹിതർക്ക് വിവാഹസിദ്ധി പ്രതീക്ഷിക്കാം. തൊഴിൽ തേടുന്നവർക്ക് പുതിയ ജോലിയിൽ പ്രവേശിക്കാനാവും. ഉദ്യോഗസ്ഥർക്ക് സ്ഥാനക്കയറ്റം, വേതന വർദ്ധനവ് എന്നിവ വന്നെത്തും. കലാപ്രവർത്തനം അംഗീകരിക്കപ്പെടും. വൃശ്ചികമാസത്തിനു ശേഷം കർമ്മരംഗത്ത് കരുതൽ അനിവാര്യം.

തിരുവാതിര

വർഷത്തിന്റെ ഭൂരിഭാഗവും ഗുണാനുഭവങ്ങൾക്കാവും മുൻതൂക്കം. നിക്ഷേപങ്ങളിൽ നിന്നും വരവധികരിക്കും. അഭിമുഖങ്ങളിൽ വിജയിക്കും. ഊഹക്കച്ചവടത്തിൽ നിന്നും ആദായം ഭവിക്കുന്നതാണ്. ആശയവിനിമയത്തിൽ വലിയ കഴിവു നേടും. കുടുംബാംഗങ്ങളുടെ പൂർണ പിന്തുണയുണ്ടാവുന്നതാണ്. രാഷ്ട്രീയ മത്സരങ്ങളിൽ വിജയിക്കുവാനാവും.

മക്കളുടെ വിദ്യാഭ്യാസച്ചെലവിന് പണം കരുതും. അന്യനാട്ടിൽ പഠിക്കാനവസരം കിട്ടിയേക്കും. ഗവേഷകർക്ക് പ്രബന്ധസമർപ്പണം സാധ്യമാകുന്നതാണ്. ചെറുപ്പക്കാരുടെ വിവാഹതടസ്സം നീങ്ങാം. കിടപ്പു രോഗികൾക്ക് ആശ്വാസ കാലമാണ്. ഗൃഹനിർമ്മാണം ഏതാണ്ട് മുഴുമിപ്പിക്കാൻ കഴിഞ്ഞേക്കും. വൃശ്ചികമാസം മുതൽ വ്യാപാരത്തിൽ കൂടുതൽ ജാഗ്രത കാട്ടണം. ആരോഗ്യപരമായ പതിവ് പരിശോധനകൾ നീട്ടിവെക്കരുത്. കുടുംബസമേതം വിനോദ / വിദേശ യാത്രകൾക്ക് അവസരം ഭവിക്കും.

പുണർതം

മിഥുനക്കൂറിൽ ജനിച്ച പുണർതം നാളുകാർക്ക് 1199 ക്ഷേമവും ഐശ്വര്യവും നിറയുന്ന വർഷമാണ്.
ഗുരുവും രാഹുവും പതിനൊന്നിൽ തുടരുകയാൽ തൊഴിലിൽ നിന്നും ലാഭവും ഭൂമി സമ്പാദ്യവും ഉദ്യോഗത്തിൽ ഉയർച്ചയും ഉണ്ടാകും. ന്യായമായ അഭിലാഷങ്ങൾ നിറവേറപ്പെടും. വിദ്യാർത്ഥികൾക്ക് പഠനത്തിൽ മികവ് കരസ്ഥമാക്കാനാവും. വ്യവഹാരങ്ങളിൽ അനുകൂലമായ തീർപ്പ് വന്നെത്തുന്നതാണ്. നൂതനമായ ആശയങ്ങൾ നിറഞ്ഞ പ്രോജക്ടുകൾ അധികാരികളുടെ ശ്രദ്ധയിൽ കൊണ്ടുവരാനാവും. ദാമ്പത്യത്തിൽ ശ്രേയസ്സും സമാധാനവും ഉണ്ടാകുന്നതാണ്. കർക്കടകക്കൂറുകാരായ പുണർതം നാളുകാർക്ക് കഷ്ടപ്പാടുകളും ക്ലേശങ്ങളും തുടരാം. സാമ്പത്തിക കാര്യത്തിൽ നല്ല അദ്ധയുണ്ടാവണം. ദാമ്പത്യത്തിൽ അസ്വാരസ്യങ്ങൾ വർദ്ധിച്ചേക്കാം. അനുരഞ്ജനത്തിന്റെ പാത സ്വീകരിക്കുകയാവും ഉചിതം. മേടമാസത്തിനു ശേഷം വ്യാഴം പതിനൊന്നിലേക്ക് പകരുകയാൽ ഗുണാനുഭവങ്ങൾ ഉണ്ടാവും. അതുവരെ പുതുസംരംഭങ്ങൾക്ക് മുതൽമുടക്കുന്നത് ആശാസ്യമാവില്ല.

പൂയം

ഗുണദോഷസമ്മിശ്രമായ വർഷമാണ്. ക്ഷമയും സഹിഷ്ണതയും കൂടുതൽ ആവശ്യമുണ്ട്. ലക്ഷ്യം നേടാൻ നിരന്തരമായ അധ്വാനം വേണ്ടി വരും. സുലഭം എന്ന് കരുതിയവ ദുർലഭമായേക്കാം. അഷ്ടമശനിയുടെ സ്ഥിതിയാൽ ആരോഗ്യപ്രശ്നങ്ങളുണ്ടാവാനിടയുണ്ട്. വൈദ്യപരിശോധനകളിൽ അലംഭാവമരുത്. വസ്തു ഇടപാടുകളിൽ കൃത്യത വേണം. വ്യവഹാരങ്ങൾക്ക് മുതിരാതിരിക്കുകയാണ് കാമ്യം.

പ്രതീക്ഷിച്ച നിയമനം ലഭിക്കാൻ അല്പം കൂടി കാത്തിരിക്കേണ്ടി വരാം. ഉദ്യോഗസ്ഥർ ചുമതലകൾ നിർവഹിക്കുന്നതിൽ വീഴ്ചയുണ്ടാവാതിരിക്കാൻ ശ്രദ്ധിക്കണം. സാമ്പത്തികമായ വലിയ മുതൽ മുടക്കുകൾക്ക് കാലം ഉചിതമല്ല. ന്യായമായ ആവശ്യങ്ങൾ നടന്നു പോകും. ചെറിയ കരാറുകൾ ഉറപ്പിച്ചു കിട്ടും. മേടമാസത്തിനു ശേഷം വ്യാഴം പതിനൊന്നിൽ വരികയാൽ തുടർന്ന് കൂടുതൽ
ശോഭന ഫലങ്ങൾ ഉണ്ടാവുന്നതാണ്.

ആയില്യം

കർമ്മരംഗത്തെ തടസ്സങ്ങൾ ഭാഗികമായി നീക്കപ്പെടും. പുതിയ അവസരങ്ങൾ തേടിവരും. ഉദ്യോഗസ്ഥർക്ക് സ്ഥലം മാറ്റം ഉണ്ടാകാം. എന്നാൽ ഒപ്പം പദവിയിൽ ഉയർച്ചയോ വേതനാധിക്യമോ പ്രതീക്ഷിക്കാം. വിദേശത്ത് ജോലിക്ക് ശ്രമം നടത്തുന്നവർക്ക് ശുഭവാർത്തയെത്തും. വലിയ സാമ്പത്തിക മുടക്കുള്ള കാര്യങ്ങൾ മേടമാസത്തിനുശേഷം തുടങ്ങുന്നതാവും ഉചിതം. കലാപ്രവർത്തകർക്ക് കഴിവുകൾ തെളിയിക്കാൻ അരങ്ങൊരുങ്ങുന്നതാണ്. പ്രണയസാഫല്യത്തിന് കാത്തിരിക്കേണ്ടിവന്നേക്കും. സുഹൃത്തുക്കളുടെ സഹായം പ്രതീക്ഷിക്കാം.

ഹൃദയസംബന്ധമായ രോഗങ്ങളുള്ളവർ കൂടുതൽ ശ്രദ്ധിക്കണം. മക്കളുടെ വിവാഹകാര്യത്തിലെ തടസ്സം നീങ്ങുന്നതാണ്. പണയവസ്തുക്കൾ പുതുക്കാനാവും. അപകടങ്ങളെ അതിജീവിക്കും.

മകം

ഭാഗ്യസ്ഥാനത്ത് വ്യാഴം തുടരുന്നതിനാൽ നേട്ടങ്ങൾ കൂടുതൽ വന്നുചേരുന്നതാണ്. പ്രവൃത്തിയിൽ ലക്ഷ്യബോധമുണ്ടാവും. ആസൂത്രണമികവോടെ നവസംരംഭങ്ങളിൽ ഏർപ്പെടും. സാങ്കേതിക വിഷയങ്ങൾ പഠിച്ചറിയും. നവമാധ്യമങ്ങളിൽ നിന്നും വരുമാനമുണ്ടാകാം. ആശയപരമായി ഐക്യമുള്ളവരുടെ കൂട്ടായ്മക്ക് രൂപം കൊടുക്കുവാൻ സാധിക്കും. സാമ്പത്തികശോച്യത ഒരുവിധം പരിഹൃതമാവുന്നതാണ്.

വൃശ്ചികമാസം മുതൽ രാഹു അഷ്ടമസ്ഥനാവുകയാൽ ആരോഗ്യപരമായി ശ്രദ്ധ വേണം. വാഹനം, അഗ്നി, യന്ത്രം എന്നിവ സൂക്ഷിച്ച് ഉപയോഗിക്കണം. ശനി സപ്തമഭാവത്തിൽ തുടരുന്നതിനാൽ ചെറുപ്പക്കാരുടെ ദാമ്പത്യസ്വപ്നങ്ങൾ നീണ്ടേക്കും. കുടുംബ ജീവിതത്തിൽ പിണക്കവും ഇണക്കവും ആവർത്തിക്കും. പാരമ്പര്യസ്വത്തുക്കളെ സംബന്ധിച്ച വ്യവഹാരം ഇഴയാനിടയുണ്ട്.

പൂരം

വിജയപരാജയങ്ങൾ സമമാകുന്ന വർഷമാണ്. ചില പ്രതീക്ഷകൾ നിറവേറും. നേട്ടങ്ങൾക്ക് പിന്നിൽ അദ്ധ്വാനമേറും. പാതിവഴിയിൽ നിർത്തിയവ പുനരാംഭിക്കാൻ ശ്രമം തുടരും. ഉദ്യോഗനിയമനങ്ങൾ പ്രതീക്ഷിക്കുന്നവർക്ക് കാലതാമസമുണ്ടായാലും അവ കരഗതമാവും. വ്യാപാരത്തിൽ കരാറുകളിൽ ഏർപ്പെടുന്നതാണ്. വിദ്യാഭ്യാസത്തിൽ മികച്ച വിജയം കൈവരിക്കുമെന്ന് പറയാനാവില്ല. വൃശ്ചികം മുതൽ അഷ്ടമരാഹു ആരോഗ്യപ്രശ്നങ്ങൾ സൃഷ്ടിക്കാം. പാദരോഗങ്ങളിൽ ശ്രദ്ധവേണം. ഗൃഹനിർമ്മാണത്തിലെ തടസ്സങ്ങൾ നീങ്ങുന്നതാണ്. വിദേശത്തു പോകാൻ ശ്രമം നടത്തുന്നവർക്ക് അതിനവസരം ലഭിച്ചേക്കും. ഭാവിയിൽ പ്രയോജനപ്പെടുന്ന കാര്യങ്ങൾക്കായി ചില ഉദ്യമങ്ങൾ നടത്തും.

ഉത്രം

അത്ഭുതങ്ങൾ ഒന്നും നടക്കാനിടയില്ലാത്ത സാധാരണ വർഷമാണ്. എന്നാൽ കഴിവുകൾ സ്വയം തിരിച്ചറിയാനാവും. അവയിൽ ചില സിദ്ധികൾ പ്രയോജനപ്പെടുത്താനും സാധിക്കുന്നതാണ്. വിജയിക്കാൻ കഠിനാദ്ധ്വാനം വേണ്ടി വന്നേക്കും. അത് പാഴായിപ്പോവില്ല; പ്രയോജനകരമാവും വിധം വിനിമയം ചെയ്യാനാവും.

ഭൗതിക കാര്യങ്ങളെക്കാൾ ആത്മീയ ഉണർവുകൾക്കും വഴിയുണ്ട്. പ്രാർത്ഥനയുടെ ശീതളച്ഛായയിൽ അഭയം തേടാം. രാഷ്ട്രീയ ലക്ഷ്യങ്ങൾ നിറവേറപ്പെടുന്നതാണ്. ഉദ്യോഗലബ്ധി പ്രതീക്ഷിക്കാം. വിവാഹതടസ്സങ്ങൾ വർഷത്തിന്റെ മുക്കാൽപ്പങ്കുവരെ നീളാം. ആരോഗ്യകാര്യങ്ങളിൽ അലംഭാവമരുത്. ചിങ്ങം, ധനു, മേടം, കർക്കടകം മാസങ്ങൾക്ക് മേന്മ കുറയാം.

അത്തം

രാഹു, വ്യാഴം എന്നീ ഗ്രഹങ്ങളുടെ അഷ്ടമസ്ഥിതി ക്ലേശത്തിനിടവരുത്തും. മനസ്സന്താപം തുടരും. വിരോധികളുടെ പ്രവർത്തനങ്ങൾ വേട്ടയാടപ്പെടാം. ശനിയുടെ ആനുകൂല്യത്താൽ വിപൽസന്ധികളെ മറികടക്കുന്നതാണ്. കർമ്മരംഗത്ത് പതുക്കെയെങ്കിലും സ്ഥായിയായ നേട്ടങ്ങൾ സംഭവിക്കുന്നതാണ്. സ്വസംരംഭങ്ങൾ വിജയിക്കാൻ അത്യധ്വാനം ആവശ്യമായി വന്നേക്കും.

കുടുംബത്തിൽ മംഗളകർമ്മങ്ങൾക്ക് സാധ്യത കാണുന്നു. മക്കളുടെ പഠനപൂർത്തീകരണം, വിവാഹം എന്നിവ നടന്നേക്കാം. കടബാധ്യത പരിഹരിക്കാൻ നടത്തുന്ന ശ്രമങ്ങളിൽ ഒരു പരിധിവരെ വിജയം നേടും. സമയബന്ധിതമായി ദൗത്യങ്ങൾ പൂർത്തീകരിക്കാം. വൈദ്യപരിശോധനകളിൽ അലംഭാവമരുത്.

ചിത്തിര

നല്ലകാര്യങ്ങൾക്കായി ചെലവുണ്ടാകും. ചിങ്ങം, കന്നി, തുലാം മാസങ്ങളിൽ അദ്ധ്വാനം കൂടും. മിച്ചം വെക്കാനൊന്നുമുണ്ടാവില്ല. അധികാരികൾ വിരോധിച്ചേക്കും. വൃശ്ചികം മുതൽ കാലം അനുകൂലമാവുന്നതാണ്. മുൻ തീരുമാനങ്ങൾ നടപ്പിലാക്കാനാവും. വായ്പ കൊണ്ട പ്രയോജനമുണ്ടാവും. കുടുംബാംഗങ്ങളുടെ ഇടയിലെ അനൈക്യം പരിഹരിക്കും.

രാഷ്ട്രീയപ്പോരാട്ടങ്ങൾ വിജയമേകുന്നതാണ്. കുംഭമാസത്തിൽ കർമ്മഗുണാഭിവൃദ്ധി പ്രതീക്ഷിക്കാം. മീനം-മേടം മാസങ്ങളിൽ അവിവാഹിതരുടെ വിവാഹകാര്യത്തിൽ തീരുമാനമുണ്ടാകാം. ഇടവമാസത്തിൽ ആരോഗ്യപ്രശ്നങ്ങൾ വരാം. മിഥുനം, കർക്കടകം മാസങ്ങളിൽ
തൊഴിൽ ലാഭം, ധനപുഷ്ടി, ദാമ്പത്യസൗഖ്യം എന്നിവയുണ്ടാകുന്നതാണ്.

ചോതി

ചിങ്ങം, ധനു, മീനം, കർക്കടകം എന്നീ മാസങ്ങൾക്ക് ഗുണമേറും. വ്യാപാരത്തിൽ നേട്ടങ്ങൾ വർദ്ധിക്കുന്നതായിരിക്കും. പുതിയ കരാറുകളിൽ ഏർപ്പെടാനാവും. മത്സരങ്ങളിൽ വിജയിക്കും. ആത്മാഭിമാനം ഉയരുന്നതാണ്. ഊഹക്കച്ചവടത്തിൽ നേട്ടങ്ങൾ പ്രതീക്ഷിക്കാം. കന്നി, തുലാം,ഇടവം എന്നീ മാസങ്ങൾക്കാവും മേന്മ കുറവ്.

ആരോഗ്യപ്രശ്നങ്ങൾ അലട്ടാം. യാത്രകൾ നിഷ്പ്രയോജനകരമായേക്കാം. കടബാധ്യതകൾ ശല്യം ചെയ്യാം. കുടുംബ ബന്ധങ്ങളുടെ ഊഷ്മളത നിലനിർത്തുന്നതിൽ ക്ലേശിക്കും. മറ്റു മാസങ്ങളിൽ ശരാശരി ഫലം. വൃശ്ചികമാസം മുതൽ കേതുജന്മരാശിയിൽ നിന്നും മാറുന്നതിനാൽ ആരോഗ്യപ്രശ്നങ്ങൾ കുറയാം. രാഹു ഏഴിൽ നിന്നും നിഷ്ക്രമിക്കുകയാൽ വിവാഹതടസ്സം നീങ്ങിയേക്കും.

വിശാഖം

സമൂഹത്തിൽ നിന്നും അവഗണന നീങ്ങി പരിഗണന ലഭിക്കും. നീതിബോധത്തോടെ പ്രവർത്തിക്കാൻ സാധിക്കും. വ്യാപാരികൾക്ക് ലാഭമുണ്ടാകുന്നതാണ്. കർമ്മരംഗം നവീകരിക്കാനുള്ള ശ്രമങ്ങൾ ലക്ഷ്യം കാണും. ഉപഭോക്താക്കളുടെ മനസ്സറിഞ്ഞ് പ്രവർത്തിക്കും. വായ്പാ തിരിച്ചടവുകൾ അധികം മുടങ്ങിയേക്കില്ല. വിദേശ യാത്രയ്ക്ക് സന്ദർഭമുണ്ടാകുന്നതാണ്. ഉപരിപഠനത്തിനായി വിദേശ/ അന്യദേശ യാത്ര ഒരു സാധ്യതയാണ്.

പ്രണയികളുടെ ഹൃദയബന്ധം ദൃഢമാകും. കുടുംബാംഗങ്ങളുമൊത്ത് തീർത്ഥയാത്ര നടത്താനായേക്കും. പൂർവികമായ വസ്തു വില്ക്കുവാനുള്ള ശ്രമം ഫലം കാണുന്നതാണ്. ഹൃദയ സംബന്ധമായ രോഗമുള്ളവർ കൂടുതൽ ശ്രദ്ധാലുക്കളാകണം. കിടപ്പ് രോഗികൾക്ക് സമാശ്വാസമുണ്ടാകും. വൃശ്ചികമാസം മുതൽ ഉദ്യോഗസ്ഥർക്ക് പുതിയ പദവി ലഭിക്കാം.

അനിഴം

കണ്ടകശനി, ആറിൽ വ്യാഴം തുടങ്ങി ചില പ്രതികൂലതകൾ ഉണ്ടെങ്കിലും ആത്മവിശ്വാസം നഷ്ടപ്പെടുത്താതെ മുന്നോട്ടു പോയാൽ വിജയിക്കാൻ സാധിക്കും. അദ്ധ്വാനഭാരം കൂടും. എന്നാൽ അതിന് തക്കതായ പ്രതിഫലം കിട്ടുന്നതാണ്. തൊഴിൽരംഗത്തെ തന്ത്രപരമായ സമീപനം നല്ല ഫലം സൃഷ്ടിക്കും. നിലവിലെ ഉദ്യോഗം ഉപേക്ഷിച്ച് പുതിയ ഒന്നിന് ശ്രമിക്കുന്നത് ചിലപ്പോൾ ഫലപ്രദമാവണമെന്നില്ല.

കലാകാരന്മാരുടെ കഴിവുകൾ അംഗീകരിക്കപ്പെടുന്നതാണ്. വീട്ടിൽ നിന്നും വിട്ടുനിൽക്കേണ്ട സാഹചര്യം ഉണ്ടായേക്കാം. ബന്ധുക്കളിൽ നിന്നും പ്രതീക്ഷിച്ച പിന്തുണ ലഭിച്ചേക്കില്ല. സാങ്കേതിക വിദ്യാഭ്യാസത്തിൽ ഉയർന്ന ബിരുദം നേടാനാവും. മേടമാസത്തിനു ശേഷം പ്രണയ സാഫല്യം, വിവാഹ സിദ്ധി എന്നിവ സാധ്യതയാണ്. ജീവിതശൈലീ രോഗങ്ങൾ അധികരിക്കാം.

തൃക്കേട്ട

ലക്ഷ്യം നേടാൻ ഏകാഗ്രമായ പഠനം, നിരന്തരമായ അദ്ധ്വാനം എന്നിവ വേണ്ടിവരും. പ്രവർത്തനങ്ങളുടെ മികവ് ഉടനെയല്ലെങ്കിലും, ക്രമേണ അംഗീകരിക്കപ്പെടും. ഗൃഹനിർമ്മാണത്തിൽ പുരോഗതി കുറയും. വസ്തുവില്‌പനയിൽ വിളംബമുണ്ടായേക്കാം. കടബാധ്യതകൾ മനപ്രയാസ ഹേതുവാകാം.

വാഹനം വാങ്ങാനുള്ള മോഹം നീണ്ടുപോകും. തർക്കം, വിവാദം തുടങ്ങിയവയിൽ നിന്നും അകന്നുനിൽക്കുകയാവും അഭിലഷണീയം. അന്യദേശത്ത് പഠനാവസരങ്ങൾ ഉണ്ടാവും. തൊഴിലിൽ പരീക്ഷണങ്ങൾ നടത്തും. മേടമാസം വരെ ജീവിതത്തിന് വലിയ പുരോഗതി ഉണ്ടാവുമെന്ന് പറയാൻ കഴിയില്ല. സുഹൃത്തുക്കളുമായി ഇണങ്ങിയും പിണങ്ങിയും മുന്നോട്ടു പോകും. കുടുംബജീവിതത്തിലും സ്നേഹദ്വേഷങ്ങൾ കലരും. പാരമ്പര്യ ചികിത്സാരീതി രോഗനിവൃത്തിക്കായി പ്രയോജനപ്പെടുത്തുന്നതാണ്.

മൂലം

ഗ്രഹങ്ങളുടെ ശുഭസ്ഥാനസ്ഥിതി സൃഷ്ടിക്കുന്ന അനുകൂലത ജീവിതത്തിന്റെ സമസ്ത മേഖലകളിലും പ്രതിഫലിക്കുന്നതാണ്. കഴിവുകൾ എത്ര ചെറുതായിരുന്നാലും അത് പുറംലോകമറിയും. അതിന് അംഗീകാരമുണ്ടാവുകയും ചെയ്യും. ഉദ്യോഗസ്ഥർക്ക് സ്ഥാനോന്നതി പ്രതീക്ഷിക്കാം.
പുതിയ ദൗത്യങ്ങളിൽ വിജയിക്കാനാവും. അന്യനാട്ടിൽ നിന്നും സ്വന്തം നാട്ടിലേക്ക് മാറ്റം കിട്ടും. ബിസിനസ്സ് ആദായകരമായി തുടരുന്നതാണ്. വിപുലീകരണത്തിനാവശ്യമായ സാമ്പത്തിക സ്രോതസ്സ് കണ്ടെത്തും. പഠനം പൂർത്തിയാക്കിയവർക്ക് പുതിയ ജോലിയിൽ പ്രവേശിക്കാൻ സാധിക്കും. വിവാഹ സ്വപ്നങ്ങൾ പൂവണിയും. സന്താനജന്മം ജീവിതത്തെ ധന്യമാക്കും. തുലാം, ധനു, മകരം, കർക്കടകം മാസങ്ങൾക്ക് മേന്മ കുറയുന്നതാണ്.

പൂരാടം

പ്രയത്നങ്ങളെ പ്രതിഫലമാക്കി മാറ്റാൻ സാധിക്കും. സ്വാശ്രയത്വത്തിൽ അഭിമാനിക്കും. ചെറുസംരംഭങ്ങൾക്ക് ഉചിതമായ കാലമാണ്. കാലഘട്ടത്തിന്റെ ആവശ്യങ്ങൾ കണ്ടറിഞ്ഞ് പ്രവർത്തിക്കാൻ സംരംഭകരെന്ന നിലയ്ക്ക് സാധിക്കുന്നതാണ്. ഉദ്യോഗരംഗം ഉന്മേഷഭരിതമാകും. ശാസ്ത്രജ്ഞർക്കും ഗവേഷകർക്കും പരീക്ഷണങ്ങളിൽ വിജയം കണ്ടെത്താൻ സാധിക്കുന്നതാണ്. നിക്ഷേപങ്ങളിൽ നിന്നും ആദായം ഉയരും. വസ്തുവിന്റെ ക്രയവിക്രയത്തിൽ ലാഭം പ്രതീക്ഷിക്കാം. ദാമ്പത്യം സ്വച്ഛന്ദമാകും. സന്താനങ്ങൾക്ക് ശ്രേയസ്സ് വന്നുചേരും. തുലാം, ധനു, മിഥുനം, കർക്കടകം എന്നീ മാസങ്ങളിൽ ആരോഗ്യപരമായി ഏറെ ശ്രദ്ധ വേണം.

ഉത്രാടം

പരിശ്രമശാലികൾക്ക് വിജയശ്രീലാളിതരാവാൻ കഴിയുന്ന വർഷമാണ്. ശനിയും വ്യാഴവുമൊക്കെ അനുകൂലരാവുകയാൽ അദ്ധ്വാനശക്തി വിലമതിക്കപ്പെടും. ഭൗതികമായ ഐശ്വര്യങ്ങൾ വന്നെത്തും. പ്രതീക്ഷകൾ സഫലമാകുന്നതാണ്. പഠനം നിന്നുപോയവർക്ക് അവ തുടരാനാവും. വിദേശജോലിക്ക് പ്രയോജനപ്പെടുന്ന ഭാഷാപരിശീലന പദ്ധതിയിൽ പങ്കെടുക്കും. നഷ്ടസാധ്യതകൾ കണക്കിലെടുത്ത് വൻ സംരംഭങ്ങളിൽ നിന്നും പിന്മാറുവാൻ അഭ്യുദയകാംക്ഷികൾ ഉപദേശിക്കും. മുൻഗാമികളുടെ പ്രവർത്തനരീതി തിരുത്തിക്കുറിക്കും. അവിവാഹിതർക്ക് വർഷത്തിന്റെ രണ്ടാം പകുതിക്കുശേഷം വിവാഹ സാധ്യത കാണുന്നു. കുടുംബജീവിതത്തിൽ സംതൃപ്തി അനുഭവിക്കും. പുതിയ കൂട്ടുകാരെ ലഭിക്കുന്നതാണ്.

തിരുവോണം

വ്യാഴം നാലിൽ നിന്നും അഞ്ചിലേക്കും രാഹു നാലിൽ നിന്നും മൂന്നിലേക്കും മാറുന്നതിനാൽ ധാരാളം ഗുണകരമായ പരിവർത്തനങ്ങൾ നടക്കുന്ന വർഷമാണിത്. പുതിയ തൊഴിൽപരിസരം ഉണ്ടാകും. ജീവിത സാഹചര്യം മെച്ചപ്പെടുന്നതാണ്. സാമ്പത്തിക ക്ലേശങ്ങൾ ഒട്ടൊക്കെ പരിഹൃതമാവും. വീടുപണി പൂർത്തിയായേക്കും. സഹപ്രവർത്തകരുടെ പിന്തുണ ലഭിക്കുന്നതാണ്. തടസ്സപ്പെട്ട പഠനം പുനരാരംഭിക്കുവാൻ സാധിച്ചേക്കും. കുറ്റാരോപണങ്ങളെ സമർത്ഥമായി മറികടക്കാനാവും. മക്കളുടെ വിവാഹകാര്യത്തിൽ തീരുമാനമാകും. പിണങ്ങിക്കഴിയുന്ന കുടുംബബന്ധങ്ങൾ വീണ്ടും ഇണങ്ങിച്ചേരുന്നതാണ്. ചിങ്ങം, ധനു, മകരം, ഇടവം മാസങ്ങളിൽ ആരോഗ്യപ്രശ്നങ്ങൾ വരാം.

അവിട്ടം

മകരക്കൂറുകാരായ അവിട്ടം നാളുകാർക്ക് ഈ വർഷം ഗുണപ്രധാനമാണ്. വിദ്യാർത്ഥികൾ ഉയർന്ന ബിരുദങ്ങൾ കരസ്ഥമാക്കാനാവും. ഗവേഷണ പ്രബന്ധങ്ങൾക്ക് പുരസ്കാരങ്ങൾ ലഭിച്ചേക്കാം. പ്രസംഗത്തിലും നാടകം, നൃത്തം തുടങ്ങിയ കലകളിലും വിജയിക്കുന്നതാണ്. ഗാർഹികമായ സ്വൈരക്കേടുകൾക്ക് പരിഹാരമുണ്ടാവും. വൃശ്ചികമാസം മുതൽ വസ്തുക്കളിൽ നിന്നും ആദായം ലഭിച്ചുതുടങ്ങും. വാഹനം സ്വന്തമാക്കാൻ അഭിലഷിക്കുന്നവർക്ക് അതിനവസരം ലഭിക്കാം. കുംഭക്കൂറുകാർ നിലവിലെ തൊഴിൽ ഉപേക്ഷിച്ച് പുതിയ തൊഴിൽ തേടുന്നത് അഭിലഷണീയമല്ല. പുതുസംരംഭങ്ങൾക്ക് മുതൽ മുടക്കുന്നതും കരുതലോടെ വേണം. ആരോഗ്യപരിപാലനത്തിൽ അലംഭാവമരുത്'.

ചതയം

ജന്മശനി തുടരുന്ന വർഷമാണ്. ഇച്ഛാജ്ഞാനക്രിയാശക്തികളെ സമന്വയിപ്പിച്ചു കൊണ്ടുള്ള പ്രവർത്തനമാണ് കരണീയം. അമിത പ്രതീക്ഷകൾ പുലർത്താതിരിക്കുക. ന്യായമായ ആവശ്യങ്ങൾ നിറവേറപ്പെടും. പുതിയ തൊഴിൽ കോഴ്സുകൾ, ഭാഷാ പഠനങ്ങൾ എന്നിവ പ്രയോജനം ചെയ്യും. വിദേശത്ത് പോകാനുള്ള ആഗ്രഹം നടന്നേക്കും. ചെറുകിട സംരംഭങ്ങളിൽ നിന്നും തരക്കേടില്ലാത്ത വരുമാനം വന്നെത്തും. വ്യവഹാരങ്ങൾക്ക് മുതിരാതിരിക്കുന്നതാണ് സമുചിതം. എഴുത്തുകാർ രചനയിൽ പുതുപരീക്ഷണങ്ങൾ നാടത്തും. ചിങ്ങം, കന്നി, കുംഭം, മകരം എന്നീ മാസങ്ങളിൽ ആരോഗ്യപ്രശ്നങ്ങൾ, കടബാധ്യത, കുടുംബവഴക്ക് എന്നിവ സാധ്യതകൾ. മേടമാസം മുതൽ സ്ഥിതി മെച്ചപ്പെടാം.

പൂരുരുട്ടാതി

ഏറ്റെടുത്ത ദൗത്യം പൂർത്തീകരിക്കാനാവും. സ്വകാര്യമേഖലയിൽ ജോലിസാധ്യത/പദവിയിൽ ഉയർച്ച പ്രതീക്ഷിക്കാം. മാർഗതടസ്സങ്ങൾ വിഷമിപ്പിക്കുമെങ്കിലും ദൃഢപരിശ്രമത്തിലൂടെ അവയെ മറികടക്കും. സാങ്കേതിക വിഷയങ്ങളിൽ ഉപരിപഠനം നടത്താനാവും. ചില ആരോഗ്യപ്രശ്നങ്ങൾക്ക് തുടർചികിത്സ വേണ്ടിവന്നേക്കും. ഉപജാപങ്ങളെ കരുതണം. വസ്തുതർക്കങ്ങൾ ചിലപ്പോൾ ഒഴിയാബാധകളായേക്കും. മീനക്കൂറുകാരായ പൂരുരുട്ടാതി നാളുകാർക്ക് കൂടുതൽ മെച്ചപ്പെട്ട സമയമാണ്. വിദേശജോലി/വിദേശധനം എന്നിവ സാധ്യതകൾ. ഗൃഹനിർമ്മാണത്തിന് തുടക്കം കുറിക്കാനാവും. വിവാഹാർത്ഥികൾക്ക് നല്ല സമയമാണ്.

ഉത്രട്ടാതി

കർമ്മഗുണം നിറഞ്ഞ വർഷമാണ്. കൃത്യനിർവഹണത്തിൽ മിടുക്കേറും. അധികാരികളുടെ വിശ്വസ്തരാവും. തൊഴിൽരംഗം കാലാനുസൃതമാക്കും. നയപരമായ സമീപനത്താൽ കുടുംബ പ്രശ്നങ്ങൾ പരിഹരിക്കും. സഹോദരരുമായി ഇണങ്ങും. സാമ്പത്തിക സുസ്ഥിതിയുണ്ടാവും. സന്താനങ്ങൾക്കായി നിക്ഷേപം നടത്താനാവും. കൃഷിയിൽ താത്പര്യമേറുന്നതാണ്. മട്ടുപ്പാവ് കൃഷി ആരംഭിക്കും. പഴയകാല സുഹൃത്തുക്കളെ കാണാനായേക്കും. സുഹൃൽ സംഗമങ്ങൾക്ക് മുൻകൈയ്യെടുക്കും. പ്രണയവിവാഹത്തിന് സാധ്യതയുണ്ട്. ജീവിതപങ്കാളിക്ക് വിലകൂടിയ പാരിതോഷികങ്ങൾ സമ്മാനിക്കും. തുലാം, കുംഭം, മീനം, കർക്കടകം എന്നീ മാസങ്ങളിൽ ആരോഗ്യപ്രശ്നങ്ങൾ ഉടലെടുക്കാം.

രേവതി

രണ്ടാം നാളിൽ രാഹുവും മൂന്നാം നാളിൽ വ്യാഴവും തുടരുന്നതിനാൽ പണക്ലേശം, വാഗ്വാദങ്ങൾ എന്നിവ ചില സാധ്യതകളാണ്. മനസ്സാന്നിദ്ധ്യം കൊണ്ടും പ്രത്യുല്പന്നമതിത്വം കൊണ്ടും ദുരിതങ്ങളെ മറികടക്കും. അനുഭവജ്ഞാനമുള്ള മേഖലകളിൽ പണമുടക്കാനും സംരംഭങ്ങൾ തുടങ്ങാനും ശ്രദ്ധ വേണം. സംഘടനകളുടെ സാരഥ്യം വഹിക്കും. വ്യക്തിപരമായ കാര്യങ്ങളിൽ ശ്രദ്ധ കുറയുന്നതായി കുടുംബാംഗങ്ങളിൽ നിന്നും പഴി കേൾക്കുന്നതാണ്. വിദേശ / അന്യദേശ യാത്രകൾ കൂടും. ഉദ്യോഗത്തിനുള്ള ശ്രമങ്ങൾ വിജയിക്കും. വിദ്യാഭ്യാസത്തിൽ പ്രതീക്ഷിച്ചത്ര മുന്നേറാൻ കഴിഞ്ഞേക്കില്ല. മക്കളുടെ വിവാഹാവശ്യത്തിന് വസ്തുവിൽക്കാൻ തീരുമാനിക്കും. ആരോഗ്യകാര്യങ്ങളിൽ അലംഭാവമരുത്. ചിങ്ങം, ധനു, മകരം, ഇടവം എന്നീ മാസങ്ങൾക്ക് മേന്മയേറും.