ജൂലൈ മാസത്തെ നക്ഷത്രഫലം, മൂലം മുതൽ രേവതി വരെ: Monthly Horoscope July 2023

July Month 2023 Astrological Predictions for stars Moolam to Revathi: 1198 മിഥുനം 16 ന് ശനിയാഴ്ചയാണ് 2023 ജൂലൈ ഒന്നാം തീയതി വരുന്നത്. സൂര്യൻ മിഥുനം- കർക്കടകം രാശികളിലായി സഞ്ചരിക്കുന്നു. ചന്ദ്രൻ അനിഴത്തിൽ തുടങ്ങി ഒരുവട്ടം രാശിചക്രഭ്രമണം പൂർത്തിയാക്കി പൂരാടത്തിൽ എത്തുന്നു. ശനി കുംഭം രാശിയിൽ വക്രഗതിയിൽ സഞ്ചരിക്കുകയാണ്.

രാഹു-കേതു മേടം തുലാം രാശികളിൽ സഞ്ചരിക്കുന്നു. വ്യാഴം മേടം രാശിയിൽ ഭരണി നക്ഷത്രത്തിൽ യാത്ര തുടരുകയാണ്. ചൊവ്വ നീചം കഴിഞ്ഞു കർക്കടകത്തിൽ നിന്നും ചിങ്ങത്തിലേക്ക് സംക്രമിക്കുകയാണ്, മാസാദ്യദിവസം തന്നെ. ബുധൻ മിഥുനത്തിലും കർക്കടകത്തിലും ചിങ്ങത്തിലുമായി സഞ്ചരിക്കുന്നു.

ജൂലൈ 6 ന് ശുക്രൻ കർക്കടകത്തിൽ നിന്നും ചിങ്ങത്തിലേക്കു സംക്രമിക്കുകയാണ്. മാസാന്ത്യം വക്രവും വരുന്നുണ്ട്. ഈ ഗ്രഹസ്ഥിതി എങ്ങനെയാണ് മൂലം മുതൽ രേവതി വരെയുള്ള നാളുകാരെ സ്വാധീനിക്കുന്നുവെന്ന അന്വേഷണമാണിവിടെ.

മൂലം: സൂര്യൻ ഏഴിലും എട്ടിലുമായി സഞ്ചരിക്കുന്നതിനാൽ സർക്കാറുമായി ബന്ധപ്പെട്ട കാര്യങ്ങളിൽ തടസ്സങ്ങൾ വരാം. കരാർ പണികൾ ചെയ്യുന്നവർക്ക് ബില്ലുകൾ യഥാസമയം മാറിക്കിട്ടണമെന്നില്ല. വ്യക്തിപരമായ കാര്യങ്ങളിൽ വിജയിക്കാൻ സാധിക്കുന്നതാണ്. വസ്തുവിൽ നിന്നും ആദായം ലഭിച്ചു തുടങ്ങും. തൊഴിൽ തേടുന്നവർക്ക് പ്രതീക്ഷ നിറവേറപ്പെടാം. ചൊവ്വ ഒമ്പതിൽ സഞ്ചരിക്കുന്നതിനാൽ വ്യവഹാരങ്ങളിൽ അനുകൂലവിധിയുണ്ടാവുന്നതാണ്. ആരോഗ്യപരമായി ജാഗ്രത വേണ്ട കാലമാണ്.

പൂരാടം: കൃത്യമായ പദ്ധതികളിലൂടെ ലക്ഷ്യം നേടാനാവും. കുടുംബത്തിലെ മുതിർന്നവരുടെ പിന്തുണ ശക്തി പകരും. സാമ്പത്തിക പരാധീനതകൾക്ക് പരിഹാരം കാണാനാവും. ഉദ്യോഗസ്ഥർക്ക് ജോലിഭാരം വർദ്ധിക്കാം. സൂര്യന്റെ അനിഷ്ടസ്ഥിതിയാൽ മേലധികാരികളുടെ അപ്രീതിക്ക് പാത്രമാവാനിടയുണ്ട്. പാരമ്പര്യവസ്തുക്കളെച്ചൊല്ലി തർക്കങ്ങൾ ഉണ്ടാവാം. സഹോദരർക്കിടയിൽ ഐകമത്യം കുറയാം. ആഢംബര കാര്യങ്ങൾക്ക് വ്യയമേറിയേക്കും.

ഉത്രാടം: ബുധാദിത്യയോഗത്താൽ കർമ്മനൈപുണ്യം സിദ്ധിക്കുന്നതാണ്. മുൻപ് പരിശ്രമിച്ച് ഉപേക്ഷിച്ചവ വീണ്ടും ശ്രമിച്ചാലോ എന്ന പരിഗണനയിലേക്ക് വരും. പ്രോജക്ടുകളുടെ അവതരണം അംഗീകരിക്കപ്പെടും. വ്യാപാര യാത്രകൾ ഫലപ്രദമായേക്കും. വായ്പകളുടെ തിരിച്ചടവ് മുടങ്ങില്ല. ചർച്ചകളിൽ നല്ല ആശയങ്ങൾ അവതരിപ്പിച്ച് ശ്രദ്ധ നേടും. കുടുംബത്തിൽ മംഗളകർമ്മങ്ങൾ നടക്കും. കഫജന്യരോഗങ്ങൾ ഉപദ്രവിച്ചേക്കാം.

തിരുവോണം: ന്യായമായ ആവശ്യങ്ങൾ സഫലമാകുന്നതാണ്. സ്വന്തം സ്ഥാപനത്തിന്റെ വിപുലീകരണം സാധ്യമാകും. പുതിയ ശാഖ തുറക്കാനായേക്കും. ആതുരശുശ്രൂഷാരംഗത്തുള്ളവരുടെ സേവനം ബഹുമാനിക്കപ്പെടുന്നതാണ്. പൊതുരംഗത്ത് തുടരുന്നവർക്ക് അനുയായികളുടെ വിശ്വാസമാർജിക്കാനായേക്കും. കുടുംബപരമായ ചില പൊരുത്തക്കേടുകൾ പരിഹരിക്കാൻ ശ്രമം തുടരും. ആരോഗ്യപ്രശ്നങ്ങളുള്ളവർ പതിവ് പരിശോധനകൾ ഒഴിവാക്കരുത്.

അവിട്ടം: കർമ്മഗുണം പുഷ്ടിപ്പെടും. ആസൂതണമികവ് അഭിനന്ദിക്കപ്പെടുന്നതാണ്. വ്യാപാരത്തിൽ ലാഭം വന്നുചേരും. വിദ്യാർത്ഥികൾക്ക് അന്യനാട്ടിൽ തുടർപഠനം സാധ്യമാകുന്നതാണ്. പട്ടാളം- പോലീസ് തുടങ്ങിയ രംഗങ്ങളിലുളളവർ മേലധികാരികളുടെ "നല്ല പുസ്തകത്തിൽ" ഇടം പിടിക്കും. ഗൃഹസ്ഥർക്ക് ജീവിതം കൂടുതൽ ആസ്വാദ്യമായി തോന്നാം. ഏഴിൽ ചൊവ്വയുടെ സ്ഥിതിയുള്ളതിനാൽ ചില പൊരുത്തക്കേടുകൾ ഭാര്യാഭർത്താക്കന്മാർക്കിടയിൽ ഉണ്ടായെന്നും വരാം. ധനസ്ഥിതി മോശമാകില്ല.

ചതയം: ജന്മശനി തുടരുന്ന ചതയം നാളുകാർക്ക് വക്രശനി ഒരാശ്വാസമായേക്കാം. മുടങ്ങിപ്പോയ പലതും പുനരാരംഭിക്കാൻ കഴിയും. വീട്ടിൽ നിന്നുമകന്ന് കഴിയുന്നവർക്ക് കുടുംബത്തോടൊപ്പം ചേരാൻ സാധിക്കുന്നതാണ്. നെടുനാളായി നല്ലൊരു തൊഴിലിനായി കാത്തിരിക്കുന്നവർക്ക് പുതുതൊഴിൽ ലഭിക്കാം. കിടപ്പ് രോഗികൾക്ക് ആശ്വസിക്കാൻ കഴിയും. കടക്കെണിയിൽ പെട്ട് നട്ടം തിരിയുന്നവർക്ക് സാമ്പത്തികമായ വളർച്ചയ്ക്ക് വഴിതുറക്കപ്പെടാം.

പൂരുരുട്ടാതി: തൊഴിലിൽ ചില ഗുണപരമായ മാറ്റങ്ങൾ പ്രതീക്ഷിക്കാം. പദവി ഉയരാം. പ്രോജക്ടുകൾക്ക് അംഗീകാരം ലഭിക്കുന്നതാണ്. എതിർശബ്ദങ്ങളെ അവഗണിച്ച് മുന്നേറാനാവും. മീനക്കൂറിൽ ജനിച്ചവർക്ക് വ്യവഹാരങ്ങളിൽ വിജയിക്കാനാവും. വസ്തുവില്പന സംബന്ധിച്ച പ്രശ്നങ്ങൾ പരിഹൃതമാകും. ചൊവ്വയുടെ ഏഴിലെ സ്ഥിതി കുംഭക്കൂറുകാരായ പൂരുരുട്ടാതിക്കാർക്ക് ദാമ്പത്യ ക്ലേശത്തിന് കാരണമായേക്കും.

ഉത്രട്ടാതി: ക്ലേശങ്ങൾക്ക് അയവ് വരുന്നതാണ്. ചില പരിഹാരങ്ങളും താനേ രൂപപ്പെടും. പ്രതീക്ഷിച്ച നീതി ലഭിച്ചേക്കും. തൊഴിൽ തേടുന്നവർക്ക് നല്ല അവസരങ്ങൾ വരുന്നതാണ്. വിദ്യാർത്ഥികളുടെ ആലസ്യം നീങ്ങും. പഠനത്തിൽ ശ്രദ്ധ കേന്ദ്രീകരിക്കാൻ സാധിക്കുന്നതാണ്. വ്യാപാരികൾക്ക് സാമ്പത്തികമായ ഉണർവ് ഉണ്ടാവും. ഉപഭോക്താക്കളുടെ സഹകരണം ഉയരും. കവികളുടെയും കലാകാരന്മാരുടെയും പ്രയത്നങ്ങൾക്ക് അംഗീകാരം വന്നെത്തും.

രേവതി: ഭാഗ്യാധിപനായ ചൊവ്വയ്ക്ക് നീചാവസ്ഥ മാറുന്നത് മീനക്കൂറുകാർക്ക് പൊതുവേ സൽഫലങ്ങൾ സൃഷ്ടിക്കും. ഭഗ്നപ്രതീക്ഷകൾ പൂവണിയുന്നതാണ്. കുടുംബബന്ധങ്ങളുടെ ഊഷ്മളത തിരിച്ചുകിട്ടും. ഉദ്യോഗത്തിൽ പുതുചുമതലകൾ വന്നുചേരും. ധനക്ലേശം കുറയും.
പണയ വസ്തുക്കൾ പുതുക്കാൻ/ തിരിച്ചെടുക്കാൻ സാധിക്കുന്നതാണ്. രോഗഗ്രസ്തർക്ക് ചികിൽസാമാറ്റം ആശ്വാസകരമാവും. മാസത്തിന്റെ രണ്ടാം പകുതി കൂടുതൽ ഗുണപ്രദമായേക്കാം.