July 30- August 05, 2023: വാരഫലം സമ്പൂര്‍ണ്ണം, അശ്വതി മുതല്‍ രേവതി വരെ: Weekly Horoscope Malayalam

July 30- August 05 Weekly Horoscope Astrological Predictions Aswathi to Revathi: സൂര്യൻ കർക്കടകം രാശിയിൽ ആണ്. പൂയം, ആയില്യം ഞാറ്റുവേലകളാണ് ക്രമത്തിൽ. ചന്ദ്രൻ വെളുത്ത ദ്വാദശിയിൽ തുടങ്ങി പൗർണമിയിലെത്തി, കൃഷ്ണപക്ഷ ചതുർത്ഥി വരെ (മൂലം മുതൽ ഉത്രട്ടാതി വരെ) സഞ്ചരിക്കുന്നു. വ്യാഴവും രാഹുവും മേടം രാശിയിലുണ്ട്. ശനി വക്രഗതിയായി കുംഭം രാശിയിൽ, ചതയം മൂന്നാം പാദത്തിൽ സഞ്ചരിക്കുന്നു. കേതു തുലാം രാശിയിൽ ചിത്തിര നാലാം പാദത്തിലുണ്ട്. ചൊവ്വയും ബുധനും വക്രഗതിയായി ശുക്രനും ചിങ്ങം രാശിയിൽ സഞ്ചരിക്കുകയാണ്. ഗ്രഹങ്ങൾക്കൊന്നും ഇപ്പോൾ മൗഢ്യം ഇല്ല. വാരമധ്യത്തോടെ പൗർണമി കഴിയുമെങ്കിലും കൃഷ്ണപക്ഷത്തിലെ ഷഷ്ഠി വരെ ചന്ദ്രൻ ബലവാനാണ്.

ഈയാഴ്ച ഞായർ, തിങ്കൾ ദിവസങ്ങൾ ഇടവക്കൂറിനും, ചൊവ്വ, ബുധൻ ദിവസങ്ങൾ മിഥുനക്കൂറിനും വ്യാഴം, വെള്ളി ദിവസങ്ങൾ കർക്കടകക്കൂറിനും ശനിയാഴ്ച മുതൽ ചിങ്ങക്കൂറിനും അഷ്ടമരാശി നടക്കുന്നു. കരുതൽ വേണ്ട ദിവസങ്ങളായി അഷ്ടമരാശിയെ വിലയിരുത്തുന്നു. അവരവരുടെ കൂറിന്റെ അഥവാ ജന്മരാശിയുടെ എട്ടാം രാശിയിൽ ചന്ദ്രൻ സഞ്ചരിക്കുന്ന രണ്ടേകാൽ ദിവസങ്ങളെയാണ് ഇപ്രകാരം വിശേഷിപ്പിക്കുന്നത്.

അശ്വതി: ഭാഗ്യഭാവം മുതൽ വ്യയഭാവം വരെ ചന്ദ്രൻ സഞ്ചരിക്കുകയാണ്. ചൊവ്വ മുതൽ വെള്ളി വരെ ദിവസങ്ങൾക്ക് മേന്മയേറും. തൊഴിലിൽ ആധിപത്യം നേടാനാവും. ഏല്പിച്ച ദൗത്യം ഭംഗിയായി നിർവഹിക്കും. പിണങ്ങി നിൽക്കുന്നവരെക്കൂടി പങ്കെടുപ്പിച്ച് സംഘടനാ പ്രവർത്തനങ്ങളിൽ മുന്നേറും. അടഞ്ഞുപോയ ആദായമാർഗങ്ങൾ തുറക്കപ്പെടാം. നിക്ഷേപങ്ങളിൽ നിന്നും പ്രതീക്ഷിച്ചത്ര ലാഭം സിദ്ധിക്കുന്നതാണ്. പൊതുവേ ആത്മവിശ്വാസം കൂടും. അഞ്ചാം ഭാവത്തിൽ ഗ്രഹാധിക്യം ഉള്ളതിനാൽ ചിലപ്പോൾ ചിന്താപ്രവണത കൂടാം.

ഭരണി: സംരംഭങ്ങളിലും പരീക്ഷകളിലും വിജയിക്കാൻ കാലം സർവ്വാത്മനാ അനുകൂലമാണ്. ശക്തമായ പിന്തുണ കുടുംബത്തിൽ നിന്നും ലഭിക്കും. നാലാം ഭാവാധിപനായ ചന്ദ്രന് പക്ഷബലം പൂർണമാവുകയാൽ മനസ്സാന്നിദ്ധ്യം അചഞ്ചലമായിരിക്കും. നേട്ടങ്ങൾക്കു പിന്നിൽ മാതാവ് / സുഹൃത്തുക്കൾ തുടങ്ങിയവരുടെ പ്രേരണയും കാരണമാവാം. കുജബുധശുക്രന്മാർ അഞ്ചാം ഭാവത്തിൽ നിന്ന് പതിനൊന്നിലേക്ക് നോക്കുകയാൽ പല വഴികളിലൂടെ ആദായം സിദ്ധിക്കുന്നതാണ്. ആരോഗ്യകാര്യത്തിൽ ശ്രദ്ധ വേണം.

കാർത്തിക: വാരത്തിന്റെ തുടക്കം ക്ലേശകരമാവാം. അലച്ചിലും പണച്ചെലവുമേറാം. ആരോഗ്യപരമായി അസ്വസ്ഥതകൾ ഉണ്ടാവാം. മറ്റു ദിവസങ്ങൾ ഗുണകരമാവും. കർമ്മരംഗത്ത് നേട്ടങ്ങൾ വന്നുചേരുന്നതാണ്. വ്യാപാരത്തിൽ നിന്നും വരുമാനം വർദ്ധിക്കും. വിദ്യാർത്ഥികൾ പഠിപ്പിൽ മികവ് തെളിയിക്കുന്നതിണ്. ഗൃഹനിർമ്മാണത്തിൽ ചെലവ് പ്രതീക്ഷിച്ചതിലും അധികമായേക്കാം.

രോഹിണി: നാലിൽ ചൊവ്വ നിൽക്കുകയാൽ ഗാർഹികമായ ക്ലേശങ്ങൾ, സുഹൃൽകലഹങ്ങൾ ഇവയുണ്ടാവാം. അയൽ തർക്കങ്ങളും ഭവിച്ചേക്കാം. വൈകാരികക്ഷോഭം നിയന്ത്രിക്കപ്പെടേണ്ടതാണ്. സാമ്പത്തികസ്ഥിതി മോശമാവില്ല. രാശിനാഥനായ ശുക്രൻ വക്രത്തിലാകയാൽ മുൻനിലപാടുകൾ തിരുത്താനിടയുണ്ട്. മുൻപ് ശരിയെന്ന് കരുതിയവ മറിച്ചാവാം എന്ന് തോന്നാനും സാധ്യത കാണുന്നു. തൊഴിൽരംഗം പുഷ്ടിപ്പെടുന്നതാണ്.

മകയിരം: ആദ്ധ്യാത്മിക യാത്രകൾ നടത്തും. കുടുംബകാര്യങ്ങളിൽ അല്പം സ്വസ്ഥതക്കുറവുണ്ടാകാം. ഉദ്യോഗസ്ഥർക്ക് ഉന്നമനേച്ഛ കൂടും. എന്നാൽ അതിനനുസരിച്ച് പദവിയോ വേതനവർദ്ധനവോ ഉണ്ടാവണമെന്നില്ല. ആലോചനായോഗങ്ങളിൽ അഭിപ്രായങ്ങളുടെ പേരിൽ ഒറ്റപ്പെടാം. മക്കളുടെ നേട്ടങ്ങൾ പ്രതീക്ഷിച്ചതു പോലെയായതിൽ ആഹ്ളാദിക്കാനാവും. അന്യദേശത്തു നിന്നും നാട്ടിലേക്ക് മടങ്ങാൻ ആഗ്രഹിക്കുന്നവർക്ക് കാര്യസാധ്യം ഭവിക്കും.

തിരുവാതിര: തെരഞ്ഞെടുപ്പുകളിൽ മത്സരിക്കും. ഗവേഷകരും വിദ്യാർത്ഥികളും വിജ്ഞാന സമ്പാദനത്തിനായി ആത്മാർഥമായ പരിശ്രമം തുടരും. ജോലി അന്വേഷിക്കുന്നവർക്ക് അതിനുള്ള വഴി തുറന്നുകിട്ടും. ഉദ്യോഗസ്ഥർക്ക് പദവികൾ ഉയരും. നവസംരംഭങ്ങൾ സാക്ഷാത്കരിക്കാൻ കഴിഞ്ഞേക്കും. കുടുംബ ജീവിതം കൂടുതൽ രമ്യമായി ഭവിക്കും. സകുടുംബ ഉല്ലാസ യാത്രകൾ മനസ്സന്തോഷമേകും. ചൊവ്വ, ബുധൻ ദിവസങ്ങൾക്ക് ശോഭ കുറയുന്നതാണ്.

പുണർതം: പ്രതീക്ഷകളിൽ ചിലതെങ്കിലും സഫലമാകുന്നതാണ്. പുതിയ ചുവടുവെപ്പുകൾക്ക് അംഗീകാരവും പിന്തുണയും ലഭിക്കുന്നതാണ്. വിദ്യാർത്ഥികളുടെ പഠനനിലവാരം മെച്ചപ്പെടും. വായ്പകൾക്കുള്ള അപേക്ഷകൾക്ക് മുൻഗണന കിട്ടുന്നതാണ്. ഗാർഹികരംഗത്ത് സ്വസ്ഥതയുണ്ടാവും. സ്നേഹവിരുന്നുകളിൽ പങ്കെടുക്കും. ഗൃഹസംബന്ധമായി ചില ചെലവുകൾ ഉണ്ടാവുന്നതാണ്. വാരമദ്ധ്യത്തിൽ ക്ലേശസാധ്യത. സാഹസങ്ങളരുത്.

പൂയം: സൂര്യൻ ഈ ആഴ്ച പകുതി വരെ ജന്മനക്ഷത്രത്തിൽ തുടരുകയാണ്. അലച്ചിൽ ഉണ്ടാവും. ദേഹസുഖം കുറയാം. മറ്റു ഗ്രഹങ്ങളുടെ ആനുകൂല്യത്താൽ ഗുണദോഷസമ്മിശ്രമായ ഫലങ്ങൾ ഉണ്ടാകുന്നതാണ്. സ്വന്തം ബിസിനസ്സിൽ അഭിവൃദ്ധി പതുക്കെയാവും. മത്സരങ്ങളിലും പരീക്ഷകളിലും കഷ്ടിച്ച് വിജയിക്കും. നവസംരംഭങ്ങൾ തുടങ്ങുക ഇപ്പോൾ അഭിലഷണീയമല്ല. കരാറുപണികൾ പുതുക്കിക്കിട്ടിയേക്കാം. കുടുംബാംഗങ്ങൾ പിന്തുണയ്ക്കുന്നതാണ്.

ആയില്യം: പുതിയ തീരുമാനങ്ങൾ കൈക്കൊള്ളുന്നതിനു മുൻപ് എല്ലാവശങ്ങളും പരിഗണിക്കുന്നത് നന്നായിരിക്കും. സാമ്പത്തിക സ്ഥിതി മോശമാവില്ല. ഭൂമിയിടപാടുകൾ ലാഭകരമാവുന്നതാണ്. കുടുംബാംഗങ്ങളുടെ സാമ്പത്തികമായ ആവശ്യങ്ങൾ നിറവേറ്റുവാൻ കഴിയും. വ്യവഹാരങ്ങളിൽ അനുകൂലഫലം എന്നത്പകുതി സാധ്യതയാണ്. യാത്രകൾ കൊണ്ട് ചെറിയ നേട്ടങ്ങൾ പ്രതീക്ഷിക്കാം. ദുഷ്പ്രേരണകളെ നിയന്ത്രിക്കേണ്ടതുണ്ട്. ആരോഗ്യകാര്യത്തിൽ ശ്രദ്ധ വേണം.

മകം: ജന്മരാശിയിൽ മൂന്നുഗ്രഹങ്ങൾ നിൽക്കുകയാൽ ആശയക്കുഴപ്പം നേരിടാം. ലക്ഷ്യത്തിലെത്താൻ കഠിനവഴികൾ താണ്ടേണ്ടിവരും. ആരോഗ്യപ്രശ്നങ്ങൾ, അകാരണമായ ക്ഷോഭം എന്നിവയും സാധ്യതകൾ. അപ്രതീക്ഷിത യാത്രകൾ വേണ്ടിവരും. ചെലവുകളിൽ നിയന്ത്രണം വേണം. ചെറിയ നേട്ടങ്ങൾ, ചെറിയ ലാഭങ്ങൾ എന്നിവ പ്രതീക്ഷിക്കാം. വലിയ ക്രയവിക്രയങ്ങൾക്ക് മുതിരാതിരിക്കുക അഭികാമ്യം.

പൂരം: നക്ഷത്രാധിപനായ ശുക്രന് വക്രഗതി തുടരുന്നതിനാൽ ഉറച്ച തീരുമാനങ്ങൾക്ക് ഇളക്കം വരാം. വ്യക്തിപരമായ നേട്ടങ്ങൾ ഉണ്ടാവുമെങ്കിലും അവയ്ക്ക് തിളക്കം കുറയാനിടയുണ്ട്. സർക്കാർ കാര്യങ്ങൾ നേടാൻ അലച്ചിലുണ്ടാവും. ഉദ്യോഗസ്ഥർക്ക് ചുമതലകൾ ഏറും; ഒപ്പം അദ്ധ്വാനവും. കുടുംബകാര്യങ്ങളിൽ ഗുണത്തിനാവും മുൻതൂക്കം. മുൻകോപം നിയന്ത്രിക്കേണ്ടതുണ്ട്. ആരോഗ്യകാര്യങ്ങളിൽ അലംഭാവമരുത്.

ഉത്രം: ഗുണാനുഭവങ്ങൾക്കൊപ്പം വിഷമങ്ങളെയും അഭിമുഖീകരിക്കേണ്ടി വരാം. കടബാധ്യതകൾ ക്ലേശമുണ്ടാക്കും. കടം വാങ്ങി കടം വീട്ടേണ്ട സാഹചര്യം വരാം. പ്രതീക്ഷിച്ച വാഗ്ദാനങ്ങൾ നിറവേറപ്പെടണം എന്നില്ല. തൊഴിൽ സാഹചര്യങ്ങളിൽ നേരിയ ആനുകൂല്യം വന്നേക്കാം. ജോലിതേടുന്നവർക്ക്, ചെറിയ ജോലിയെങ്കിലും ലഭിക്കാനിടയുണ്ട്. നിലവിലെ ജോലി ഉപേക്ഷിക്കുന്നത് അഭിലഷണീയമായിരിക്കില്ല. വാഹനം, അഗ്നി, ആയുധം തുടങ്ങിയവയുടെ ഉപയോഗം അത്യന്തം ശ്രദ്ധിച്ചാവണം. സുഹൃത്തുക്കളുടെയും കുടുംബത്തിന്റെയും പിന്തുണ പ്രത്യാശയേകും.

അത്തം: ആഴ്ചയുടെ രണ്ടാം പകുതി കൂടുതൽ പ്രയോജനകരമാവും. ആദ്യപകുതിയിൽ സാമ്പത്തിക ക്ലേശങ്ങൾ വരാം; ബുധൻ തൊട്ട് ധനസ്ഥിതി മെച്ചമാകും. വിദ്യാഭ്യാസത്തിൽ അലസത വരാം. ഏകാഗ്രത കുറഞ്ഞേക്കും. ഉദ്യോഗസ്ഥർക്ക് പിടിപ്പുകേടിന് മേലധികാരിയുടെ ശകാരം കിട്ടാം. കുടുംബബന്ധങ്ങൾ ഹൃദ്യമാവുന്നതിന് സ്വന്തം മനോഭാവം തടസ്സമാണെന്നറിയും. അവ തിരുത്തി മുന്നോട്ടുപോകാനുള്ള ശ്രമം ഭാഗികമായി വിജയിക്കുന്നതാണ്.

ചിത്തിര: സൽകർമ്മങ്ങൾ ചെയ്യാൻ സന്ദർഭമുണ്ടാകും. വാഗ്വാദങ്ങളിലും സംവാദങ്ങളിലും വിജയിക്കുന്നതാണ്. രാഷ്ട്രീയലക്ഷ്യത്തോടെ നടത്തുന്ന പ്രവർത്തനങ്ങളിൽ വിജയിക്കും. ഭൂമിയുടെ ക്രയവിക്രയങ്ങൾ നേട്ടത്തിന് കാരണമാകുന്നതാണ്. വ്യാപാരത്തിൽ നിന്നും കുറച്ചെങ്കിലും ലാഭം വന്നെത്തും. ബന്ധുക്കൾക്കു ചില സഹായങ്ങൾ ചെയ്യാൻ തയ്യാറാവും. പഠിതാക്കൾക്ക് ഗവേഷണ പ്രബന്ധങ്ങൾ സമർപ്പിക്കാനാവും. വാരാന്ത്യത്തിൽ ചെലവധികരിക്കും.

ചോതി: വാരത്തിന്റെ തുടക്കം തന്നെ നല്ല ഫലങ്ങളുണ്ടാവും. തടസ്സങ്ങൾ നീങ്ങി പ്രവൃത്തിയിൽ മുഴുകാനാവും. സ്വന്തം വ്യാപാരത്തിലും മറ്റുള്ള തൊഴിലുകളിലും വിജയിക്കുന്നതാണ്. ഉപഭോക്താക്കളുടെ താല്പര്യങ്ങൾ മനസ്സിലാക്കും. ധനവിനിയോഗം മികച്ചതായിരിക്കും. വരവും ചെലവും സമീകരിക്കുവാനാവും. കലാപ്രവർത്തനം പ്രോൽസാഹിക്കപ്പെടും. കുടുംബാംഗങ്ങളുടെ കാര്യങ്ങൾ ശ്രദ്ധാപൂർവം മനസ്സിലാക്കുവാനും ഉചിതമായ മാർഗ്ഗനിർദ്ദേശങ്ങൾ നൽകുവാനും സമയം കണ്ടെത്തും.

വിശാഖം: പതിനൊന്നാം ഭാവത്തിൽ മൂന്ന് ഗ്രഹങ്ങളുള്ളതിനാൽ തൊഴിലിൽ പുരോഗതിയും വിജയവും മനസ്സ്വസ്ഥതയും വന്നെത്തും. ധനപരമായ ക്ലേശങ്ങൾ താൽകാലികമായെങ്കിലും അവസാനിക്കും. സർക്കാർ കാര്യങ്ങളിലെ തടസ്സങ്ങൾ നീങ്ങുന്നതാണ്. കർമ്മമേഖലയിൽ നവോന്മേഷം സിദ്ധിക്കും. പ്രണയികൾക്ക് അവസ്മരണീയമായ അനുഭവങ്ങൾ വന്നെത്തും. ദാമ്പത്യത്തിലെ പ്രശ്നങ്ങൾ പരിഹരിക്കപ്പെടുന്നതാണ്. ആരോഗ്യകാര്യത്തിൽ ശ്രദ്ധ പുലർത്തേണ്ടതുണ്ട്.

അനിഴം: പൊതുവേ നേട്ടങ്ങളും കോട്ടങ്ങളും അനുഭവത്തിൽ വരുന്ന ആഴ്ചയാണ്. എന്നാൽ കൂടുതൽ അദ്ധ്യാനിക്കേണ്ട സാഹചര്യം സംജാതമാകുന്നതാണ്. വിജയത്തിന് തിളക്കം കുറഞ്ഞുപോയതായി തോന്നാം. ശത്രുക്കളുടെ രഹസ്യകരുനീക്കങ്ങൾ ശ്രദ്ധയിൽപ്പെടണമെന്നില്ല. ഉപരിവിദ്യാഭ്യാസത്തിൽ ചില ക്ലേശങ്ങൾ ഭവിക്കാം. ദൂരദിക്കുകളിൽ തൊഴിൽ ലഭിക്കാൻ സാധ്യതയുണ്ട്. എന്നാൽ നിലവിലെ തൊഴിൽ ഉപേക്ഷിച്ച്, മറ്റൊരു ജോലി തേടുന്നത് അഭിലഷണീയമാവില്ല. ദൈവിക സമർപ്പണങ്ങൾ തടസ്സപ്പെടാം. സാമ്പത്തികസ്ഥിതി ശരാശരിയായിരിക്കും.

തൃക്കേട്ട: പഠനമോ ജോലിയോ മൂലം വീടുവിട്ടുനിൽക്കേണ്ട സാഹചര്യം വന്നുചേരാം. എന്നാൽ പുതിയ അവസരങ്ങൾ പ്രയോജനപ്പെടുത്താൻ മനസ്സ് തയ്യാറായേക്കില്ല. പ്രൊഫഷണലുകൾക്ക് ചില വിളംബങ്ങളോ വിഘ്നങ്ങളോ വരാം. ക്ഷമാപൂർവമുള്ള കാത്തിരിപ്പും സാമ്പത്തിക സാഹസങ്ങൾ ഒഴിവാക്കുന്നതും പരീക്ഷണങ്ങൾക്ക് തുനിയാതിരിക്കുന്നതും ഈയാഴ്ചയിൽ നല്ല മറുമരുന്നുകളാണ്. ദാമ്പത്യ ജീവിതത്തിൽ അല്പം സ്വൈരക്കേടുകൾ ഭവിക്കാം. കലാപ്രവർത്തനത്തിൽ നൈരന്തര്യം കുറയാം.

മൂലം: ജന്മനക്ഷത്രത്തിലാണ് വാരം തുടങ്ങുന്നത്. സന്തോഷാനുഭവങ്ങൾ ഉണ്ടാവും. നല്ല ഭക്ഷണം, ആവോളം വിശ്രമം ഇവ ഉണ്ടാകും. മനസ്സിനെ ആഹ്ളാദിപ്പിക്കുന്ന കാര്യങ്ങൾ ചെയ്യാനാവും. വ്യാപാരത്തിൽ വലിയ പുരോഗതി പ്രതീക്ഷിക്കേണ്ടതില്ല. സാമ്പത്തിക സ്ഥിതി ശരാശരിയായി തുടരും. സർക്കാർ കാര്യങ്ങളിൽ തടസ്സങ്ങൾ വന്നുചേരുന്നതാണ്. ഉദ്യോഗസ്ഥർക്ക് മേലധികാരിയുമായി പൊരുത്തപ്പെടാൻ കഴിഞ്ഞേക്കില്ല.

പൂരാടം: ആരോഗ്യപ്രശ്നങ്ങൾ അലട്ടാം. ശാരീരിക സൗഖ്യമുണ്ടായാൽ വല്ലകാര്യവും മനക്ലേശത്തിന് ഇടവരുത്തിയെന്നു വന്നേക്കാം. വ്യാപാരത്തിൽ പുരോഗതി ഭാഗികമായിട്ടാവും. സാമ്പത്തിക സ്ഥിരത പറയാനാവില്ല. പിതാവുമായി കലഹിച്ചേക്കാം. കുടുംബജീവിതത്തിൽ ഇണക്കവും പിണക്കവും ഇടകലരും. ചില സുഹൃത്തുക്കൾ സഹായഹസ്തവുമായി പിന്തുണയ്ക്കും. ബന്ധുക്കൾ ശത്രുക്കളെപ്പോലെ പെരുമാറിയെന്നും വരാം. ജാഗ്രത എല്ലാക്കാര്യത്തിലും ഉണ്ടാവണം.

ഉത്രാടം: നിശ്ചിത സമയത്തിനുള്ളിൽ കൂടുതൽ കാര്യങ്ങൾ ചെയ്യാനുള്ള ശ്രമം മുഴുവനായും വിജയിക്കണമെന്നില്ല. ചില നേട്ടങ്ങൾ സന്തോഷമേകും. വാരത്തിന്റെ തുടക്കത്തിൽ ക്ലേശങ്ങൾക്കാവും മുൻതൂക്കം. ചെലവേറുന്നതാണ്. ഗൃഹോപകരണങ്ങൾ മാറ്റിവാങ്ങേണ്ടി വരാം. സുഹൃത്തുക്കളുമായി രമ്യബന്ധം നിലനിർത്തുന്നതിൽ പരാജയപ്പെടാം. വിദ്യാർത്ഥികൾക്ക് പഠനത്തിൽ ഏകാഗ്രത കുറഞ്ഞേക്കാം.

തിരുവോണം: വാഗ്ദാനങ്ങൾ യഥാർത്ഥമാണോ എന്നന്വേഷിക്കുന്നത് നന്നായിരിക്കും. ഉപജീവനവൃത്തിയിൽ പരിഷ്ക്കരംകൊണ്ടുവരാൻ ശ്രമം തുടരും. പുതുജോലി തേടുന്നത്, നിലവിലെ ജോലി ഉപേക്ഷിച്ചാവരുത്. സാമ്പത്തിക രംഗം മോശമാവില്ല. ന്യായമായ ആവശ്യങ്ങൾ നടന്നുകിട്ടുന്നതാണ്. മക്കളുടെ വിവാഹ കാര്യത്തിൽ തീരുമാനമാകത്തത് വിഷമിപ്പിക്കും. ഏഴിലും എട്ടിലും പാപഗ്രഹങ്ങൾ സഞ്ചരിക്കുന്നതിനാൽ ആരോഗ്യകാര്യങ്ങളിൽ കരുതൽ വേണം.

അവിട്ടം: കർമ്മമേഖലയിലെ മികവ് നിലനിർത്തും. സഹപ്രവർത്തകർ ഉപദേശം തേടും. പുതുദൗത്യങ്ങളിൽ നന്നായി പങ്കുകൊള്ളും. ദുശ്ശീലങ്ങൾ ഉപേക്ഷിക്കാൻ ശ്രമം തുടരും. ദാമ്പത്യരംഗം സുഖകരമാവണമെന്നില്ല. സാമ്പത്തിക അസമത്വങ്ങൾ കലഹപ്രേരണയായേക്കും. പ്രണയികൾക്കിടയിൽ ഊഷ്മളത കുറയാം. അവിവാഹിതരുടെ വിവാഹസ്വപ്നം നീളുന്നതാണ്. മകരക്കൂറുകാർക്ക് ആരോഗ്യപ്രശ്നങ്ങൾ, കാര്യവിഘ്നം ഇവ ഭവിക്കാം.

ചതയം: മത്സരബുദ്ധിയോടെ പ്രവൃത്തികളിൽ മുഴുകും. ഏറ്റെടുത്ത ഉത്തരവാദിത്വങ്ങൾ ഭംഗിയായി പൂർത്തിയാക്കും. സർക്കാരിൽ നിന്നും അനുമതികളും ആനുകൂല്യങ്ങളും പ്രതീക്ഷിച്ച സമയത്ത് വന്നെത്തും. ഭദ്രതയില്ലാത്ത സാമ്പത്തിക ഇടപാടുകളിൽ നിന്നും പിന്മാറുന്നതാണ്. വിദേശയാത്രകൾക്ക് അല്പം കൂടി കാത്തിരിക്കേണ്ടിവന്നേക്കാം. ദാമ്പത്യത്തിൽ സ്വൈരക്കേടുകൾ ഉണ്ടാവുന്നതാണ്.

പൂരുരുട്ടാതി: അധികാരികളുടെ വിശ്വാസം നേടും. പദവി ഉയരുന്നതാണ്. സംഘടനകളിലും രാഷ്ട്രീയ സ്ഥാപനങ്ങളിലും താക്കോൽ സ്ഥാനങ്ങളിലെത്തും. വിജയതന്ത്രങ്ങൾ ഫലപ്രദമായി ആവിഷ്കരിക്കും. കുടുംബജീവിതത്തിലെ പ്രശ്നങ്ങൾ പരിഹരിക്കാൻ ശ്രമം തുടരും. ഭൂമി സംബന്ധിച്ച ഇടപാടുകളിൽ നേട്ടം പ്രതീക്ഷിക്കാം. സഹോദരബന്ധം ഊഷ്മളമാകും. ദൈവിക സമർപ്പണങ്ങൾക്ക് സമയം കണ്ടെത്താനാവും.

ഉത്രട്ടാതി: വ്യവഹാരങ്ങൾക്കായി അലച്ചിൽ തുടരും. എതിർ ശബ്ദങ്ങളെ തിരിച്ചറിയുന്നതാണ്. അതിജീവന വഴികൾ തെളിഞ്ഞുകിട്ടാം. പാരമ്പര്യ തൊഴിലുകൾ പിന്തുടരുന്നവർക്ക് നേട്ടങ്ങൾ പ്രതീക്ഷിക്കാവുന്നതാണ്. കുടുംബാംഗങ്ങളുടെ പിന്തുണ കരുത്തുപകരും. അവരുടെ ശ്രേയസ്സ് ആഹ്ളാദമേകും. ദീർഘയാത്രകൾ മുൻനിശ്ചയിച്ചതിൻ പടി നടന്നേക്കും. വായ്പകൾ ലഭിക്കാൻ വഴികൾ തേടും. സാമ്പത്തിക അച്ചടക്കം ഗുണമേകും.

രേവതി: സംഘടനാ പ്രവർത്തനത്തിന്റെ ചുക്കാൻ പിടിക്കും. പ്രവൃത്തിമേഖലയിൽ അനിഷേധ്യത തുടരുന്നതാണ്. ഗൃഹനിർമ്മാണത്തിലെ തടസ്സം പരിഹരിക്കും. വ്യവഹാരങ്ങളിൽ നീതി ലഭിച്ചേക്കാം. വിദ്യാർത്ഥികൾക്ക് ഉപരിപഠനത്തിന് പ്രവേശം കിട്ടുന്നതാണ്. മക്കളുടെ ഭാവികാര്യങ്ങൾക്കായി അലച്ചിലുണ്ടായേക്കാം. സാമ്പത്തികമായി തരക്കേടില്ലാത്ത കാലമാണ്. പൂജാദികർമ്മങ്ങളിൽ പങ്കെടുക്കും. കുടുംബത്തോടൊപ്പം സമയം ചെലവഴിക്കാനാവും.