July 23- July 29, 2023: വാരഫലം സമ്പൂര്‍ണ്ണം, അശ്വതി മുതല്‍ രേവതി വരെ: Weekly Horoscope Malayalam

July 23- July 29 Weekly Horoscope Astrological Predictions Aswathi to Revathi: സൂര്യൻ കർക്കടകം രാശിയിൽ പൂയം ഞാറ്റുവേലയിൽ സഞ്ചരിക്കുന്നു. ചന്ദ്രൻ വെളുത്ത പഞ്ചമി മുതൽ ഏകാദശി വരെയുള്ള തിഥികളിലാണ്. പക്ഷബലം ഉണ്ട് ചന്ദ്രനെന്നു സാരം. ചൊവ്വ പൂരം നക്ഷത്രത്തിലും ബുധൻ ആയില്യം-മകം നക്ഷത്രങ്ങളിലും ഗുരു ഭരണിയിലും സഞ്ചരിക്കുന്നു. ശുക്രൻ വക്രഗതിയിലാണ്. പൂരം, മകം, ആയില്യം എന്നീ നാളുകളിൽ ശുക്രൻ പിന്നോട്ടു പോകുകയാണ്.

ശനി ചതയത്തിൽ വക്രത്തിലാണ് ഇപ്പോൾ. രാഹു അശ്വതി രണ്ടാം പാദത്തിലും കേതു ചിത്തിര നാലാം പാദത്തിലും തുടരുന്നു. ഇതാണ് വരുന്ന ആഴ്ചയിലെ ഗ്രഹസ്ഥിതി. ഈയാഴ്ച്ചയിൽ ഞായർ, തിങ്കൾ ദിവസങ്ങൾ കുംഭക്കൂറിനും ചൊവ്വ ഉച്ചമുതൽ വ്യാഴം വരെ മീനക്കൂറിനും, വെള്ളി, ശനി ദിവസങ്ങൾ മേടക്കൂറിനും അഷ്ടമരാശി ദിവസങ്ങളാണ് എന്നതും പ്രസ്താവ്യം.

അശ്വതിയിൽ തുടങ്ങി രേവതി വരെയുള്ള മുഴുവൻ നാളുകാർക്കും വാരഫലം അനുകൂലമാണോ പ്രതികൂലമാണോ എന്ന അന്വേഷണമാണ് ഇവിടെ നടത്തപ്പെടുന്നത്.

അശ്വതി: രണ്ടാം ഭാവാധിപനായ ശുക്രൻ വക്രഗതിയിലാകയാൽ സാമ്പത്തിക ക്ലേശം ഏർപ്പെടാം. മുഖാഭരണങ്ങൾ കളവ് പോയേക്കാം. പഠനത്തിൽ ശ്രദ്ധ കുറയാനിടയുണ്ട്. ചൊവ്വയുടെ പഞ്ചമ സ്ഥിതിയാൽ മനക്ലേശം, അനാവശ്യ കാര്യങ്ങളിൽ നിർബന്ധബുദ്ധി എന്നിവയും ഫലം. വാരത്തിന്റെ തുടക്കത്തിൽ കർമ്മരംഗം പുഷ്ടിപ്പെടുന്നതാണ്.

ഭരണി: മനസ്സ്വസ്ഥത കുറയും. തീവ്രമായ ഇഷ്ടാനിഷ്ടങ്ങൾ പുലർത്തും. ഉദരരോഗം ഒരു സാധ്യതയാണ്. പ്രവൃത്തികളിൽ ആലസ്യമുണ്ടാകാനിടയുണ്ട്. നക്ഷത്രാധിപന് വക്രഗതി തുടങ്ങുകയാൽ നിലപാടുകളിൽ നിന്നും പിന്നോട്ടു പോയേക്കും, ആദർശത്തിൽ വെള്ളം ചേർക്കാൻ തയ്യാറാകുന്നതാണ്. പ്രണയികൾക്ക് പാരസ്പര്യം കുറയാം. ജീവിതശൈലി രോഗങ്ങൾ വിഷമിപ്പിക്കാം. വാരാദ്യത്തിൽ അധികാര സിദ്ധിയുണ്ടാകും.

കാർത്തിക: അനുകൂല സാഹചര്യങ്ങൾ പരമാവധി പ്രയോജനപ്പെടുത്തും. സർക്കാരുമായി ബന്ധപ്പെട്ട വിഷയങ്ങളിൽ നേട്ടമുണ്ടാകും. ഔദ്യോഗിക കാര്യങ്ങളിൽ കൃത്യനിഷ്ഠ പുലർത്തും. ചില പുതുചുമതലകൾ വന്നുചേർന്നാൽ അത്ഭുതപ്പെടാനില്ല. വിനോദിക്കാനും മനസ്സിന് സന്തോഷിക്കാനുമുള്ള സന്ദർഭം സംജാതമാകും. കുടുംബജീവിതത്തിൽ സമാധാനം ഭവിക്കുന്നതാണ്.

രോഹിണി: നാലാം ഭാവത്തിലെ ചൊവ്വ മനപ്രയാസങ്ങൾ സൃഷ്ടിച്ചേക്കാം. ദേഹസുഖക്കുറവു വരുത്താം. എന്നാൽ മറ്റു ഗ്രഹങ്ങളുടെ അനുകൂലത ഗുണകരമാവും. സൂര്യൻ ശക്തമായ പിന്തുണയേകും. സംരംഭങ്ങളിൽ സർക്കാർ അനുമതിയുണ്ടാവും. തൊഴിൽ തടസ്സം നീങ്ങാം. വ്യാപാരത്തിലെ മാന്ദ്യം പരിഹൃതമായേക്കും. വിദ്യാർത്ഥികൾക്ക് ഏകാഗ്രതയോടെ പഠനത്തിൽ മുഴുകാനാവും.

മകയിരം: വിജയിക്കാൻ പല വഴികൾ തുറക്കപ്പെടും. അവ പ്രയോജനപ്പെടുത്തുന്നതിൽ പത്താം ഭാവത്തിലെ ശനി തടസ്സങ്ങൾ സൃഷ്ടിക്കാം. മിഥുനക്കൂറുകാർക്ക് സഹോദരാനുകൂല്യം പ്രതീക്ഷിക്കാം. ഭൂമി വ്യാപാരത്തിൽ നിന്നും ആദായം ഉണ്ടാകുന്നതാണ്. കുടുംബാംഗങ്ങളുടെ ക്ഷേമത്തിൽ ശ്രദ്ധിക്കും. പുതുതൊഴിൽ നേടാനാവും. വരുമാനം മോശമാവില്ല. ഇടവക്കൂറുകാർ കൂടുതൽ ആലോചിക്കും. അക്കാരണത്താൽ നേട്ടങ്ങൾ കുറയാം.

തിരുവാതിര: വിജ്ഞാന സമ്പാദനം എളുപ്പമാവും. പരീക്ഷയിൽ വിജയിക്കാൻ സാധിക്കും. ഉദ്യോഗസ്ഥർക്ക് ചുമതലകളും അധികാരവും കൂടും. സ്നേഹവിരുന്നുകളിൽ പങ്കെടുക്കാനാവും. വ്യാപാരികൾക്ക് ലോൺ, ചിട്ടി മുതലായവയിൽ നിന്നും ധനാഗമം ഉണ്ടാവും. മക്കളുടെ ശ്രേയസ്സിനായി നല്ല തീരുമാനങ്ങൾ കൈക്കൊള്ളുന്നതാണ്. വീട് , വാഹനം മുതലായവ നവീകരിക്കുവാൻ ശ്രമം തുടങ്ങും. ആരോഗ്യനില തൃപ്തികരമാവും.

പുണർതം: ഭരണപരമായ തീരുമാനങ്ങൾ സ്വാഗതം ചെയ്യപ്പെടും. സുഹൃത്തുക്കളുടെ പിന്തുണ ശക്തിയേകും. ധനപരമായി പൊതുവേ കാലം അനുകൂലമാണ്. വായ്പകൾ മുടക്കം കൂടാതെ അടയ്ക്കാനാവും. കാലാവധി തീരുന്ന കരാറുകൾ പുതുക്കിക്കിട്ടും. വിദ്യാർത്ഥികൾക്ക് ഇഷ്ടവിഷയങ്ങളിൽ ശ്രദ്ധകേന്ദ്രീകരിക്കാനും ഉപരിപഠനത്തിന് പോകാനും കഴിയുന്നതാണ്. ആരോഗ്യപരമായി നല്ല സമയമാണെങ്കിലും പരിശോധനാദികൾ മുടക്കരുത്.

പൂയം: സൂര്യൻ ജന്മരാശിയിൽ തുടരുകയാൽ ദേഹസൗഖ്യം കുറയും. ക്ഷോഭശീലം ഉയരും. ചെറുകാര്യങ്ങൾ പോലും ദുർലഭമാകാം. ഉദ്യോഗസ്ഥർക്ക് അധികാരികളുടെ ‘നല്ല പുസ്തകത്തിൽ’ ഇടം നേടാൻ കഴിഞ്ഞേക്കില്ല. അപവാദങ്ങൾ അലട്ടാം. സാമ്പത്തിക സ്ഥിതി മോശമാവില്ല. പ്രതീക്ഷിക്കാത്ത വഴികളിൽ നിന്നും പണവരവ് ഉണ്ടാകും. കുടുംബാംഗങ്ങളുടെ ഐക്യം ഹൃദയോന്മേഷം പകർന്നേക്കും. ആരോഗ്യ പരിശോധനകൾ മുടക്കരുത്.

ആയില്യം: ജന്മരാശിയിൽ സൂര്യൻ, രണ്ടിൽ ചൊവ്വ, നാലിൽ കേതു, അഷ്ടമത്തിൽ ശനി, പത്തിൽ രാഹു എന്നിങ്ങനെ പാപഗ്രഹങ്ങളുടെ പ്രധാനഭാവസ്ഥിതി തുടരുന്നതിനാൽ നേട്ടങ്ങൾ എളുപ്പമാവില്ല. ചെറുകാര്യങ്ങൾ പോലും വിയർത്തു നേടേണ്ടിവരും. കെണികളിൽ വീഴാതെ നോക്കണം. കടബാധ്യത കൂടാം. ശുക്രനും ബുധനും അനുകൂല ഭാവങ്ങളിൽ തുടരുകയാൽ അതിജീവനം വിഷമമാവില്ല. പഠന മികവ്, ഗൃഹ സൗഖ്യം, കച്ചവടത്തിൽ പുരോഗതി എന്നിവ ഗുണാനുഭവങ്ങൾ.

മകം: ജന്മരാശിയുടെ രണ്ട്, മൂന്ന്, നാല് രാശികളിലൂടെ ചന്ദ്രൻ സഞ്ചരിക്കുന്ന ആഴ്ചയാണ്. ധനപരമായി നേട്ടങ്ങൾ കുറയുക, പഠനക്ലേശമുണ്ടാവുക എന്നിവയാണ് രണ്ടാം ഭാവത്തിലെ ചന്ദ്രസ്ഥിതിയുടെ ഫലം. മൂന്നിലെ ചന്ദ്രസ്ഥിതിയാൽ മനസ്സന്തോഷം, ശത്രുവിജയം, ധനധാന്യസമൃദ്ധി എന്നിവ ഫലം. നാലാമെടത്ത് ചന്ദ്രൻ സഞ്ചരിക്കുമ്പോൾ ദേഹാലസ്യം, ബന്ധുകലഹം മുതലായവയാവും ഫലസാധ്യതകൾ. ആകയാൽ ഈയാഴ്ച ഗുണദോഷസമ്മിശ്രമാവും എന്ന് സാരം.

പൂരം: കുജൻ പൂരം നക്ഷത്രത്തിൽ സഞ്ചരിക്കുകയാൽ ആരോഗ്യപ്രശ്നങ്ങൾ വരാം. പ്രതീക്ഷിച്ചതിന് വിരുദ്ധമായവ സംഭവിക്കാം. സൂര്യൻ പന്ത്രണ്ടിൽ തുടരുകയുമാണ്. അതിനാൽ ചെലവ് കൂടും. സർക്കാർ കാര്യങ്ങളിൽ സുഗമത കുറയുന്നതാണ്. ഉദ്യോഗസ്ഥർക്ക് നല്ല കാലമാണെന്ന് പറയുക വയ്യ. പലതും അവസാനനിമിഷമാവും നടന്നു കിട്ടുക. കുടുംബജീവിതത്തിൽ സമ്മിശ്രാനുഭവങ്ങൾ ഉണ്ടാവാം. വ്യാപാരത്തിൽ വലിയ മുതൽമുടക്ക് ഇപ്പോൾ നല്ലതല്ല.

ഉത്രം: ആത്മവിശ്വാസം പ്രവർത്തനങ്ങൾക്ക് മികവേകും. ദൂരദിക്കുകളിൽ നടത്തുന്ന ജോലിക്കുള്ള ശ്രമം വിജയിച്ചേക്കാം. തീർത്ഥാടനം / വിനോദം ഇവക്കായി സകുടുംബയാത്രകൾ ഉണ്ടാവാം. വ്യാപാര പുരോഗതി പ്രതീക്ഷിച്ചത്ര തന്നെയാവും. പണയവസ്തുക്കൾ തിരിച്ചെടുക്കുന്നതിൽ ഭാഗികമായി വിജയിക്കും. നല്ല അനുഭവങ്ങൾക്ക് മുൻതൂക്കമുള്ള ആഴ്ചയാവും.

അത്തം: സദ് വാർത്തകൾ കേൾക്കും. വായ്പകൾക്കുള്ള ശ്രമം വിജയിക്കുന്നതാണ്. പൈതൃക സ്വത്തുക്കളിന്മേലുള്ള തർക്കം രാജിയാവും. പിണങ്ങിയ ബന്ധുക്കൾ ഇണങ്ങാം. ഉപാസനാദികൾക്ക് നല്ല പരിസമാപ്തിയുണ്ടാവും. ഊഹക്കച്ചവടത്തിന് മുതിരാതിരിക്കുകയാവും അഭികാമ്യം. ദാമ്പത്യത്തിൽ സുഖവും സന്തോഷവും പ്രതീക്ഷിക്കാം. വിജ്ഞാന സമ്പാദനം തൃപ്തിയേകും. വാരത്തിന്റെ ആദ്യാവസാനങ്ങൾക്കാവും മികവ്.

ചിത്തിര: ഏകാഗ്രത, പ്രവൃത്തികൾക്ക് മിഴിവേകും. ബിസിനസ്സ് വിപുലീകരിക്കാനുള്ള ശ്രമങ്ങൾ വിജയിക്കുന്നതാണ്. സാമ്പത്തികാവശ്യങ്ങൾക്കായി വായ്പകൾ പ്രയോജനപ്പെടുത്താൻ ശ്രമം തുടങ്ങും. വിദ്യാർത്ഥികൾ പഠനമികവിനൊപ്പം കലാകായിക മത്സരങ്ങളിൽ പങ്കെടുക്കാൻ പരിശീലനമാരംഭിക്കും. കൂട്ടുകാർക്കിടയിലെ ബന്ധം ദൃഢമാകുന്നതാണ്. അവിവാഹിതരുടെ വിവാഹാന്വേഷണം ഊർജ്ജിതമാകും. ക്ഷേത്രാടനയോഗവും കാണുന്നു.

ചോതി: ഇടക്കിടെ ചിത്തക്ലേശമുണ്ടാകും. ചിലപ്പോൾ സാമ്പത്തിക കാര്യങ്ങൾ; ചിലപ്പോൾ കുടുംബ പ്രശ്നങ്ങൾ എന്നിങ്ങനെ. അവ പരിഹരിക്കാനും പ്രതീക്ഷാപൂർവ്വം മുന്നേറാനും സാധിക്കുന്നതാണ്. ഉദ്യോഗസ്ഥർ ചുമതലകൾ സമയബന്ധിതമായി പൂർത്തിയാക്കുവാൻ വിഷമിച്ചേക്കും. കരാർ പണികൾ പുതുക്കി കിട്ടുന്നതാണ്. ബിസിനസ്സിൽ ആദായം വർദ്ധിക്കും. അനുരാഗികൾക്ക് കാലം അനുകൂലം.

വിശാഖം: കർമ്മപുഷ്ടി ഉണ്ടാകും. സഹപ്രവർത്തകരുടെ കഴിവുകൾ നന്നായി സമന്വയിപ്പിക്കും. പ്രൊഫഷണലുകൾ മത്സരബുദ്ധിയോടെ പ്രവർത്തിക്കും. നേട്ടങ്ങൾക്കൊപ്പം സാമ്പത്തിക മെച്ചവും വന്നുചേരും. തൊഴിൽ തേടുന്നവർക്ക് നിരാശപ്പെടേണ്ടി വരില്ല. അകലങ്ങളിൽ കഴിയുന്നവർക്ക് നാട്ടിലേക്ക് മടങ്ങാൻ സാഹചര്യം ഒരുങ്ങും. കുടുംബത്തിൽ മംഗളകർമ്മങ്ങൾക്ക് തയ്യാറെടുപ്പുകൾ ആരംഭിക്കും. ആഴ്ചയുടെ മധ്യം കൂടുതൽ നല്ല ഫലങ്ങൾ നൽകും.

അനിഴം: സാഹചര്യങ്ങൾ അനുകൂലമാണ്. ആഴ്ചയുടെ തുടക്കത്തിൽ നേട്ടങ്ങൾ വന്നുചേരും. സൽസംരംഭങ്ങളിൽ പങ്കാളിയാകുന്നതാണ്. ആഴ്ചയുടെ മദ്ധ്യത്തിൽ തൊഴിൽ തടസ്സങ്ങൾ വരാം. കഴിവുകൾ മുഴുവൻ പുറത്തെടുക്കാൻ കഴിഞ്ഞെന്നുവരില്ല. വായ്പകൾക്കുള്ള അപേക്ഷകൾ തള്ളപ്പെടാം. വാരാന്ത്യത്തിൽ മനസ്സ് ശാന്തമാവും. കലഹ പ്രേരണകളെ മറികടക്കും. കുടുംബത്തോടൊപ്പം നല്ല സന്ദർഭങ്ങൾ ചെലവഴിക്കാനാവും.

തൃക്കേട്ട: ഹൃദയബന്ധങ്ങൾ നിലനിർത്താൻ ക്ലേശിക്കും. നേട്ടങ്ങളിലെത്താൻ വിചാരിച്ചതിലും സമയം വേണ്ടിവരും. പ്രതീക്ഷിച്ച പിന്തുണകൾ വൈകിയേക്കും. വിദ്യാർത്ഥികൾക്ക് ഏകാഗ്രശ്രദ്ധ പാളാം. ക്ഷമയും നിരന്തര പരിശ്രമവും ആവശ്യമായ ഘട്ടമാണിത്. ചെലവുകളിലും നിയന്ത്രണം വേണ്ടതുണ്ട്. ഗാർഹിക ജീവിതത്തിൽ കാറും കോളും ഉണ്ടായാലും അവ താൽകാലിക പ്രശ്നങ്ങളായി മാറിയേക്കാം.

മൂലം: കർമ്മലാഭവ്യയ ഭാവങ്ങളിലൂടെ ഈയാഴ്ച ചന്ദ്രൻ സഞ്ചരിക്കുകയാൽ കർമ്മരംഗം പുഷ്ടിപ്പെടും. കഴിവുകൾക്ക് അംഗീകാരം സിദ്ധിക്കുന്നതാണ്. കച്ചവടത്തിൽ ലാഭം വർദ്ധിക്കും. പുതിയ ഉല്പന്നങ്ങൾക്ക് സ്വീകാര്യതയുണ്ടാവും. കുടുംബബന്ധങ്ങൾ ദൃഢമാകുന്നതാണ്. മക്കളുടെ ജോലികാര്യത്തിൽ പ്രതീക്ഷ സഫലമാകും. വാരാന്ത്യത്തിൽ ചിലവുകൾ വർദ്ധിക്കാം. ക്ഷിപ്രപ്രതികരണങ്ങൾ ശത്രുക്കളെ സൃഷ്ടിച്ചേക്കാം.

പൂരാടം: പ്രതീക്ഷകൾക്കനുസരിച്ച് കുറെ കാര്യങ്ങളൊക്കെ നടന്നുകിട്ടുന്ന ആഴ്ചയാണ്. ഉദ്യോഗസ്ഥർക്ക് കൂടുതൽ ഉത്തരവാദിത്വം ഉണ്ടാവും. പുതുസംരംഭങ്ങൾ വലിയ പരിക്കുകളില്ലാതെ മുന്നോട്ടുപോകും. കിട്ടാക്കടങ്ങളും കൈവായ്പകളും മടക്കിക്കിട്ടാം. തിരിച്ചടവുകൾക്ക് പണം കണ്ടെത്താനാവും. മക്കളുടെ വിവാഹത്തിൽ ഉണ്ടായിരുന്ന തടസ്സം നീങ്ങുന്നതാണ്. അന്യദേശത്ത് ജോലി പ്രതീക്ഷിക്കുന്നവർക്ക് ശുഭവാർത്തകൾ വരാം.

ഉത്രാടം: ഗുണാനുഭവങ്ങൾക്ക് മുൻതൂക്കം കൈവരുന്ന ആഴ്ചയാണ്. കരുതിയവ ചെയ്യാനാവും. വിദ്യാർത്ഥികൾ സെമസ്റ്ററുകളിൽ മികവ് തെളിയിക്കും. കുടുംബജീവിതത്തിൽ സമാധാനമുണ്ടാവുന്നതാണ്. മക്കളുടെ വിവാഹകാര്യത്തിൽ നല്ല തീരുമാനം വന്നുചേരും. തൊഴിൽ പരമായ വളർച്ച പ്രതീക്ഷിക്കാം. വിയോജിപ്പുകൾ മാറ്റിവെച്ച് സഹപ്രവർത്തകർ സർവ്വാത്മനാ സഹകരിക്കുന്നതാണ്.

തിരുവോണം: ഉപജീവനം ഉന്മേഷകരമാവും. മടുപ്പിച്ചിരുന്ന മാന്ദ്യവും തടസ്സങ്ങളും മാറുന്നതാണ്. കച്ചവടത്തിൽ ആദായം വർദ്ധിക്കും. വിപണനതന്ത്രങ്ങൾ ഫലം കണ്ടെത്തും. ഉദ്യോഗസ്ഥർക്ക് വിഷമം പിടിച്ച ചില ദൗത്യങ്ങൾ ഏറ്റെടുക്കേണ്ടി വന്നേക്കും. അതിൽ വിജയം കാണാനും സാധിക്കുന്നതാണ്. അഷ്ടമത്തിൽ കുജൻ തുടരുകയാൽ സാഹസകർമ്മങ്ങൾക്ക് മുതിരരുത്. ആരോഗ്യപരിപാലനം മുടക്കുകയുമരുത്.

അവിട്ടം: ഉന്മേഷരഹിതമായി തോന്നും, ആഴ്ചയുടെ ആരംഭത്തിൽ. ക്രമേണ വ്യക്തിപരമായും തൊഴിൽപരമായും ഗുണം അനുഭവത്തിൽ വരുന്നതാണ്. വായ്പകൾക്കുള്ള ശ്രമം വിജയം കണ്ടേക്കും. വസ്തുവിൽക്കുന്നതിന് ഉണ്ടായിരുന്ന തടസ്സം നീങ്ങുന്നതാണ്. കരാർ ജോലികൾ ചെയ്തിരുന്നവർക്ക് അവ പുതുക്കിക്കിട്ടാൻ സാധ്യതയുണ്ട്. എന്നാൽ നിലവിലെ തൊഴിൽ ഉപേക്ഷിച്ച് പുതിയ തൊഴിൽ തേടുന്നത് അഭികാമ്യമായിരിക്കില്ല. ഗാർഹികജീവിതത്തിലെ പിണക്കങ്ങൾ ഇണക്കമായി മാറുന്നതാണ്. ആരോഗ്യ ജാഗ്രത അനിവാര്യം.

ചതയം: തൊഴിൽപരമായി കുറച്ച് മെച്ചവും വ്യക്തിപരമായി ക്ലേശവും അനുഭവത്തിൽ വരുന്ന വാരമാണ്. അഷ്ടമരാശി ദിനങ്ങളാണ് തുടക്കത്തിൽ. സർവ്വതും ശ്രദ്ധാപൂർവം നിർവഹിക്കണം. ബുധനാഴ്ച തൊട്ട് അനുകൂലഫലങ്ങൾ പ്രതീക്ഷിക്കാനാവും. പണക്കഷ്ടം കുറയും. തിരിച്ചടവുകൾ ഭാഗികമായിട്ടെങ്കിലും നടത്താനാവും. ദാമ്പത്യത്തിൽ വിട്ടുവീഴ്ചയില്ലായ്മ മൂലമുള്ള പ്രശ്നങ്ങൾ തലപൊക്കുന്നതാണ്. പതിവ് ആരോഗ്യപരിശോധനകൾ നീട്ടിവെക്കുന്നത് ഉചിതമാവില്ല.

പൂരുരുട്ടാതി: സമ്മിശ്രഫലങ്ങൾ ഉണ്ടാവും, ഈ ആഴ്ചയിൽ. അധികാരവും പദവിയും സ്തുത്യർഹമാം വിധം ഉപയോഗിക്കുന്നതാണ്. എതിർപ്പുകളുടെ മുനയൊടിക്കും. പ്രശ്നങ്ങളുടെ മൂലകാരണം കണ്ടെത്തി അവ പരിഹരിക്കുന്നതിൽ സഹിഷ്ണുത കാട്ടുന്നതാണ്. സഹകരിക്കാത്തവരെ ഒപ്പം കൂട്ടുന്നതിൽ ലക്ഷ്യം കാണും. ധനസ്ഥിതി ആവശ്യങ്ങൾക്ക് ഉതകുന്നവിധത്തിൽ മാത്രമാവാം. കുടുംബജീവിതത്തിൽ സ്വൈരക്കേടുകൾ ഉണ്ടെന്നുവന്നാലും അവ പറഞ്ഞുതീർക്കുന്നതിൽ വിജയിക്കുന്നതാണ്.

ഉത്രട്ടാതി: ആഴ്ചയുടെ മധ്യത്തിൽ അഷ്ടമരാശി വരികയാൽ ചൊവ്വ, ബുധൻ ദിവസങ്ങൾക്ക് തിളക്കം കുറയാം. നവസംരംഭങ്ങൾക്ക് മുതിരാതിരിക്കുക അഭികാമ്യം. പണമിടപാടുകളിൽ കണക്ക് സൂക്ഷിക്കുന്നത് നന്ന്. പരീക്ഷകളിലും അഭിമുഖങ്ങളിലും കഷ്ടിച്ച് കടന്നുകൂടും. പ്രതികൂലതകളെ മറികടക്കുന്നതിൽ വിജയിക്കും. ആറാം ഭാവത്തിലെ ചൊവ്വ കർമ്മരംഗത്ത് ആത്മവിശ്വാസത്തോടെ പ്രവർത്തിക്കുവാൻ സഹായിക്കും. കുടുംബ ബന്ധങ്ങളുടെ ഊഷ്മളത കരുത്തുപകരും. ഭൂമിയിൽ നിന്നും പ്രതീക്ഷിച്ചതിൻവണ്ണം ആദായം ഉണ്ടാകുന്നതാണ്.

രേവതി: തുടക്കത്തിൽ ചില തിരിച്ചടികൾ ഉണ്ടായാലും കർമ്മരംഗം അഭംഗുരമായി മുന്നോട്ടു പോകുന്നതാണ്. അദ്ധ്വാനം വിലമതിക്കപ്പെടും. ഉദ്യോഗസ്ഥർക്ക് ചുമതലകൾ സ്തുത്യർഹമാം വിധം നടപ്പിലാക്കാനാവും. വ്യവഹാരങ്ങളിൽ അനുകൂലതയുണ്ടാവും. വീടുവിട്ടു നിൽക്കുന്നവർക്ക് നാട്ടിലേക്ക് / വീട്ടിലേക്ക് മടങ്ങാൻ സാഹചര്യം സഞ്‌ജാതമാകുന്നതാണ്. കച്ചവടത്തിൽ പുരോഗതിയും വരുമാനത്തിൽ ഉയർച്ചയും പ്രതീക്ഷിക്കാം. ഗാർഹികജീവിതത്തിൽ മനസ്സന്തോഷകരങ്ങളായ അനുഭവങ്ങൾ വന്നെത്തും. ചൊവ്വ, ബുധൻ ദിവസങ്ങൾക്ക് മേന്മ കുറയാം.