മിഥുനത്തിൽ മൂലംകാർക്ക് അധ്വാനത്തിന് ഫലം കിട്ടില്ല, പൂരാടക്കാർക്ക് ദാമ്പത്യത്തിൽ സംതൃപ്തി, ഉത്രാടക്കാർക്ക് കർമ്മമേഖലയിൽ തടസങ്ങൾ

മൂലം: അമിതമായി അദ്ധ്വാനിച്ചാലും നല്ലഫലം കിട്ടണമെന്നില്ല. ഔദ്യോഗിക യാത്രകൾ കൂടുതലായിരിക്കും. യാത്രാക്ലേശമുണ്ടാവും. കൂട്ടുകച്ചവടത്തിൽ അസംതൃപ്തി വരും. തൊഴിലിടത്തിൽ നീതിലഭിക്കുന്നില്ല എന്ന തോന്നൽ ശക്തമാകും. കരാർ ജോലികൾ മുടങ്ങില്ല. ഏജൻസി പ്രവർത്തനങ്ങൾ കൊണ്ട് ധനലാഭം വന്നുചേരുന്നതാണ്. കടബാധ്യത ചെറിയ തോതിൽ പരിഹരിക്കാൻ കഴിഞ്ഞേക്കും.

മൂലം: നല്ല പരിചയമില്ലാത്ത ചിലരുടെ സഹായം ലഭിക്കുന്നതാണ്. ജീവിത പങ്കാളിയുടെ ഓൺലൈൻ ബിസിനസ്സ് വിപുലീകരിക്കാൻ ആവശ്യമായ സാങ്കേതികജ്ഞാനം നേടുന്നതാണ്. രോഗ ക്ലേശിതർക്ക് ചികിൽസാ മാറ്റം അനിവാര്യമാവും. കുടുംബത്തിലെ, സംഘടനയിലെ ഒക്കെ പുതിയ തലമുറയുമായി ഒത്തുപോകാൻ വിഷമിച്ചേക്കും.

പൂരാടം: ക്രിയാപരതയുണ്ടാവും. അറിവിനെ അനുഭവമാക്കാൻ സാധിക്കും. ഔദ്യോഗികരംഗത്ത് ആലസ്യമനുഭവപ്പെടും. പരാശ്രയത്വം മടുപ്പിക്കാം. സഹാപ്രവർത്തകരിൽ നിന്നും വേണ്ടത്ര പിന്തുണ കിട്ടിയേക്കില്ല. മറ്റുള്ളവർക്ക് നൽകിയ വാഗ്ദാനങ്ങൾ പാലിക്കാനാവാതെ മാനസിക പിരിമുറുക്കത്തിലാവും. സ്വാശ്രയ ജോലികളിൽ നിന്നും സാമാന്യമായ ആദായം പ്രതീക്ഷിച്ചാൽ മതിയാകും.

പൂരാടം: പാർട്ണർഷിപ്പ് സംരംഭം വിജയിക്കണമെന്നില്ല. ദാമ്പത്യത്തിൽ സംതൃപ്തി പ്രതീക്ഷിക്കാം. പ്രണയികൾക്ക് തടസ്സങ്ങളെ അഭിമുഖീകരിക്കേണ്ട സ്ഥിതിയുണ്ടാവും. കലാകാരന്മാർക്ക് അവസരങ്ങൾ കുറയില്ല. ഗൃഹത്തിൽ നവീകരണ പ്രവർത്തനം നടക്കും. ലഘുയാത്രകൾ കൂടും. പ്രൊഫഷണൽ വിദ്യാഭ്യാസത്തിന് അവസരം ലഭിക്കുന്നതാണ്.

ഉത്രാടം: മകരക്കൂറുകാർക്ക് കർമ്മരംഗത്ത് അഭ്യുദയം പ്രതീക്ഷിക്കാം. സ്വകാര്യ സ്ഥാപനത്തിൽ ജോലി ചെയ്യുന്നവർക്ക് വേതന വർദ്ധനവ് ഉണ്ടാവും. സ്വതന്ത്രമായി കാര്യങ്ങൾ തീരുമാനിക്കാനുള്ള അവകാശം കൈവരുന്നതാണ്. നീതിയുക്തമായി പ്രവർത്തിക്കും. രാശ്യധിപനായ ശനി സഹായസ്ഥാനത്ത് തുടരുകയാൽ പലതരം പിന്തുണകൾ ലഭ്യമാകും.

ഉത്രാടം: കുടുംബത്തിലെ വയോജനങ്ങൾക്ക് ക്ഷേമകാലമാവും. എന്നാൽ അഷ്ടമത്തിലെ കേതു/കുജ യോഗം ദേഹാസ്വാസ്ഥ്യം, മാനസിക പിരിമുറുക്കം ഇവയ്ക്ക് കാരണമായേക്കും. ഉത്രാടം ധനുക്കൂറുകാർക്ക് കർമ്മമേഖലയിൽ തടസ്സങ്ങൾ ഉണ്ടാവും. അദ്ധ്യാത്മിക കാര്യങ്ങളിൽ താല്പര്യം കുറയുന്നതാണ്. ചെറുകിട സംരംഭങ്ങൾ ആദായകരമാവും.