വാരഫലം, അശ്വതി മുതൽ രേവതി വരെ: August 20-August 26, 2023: Weekly Horoscope, Astrological Predictions

August 20-August 26 2023: Weekly Horoscope Astrological Predictions Moolam to Revathy: സൂര്യൻ ചിങ്ങം രാശിയിൽ മകം ഞാറ്റുവേലയിൽ സഞ്ചരിക്കുന്നു. ചന്ദ്രൻ ശുക്ല ചതുർത്ഥിയിൽ തുടങ്ങി ദശമി വരെയും അത്തം മുതൽ തൃക്കേട്ട വരെയും ഉള്ള തിഥികളിലും നക്ഷത്രങ്ങളിലും ആയി കടന്നുപോകുന്നു. ശനി കുംഭം രാശിയിൽ ചതയം നക്ഷത്രത്തിലൂടെ വക്ര സഞ്ചാരം തുടരുകയാണ്. വ്യാഴം മേടം രാശിയിൽ ഭരണി നക്ഷത്രം മൂന്നാം പാദത്തിലും രാഹു മേടം രാശിയിൽ അശ്വതി നക്ഷത്രം രണ്ടാം പാദത്തിലും കേതു തുലാം രാശിയിൽ ചിത്തിര നക്ഷത്രത്തിന്റെ നാലാം പാദത്തിലും സഞ്ചരിക്കുന്നു.

ചൊവ്വ കന്നി രാശിയിൽ ഉത്രം നക്ഷത്രത്തിലാണ്. ബുധൻ ചിങ്ങം രാശിയിൽ പൂരം നക്ഷത്രത്തിൽ സഞ്ചരിക്കുന്നു. വാരാന്ത്യത്തിൽ വക്രഗതിയിലുമാണ്. ശുക്രൻ കർക്കടകം രാശി, ആയില്യം നക്ഷത്രത്തിൽ വക്രമൗഢ്യത്തിൽ സഞ്ചരിക്കുന്നു.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള ഒന്‍പത് നാളുകാരുടെ വാരഫലം ഇവിടെ അപഗ്രഥിക്കുന്നു.

അശ്വതി

അനുജന്മനക്ഷത്രമായ മകത്തിൽ സൂര്യൻ സഞ്ചരിക്കുകയാൽ ആരോഗ്യപ്രശ്നങ്ങൾ ഉണ്ടാവാം. ആറിലെ ചൊവ്വ ആത്മശക്തിയും തൊഴിലിൽ അഭ്യുദയവും നൽകും. വാഹന യാത്രയിൽ ശ്രദ്ധ വേണം. ആഢംബരത്തിനായി പണം ചെലവ് ചെയ്തേക്കാം. മക്കളുടെ കാര്യത്തിൽ നല്ല ശ്രദ്ധ വേണ്ടതുണ്ട്. വിദ്യാർത്ഥികൾക്ക് ഉന്മേഷം കുറയാം. ന്യായമായ ആവശ്യങ്ങൾക്ക് പണം വന്നുചേരുന്നതാണ്. രാഹു അശ്വതി രണ്ടാം പാദത്തിൽ തുടരുകയാൽ എല്ലാക്കാര്യത്തിലും ജാഗ്രത പുലർത്തുന്നത് നന്നായിരിക്കും.

ഭരണി

നക്ഷത്രനാഥനായ ശുക്രന്റെ ദൗർബല്യം മാനസികോർജ്ജത്തെ തെല്ല് ദുർബലപ്പെടുത്താം. അമ്മയുടെ ആരോഗ്യസ്ഥിതിയിൽ ശ്രദ്ധ വേണം. ഗൃഹനിർമ്മാണത്തിന് തടസ്സം വരാനിടയുണ്ട്. അഞ്ചിലെ ബുധാദിത്യയോഗം ചിന്താക്കുഴപ്പത്തിനിടവരുത്തും. വ്യാഴം ഭരണി മൂന്നാം പാദത്തിലാണ് എന്നതും രാഹു രാശിയിൽ തുടരുന്നു എന്നതും എല്ലാത്തരം സാഹസങ്ങൾക്കും തുനിയുമ്പോൾ ഓർമ്മ വേണം. സാമ്പത്തികമായി മെച്ചം വരും. കർമ്മപുഷ്ടി അനുഭവപെടാം.

കാർത്തിക

നല്ല കാര്യങ്ങൾ പലതും ചെയ്യും. ജീവകാരുണ്യ പ്രവർത്തനങ്ങൾക്ക് നേരം കണ്ടെത്തും. അധികാര പദവികൾ വഹിക്കുന്നവരുടെ പിന്തുണ സമാർജ്ജിക്കും. സാമ്പത്തിക സ്ഥിതി മോശമാവില്ല. ഉപരിപഠനത്തിന് അവസരം ഭവിക്കും. പൂർവ്വിക ഗൃഹം വാസയോഗ്യമാക്കാനുള്ള തീരുമാനത്തിലേർപ്പെടും. വിദേശത്തുനിന്നും ശുഭവാർത്ത ലഭിക്കും. മത്സരങ്ങളിൽ വിജയിക്കാനാവുന്നതാണ്. ഏജൻസി, കരാറു പണികൾ, ചെറുകിട വ്യാപാരം എന്നിവയിൽ ഉയർച്ചയുണ്ടാവുന്നതാണ്.

രോഹിണി

അന്യദിക്കിൽ കഴിഞ്ഞവർക്ക് ജന്മനാട്ടിൽ മടങ്ങിയെത്താനാവും. ഉദ്യോഗസ്ഥർക്ക് സ്വതന്ത്രചുമതല ലഭിക്കാം. നീതിബോധത്തോടെയുള്ള പ്രവർത്തനം ശ്ളാഘിക്കപ്പെടുന്നതാണ്. പുതിയ തൊഴിൽ തേടുന്നവർക്ക് കാലം അനുകൂലമാണ്. രാഷ്ട്രീയപ്പോരാട്ടങ്ങളിൽ വിജയിക്കും. കുടുംബ ബന്ധങ്ങൾ അനുകൂലമാവും. മക്കളുടെ പഠിപ്പിലും തൊഴിലിലുമുള്ള മുന്നേറ്റം മനസ്സംതൃപ്തിയേകും. ക്രിയാകുശലതയും ചലനോർജ്ജവും പരമാവധി പ്രയോജനപ്പെടുത്തും.

മകയിരം

ചന്ദ്രബലം ഉള്ള വാരമാകയാൽ മനസ്സ് പ്രസന്നമാകും. കലഹസന്ദർഭങ്ങളെ സ്വയം ഒഴിവാക്കും. പോസിറ്റീവ് ചിന്താഗതി ഒപ്പമുള്ളവരിലും വളർത്തും. വ്യവഹാരങ്ങൾക്ക് മുതിരാതിരിക്കാൻ ആത്മവിവേകം സഹായിക്കും. ഇഷ്ടവസ്തുക്കൾ പാരിതോഷികമായി ലഭിച്ചേക്കാം. നല്ല സുഹൃത്തുക്കളുടെ പിന്തുണ പ്രതീക്ഷിക്കാവുന്നതാണ്. അപകടങ്ങളെ അതിജീവിക്കും. തൊഴിൽ വിജയകരമാവുന്നതാണ്. കുടുംബാംഗങ്ങളുമായി ഒത്തുചേരുന്നതിനാവും.

തിരുവാതിര

തിരിച്ചടികളിൽ പോലും തളരാത്ത കർമ്മഗുണവും ഹൃദ്യമായ മനപ്പരിപാകവും പ്രകടിപ്പിക്കും. ബഹുമാന്യരായ മിത്രങ്ങളുടെ ഒത്താശ സൽപ്രവൃത്തികൾ ചെയ്യാൻ കാരണമാകും. ബിസിനസ്സിൽ ലാഭം കൂടുന്നതാണ്. വ്യാപാര നവീകരണത്തിന് കളമൊരുങ്ങും. കുടുംബത്തിലെ അനന്തര തലമുറയുടെ വിവാഹാദികൾക്ക് മുൻകൈയ്യെടുക്കും. കാര്യമാത്രപ്രസക്തമായ പ്രസംഗത്തിലൂടെ സദസ്സിന്റെ കൈയടി നേടുന്നതാണ്. ആരോഗ്യപരിപാലനത്തിൽ തെല്ലും അലംഭാവമരുത്.

പുണർതം

മിഥുനക്കൂറുകാർക്ക് മൂന്നാം ഭാവത്തിലെ സൂര്യനും കർക്കടകക്കൂറുകാർക്ക് മൂന്നാം ഭാവത്തിലെ ചൊവ്വയും സദ്ഫലങ്ങൾ സൃഷ്ടിക്കും. എതിർപ്പുകളെ പ്രതിരോധിക്കാനാവും. ചില പരാധീനതകൾ നീങ്ങുന്നതാണ്. സ്വന്തം കാലിൽ ഉറച്ചു നിൽക്കാൻ ശക്തിയുണ്ടാവും. തൊഴിലിലെ മാന്ദ്യം അകലും. പ്രമുഖരുടെ പിന്തുണ കിട്ടുന്നതാണ്. ശാരീരിക ക്ലേശങ്ങൾക്ക് ആശ്വാസം ലഭിച്ചേക്കും. പ്രിയജനങ്ങളുമായി ലഘുയാത്രകൾ നടത്തുവാനവസരം ഉണ്ടാകും.

പൂയം

മുൻ ആസൂത്രണം വലിയ പാളിച്ച കൂടാതെ നടപ്പിലാക്കാനാവും. ധനപരമായ ക്ലേശങ്ങൾ കുറച്ചൊക്കെ പരിഹരിക്കാൻ വഴികൾ തെളിഞ്ഞേക്കും. ചിട്ടി, വായ്പാ തുടങ്ങിയവയിലൂടെ ധനസമാഹരണം സാധ്യമാകും. മക്കളുടെ വിവാഹതടസ്സം നീങ്ങുന്നതാണ്. കൂടിയാലോചനകളിൽ നിന്നും തൊഴിൽ രംഗം മെച്ചപ്പെടുന്നതിന് വഴി തെളിയുന്നതാണ്. അഷ്ടമശനി ചില ആരോഗ്യപ്രശ്നങ്ങൾക്ക് കാരണമാകാം. അതിനാൽ പതിവ് ആരോഗ്യ പരിശോധനകൾ മുടക്കരുത്.

ആയില്യം

കൂട്ടുത്തരവാദിത്വത്തിൽ വീഴ്ച വരുത്തുന്ന ചില സഹപ്രവർത്തകരോട് കലഹിക്കും. നാലാം ഭാവാധിപനായ ശുക്രന് വക്രസ്ഥിതി വരുന്നതിനാൽ കുടുംബാംഗങ്ങളുമായി ഇണങ്ങുകയും പിണങ്ങുകയും ചെയ്യും. ചെറുകിട കച്ചവടക്കാർക്ക് നേട്ടങ്ങൾ വർദ്ധിക്കുന്നതാണ്. ആഘോഷങ്ങളെ മുൻനിർത്തിയുള്ള വ്യാപാരം ലാഭകരമാകും. മംഗളാവസരങ്ങളുടെ നേതൃത്വം വഹിക്കും. പ്രണയികൾക്ക് തെല്ല് നിരാശപ്പെടേണ്ടി വന്നേക്കാം. വാഹനം, യന്ത്രം, അഗ്നി ഇവയുടെ ഉപയോഗത്തിൽ ഏറെ ശ്രദ്ധ വേണ്ടതുണ്ട്.

മകം

മകം ഞാറ്റുവേല എന്നതിനാൽ കുറച്ച് ആരോഗ്യപ്രശ്നങ്ങൾ വരാം. രണ്ടിലെ ചൊവ്വ പരുഷവാക്കുകൾ പറയാൻ പ്രേരിപ്പിക്കാം. വിദ്യാർത്ഥികൾക്ക് സമ്മർദ്ദങ്ങൾ ഉണ്ടാവാം. ക്രയവിക്രയങ്ങളിൽ കോട്ടംതട്ടാതെ സൂക്ഷിക്കേണ്ടതുണ്ട്. മുഖരോഗങ്ങൾ ഉപദ്രവിച്ചേക്കാം. അധികച്ചെലവുകൾ വന്നുപെടും. പുതുജോലികൾ തേടുന്നവർക്ക് നിരാശപ്പെടേണ്ടതായി വരാം. ശുഭ കാര്യങ്ങൾ തുടങ്ങുവാൻ ഈ ആഴ്ച ശുഭകരമല്ല.

പൂരം

നക്ഷത്രനാഥന്റെ മൗഢ്യം അവസാനിച്ചുവെങ്കിലും വക്രം നടക്കുകയാൽ തീരുമാനങ്ങളിൽ നിന്നും പിന്തിരിഞ്ഞേക്കും. പദവികളുടെ അന്തസ്സ് നിലനിർത്താൻ ക്ലേശിക്കുന്നതാണ്. ധൂർത്ത് കൂടാം. ദുർബോധനങ്ങളെ കരുതേണ്ടതുണ്ട്. കുടുംബാംഗങ്ങളോട് കയർത്തു സംസാരിക്കേണ്ട സാഹചര്യം വരാം. ആദർശം ചിലപ്പോൾ അപ്രായോഗികമായേക്കാം. കലാപ്രവർത്തനത്തിൽ ശോഷണം വരുന്നതാണ്. സ്നേഹബന്ധങ്ങളുടെ ഇഴയടുപ്പം കുറയുന്നതിൽ ഖേദിക്കും.

ഉത്രം

ഞായർ, തിങ്കൾ, വ്യാഴം, വെള്ളി ദിവസങ്ങൾക്കാവും മികവ്. മനസ്സമാധാനം പുലരും. ന്യായമായ ആവശ്യങ്ങൾ നടന്നുകിട്ടുകയും ചെയ്യും. സമൂഹത്തിന്റെ അംഗീകാരം നേടുക, ചൊവ്വാ, ബുധൻ ദിവസങ്ങളിൽ അത്ര എളുപ്പമാവണമെന്നില്ല. കർമ്മരംഗത്ത് തടസ്സങ്ങൾ ഉണ്ടായേക്കും. ആവശ്യപ്പെട്ട ദിക്കിലേക്ക് സ്ഥലം മാറ്റം കിട്ടിയെന്നു വരുന്നതല്ല. വെള്ളി,ശനി ദിവസങ്ങളിൽ ബന്ധുക്കളെ കാണാൻ സാധിക്കും. ആത്മീയസാധനയ്ക്ക് ഈ വാരം ഉചിതമല്ല.

അത്തം

പ്രവർത്തനശൈലി കുടുംബത്തിനകത്ത് വിമർശിക്കപ്പെട്ടാലും പുറമേയ്ക്ക് സ്വീകാര്യമാവും. ആഢംബര വസ്തുക്കൾ വാങ്ങും. മാതാവിന്റെ ആരോഗ്യസ്ഥിതി മെച്ചപ്പെടുന്നതാണ്. ബിസിനസ്സിൽ നേട്ടങ്ങൾ മോശമാവില്ല. ഉദ്യോഗസ്ഥർക്ക് ചുമതലകളും ഒപ്പം അദ്ധ്വാനവും വർദ്ധിക്കും. മകൻ / മകൾ പഠനാവശ്യത്തിന് ദൂരസ്ഥലത്തിലേക്ക് പോകാനിടയുണ്ട്. ജോലി തേടുന്ന ചെറുപ്പക്കാർക്ക് താൽകാലികമായെങ്കിലും ആദായമാർഗം തുറക്കപ്പെടും.

ചിത്തിര

ഭൂമി വാങ്ങാനുള്ള തീരുമാനം സഫലമാകും. ധനസമാഹരണത്തിന് കുറച്ചധികം ക്ലേശിക്കേണ്ടതായി വന്നേക്കും. തൊഴിൽ ചെയ്യുന്നവർക്ക് തരക്കേടില്ലാത്ത ലാഭം പ്രതീക്ഷിക്കാം. ഔദ്യോഗികരംഗത്ത് ആശയപരമായി ഭിന്നിപ്പുള്ളവരെ ഇണക്കി നിർത്തുന്നതിൽ ഒരു പരിധിവരെ വിജയിക്കും. പാചകകൗശലം പ്രശംസ നേടും. വാഹനം ഓടിക്കാനുള്ള പഠനം പുരോഗമിക്കും. നിക്ഷേപങ്ങളിൽ നിന്നും കൂടുതൽ ലാഭം ഭവിക്കുന്നതാണ്. ആരോഗ്യപരമായി ശ്രദ്ധ വേണ്ടതുണ്ട്.

ചോതി

പന്ത്രണ്ടാം ഭാവത്തിൽ ശശികുജയോഗം നടക്കുന്നതിനാൽ വാരാദ്യം നല്ലകാര്യങ്ങൾ ഭവിക്കും. ഒപ്പം ചെലവും, യാത്രാ ക്ലേശവും കൂടി ഉണ്ടാവാം. ചൊവ്വാ, ബുധൻ, വ്യാഴം ദിവസങ്ങളിൽ ഗുണാനുഭവങ്ങൾക്കാവും മുൻതൂക്കം. നല്ല വരുമാനം, പദവിയിൽ ഉയർച്ച, വിദ്യാഭ്യാസത്തിൽ മുന്നേറ്റം ഇവ ഉണ്ടാവാം. വസ്ത്രാഭരണാദികൾ പാരിതോഷികമായി ലഭിച്ചേക്കാം. വെള്ളി, ശനി ദിവസങ്ങൾക്ക് മേന്മ കുറഞ്ഞേക്കും. കലഹപ്രേരണയുണ്ടാകാം. വാക്കുകൾക്ക് പാരുഷ്യം ഏറും. ആരോഗ്യത്തിൽ ശ്രദ്ധ കുറയ്ക്കരുത്.

വിശാഖം

അയൽ ബന്ധങ്ങൾ രമ്യമാകും. പഴയ വ്യവഹാരങ്ങൾ അവസാനിപ്പിക്കാൻ സന്നദ്ധത കാണിക്കും. കലാപ്രവർത്തകർക്ക് അല്പം നിരാശപ്പെടേണ്ടിവരും. പുതിയ അവസരങ്ങൾ കുറയാം. കരാർ പണികൾ പുതുക്കപ്പെടും. വലിയ മുതൽ മുടക്കുകൾക്ക് കാലം ഇപ്പോൾ ഉചിതമല്ല. നല്ലകാര്യങ്ങൾക്ക് ചെലവ് ഉണ്ടാകും. മക്കളുടെ വിവാഹത്തിൽ ശുഭതീരുമാനം കൈക്കൊള്ളും. ഓഹരി വിപണി, ചിട്ടി മുതലായവയിൽ നിന്നും ധനം വന്നെത്താം. സകുടുംബം വിനോദയാത്രകൾ നടത്താൻ അവസരം കിട്ടിയേക്കും.

അനിഴം

തൊഴിൽ മേഖലയിൽ മാറ്റത്തിന്റെ വ്യക്തമായ ദിശാസൂചനകൾ പ്രകടമാകുന്നതാണ്. ചെറുസംരംഭങ്ങളുമായി മുന്നോട്ടുനീങ്ങും. സർക്കാരിൽ നിന്നും അനുമതി, ബാങ്കുകളിൽ നിന്നും ധനസഹായം എന്നിവ സാധ്യതകളാണ്. സാങ്കേതിക വിദ്യാഭ്യാസത്തിൽ മുന്നേറാൻ കഴിയും സ്വന്തം വാഗ്ദാനങ്ങൾ നിറവേറാനായതിൽ സന്തോഷമുണ്ടാകും. ആഴ്ചയുടെ മദ്ധ്യത്തിൽ മനക്ലേശം, ചെലവുകളുടെ ആധികം, ആലസ്യം എന്നിവ അനുഭവത്തിൽ വരാം. മറ്റു ദിവസങ്ങളിൽ ഉന്മേഷവും ഗുണവും ഫലം.

തൃക്കേട്ട

ഭാവിയെ മുന്നിൽക്കണ്ട് ചില പദ്ധതികൾ ആവിഷ്കരിക്കും. തൊഴിൽരംഗം സാങ്കേതികവൽക്കരിക്കുന്നതിന് മുതിരും. ബിസിനസ്സ് ലാഭകരമാവുന്നതിന് പല പരീക്ഷണങ്ങളും കൈക്കൊള്ളുന്നതാണ്. രാഷ്ട്രീയവ്യക്തിത്വങ്ങളുടെ പിന്തുണ ലഭിച്ചേക്കാം. വീടുമാറ്റമോ, വീടുവിട്ടു നിൽക്കേണ്ട സ്ഥിതിയോ സംജാതമാകാം. പ്രണയികൾക്ക് അനുകൂല സാഹചര്യമാവില്ല. കുടുംബപ്രശ്നങ്ങളെ സമചിത്തതയോടെ നേരിടും. വാരത്തിന്റെ ആരംഭാന്ത്യങ്ങൾക്ക് മെച്ചമേറും.

മൂലം

ആത്മാർത്ഥതയുള്ള പരിശ്രമങ്ങൾ വിജയം കാണും. തൊഴിലിൽ നിന്നും നേട്ടങ്ങളുണ്ടാകും. ഭാഗ്യസ്ഥാനാധിപനായ സൂര്യൻ ഭാഗ്യഭാവത്തിൽ തുടരുകയാൽ നല്ല അനുഭവങ്ങൾ വർദ്ധിക്കും. ഉദ്യോഗാർത്ഥികൾക്ക് അവസരങ്ങൾ നഷ്ടമാകുകയില്ല. എന്നാൽ അദ്ധ്വാനം കൂടും. ഒന്നിനുപിറകെ ഒന്നായി പല ദൗത്യങ്ങൾ വന്നെത്തും. കുടുംബാംഗങ്ങൾക്ക് ഫലപ്രദമായ ചില ഉപദേശങ്ങൾ നൽകാനായേക്കും. പ്രതീക്ഷിച്ച ധനവും സഹായവും മറ്റും കൃത്യമായി തന്നെ വന്നെത്തും. വാഹനം വാങ്ങാനുള്ള ശ്രമം തുടരുന്നതാണ്.

പൂരാടം

ധനവരവ് സംതൃപ്തിയേകും. കരാർ ജോലികൾ പുതുക്കപ്പെടുന്നതാണ്. ഊഹക്കച്ചവടം മോശമാകില്ല. പിതൃസ്വത്തിൽ നിന്നും ആദായം വന്നെത്തും. വിദ്യാഭ്യാസ കാര്യത്തിലെ മാന്ദ്യം നീങ്ങും. പരീക്ഷകളിൽ നന്നായി എഴുതാനാവും. നക്ഷത്രാധിപനായ ശുക്രന് വക്രസ്ഥിതിയാകയാൽ സുഹൃൽബന്ധങ്ങളിൽ ചില തെറ്റിദ്ധാരണകൾ വരാം. രോഗചികിത്സ പുനരാരംഭിച്ചേക്കാം. അന്യദേശ യാത്രകൾക്ക് സാധ്യതയുണ്ട്. ഉപാസനാദികൾക്ക് തടസ്സമുണ്ടാകുന്നതല്ല.

ഉത്രാടം

സദുദ്ദേശ്യത്തോടെയുള്ള പ്രവർത്തനങ്ങൾക്ക് സർവ്വാത്മനാ ഉള്ള സ്വീകരണം ലഭിക്കും. സൂര്യനും ബുധനും ഒരുമിക്കുകയാൽ കർമ്മനൈപുണ്യം ഭവിക്കും. വിരോധികൾക്ക് മൗനം കൊണ്ടും അവഗണന കൊണ്ടും മറുപടി നൽകും. ഭരണസമിതിയിലേക്ക് തെരഞ്ഞെടുക്കപ്പെടാൻ സാധ്യതയുണ്ട്.
വിദ്യാർത്ഥികൾ പഠനത്തിൽ ശ്രദ്ധ കേന്ദ്രീകരിക്കും. വ്യാപാര കാര്യങ്ങൾക്കായി യാത്രകൾ വേണ്ടി വരുന്നതാണ്. സാമൂഹ്യപ്രവർത്തനം കാരണം സ്വന്തം വീട്ടുകാരോടൊപ്പം ചിലവഴിക്കാൻ വേണ്ടത്ര നേരം കിട്ടിയേക്കില്ല.

തിരുവോണം

പുതുജോലികൾ തേടുന്നവർക്ക് അനുകൂലമായ ഉത്തരം ലഭിക്കുന്നതാണ്. ഉദ്യോഗസ്ഥർക്ക് അധികാരികളുടെ പ്രീതി കൈവരും. ഏജൻസി പ്രവർത്തനങ്ങൾ ലാഭകരമാവുന്നതാണ്. ഒന്നുകൂടി ഉത്സാഹിച്ചാൽ പുതുസംരംഭങ്ങളിൽ വിജയിക്കുവാൻ കഴിഞ്ഞേക്കും. ഒമ്പതിലെ ചൊവ്വ ആത്മീയ സാധനകളെ തടസ്സപ്പെടുത്താം. കുടുംബത്തിലെ വയോജനങ്ങളുടെ കാര്യത്തിൽ ശ്രദ്ധ വേണം. കുട്ടികൾക്ക് ചെറിയ ആരോഗ്യപ്രശ്നങ്ങൾ വന്നേക്കും. സഹിഷ്ണുതയ്ക്ക് ജീവിതത്തിൽ വലിയ വിലയുണ്ടെന്നറിയും.

അവിട്ടം

പുതിയ കോഴ്സുകൾ പഠിക്കാൻ സമയം കണ്ടെത്തും. വിദേശജോലിയ്ക്ക് ശ്രമം ഊർജ്ജിതപ്പെടുത്തും. പൂർവ്വസുഹൃത്തുക്കളെ കണ്ടുമുട്ടുന്നതാണ്. പണയവസ്തുക്കൾ തിരിച്ചെടുക്കാൻ കാര്യമായ ശ്രമം നടത്തും. കൈവായ്പകൾ പ്രയോജനപ്പെടാം. രോഗികൾക്ക് ആശ്വാസം കിട്ടുന്ന വാരമാണ്. ഭാര്യാഭർത്താക്കന്മാർക്കിടയിൽ ഐക്യം ദൃഢമാകാം. ഈശ്വരീയകാര്യങ്ങൾക്ക് നേരം കണ്ടെത്തും.

ചതയം

ചില തൊഴിൽ തടസ്സങ്ങളെ നേരിടേണ്ടി വരാം. വാരാദ്യം അഷ്ടമരാശിയാകയാൽ കരുതൽ വേണം. കലഹസന്ദർഭങ്ങളെ ഒഴിവാക്കുക ഉചിതം. ജോലിയിൽ അദ്ധ്വാനം വർദ്ധിക്കും. അതനുസരിച്ച് പണവരവ് ഉണ്ടാവണമെന്നില്ല. സഹായവാഗ്ദാനങ്ങൾ പാഴാവും. കരാറുകളിലും മറ്റും പങ്കാളിയാകുമ്പോൾ അതിന്റെ എല്ലാ വശങ്ങളും മനസ്സിലാക്കുക. സാഹസങ്ങൾക്ക് തുനിയരുത്. പാഴ്ച്ചെലവുകൾ ഒഴിവാക്കുകയും വേണം.

പൂരുരുട്ടാതി

വ്യക്തിപരമായ ഇഷ്ടാനിഷ്ടങ്ങൾ മാറ്റി വെക്കും. കുടുംബകാര്യങ്ങൾക്കായി നെട്ടോട്ടമോടും. സ്വന്തബന്ധുക്കളുടെ വിവാഹാദികളുടെ ചുമതല ഏറ്റെടുക്കുന്നതാണ്. വ്യാപാര കാര്യങ്ങൾക്ക് വായ്പനേടാൻ വലിയ ശ്രമം നടത്തേണ്ടി വന്നേക്കാം. പ്രാഥമിക തിരഞ്ഞെടുപ്പുകളിൽ ജയിച്ച ചെറുപ്പക്കാർക്ക് തൊഴിൽ നിയമനത്തിന് അറിയിപ്പ് ലഭിക്കാം. പണവരവ് മോശമാകില്ല.
വയോജനങ്ങൾക്ക് ആരോഗ്യപരമായി ക്ലേശിക്കേണ്ടി വരാം.

ഉത്രട്ടാതി

അഷ്ടമരാശിയാകയാൽ ചൊവ്വാ, ബുധൻ ദിവസങ്ങൾക്ക് മേന്മ കുറയുന്നതാണ്. പ്രതീക്ഷിച്ച ധനം വന്നുചേരണമെന്നില്ല. ചിലപ്പോൾ കടബാധ്യത അലോസരപ്പെടുത്താം. കുടുംബകാര്യങ്ങളുടെ നിർവഹണത്തിൽ വിജയിച്ചേക്കും. പഠനത്തിൽ ഒരുവിധം മുന്നേറാനാവും. ഗവേഷകരുടെ പ്രബന്ധരചനയിൽ പുരോഗതി കുറഞ്ഞേക്കാം. ന്യായമായ ആവശ്യങ്ങൾ നടന്നുകിട്ടാം. പുതുസംരംഭങ്ങൾ വിദഗ്‌ദ്ധോപദേശം ലഭിച്ച ശേഷം തുടങ്ങുകയാവും സമുചിതം.

രേവതി

നിയമപ്രശ്നങ്ങളിൽ ആനുകൂല്യം ലഭിക്കാം. സർക്കാരിൽ നിന്നും പ്രതീക്ഷിച്ച അനുമതി കൃത്യസമയത്ത് കിട്ടുന്നതാണ്. രാഷ്ട്രീയപ്രവർത്തകർക്ക് പുതുപദവികൾ വന്നുചേർന്നേക്കും. ബുധാദിത്യയോഗത്താൽ ചിന്തിച്ച് പ്രവർത്തിക്കാനും സമുചിത തീരുമാനങ്ങൾ കൈക്കൊള്ളാനും സാധിക്കുന്നതാണ്. സാങ്കേതിക കാര്യങ്ങൾ പഠിച്ചറിയാൻ ഉദ്യമിക്കും. ഏഴിലെ ചൊവ്വ കുടുംബപ്രശ്നങ്ങളെ അല്പം സങ്കീർണമാക്കാനിടയുണ്ട്. ബിസിനസ്സ് സംബന്ധിച്ച ചർച്ചകളിൽ ആശാവഹമായ പുരോഗതി ഉണ്ടാവണമെന്നില്ല.