August 06- August 12, 2023: വാരഫലം സമ്പൂര്‍ണ്ണം, അശ്വതി മുതല്‍ രേവതി വരെ: Weekly Horoscope Malayalam

August 06-August 12 Weekly Horoscope Astrological Predictions Aswathi to Revathi: സൂര്യൻ കർക്കടകം രാശിയിൽ, ആയില്യം ഞാറ്റുവേലയിലാണ്. ചന്ദ്രൻ കൃഷ്ണപക്ഷത്തിൽ പഞ്ചമി മുതൽ ഏകാദശി വരെയുള്ള തിഥികളിലായി സഞ്ചരിക്കുന്നു. (രേവതി മുതൽ തിരുവാതിര വരെ നക്ഷത്രങ്ങളിൽ). ശനി കുംഭം രാശിയിൽ ചതയം നക്ഷത്രത്തിൽ വക്രഗതി തുടരുന്നു. വ്യാഴം മേടം രാശിയിൽ ഭരണി നക്ഷത്രത്തിലും രാഹു മേടം രാശിയിൽ അശ്വതി നക്ഷത്രത്തിലും കേതു തുലാം രാശിയിൽ ചിത്തിര നക്ഷത്രത്തിലും ആയി സഞ്ചരിക്കുന്നു.

ബുധനും ചൊവ്വയും ചിങ്ങം രാശിയിൽ പൂരം നാളിൽ സഹചാരികളാവുന്നു. ശുക്രൻ കർക്കടകം രാശിയിൽ വക്രഗതിയായി ആയില്യം നക്ഷത്രത്തിലും തുടരുന്നു. അതോടൊപ്പം ഈയാഴ്ച ശുക്രന് മൗഢ്യവും ആരംഭിക്കുകയാണ്. ഈയാഴ്ച തുടക്കത്തിൽ ചിങ്ങക്കൂറിനും, തിങ്കൾ- ചൊവ്വ ദിവസങ്ങളിൽ കന്നിക്കൂറിനും ബുധനും വ്യാഴവും തുലാക്കൂറിനും വെള്ളി,ശനി ദിവസങ്ങൾ വൃശ്ചികക്കൂറിനും ചന്ദ്രാഷ്ടമം അഥവാ അഷ്ടമരാശിക്കൂറ് ആകുന്നു. അവരവരുടെ ജന്മരാശിയുടെ അഥവാ കൂറിന്റെ എട്ടാം രാശിയിൽ ചന്ദ്രൻ സഞ്ചരിക്കുന്ന രണ്ടേകാൽ ദിവസത്തെയാണ് ഇപ്രകാരം പറയുന്നത്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ ആയില്യം വരെയുള്ള 9 നാളുകാരുടെ വാരഫലം ഇവിടെ അപഗ്രഥിക്കപ്പെടുന്നു.

അശ്വതി

ചൊവ്വയും ബുധനും അഞ്ചാം ഭാവത്തിലാകയാൽ സർവ്വത്ര ആശയക്കുഴപ്പം ഉണ്ടാവും. കർമ്മണ്യത തെല്ല് പിൻവാങ്ങിയേക്കും. സകുടുംബ യാത്രകൾക്ക് അനുകൂല സന്ദർഭമല്ല. ശുക്രന്റെ വക്രസ്ഥിതിയാൽ വാഹനം, വീട് ഇവ സംബന്ധിച്ച കാര്യങ്ങളിൽ തടസ്സം, ക്ലേശം എന്നിവ വരാം. പ്രതീക്ഷിച്ച പണം കൈവശം വന്നില്ലെന്ന സ്ഥിതിയുണ്ടാവാം. നേട്ടങ്ങൾക്ക് തിളക്കം കുറയാം. സമയനീക്കത്തോടെയാവും എല്ലാക്കാര്യവും നടന്നുകിട്ടുക.

ഭരണി

നക്ഷത്രാധിപനായ ശുക്രന് വക്രമൗഢ്യാദികൾ വരികയാൽ ഒന്നുരണ്ടാഴ്ചക്കാലം സാഹസങ്ങൾക്കും പണം മുടക്കിയുള്ള പരീക്ഷണങ്ങൾക്കും മുതിരാതിരിക്കുക കരണീയം. വിജയം, പഠിപ്പിലാവട്ടെ, മത്സരങ്ങളിലാവട്ടെ ശോഭ കുറഞ്ഞതാവും. ഗാർഹിക കാര്യങ്ങളിൽ നല്ലശ്രദ്ധ വേണം. ക്രയവിക്രയങ്ങളിൽ കബളിപ്പിക്കപ്പെടാനിടയുണ്ട്. കലാകാരന്മാർക്ക് ഉദ്ദേശിച്ച പ്രതിഫലം കിട്ടില്ല. പെൺസുഹൃത്തുമായി കലഹിച്ചേക്കാം. ആദായം പ്രതീക്ഷിച്ചതിൻ വിധമാവും. ദുർവാസനകളെ നിയന്ത്രിക്കാൻ ക്ലേശിച്ചേക്കും.

കാർത്തിക

സഹായ വാഗ്ദാനങ്ങൾ വന്നുചേരും. കടബാധ്യത ഭാഗികമായി പരിഹരിക്കാനാവും. തൊഴിൽ തേടുന്നവർക്ക് ചെറിയ വഴികൾ തുറന്നുകിട്ടും. ഭാര്യാഭർത്തൃ ബന്ധത്തിലെ പൊരുത്തക്കേടുകൾ മുഴുവനായും മാറുമെന്നു പറയാനാവില്ല. മക്കളുടെ ഉപരിപഠനത്തിനായി വായ്പകൾ പ്രയോജനപ്പെടുത്തിയേക്കും. വയോജനങ്ങളുടെ ആരോഗ്യകാര്യത്തിൽ ശ്രദ്ധ വേണം. വാഗ്വാദങ്ങൾക്ക് മുതിരാതിരിക്കുക അഭിലഷണീയം.

രോഹിണി

തടസ്സങ്ങൾ വീട്ടിലും ജോലിസ്ഥലത്തും തുടരുന്നതായി അനുഭവപ്പെടും. നിലവിലെ ജോലി ഉപേക്ഷിക്കുന്നത് ആശാസ്യമാവില്ല. സുഹൃത്തുക്കളുടെ പിന്തുണ കുറയാം. മാതാവിന്റെ ആരോഗ്യകാര്യത്തിൽ ശ്രദ്ധ വേണം. പരീക്ഷകൾക്ക് തയ്യാറെടുക്കുന്നവർ കൂടുതൽ പരിശ്രമിക്കേണ്ടതായുണ്ട്. സാമ്പത്തിക സ്ഥിതി മോശമാവില്ല. അന്യദേശത്ത് ചില അവസരങ്ങൾ തുറക്കപ്പെടാം. മാനസികാരോഗ്യം ദുർബലമാകാം.

മകയിരം

ബന്ധുക്കളുടെ സഹായം പ്രതീക്ഷിക്കാം. വിദ്യാർത്ഥികളുടെ പഠന കാര്യത്തിൽ ഉണ്ടായിരുന്ന അനിശ്ചിതത്വം നീങ്ങുന്നതാണ്. തീരുമാനങ്ങൾ വേഗത്തിൽ കൈക്കൊള്ളും. എന്നാൽ കാര്യനിർവഹണം മികച്ചതാവും എന്നുപറയാനാവില്ല. തൊഴിൽ തേടുന്നവർക്ക് ചെറിയ വരുമാനമാർഗം വന്നുചേരാം. സാമ്പത്തിക കാര്യങ്ങളിൽ അനാസ്ഥയരുത്. പൊതുക്കാര്യങ്ങളിൽ ഇടപെടുന്നവർക്ക് എതിർപ്പുണ്ടായേക്കും. വാരമധ്യം വരെ ധനോന്നതി, സ്ഥാനലാഭം ഉൾപ്പെടെ നേട്ടങ്ങൾ തുടരും.

തിരുവാതിര

തൊഴിലിലെ സമർപ്പണബുദ്ധി ആദരിക്കപ്പെടും. ചെറുകിട കച്ചവടക്കാർക്ക് ലാഭം വർദ്ധിക്കും. പുനരധിവാസ പദ്ധതികളുടെ ഗുണഭോക്താവാകും. കലാകായികമത്സരങ്ങളിൽ പങ്കെടുക്കുന്നതാണ്. പദവികൾക്കു വേണ്ടിയുള്ള തർക്കത്തിൽ ഒപ്പമുള്ളവരെ പിന്തള്ളി മുന്നേറും. കുടുംബജീവിതം സുഖകരമാവും. അവിവാഹിതരുടെ വിവാഹാലോചനകൾ ലക്ഷ്യം കാണും. ന്യായമായ ആവശ്യങ്ങൾ മിക്കതും നിറവേറപ്പെടും. വിദ്യാർത്ഥികൾക്ക് ആത്മവിശ്വാസമേറും.

പുണർതം

കുടുംബത്തിന്റെ ആവശ്യങ്ങൾ നിറവേറ്റുന്നതിൽ വിജയിക്കും. മക്കളുടെ കാര്യത്തിൽ ആശ്വാസവും സന്തോഷവും അനുഭവപ്പെടും. വിദേശയാത്രക്ക് ഒരുക്കങ്ങൾ തുടങ്ങുന്നതാണ്. കർമ്മരംഗത്ത് തിരക്കേറും. പുതിയ കരാറുകൾ സംബന്ധിച്ച ചർച്ചകളിൽ സ്ഥാപനത്തിന്റെ പ്രതിനിധിയായി പങ്കെടുത്തേക്കും. കലാരംഗത്തുള്ളവർക്ക് ജന്മസിദ്ധമായ കഴിവുകൾ പുറത്തെടുക്കാനും പ്രകടിപ്പിക്കാനും അവസരമൊരുങ്ങുന്നതാണ്. ധനപരമായി നിരാശപ്പെടേണ്ടി വരില്ല. വ്യാഴം മുതൽ ചെലവു കൂടാനിടയുണ്ട്. ആരോഗ്യ പരിരക്ഷ പ്രധാനം.

പൂയം

പ്രതീക്ഷാനിർഭരമായ ഒരാഴ്ചയാണ് മുന്നിലുള്ളത്. അദ്ധ്വാനത്തിന് ഉയർന്ന പ്രതിഫലവും ഉല്പന്നങ്ങൾക്ക് നല്ല വിപണിമൂല്യവും സിദ്ധിക്കും. മത്സരങ്ങളിൽ വിജയ സാധ്യത കൂടുതലാണ്. എതിർ ശബ്ദങ്ങളെ അവഗണിച്ച് മുന്നേറാനാവും. നവസംരംഭങ്ങൾക്ക് നല്ല വരവേല്പ് ലഭിക്കുന്നതാണ്. സഹപ്രവർത്തകർക്കിടയിലെ തർക്കങ്ങൾ നീതിപൂർവ്വം പരിഹരിക്കാനാവും. ദാമ്പത്യജീവിതത്തിൽ സ്വസ്ഥതയും പാരസ്പര്യവും വന്നെത്തും. പ്രണയികൾക്കിടയിൽ ഹൃദയബന്ധം ദൃഢമാകും. വാരാന്ത്യത്തിൽ ചെലവധികരിച്ചേക്കാം. കരുതൽ വേണം.

ആയില്യം

പ്രയോജനപ്രദമായ കാര്യങ്ങൾ ഭംഗിയായി നിർവഹിക്കാനും അതിൽ നിന്നുള്ള ലാഭം അനുഭവിക്കാനും കഴിയുന്ന വാരമാണ്. പലതരം തടസ്സങ്ങൾ നേരിട്ട് മനക്ലേശം അനുഭവിച്ചവർക്ക് പുതിയ പ്രതീക്ഷകളും ഉണർവും വന്നെത്തുന്നതാണ്. ഭൂമിയിൽ നിന്നും ആദായം ഉണ്ടാകും. ഉദ്യോഗം സംബന്ധിച്ച അലച്ചിലിന് സമാപ്തിയാകും. പ്രതികൂലമായ സാഹചര്യങ്ങളെ ബുദ്ധികൗശലം കൊണ്ട് മറികടക്കാനാവും. നവീനഗൃഹോപകരണങ്ങൾ വാങ്ങുന്നതാണ്. കുടുംബജീവിതത്തിൽ ശ്രേയസ്സുണ്ടാവും. വാക്സ്ഥാനത്തു ചൊവ്വ നിൽക്കുന്നതിനാൽ പരുഷവാക്കുകൾ പറയാനിടവരുന്നതാണ്.

മകം

ജന്മരാശിയിൽ ചൊവ്വ സഞ്ചരിക്കുന്നതിനാൽ ആരോഗ്യപ്രശ്നങ്ങളുണ്ടാവാം. വൈകാരിക ക്ഷോഭങ്ങളെ നിയന്ത്രിക്കേണ്ടതുണ്ട്. വ്യാപാരത്തിൽ ആദായം ഉയരും. പലതരം ചെലവുകളും വന്നുചേരും. ഈയാഴ്ചയുടെ തുടക്കത്തിന് അല്പം മികവ് കുറയാം. ക്രമേണ മെച്ചമുണ്ടാവും.
പഴയ സുഹൃത്തുക്കളെ കാണും. ഉദ്യോഗസ്ഥർ പ്രവൃത്തിയിൽ അല്പം ഉദാസീനരായേക്കാം. പുതിയ ചുമതലകൾ ഏറ്റെടുക്കുന്നതിൽ രണ്ടുമനസ്സുണ്ടാവും. കുടുംബജീവിതത്തിൽ പിണക്കങ്ങളും ഇണക്കങ്ങളും ആവർത്തിച്ചേക്കാം. വിദ്യാർത്ഥികൾ പഠനത്തിൽ അല്പം വിമനസ്സാവാനിടയുണ്ട്.

പൂരം

നക്ഷത്രനാഥനായ ശുക്രന് നീചമൗഢ്യാദികൾ വരുന്നതിനാൽ പ്രവർത്തനങ്ങളിൽ ശ്രദ്ധയുണ്ടാവണം. തീരുമാനങ്ങൾ കൈക്കൊള്ളുമ്പോഴും കരുതൽ പുലർത്തുന്നത് നല്ലത്. പ്രവർത്തികളിൽ വിജയിക്കാനാവും. വ്യാപാരം പുരോഗതിയിലേക്ക് നീങ്ങും. സൽകർമ്മങ്ങൾക്ക് നേരം കണ്ടെത്തും. സ്വന്തം നിർദ്ദേശങ്ങൾ മേലധികാരികൾക്ക് സ്വീകാര്യമായേക്കും. കുടുംബാംഗങ്ങളുടെ ക്ഷേമത്തിനായി പല കാര്യങ്ങളും പ്രാവർത്തികമാക്കും. ആഢംബരവസ്തുക്കൾ വാങ്ങിയേക്കും. തീർത്ഥാടനയോഗം ഉണ്ട്. വയോജനങ്ങൾ ആരോഗ്യകാര്യത്തിൽ കൂടുതൽ ശ്രദ്ധ വെക്കണം.

ഉത്രം

ഏതുകാര്യത്തിലും തുടർച്ചയായി നേരിട്ടിരുന്ന തടസ്സം നീങ്ങുന്നതാണ്. കർമ്മരംഗത്ത് വളർച്ചയും നേട്ടങ്ങളും പ്രതീക്ഷിക്കാം. സാമ്പത്തികമായ അനിശ്ചിതാവസ്ഥക്ക് തെല്ല് പരിഹാരമുണ്ടാകുന്നതാണ്. വിദ്യാർത്ഥികൾക്ക് പഠനത്തിൽ ഏകാഗ്രതയുണ്ടാവും. തൊഴിൽ തേടുന്നവർക്ക് അതിനവസരം വന്നെത്തുന്നതാണ്. ആദായമാർഗം തുറക്കപ്പെടും.
അന്യനാടുകളിൽ കഴിയുന്നവർക്ക് നാട്ടിലേക്ക് മടങ്ങാൻ സാഹചര്യം സഞ്ജാതമാകും. പണച്ചെലവ് നിയന്ത്രിക്കുന്നത് ഉചിതം. വാതകഫരോഗങ്ങൾ ക്ലേശിപ്പിച്ചേക്കാം.

അത്തം

അസാധ്യം എന്നു കരുതി ഉപേക്ഷിച്ച കാര്യങ്ങൾ നേടിയെടുത്തേക്കും. വിജയപ്രതീക്ഷ എല്ലാക്കാര്യത്തിലും ഉണ്ടാകും. വായ്പകൾ തിരിച്ചടക്കുന്നതിൽ വിഷമിക്കാം. അതിനും ചില പോംവഴികൾ തെളിഞ്ഞുകിട്ടിയേക്കും. അദ്ധ്വാനം കൂടുമെങ്കിലും അതിൽ സന്തോഷിക്കാൻ സാധിക്കുന്നതാണ്. മക്കളുടെ പഠനം തൃപ്തികരമായിരിക്കും. വിവാഹാർത്ഥികൾക്ക് മനസ്സിനിണങ്ങിയ പങ്കാളിയെ കണ്ടെത്താനായേക്കും. ആരോഗ്യശ്രദ്ധയാണു പരമപ്രധാനം.

ചിത്തിര

പുതുസംരംഭങ്ങൾ ഫലം കണ്ടുതുടങ്ങും. പ്രാരംഭതടസ്സങ്ങളെ വേഗത്തിൽ തന്നെ അതിജീവിക്കാനാവും. സമ്മാനങ്ങളോ പാരിതോഷികങ്ങളോ ലഭിക്കാം. ഉന്നതവിദ്യാഭ്യാസത്തിൽ വിജയമുണ്ടാകും. കുടുംബസൗഖ്യം അനുഭവത്തിൽ തുടരും. വസ്തു സംബന്ധിച്ച വ്യവഹാരങ്ങളിൽ അനുകൂലവിധിയോ അനുരഞ്ജനമോ പ്രതീക്ഷിക്കാം. ആരോഗ്യകാര്യത്തിൽ കൂടുതൽ ശ്രദ്ധ വേണം. രോഗികൾ തുടർചികിൽസകളിൽ അമാന്തമരുത്. പ്രണയികൾക്ക് നല്ലവാരമാണ്. ഹൃദയബന്ധം ദൃഢമാകും.

ചോതി

വ്യാപാരത്തിൽ ഉയർച്ച കണ്ടുതുടങ്ങും. പുതിയ ഉല്പന്നങ്ങൾ ഉപഭോക്താക്കളെ ആകർഷിക്കുന്നതാണ്. ജോലി സംബന്ധിച്ച ഉടമ്പടികൾ പുതുക്കപ്പെടാം. തക്കതായ യോഗ്യതകളുണ്ടായിട്ടും പരിഗണിക്കപ്പെടാതെ പോയ അവസരങ്ങൾ വീണ്ടും കൈവരും. അധികാരികളുടെ പൂർണ പിന്തുണ ലഭിക്കാത്തത് ചിലപ്പോൾ ഏറ്റെടുത്ത ദൗത്യങ്ങൾക്ക് വെല്ലുവിളിയായേക്കും. സഹപ്രവർത്തകരുടെ പിന്തുണയുണ്ടാകും. വിവാഹത്തിനുള്ള തടസ്സങ്ങൾ മാറിക്കിട്ടും. ധനപരമായി മെച്ചമുണ്ടാകും. ബുധൻ, വ്യാഴം ദിവസങ്ങൾക്ക് അഷ്ടമരാശിയാകയാൽ മേന്മ കുറയുന്നതാണ്. സാഹസങ്ങളും ദീർഘയാത്രകളും ഒഴിവാക്കുന്നത് നല്ലത്.

വിശാഖം

കർമ്മമേഖല വിപുലീകരിക്കുന്നതിൽ വിജയിക്കും. സാമൂഹികമായ അംഗീകാരം സിദ്ധിക്കും. സംഘടനാ പ്രവർത്തനങ്ങളുടെ അമരത്ത് അവരോധിക്കപ്പെടാം. കൂടിയാലോചനകളിൽ കൃത്യമായ അഭിപ്രായം പറയും. പുതുവിഷയങ്ങൾ പഠിക്കണം എന്നുള്ള ജിജ്ഞാസ ഉണ്ടാകുന്നതാണ്. പണത്തിന്റെ കാര്യത്തിൽ അഭിമുഖീകരിച്ച ഞെരുക്കം ഭാഗികമായി മാറുന്നതാണ്. വായ്പാ തിരിച്ചടവ് മുടങ്ങില്ല. കുടുംബജീവിതത്തിൽ തുടരുന്ന അനുരഞ്ജനനയം ഫലപ്രദമാകുന്നതാണ്.

അനിഴം

ഗുണദോഷസമ്മിശ്രമായ വാരമാണ്. പ്രവൃത്തികളിൽ മികവ് പുലർത്തും. ഉദ്യോഗസ്ഥർക്ക് അനുമോദനം ലഭിക്കാം. കാര്യങ്ങൾ തീർപ്പാക്കുന്നതിലെ കൃത്യതയും മാനുഷികമായ സമീപനവും ജനപ്രിയതക്ക് കാരണമാകും. കുടുംബജീവിതത്തിൽ പ്രശ്നങ്ങൾ ഉണ്ടായാലും തുറന്ന സമീപനം മൂലം അവയെ പരിഹരിക്കാൻ കഴിയുന്നതാണ്. മക്കളുടെ വിദ്യാഭ്യാസകാര്യത്തിന് വായ്പകൾ പ്രയോജനപ്പെടുത്തും. വെള്ളി, ശനി ദിവസങ്ങൾക്ക് മേന്മ കുറവായിരിക്കും.

തൃക്കേട്ട

നക്ഷതനാഥനായ ബുധൻ പത്താം ഭാവത്തിൽ സഞ്ചരിക്കുകയാൽ ലക്ഷ്യബോധത്തോടെ പ്രവർത്തിക്കാനാവും. ദുർഘടങ്ങളെ ബുദ്ധികൗശലം കൊണ്ട് നേരിടും. ചിലർക്ക് വീടുവിട്ടുനിൽക്കേണ്ട സാഹചര്യം ഉണ്ടായേക്കാം. സമൂഹത്തിലെ പ്രധാനവ്യക്തികളുടെ സൗഹൃദം ലഭിക്കാം. കുടുംബവുമൊത്ത് തീർത്ഥാടനങ്ങൾക്കും ക്ഷേത്രാടനങ്ങൾക്കും അവസരം ഉണ്ടായേക്കും. വിദേശയാത്ര, വിദേശപര്യടനം എന്നിവക്കായി ശ്രമിക്കുന്നവർക്ക് അതിനുള്ള അനുമതി ലഭിക്കാം. വാരാന്ത്യം അത്ര മെച്ചപ്പെട്ടതാവണം എന്നില്ല.

മൂലം

സൂര്യന്റെ അഷ്ടമസ്ഥിതി കാരണം സർക്കാർ കാര്യങ്ങളിൽ ക്ലേശങ്ങളും തടസ്സങ്ങളും വരാം. ഭാഗ്യഭാവത്തിലെ കുജസ്ഥിതി ഈശ്വരാധീനക്കുറവിനെ സൂചിക്കുന്നു. ഊഹക്കച്ചവടത്തിൽ നഷ്ടം വരാം. വലിയ ക്രയവിക്രയങ്ങളിൽ ഏർപ്പെടാതിരിക്കുക ഉചിതം. കുടുംബജീവിതത്തിൽ പിണക്കങ്ങളേറും; ഇണക്കങ്ങൾ കുറയും. മകളുടെ വിവാഹ കാര്യത്തിൽ നല്ല തീരുമാനം ഉണ്ടായേക്കാം. പുതിയ ജോലി പ്രതീക്ഷിക്കുന്നവർക്ക് അല്പം കൂടി കാത്തിരിക്കേണ്ടി വന്നേക്കും.

പൂരാടം

കൂട്ടുകെട്ടുകൾ തിരിച്ചടിയുണ്ടാക്കാം. രാഷ്ട്രീയത്തിൽ പ്രവർത്തിക്കുന്നവർക്ക് കിടമത്സരങ്ങളുണ്ടാവുന്നതാണ്. അന്യദേശ ജോലികൾക്കുള്ള അന്വേഷണം നീളും. തൊഴിലിൽ അദ്ധ്വാനം കൂടും. എന്നാൽ വേതനം/ പ്രതിഫലം കുറയും. അത് കിട്ടേണ്ട നേരത്ത് കിട്ടണമെന്നുമില്ല. ഗുരുസ്ഥാനീയരുടെ, പിതാവിന്റെ ആരോഗ്യസ്ഥിതി അത്ര മെച്ചമാവില്ല. വായ്പകൾ നേടിയെടുക്കാനുള്ള ശ്രമം ഭാഗികമായി വിജയിക്കുന്നതാണ്. ഭാര്യാഭർത്താക്കന്മാർക്കിടയിലെ അനൈക്യം തീരാം. കുട്ടികളുടെ ഭാവിക്കായുള്ള ചില നീക്കുപോക്കുകൾ ദാമ്പത്യത്തിൽ ഉണ്ടായേക്കാം.

ഉത്രാടം

നേട്ടങ്ങളും സാമ്പത്തികലാഭവും കൈവരിക്കാൻ ഇരട്ടി അദ്ധ്വാനിക്കേണ്ടിവരും. പൊതുപ്രവർത്തനം മടുപ്പിക്കും. സ്ഥാപിത താത്പര്യക്കാരുടെ ഒത്താശ നിരസിക്കേണ്ടതായി വന്നേക്കും. ചെറുകച്ചവടക്കാർക്കും ദിവസവേതനക്കാർക്കും വരുമാനം ഉയരും. കലാകാരന്മാർക്ക് സന്തോഷിക്കാൻ കഴിയുന്നതാണ്. പഠനത്തിലും ഗവേഷണത്തിലും മുഴുകിയവർക്ക് കൂടുതൽ വിജ്ഞാനസമ്പാദനം സാധ്യമാകും. ദുർവാസനകളെ നിയന്ത്രിക്കാൻ കഴിയും. ആരോഗ്യപ്രശ്നങ്ങൾ നിസ്സാരവത്കരിക്കരുത്.

തിരുവോണം

ആദർശത്തെക്കാൾ പ്രായോഗികമായ സമീപനം സ്വീകരിക്കും. വാഗ്ദാനങ്ങൾ നൽകില്ല. സന്ദർഭോചിതമായി ഉണർന്ന് പ്രവർത്തിക്കും. ആതുരസേവനത്തിനും ജീവകാരുണ്യത്തിനും സമയം കണ്ടെത്തുന്നതാണ്. ആരുടെയും പിന്തുണ പ്രതീക്ഷിക്കാതെ എല്ലാക്കാര്യത്തിലും മുന്നിട്ടിറങ്ങും. സാമ്പത്തികസ്ഥിതി കൂടിയും കുറഞ്ഞുമിരിക്കും. വ്യാപാരത്തിൽ മാന്ദ്യം നീങ്ങിയെന്നു പറയാം. മക്കളുമായി കലഹിക്കുന്നത് ഒഴിവാക്കും. ദാമ്പത്യത്തിൽ അനുരഞ്ജനത്തിന്റെ പാത സ്വീകരിച്ചേക്കും. ആരോഗ്യപരമായി ശരാശരിക്കാലമാണ്.

അവിട്ടം

ഉത്തരവാദിത്വങ്ങൾ ഏറ്റെടുക്കും. ഉദ്യോഗാർത്ഥികൾക്ക് കാത്തിരുപ്പ് നീളാം. നവസംരംഭങ്ങൾ തുടങ്ങുവാനുള്ള പ്രാരംഭ കാര്യങ്ങൾ പൂർത്തിയാക്കും. വിദ്യാഭ്യാസത്തിൽ ഏകാഗ്രത അല്പം കുറയാം. പ്രണയികൾക്ക് അനുകൂലമായ ആഴ്ചയാണെന്ന് പറയാനാവില്ല. ഏഴിൽ സൂര്യൻ തുടരുന്നതിനാൽ ഭാര്യാഭർത്തൃബന്ധം അത്ര സുഖകരമാവണമെന്നില്ല. ഏഴിലെ ചൊവ്വ കുംഭക്കൂറുകാർക്കും ദാമ്പത്യ പ്രശ്നങ്ങളുണ്ടാക്കും. വരവും ചെലവും സമമായി തുടരും.

ചതയം

എതിർപ്പുകളെ മറികടന്ന് മുന്നോട്ട് പോകാനാവും. ബിസിനസ്സിന്റെ പുരോഗതിക്കാവശ്യമായ ആശയങ്ങൾ സ്വയം കണ്ടെത്തി നടപ്പിലാക്കും. ഭാഗ്യാധിപഗ്രഹമായ ശുക്രന് വക്രമൗഢ്യാദികൾ ഉള്ളതിനാൽ ഭാഗ്യപരീക്ഷണങ്ങൾക്ക് മുതിരരുത്. നൂറുശതമാനം ഉറപ്പുള്ള സാമ്പത്തിക ഇടപാടുകളിൽ മാത്രം ഏർപ്പെടുക. ചെറുപ്പക്കാരുടെ വിവാഹകാര്യത്തിൽ തീരുമാനം നീണ്ടുപോകാം. ദാമ്പത്യ പ്രശ്നങ്ങൾ കുറച്ചൊന്ന് രൂക്ഷമായേക്കാം. വാക്കുകളിൽ നിയന്ത്രണം വേണ്ടതുണ്ട്. കാലികമായ വൈദ്യപരിശോധനകൾ മുടക്കരുത്.

പൂരുരുട്ടാതി

ഗാർഹിക അന്തരീക്ഷം തൃപ്തികരമാവും. അസുഖങ്ങളുടെ തുടർച്ചയ്ക്ക് അവസാനമാകും. മംഗളകർമ്മങ്ങൾക്ക് തയ്യാറെടുക്കും. പണമിടപാടുകളിലൂടെ നേട്ടം വന്നുചേരും. നഷ്ടപ്പെട്ട വസ്തുക്കൾ തിരികെ കിട്ടാം. ദാമ്പത്യത്തിലെ അനൈക്യങ്ങളെ മാദ്ധ്യസ്ഥത്തിലൂടെ പരിഹരിക്കും. വിദേശത്തു പോകാനോ സ്ഥിരാംഗത്വം ലഭിക്കാനോ ഉള്ള അപേക്ഷകളിൽ നല്ല തീരുമാനം പ്രതീക്ഷിക്കാവുന്നതാണ്. സൗഹൃദബന്ധങ്ങളിൽചില അകൽച്ചകൾ ഉണ്ടായേക്കാം.

ഉത്രട്ടാതി

നിരവധി കാര്യങ്ങൾ ഏകകാലത്ത് ഏറ്റെടുക്കേണ്ടിവരും. എന്നാൽ പുതിയ സംരംഭങ്ങൾ തുടങ്ങുന്നത് സംബന്ധിച്ച് ചിലകാര്യങ്ങൾ ബാക്കിയാവും. ഉദ്യോഗത്തിൽ സംതൃപ്തിയുണ്ടാവുന്നതാണ്. ഗവേഷണത്തിൽ തടസ്സങ്ങൾ ഉണ്ടായേക്കാം. പഴയ കൈവായ്പകൾ മടക്കിക്കിട്ടാം. കുടുംബത്തോടൊപ്പം തീർത്ഥാടനത്തിനുള്ള യോഗം കാണുന്നു. അനാവശ്യ വിവാദങ്ങളിൽ നിന്നും അകലം പാലിക്കുന്നത് ഉത്തമം. വിലകൂടിയ വസ്തുക്കൾ സ്വന്തമാക്കിയേക്കും.

രേവതി

സ്വന്തം കാര്യം നോക്കുന്നതിൽ അലംഭാവം ഉണ്ടായേക്കും. സുഹൃത്തുക്കളുടെ പ്രശ്നങ്ങൾക്ക് മുന്നിട്ടിറങ്ങും. ദുരാരോപണങ്ങളെ തള്ളിക്കളയും. നീതിലഭിക്കാൻ പലവാതിലുകൾ മുട്ടേണ്ടിവരാം. അവിവാഹിതർക്ക് വിവാഹതടസ്സം നീങ്ങിയേക്കും. ദാമ്പത്യത്തിൽ സുഖവും സംതൃപ്തിയും ഉണ്ടാകും. പ്രവർത്തനങ്ങൾക്ക് ജീവിതപങ്കാളിയിൽ നിന്നും ശക്തമായ പിന്തുണ ലഭിച്ചേക്കാം. അന്യനാട്ടിലെ ജോലിയിൽ അതൃപ്തിയുണ്ടാവുന്നതാണ്. എന്നാൽ നിലവിലെ ജോലി ഉപേക്ഷിച്ചിട്ട് പുതിയത് തേടുന്നത് അഭികാമ്യമല്ല. കിടപ്പുരോഗികൾക്ക് ആശ്വാസം അനുഭവപ്പെടാം.