Weekly Horoscope June 29-July 05: സമ്പൂർണ വാരഫലം, അശ്വതി മുതൽ രേവതി വരെ

Weekly Horoscope: ആദിത്യൻ മിഥുനം രാശിയിലാണ്. തിരുവാതിര നക്ഷത്രത്തിലൂടെ സഞ്ചരിക്കുകയാൽ 'തിരുവാതിര ഞാറ്റുവേല'ക്കാലമാണ്. ചന്ദ്രൻ വെളുത്തപക്ഷത്തിൽ. മകം മുതൽ ചോതി വരെയുള്ള നക്ഷത്രങ്ങളിലൂടെ സഞ്ചരിക്കുന്നു. 

ശനി മീനം രാശിയിൽ ഉത്രട്ടാതി നക്ഷത്രത്തിൻ്റെ രണ്ടാം പാദത്തിലാണ്. വ്യാഴം മിഥുനം രാശിയിൽ തിരുവാതിര നക്ഷത്രത്തിൻ്റെ രണ്ടാം പാദത്തിൽ സഞ്ചരിക്കുന്നു. ബുധൻ കർക്കടകത്തിൽ പൂയം നക്ഷത്രത്തിലാണ്. ശുക്രൻ 29ന്, ഞായർ മദ്ധ്യാഹ്നത്തിൽ മേടം രാശിയിൽ നിന്നും ഇടവത്തിലേക്ക് സംക്രമിക്കുന്നു. ശുക്രൻ കാർത്തിക നക്ഷത്രത്തിലാണ്. ചൊവ്വ ചിങ്ങം രാശിയിലാണ്. 

30 ന് തിങ്കളാഴ്ച പൂരം നക്ഷത്രത്തിൽ പ്രവേശിക്കും. രാഹു കുംഭം രാശിയിൽ പൂരൂരുട്ടാതി മൂന്നാം പാദത്തിലും കേതു ചിങ്ങം രാശിയിൽ ഉത്രം ഒന്നാം പാദത്തിലുമാണ്. ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള നാളുകളിൽ ജനിച്ചവരുടെ സമ്പൂർണ വാരഫലം ഇവിടെ അവതരിപ്പിക്കുന്നു.

അശ്വതി

വാരാദ്യം അത്ര മികച്ചതാവുമെന്ന് പറയാനാവില്ല. ചന്ദ്രന് കുജകേതുയോഗം ഭവിക്കുന്നതിനാൽ സർവ്വത്ര ആശയക്കുഴപ്പം വരാം. ചില പ്രയത്നങ്ങൾ ആവർത്തിക്കേണ്ടതായ സ്ഥിതിയുണ്ടാവും.  സന്താനങ്ങളുടെ കാര്യത്തിൽ, മുഖ്യമായും അവരുടെ പഠനം സംബന്ധിച്ച്, ചില ഉൽക്കണ്‌ഠകൾ ഒരു സാധ്യതയാണ്. ബുധനാഴ്ച തൊട്ട് ആത്മവിശ്വാസം വർദ്ധിക്കും. ചിന്തകൾ നേർരേഖ പോലെ കൃത്യമാവും. ജോലിസ്ഥലത്ത് കർമ്മനിരതത്വം കൈവരിക്കുന്നതാണ്. ആസന്ന ഭാവിയെക്കുറിച്ച് വ്യക്തമായ രൂപരേഖ മനസ്സിൽ തെളിയും.  കഴിഞ്ഞ കാര്യങ്ങളെ സൂക്ഷ്മവിശകലനം ചെയ്യാനും തിരുത്തൽ വരുത്തി മുന്നേറാനും സാഹചര്യം അനുകൂലമാവും. ആരോഗ്യ ജാഗ്രത അനിവാര്യം.

ഭരണി

നക്ഷത്രാധിപനായ ശുക്രൻ സ്വക്ഷേത്രത്തിൽ രണ്ടാമെടത്തിലായി സഞ്ചരിക്കുകയാൽ വചോവിലാസം വർദ്ധിക്കും. ധനാഗമം സുഗമമാവുന്നതാണ്. കുടുംബസുഖം ഭവിക്കുകയും ചെയ്യും. ഭോഗാനുഭവങ്ങൾ ഉണ്ടാവും. ഇഷ്ടജനങ്ങളുമായി സല്ലപിക്കാൻ അവസരം വന്നെത്തും. കർമ്മരംഗത്ത് കാര്യമായ തടസ്സങ്ങളൊന്നും ഉണ്ടാവില്ല. ആത്മവിശ്വാസത്തോടെ മുന്നോട്ടുപോകാൻ സാഹചര്യം ഒത്തിണങ്ങുന്നതാണ്. അഞ്ചാം ഭാവത്തിലെ  കുജ - കേതു യോഗം മക്കളുടെ കാര്യത്തിൽ ചില ഉത്കണ്ഠകൾ സൃഷ്ടിച്ചേക്കാം. ആലോചനകൾ അമിതമാവുന്നതാണ്. ചൊവ്വ, ബുധൻ ദിവസങ്ങൾക്ക് മേന്മ കുറയാനിടയുണ്ട്. 

കാർത്തിക

തൊഴിലിടത്തിൽ സമാധാനമുണ്ടാവും. എന്നാൽ അധികാരമുള്ള ചുമതലകൾ ലഭിക്കാൻ കാത്തിരിക്കേണ്ടിവരും. കൃത്യനിഷ്ഠ പുലർത്താൻ മകനെ നിർബന്ധിക്കേണ്ട സാഹചര്യം ഉദിക്കാം. കരാർ പണികളിലെ തടസ്സങ്ങൾ നീങ്ങിയേക്കും. ഒരുപക്ഷേ പ്രതീക്ഷിക്കുന്ന സന്ദേശം എത്തിയേക്കില്ല. കാത്തിരിപ്പ് തുടരാം. പൊതുപ്രവർത്തനത്തിന് കൂടുതൽ സമയം നീക്കിവെക്കുന്നതാണ്. ഏജൻസികളിലൂടെ ആദായം ഉയരുന്നതാണ്. വിദേശത്തുള്ളവർക്ക് ജോലി സംബന്ധിച്ച ആശങ്കകൾ ഉണ്ടായേക്കും. വയോജനങ്ങളുടെ ആരോഗ്യകാര്യത്തിൽ ശ്രദ്ധയുണ്ടാവണം. 

Also Read: മിഥുന മാസത്തെ സമ്പൂർണ നക്ഷത്രഫലം, അശ്വതി മുതൽ രേവതി വരെ

രോഹിണി

നക്ഷത്രനാഥനായ ചന്ദ്രൻ വെളുത്തപക്ഷത്തിലൂടെ കടന്നുപോവുകയാൽ ആത്മവിശ്വാസം വർദ്ധിക്കുന്നതാണ്. ആലോചനകൾ സാക്ഷാൽക്കരിക്കാൻ ഒരു പരിധിവരെ കഴിഞ്ഞേക്കും. വാരാദ്യം ചന്ദ്രന് കുജകേതു യോഗം വരികയാൽ  സമ്മർദ്ദങ്ങൾ ഉയരുവാനിടയുണ്ട്. മിഥ്യാധാരണകൾ വരാം. ആത്മസംയമനം അനിവാര്യമാണ്. മറ്റു ദിവസങ്ങളിൽ കൃത്യനിർവഹണം പ്രശംസിക്കപ്പെടും. ബഹുകാര്യങ്ങളിൽ വ്യാപരിക്കാനാവും. ഭോഗസംതൃപ്തിയുണ്ടാവും. പ്രണയത്തിൽ വിജയിച്ചതായി തോന്നും. കലാപരമായ കാര്യങ്ങളിൽ മനസ്സർപ്പിക്കും.  വീട്ടുപകരണങ്ങൾ വാങ്ങാൻ ചെലവുണ്ടായേക്കും.

മകയിരം

കഴിഞ്ഞവാരം അനുഭവിച്ച മാനസിക സംഘർഷം ഇപ്പോളുണ്ടാവില്ല. പ്രശ്നങ്ങൾ ഭംഗിയായി പരിഹരിക്കുന്നതാണ്. എന്നാലും ചില സമാധാനക്കേടുകൾ ചൊവ്വ-കുജ യോഗത്താൽ ഉണ്ടായിക്കൊണ്ടിരിക്കും. വ്യാപാരം -വ്യവസായം എന്നിവ വിപുലീകരിക്കാൻ ആലോചിക്കും. ഇടവക്കൂറുകാർക്ക് ഭോഗസുഖമുണ്ടാവും. വിലയേറിയ പാരിതോഷികങ്ങൾ ലഭിക്കാനിടയുണ്ട്. മിഥുനക്കൂറുകാർക്ക് അപ്രതീക്ഷിതമായ സഹായം കൈവരുന്നതാണ്. സർക്കാർ കാര്യങ്ങളിൽ പരിശ്രമങ്ങൾ ഫലം കണ്ടേക്കില്ല. ഗവേഷകർക്ക് പ്രബന്ധ രചനയിൽ തടസ്സങ്ങൾ ഉണ്ടാവാം. ബന്ധുക്കൾ തമ്മിലുള്ള കലഹങ്ങളിൽ വിജയകരമായി    ഇടപെടുന്നതാണ്.

തിരുവാതിര

ഉദ്യോഗസ്ഥർക്ക് പ്രതീക്ഷിച്ചതിലും ഭംഗിയായി പല കാര്യങ്ങളും നിർവഹണസന്ധിയിൽ എത്തിക്കുവാനാവും. മേലധികാരികളുടെ അനുമോദനം ലഭിക്കും.  അപ്രതീക്ഷിതമായി ചില വ്യക്തികളിൽ നിന്നും സഹകരണം  കൈവരുന്നതാണ്. എതിർപ്പുകളെ മൗനത്താൽ നിരാകരിക്കും. ബിസിനസ്സുകാർക്ക് ന്യായമായ ലാഭം കിട്ടും. വിപുലീകരണം സംബന്ധിച്ചുള്ള ചർച്ചകളിൽ പുരോഗതിയുണ്ടാവും. ഗൃഹനിർമ്മാണത്തിലെ തടസ്സം മാറുന്നതിന് സാധ്യത കാണുന്നു. ധനസഹായം കൈവരുന്നതാണ്. ഉപരിവിദ്യാഭ്യാസത്തിന് അടുത്തുള്ള കലാലയത്തിൽ തന്നെ അഡ്മിഷൻ കിട്ടാം.

പുണർതം

നക്ഷത്രാധിപനായ വ്യാഴത്തിൻ്റെ മൗഢ്യം തുടരുകയാണ്. വാരാദ്യം ആത്മവിശ്വാസം വർദ്ധിക്കും. ലഘുപ്രയത്നത്താൽ ചില വലിയ കാര്യങ്ങൾ നേടിയേക്കും. അധികാരികളോട് അകലം പ്രാപിക്കും. എന്നാൽ ഏതുകാര്യവും "വളയ്ക്കുകയേ ചെയ്യാവൂ, ഒടിക്കരുത്" എന്ന നിയമം മറക്കരുത്. മകൻ്റെ ന്യായമായ ആവശ്യങ്ങൾക്ക് ധനസഹായം ചെയ്യും. സംഘടനകളിൽ പ്രവർത്തിക്കുന്നവർക്ക് എതിർപ്പുകളെ നേരിടേണ്ടി വരാം. കടബാധ്യതകൾ ഭാഗികമായി പരിഹരിക്കാൻ വഴിതെളിയുന്നതാണ്. ശുക്രൻ പന്ത്രണ്ടിൽ സഞ്ചരിക്കുകയാൽ ആഡംബരച്ചെലവുകൾ വരുന്നതാണ്.

പൂയം

കൊണ്ടും കൊടുത്തും, നേടിയും നഷ്ടപ്പെടുത്തിയും നീങ്ങുന്ന വാരമാണ്. ഔദ്യോഗികമായി ജോലിഭാരം കൂടുന്നതായിരിക്കും. വാഗ്ദാനലംഘനങ്ങൾ മൂലം പരിഹാസം ഏറ്റുവാങ്ങേണ്ടി വരാം. കുടുംബകാര്യങ്ങളിൽ ശ്രദ്ധ കുറയുന്നതിനാൽ ചില പ്രശ്നങ്ങൾ ഉണ്ടാവുന്നതാണ്. സമാധാന ശ്രമങ്ങൾ ജീവിതപങ്കാളി വിക്കൊള്ളണമെന്നില്ല. ശുക്രൻ പതിനൊന്നിൽ സഞ്ചരിക്കുന്നതിനാൽ നഷ്ടപ്രണയം വീണ്ടും പുഷ്കലമാവാം. കടബാധ്യതകളിൽ തെല്ലൊരു ആശ്വാസം സംജാതമാകും.  ആരോഗ്യപ്രശ്നങ്ങളിൽ കരുതൽ വേണം. വാഹനം മോടിപിടിപ്പിക്കാൻ ധനം വ്യയം ചെയ്യുന്നതാണ്. 

ആയില്യം

പതിനൊന്നിലെ ശുക്രസഞ്ചാരം ഭൗതികമായ നേട്ടങ്ങൾക്ക് വഴിതുറക്കാം. കലാപ്രവർത്തകർക്ക് മികച്ച അവസരങ്ങൾ സിദ്ധിക്കും. ന്യായമായ ആവശ്യങ്ങൾ നടന്നുകിട്ടും. സാമൂഹികമായ അംഗീകാരം ലഭിക്കുന്നതാണ്. ഉന്നതവിദ്യാഭ്യാസത്തിന് ആഗ്രഹിച്ച സ്ഥാപനത്തിൽ തന്നെ പ്രവേശനം കിട്ടും. ബിസിനസ്സുകാരുടെ കച്ചവടതന്ത്രങ്ങൾ ഫലം കാണുന്നതാണ്. സംഭാഷണത്തിലെ അശ്രദ്ധ മൂലം വിരോധത്തിനിട വരാം. കുടുംബസുഖം തെല്ല് കുറയുവാനിടയുണ്ട്. ഗൃഹനവീകരണം പൂർത്തിയാവും. ലഘുയാത്രകൾ കൊണ്ട് കാര്യസിദ്ധി കൈവന്നേക്കും.

മകം

ചന്ദ്രൻ, കേതു, ചൊവ്വ എന്നീ ഗ്രഹങ്ങൾ ജന്മരാശിയിൽ സഞ്ചരിക്കുകയാൽ ആശയക്കുഴപ്പം ഉണ്ടാവും. അവിചാരിതമായ സമ്മർദ്ദങ്ങൾ വന്നെത്തും. പ്രത്യേകിച്ചും വാരാദ്യദിവസങ്ങളിൽ. ഉപജാപങ്ങളിൽ കുടുങ്ങാതെ ശ്രദ്ധിക്കുക. ദേഹാസ്വസ്ഥത അനുഭവപ്പെട്ടാൽ വൈദ്യസഹായം തേടണം. ബുധനാഴ്ച മുതൽ മാറ്റം വരാം. പ്രതീക്ഷിച്ച ധനം വന്നുചേരുന്നതാണ്.  കുടുംബത്തിൻ്റെ പിന്തുന്ന പ്രതീക്ഷിക്കാം. തൊഴിലിടത്തിൽ സാമാന്യമായ സംതൃപ്തി ഭവിക്കും.  അന്യദിക്കിൽ തുടർ പഠനത്തിനുള്ള അവസരം സംജാതമാകുന്നതാണ്.

പൂരം 

നക്ഷത്രാധിപനായ ശുക്രൻ്റെ സ്വക്ഷേത്രസ്ഥിതി ആത്മവിശ്വാസമേകും. ജന്മരാശിയിലും ജന്മനക്ഷത്രത്തിലും പാപഗ്രഹങ്ങൾ കടന്നുപോകുന്നത് അനുകൂലമല്ലാത്ത സാഹചര്യങ്ങൾ സൃഷ്ടിക്കും. ക്രയവിക്രയങ്ങളിൽ ശ്രദ്ധിക്കണം. ജോലിയിലെ ആത്മാർത്ഥത അംഗീകരിക്കപ്പെടും.  പ്രണയത്തിൽ തിരിച്ചടികൾ വരാം. സ്വന്തം വാക്കുകൾ ദുർവ്യാഖ്യാനിക്കപ്പെടാനിടയുണ്ട്. യാത്രകൾക്ക് ഗുണം കുറയും.  കരാറുകളിൽ ഏർപ്പെടുമ്പോൾ വ്യവസ്ഥകൾ കൃത്യമായി മനസ്സിലാക്കാൻ മറക്കരുത്. സാങ്കേതിക വിദ്യകൾ സ്വായത്തമാക്കാനുള്ള ശ്രമം തുടരുന്നതാണ്.

Also Read: 'അച്ഛനെയാണെനിക്കിഷ്ടം...' അച്ഛനും മക്കളും ജ്യോതിഷവും

ഉത്രം

ആദിത്യൻ്റെയും ഒപ്പം വ്യാഴത്തിൻ്റെയും അനുകൂലത പ്രതിസന്ധികളെ മറികടക്കാൻ സഹായിക്കുന്നതാണ്. ചിലപ്പോൾ ഏകാന്തത അനുഭവപ്പെടും. കൃത്യനിർവഹണം തൃപ്തികരമാവും. സഹപ്രവർത്തകരുടെ ഉപദേശനിർദ്ദേശങ്ങൾ പ്രയോജനപ്പെടുന്നതാണ്. ഭൗതികമായ ആവശ്യങ്ങൾ കൂടിവരുന്നതിൽ ചിലപ്പോൾ കുടുംബത്തോട് കലഹിച്ചേക്കും. മനസ്സന്തോഷമുള്ള കാര്യങ്ങൾക്ക്, സുഹൃൽ സല്ലാപം, വായന, വിനോദപരിപാടികൾ തുടങ്ങിയവയ്ക്ക് സമയം ലഭിച്ചേക്കില്ല. അനാവശ്യമായ ഉൽക്കണ്ഠകൾ ഒഴിവാക്കുക ഉത്തമം.

അത്തം

വാരാദ്യം പലതരം ചെലവുകൾ വന്നുപെടും. ക്ഷോഭം നിയന്ത്രിക്കപ്പെടണം. സമയനിഷ്ഠ പാലിക്കാൻ ക്ലേശിക്കുന്നതാണ്. മറ്റു ദിവസങ്ങളിൽ സ്വസ്ഥത പ്രതീക്ഷിക്കാം. തൊഴിൽ വൈദഗ്ദ്ധ്യം അഭിനന്ദിക്കപ്പെടും. വിജ്ഞാനാന്വേഷണത്തിനും നേരം കണ്ടെത്തുന്നതാണ്. പ്രമുഖരുമായുള്ള പരിചയം ആത്മവിശ്വാസം വളർത്തും. സമ്മാനങ്ങൾ ലഭിക്കാനിടയുണ്ട്. കുടുംബ ബജറ്റ് ചുരുക്കാൻ വിഫലശ്രമം നടത്തുന്നതാണ്. ഭാഗ്യസ്ഥാനത്ത് ശുക്രൻ സഞ്ചരിക്കുകയാൽ ഭാഗ്യാനുഭവങ്ങൾ വരാം.

ചിത്തിര

വാക്കുപാലിക്കാൻ കഴിയും. വിവാദങ്ങളിൽ വിജയിക്കുന്നതാണ്. കിട്ടാക്കടങ്ങൾ ഭാഗികമായി കൈവരാം. രോഗക്ലേശിതർക്ക് പുതുചികിൽസയിലൂടെ ആശ്വാസം ലഭിക്കുന്നതാണ്. തൊഴിലിടത്തിൽ ചെറിയ വൈഷമ്യങ്ങൾ ഉണ്ടായേക്കും. അടുത്ത ബന്ധുക്കളുടെ സഹകരണം പ്രതീക്ഷിക്കാം. വിരുന്നുകൾ, ഷോപ്പിംഗ്, ഉല്ലാസം ഇവയ്ക്കുള്ള അവസരം വന്നെത്തുന്നതാണ്. നവസംരംഭങ്ങൾ പുഷ്ടിപ്പെടുത്താൻ പരസ്യത്തിൻ്റെ സഹായം ആവശ്യമാകും.  ഊഹക്കച്ചവടത്തിൽ നിന്നും ഊഹിച്ച ആദായം കിട്ടിയേക്കില്ല.

ചോതി

തൊഴിൽ പ്രതിസന്ധികൾ വലച്ചെന്നു വരാം. തിടുക്കത്തിലെടുക്കുന്ന തീരുമാനങ്ങൾ അബദ്ധത്തിലാക്കാം. നിലവിലെ ജോലി ഉപേക്ഷിക്കാതിരിക്കുക
അഭികാമ്യമാണ്. ഭോഗസുഖമുണ്ടാവും. ആഡംബരച്ചെലവുകൾ അധികമായേക്കും. അതിൻ്റെ പേരിൽ  കുടുംബ കലഹങ്ങൾ ഉയരാനിടയുണ്ട്. പരാശ്രയത്വം കുറയ്ക്കാൻ ആഗ്രഹിക്കും. മകളുടെ ഭാവികാര്യങ്ങളിൽ ഉചിതമായ തീരുമാനം കൈക്കൊള്ളാൻ സാധിച്ചേക്കില്ല. പൂർവ്വികസ്വത്തു സംബന്ധിച്ച വിവരങ്ങൾ തേടേണ്ടി വരാം. അതിൽ നിന്നും ഗുണാനുഭവങ്ങൾക്ക് സാധ്യതയുണ്ട്. സഹോദരഗുണമുണ്ടാവും.

വിശാഖം

ആത്മവിശ്വാസം കുറയാനിടയുണ്ട്. മിഥ്യാധാരണകൾ പുലർത്തും. ഏജൻസി പ്രവർത്തനത്തിൽ ലാഭമുണ്ടാവുന്നതാണ്. കാര്യാലോചനകളിൽ ശബ്ദമുയർത്തി സംസാരിക്കേണ്ടി വരാം. എതിർപ്പുകളെ ആശയപരമായി നേരിടുന്നതാണ്.  ധനപരമായ ശോച്യത മാറിക്കിട്ടുന്നതിന് അവസരം ഒരുങ്ങും. പ്രതിമാസപ്പലിശകൾ അടക്കാൻ സാധിക്കും. ബിസിനസ്സ് യാത്രകൾ സാമാന്യമായി ഗുണം ചെയ്യുന്നതാണ്. ഭൂമി വിൽക്കാനുള്ള ഊർജ്ജിതശ്രമം ഫലം കണ്ടുതുടങ്ങും. ബന്ധുക്കളുടെ തർക്കത്തിൽ മാധ്യസ്ഥത്തിന് മുതിരുന്നത് പേരുദോഷമുണ്ടാക്കാം.വാഹനത്തിൻ്റെ അറ്റകുറ്റപ്പണിക്ക് കൂടുതൽ ചെലവുണ്ടാവും.

അനിഴം

പലനിലയ്ക്കും സമാശ്വാസം വന്നെത്തുന്ന വാരമാണ്. പ്രയത്നം വിഫലമല്ലെന്ന തോന്നൽ സന്തോഷിപ്പിക്കും. ഉദ്യോഗസ്ഥർക്ക് പ്രവൃത്തിയിൽ പൂർണതോതിൽ മുഴുകാനാവും. ചുമതലകളിൽ വിജയം നേടുന്നതാണ്. രോഗാരിഷ്ടകൾ കുറയുന്നതിന് സാധ്യതയുണ്ട്. അനാവശ്യച്ചെലവുകൾ പരപ്രേരണകൂടാതെ തന്നെ ചുരുക്കാൻ കഴിയും. വിദ്യാർത്ഥികൾക്ക് ഭാവിയിൽ പ്രയോജനം ചെയ്യുന്ന പുതിയ കോഴ്സുകളിൽ പ്രവേശനം കിട്ടുന്നതാണ്. അനുരാഗികൾക്ക് ആഹ്ളാദിക്കാനാവും. നാലിലെ രാഹു ഇടക്കിടെ ചില ചിത്തവ്യാകുലതകൾ ഉണ്ടാക്കിയേക്കും. 

തൃക്കേട്ട

സന്താനങ്ങളുടെ ആവശ്യങ്ങൾക്കായി പണം ചെലവഴിക്കേണ്ടി  വരുന്നതാണ്. ആരോഗ്യം തൃപ്തികരമായിരിക്കും. മുൻ ആഴ്ചത്തെ അപേക്ഷിച്ച് കർമ്മരംഗത്തെ തടസ്സങ്ങളെ അനായാസം മറികടക്കുന്നതാണ്. പൊതുവേ സാമ്പത്തിക നില മെച്ചപ്പെടും. ഗൃഹാന്തരീക്ഷത്തിൽ സ്വാച്ഛന്ദ്യം സാമാന്യമായിട്ടാവും. സുഹൃത്തുക്കളുടെയോ ബന്ധുക്കളുടെയോ വാക്കുകൾ സ്വീകരിക്കില്ല. തീരുമാനം സ്വന്തം തന്നെയായിരിക്കും. ജനമധ്യത്തിൽ സ്വീകാര്യത വർദ്ധിക്കുന്നതാണ്. ബിസിനസ്സ് കാര്യങ്ങൾക്കായി യാത്രകളുണ്ടാവും. മനസ്സിന് സന്തോഷമുണ്ടാവുന്ന വാർത്തകൾ കേൾക്കുന്നതാണ്.

മൂലം

ഇപ്പോഴത്തെ ഗ്രഹനിലപൊതുവേ മികച്ച ഫലത്തെ കാണിക്കുന്നില്ലെങ്കിലും ചന്ദ്രൻ, രാഹു, ബുധൻ തുടങ്ങിയ ഗ്രഹങ്ങളുടെ അനുകൂലതയാൽ ന്യായമായ ആവശ്യങ്ങൾ നടന്നുകിട്ടും. സ്വാശ്രയ തൊഴിലിൽ ലാഭം കിട്ടുകയില്ല. നഷ്ടം വരാതെ നോക്കാനാവും എന്നുമാത്രം. ഇപ്പോൾ നവസംരംഭങ്ങൾ തുടങ്ങുന്നത് ഗുണം ചെയ്യില്ല. ദുഷ്പ്രലോഭനങ്ങളെ ചെറുക്കേണ്ടതുണ്ട്. ചിലരുടെ സഹായം ആവശ്യപ്പെടാതെ തന്നെ ലഭിക്കാം. പിന്നീട് അതു സ്വീകരിക്കേണ്ടിയിരുന്നില്ലെന്ന് തോന്നിയേക്കാം. രോഗഗ്രസ്തർക്ക് അല്പം ആശ്വാസമുണ്ടാവുന്നതാണ്.

പൂരാടം

കാര്യസിദ്ധിക്കായി കിണഞ്ഞ് പരിശ്രമിക്കേണ്ടി വരും. പലനിലയ്ക്കും പ്രതികൂല സാഹചര്യങ്ങൾ ഉണ്ടെങ്കിലും പ്രായോഗിക ബുദ്ധിയും പ്രത്യുല്പന്നമതിത്വവും കൊണ്ട് അവയെ മറികടക്കാനാവും. തൊഴിലിൽ ഇത് ശരാശരിക്കാലമാണ്. കടബാധ്യത പരിഹരിക്കാൻ വഴിതെളിയും. ആഢംബരച്ചെലവുകൾ കുറക്കാനും മിതവ്യയം പാലിക്കാനും ശ്രമം തുടരും. ബന്ധുഭവനം സന്ദർശിക്കുന്നതാണ്. പൊതുക്കാര്യങ്ങൾക്ക് ധാരാളം സമയം കണ്ടെത്തും ' നേരേവാ നേരേപോ' മട്ട് ശത്രുക്കളെ സൃഷ്ടിക്കാം. ഗൃഹത്തിൻ്റെ നവീകരണം നീളുന്നതാണ്.

ഉത്രാടം

രോഗക്ലേശങ്ങളാൽ വലയുന്നവർക്ക് ആശ്വാസമനുഭവപ്പെടും. ദൗത്യങ്ങൾ വിജയകരമായി പൂർത്തിയാക്കുന്നതാണ്. ഉദ്യോഗസ്ഥർക്ക് സ്വസ്ഥതയുണ്ടാവുന്ന കാലമാണെന്ന് കരുതാം. അമിതഭാരം ഉണ്ടാവില്ല. ബിസിനസ്സിൽ വിജയിക്കുന്നതാണ്. മുടക്കിയ ധനം തിരികെ കിട്ടിത്തുടങ്ങും. വിദ്യാഭ്യാസപരമായുണ്ടായ തടസ്സങ്ങൾ പരിഹൃതമാവും. ഗൃഹനിർമ്മാണവുമായി ബന്ധപ്പെട്ട കാര്യങ്ങളിൽ തടസ്സം അനുഭവപ്പെടും. ഭൂമിവിൽപ്പനയിലും പ്രതീക്ഷിച്ച പോലെയാവില്ല കാര്യങ്ങൾ. പഴയ സുഹൃത്തുക്കളെ വീണ്ടും കാണാനായേക്കും.

തിരുവോണം

പ്രവർത്തനങ്ങളിൽ ആലസ്യം വരാം. സ്നേഹപ്രേരണകളോ സമ്മർദ്ദങ്ങളോ ഇല്ലെങ്കിൽ പ്രവൃത്തിയിൽ പരാങ്മുഖരാവും. മംഗളകർമ്മങ്ങളിൽ പങ്കെടുക്കുന്നതാണ്. ജോലിസ്ഥലത്തെ ഉപജാപങ്ങളെ തിരിച്ചറിയും. കലാരംഗത്തുള്ളവർക്ക് അവസരങ്ങൾ കിട്ടാം. കരാറുകളിൽ ഏർപ്പെടുമ്പോൾ വ്യവസ്ഥകളെക്കുറിച്ചറിയാൻ മറക്കരുത്. ധനനിക്ഷേപങ്ങളിലും വിനിമയത്തിലും കരുതൽ വേണം. ഉദാരസമീപനം ചൂഷണ ചെയ്യപ്പെടാനിടയുണ്ട്. അക്കാര്യത്തിലും ജാഗ്രത അനിവാര്യം. വിദേശത്തുള്ളവർക്ക് തൊഴിലിൽ ആശ്വാസം ഉണ്ടാവും. ജീവിത പങ്കാളിയുടെ നിർദ്ദേശങ്ങൾ കാര്യസാധ്യത്തിന് കാരണമാവുന്നതാണ്.

Also Read: നിങ്ങളുടെ ജീവിതപങ്കാളി എങ്ങനെയുള്ള ആളാവും?

അവിട്ടം

ലക്ഷ്യപ്രാപ്തി എളുപ്പമല്ല. പക്ഷേ അസാധ്യമാണ് എന്നുപറയാനുമാവില്ല. തുടർ പരിശ്രമങ്ങൾ ആവശ്യമാണ്.  ബിസിനസ്സിൽ പുതിയ പങ്കാളികളെ ചേർക്കുന്നത് കരുതലോടെ വേണം. വിദേശയാത്രക്ക് മുന്നൊരുക്കം നടത്തും. സാഹിത്യ പ്രവർത്തനം അഭംഗുരം നടക്കും. സദുദ്ദേശത്തോടെ പറയുന്നവ തെറ്റിദ്ധരിക്കപ്പെടാം. സാമ്പത്തികമായ അമളി പിണയാൻ സാധ്യതയുണ്ട്. കരുതൽ വേണം. വസ്തുസംബന്ധിച്ച അയൽതർക്കങ്ങൾക്ക് മുതിരരുത്. മകൾക്ക് ഇഷ്ടപ്പെട്ട വിഷയത്തിൽ തുടർപഠനത്തിന് അവസരമുണ്ടാവും. സാങ്കേതിക വിഷയങ്ങൾ പഠിച്ചറിയാൻ സാധിച്ചേക്കും.

ചതയം

സമ്മിശ്രമായ വാരമാണ്. ആദ്യ പകുതിയിൽ ലഘുപ്രയത്‌നത്താൽ നേട്ടങ്ങൾ വരും.  ആവശ്യത്തിന് വിശ്രമം കിട്ടുന്നതായിരിക്കും. ഗാർഹികസൗഖ്യം പ്രതീക്ഷിക്കാം. നവീന ഗൃഹോപകരണങ്ങൾ വാങ്ങുവാനായേക്കും. മുൻകൂട്ടി തീരുമാനിച്ചവ പ്രാവർത്തികമാക്കാൻ സാധിച്ചേക്കും. മറ്റു ദിവസങ്ങളിൽ ആലസ്യമനുഭവപ്പെടും. സഹപ്രവർത്തകരുടെ നിർദ്ദേശങ്ങൾ നിരാകരിക്കുന്നതാണ്. ലോൺ തിരിച്ചടവിന്  കഴിയാതെ വന്നേക്കാം. പഴയ കടബാധ്യതകൾ ചിത്തശല്യത്തിന് കാരണമാകാനിടയുണ്ട്. ദുഷ്പ്രേരണകളെ പ്രതിരോധിക്കാൻ സാധിച്ചെന്നുവരില്ല.

പൂരൂരുട്ടാതി

പ്രവൃത്തികളിൽ സാമാന്യമായ വിജയമുണ്ടാവും. കലാരംഗത്തെ ചുവടുവെയ്പുകൾ കൂടുതൽ അംഗീകരിക്കപ്പെടും. വിശിഷ്ട വ്യക്തികളുടെ സഹകരണം ദിശാബോധമേകും. പ്രൈവറ്റ് ജോലിയിൽ വേതന വർദ്ധന/ പദവിയിൽ ഉയർച്ച തുടങ്ങിയവ പ്രതീക്ഷിക്കാം. അനാവശ്യമായ തിടുക്കവും ആകാംക്ഷയും ഗുണം ചെയ്യില്ല. ദാമ്പത്യത്തിൽ അനൈക്യസാഹചര്യങ്ങൾ വരാനിടയുളളതിനാൽ കരുതൽ വേണം. കൂട്ടുകച്ചവടത്തിൽ തൃപ്തിക്കുറവ് ഭവിക്കാം.  കളം മാറ്റിചവുട്ടുന്ന കാര്യം ആലോചിക്കും. കമ്മീഷൻ വ്യാപാരം ഗുണം ചെയ്യുന്നതാണ്.

ഉത്രട്ടാതി

ശനിയുടെ ജന്മനക്ഷത്ര സഞ്ചാരത്താൽ ക്ലേശങ്ങൾ വന്നും പോയും ഇരിക്കും. ആലസ്യവും കർമ്മരംഗത്തെ മടുപ്പും അനുഭവപ്പെടാം. പന്ത്രണ്ടിലെ രാഹു അകാരണമായ അലച്ചിലിന് ഇടവരുത്തുന്നതാണ്. അനാവശ്യ കാര്യങ്ങൾക്ക് പണച്ചെലവുണ്ടാക്കും. കുഞ്ഞുങ്ങളുടെയും മുതിർന്നവരുടെയും ആരോഗ്യകാര്യത്തിൽ നല്ലശ്രദ്ധ ആവശ്യമായ സന്ദർഭമാണ്. എതിർ സ്വരങ്ങളെ അവഗണിക്കുവാൻ കരുത്തുണ്ടാവും. വസ്തു / കെട്ടിടം ഇവകളിൽ നിന്നും വരുമാനം ലഭിക്കുന്നതാണ്. വീടുവിട്ടു നിൽക്കുന്നവർക്ക് വീട്ടിലെത്താൻ അല്പം കൂടി കാക്കേണ്ടതുണ്ട്. 

രേവതി

ഭാവിയെക്കുറിച്ച് കൂടുതൽ കണക്കുകൂട്ടും. കൂടുതൽ ആലോചിക്കും. ചടുലമായ നീക്കങ്ങൾക്ക് മുതിരാതിരിക്കുകയാവും കരണീയം. ധനകാര്യം തൃപ്തികരമാവും. പക്ഷേ പാഴ്ച്ചെലവുകൾക്ക് സാഹചര്യം ഉണ്ടായിക്കൊണ്ടിരിക്കുമെന്നതിനാൽ കരുതൽ വേണം. വിദ്യാർത്ഥികൾക്ക് ആഗ്രഹിച്ച വിഷയത്തിൽ ഉപരിപഠനത്തിന് അവസരം ലഭിക്കുന്നതാണ്. സ്ത്രീകളുടെ പിന്തുണ കൈവരും. തീർത്ഥാടനത്തിന് അവസരം കൈവരും. കുടുംബകാര്യങ്ങളിൽ ശ്രദ്ധ കുറയുന്നതായി പരാതി ഉയരാം. വ്യവഹാരങ്ങളിൽ തത്കാലം ജയമോ തോൽവിയോ പ്രതീക്ഷിക്കേണ്ടതില്ല.

Read More: ജൂൺ മാസത്തെ നക്ഷത്രഫലം, അശ്വതി മുതൽ രേവതിവരെ