Weekly Horoscope Aug 03-Aug 09: സമ്പൂർണ വാരഫലം, അശ്വതി മുതൽ രേവതിവരെ

ആദിത്യൻ കർക്കടകം രാശിയിൽ ആയില്യം ഞാറ്റുവേലയിലാണ്. ചന്ദ്രൻ പൂർണ്ണമായും വെളുത്തപക്ഷത്തിൽ സഞ്ചരിക്കുന്നു. ആഗസ്റ്റ് 9 ന്/ കർക്കടകം 24ന് ശനിയാഴ്ച വെളുത്തവാവ്/പൗർണ്ണമി ആയിരിക്കും. ചൊവ്വ കന്നിരാശിയിൽ ഉത്രം നക്ഷത്രത്തിലാണ്. ബുധൻ കർക്കടകം രാശിയിൽ വക്രഗതിയിൽ പൂയം നക്ഷത്രത്തിൽ സഞ്ചരിക്കുന്നു. ബുധന്  മൗഢ്യാവസ്ഥയുമുണ്ട്.  ശുക്രൻ മിഥുനം രാശിയിൽ തിരുവാതിര നക്ഷത്രത്തിൽ തുടരുന്നു. 

ശനി മീനം രാശിയിൽ ഉത്രട്ടാതിയിൽ വക്രഗതിയിൽ സഞ്ചരിക്കുകയാണ്. വ്യാഴം മിഥുനം രാശിയിൽ തിരുവാതിരയിലൂടെ കടന്നുപോകുന്നു. ശുക്രനും ഗുരുവും മിഥുനം രാശിയിൽ തിരുവാതിരയിലാണ് എന്നത് പ്രസ്താവ്യം. രാഹു കുംഭം  രാശിയിൽ പൂരൂരുട്ടാതി രണ്ടാം പാദത്തിലും കേതു ചിങ്ങം രാശിയിൽ പൂരം ഒന്നാം പാദത്തിലും ആയി പിൻഗതിയിൽ തുടരുന്നുണ്ട്.

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള നക്ഷത്രങ്ങളുടെ ഒരാഴ്ചക്കാലത്തെ സമ്പൂർണ്ണഫലം ഇവിടെ അപഗ്രഥിക്കുന്നു.

Also Read: ഓഗസ്റ്റ് മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

അശ്വതി

നിലവിലെ സാഹചര്യങ്ങൾ ആവർത്തിക്കുന്നതാണ്. പുതിയ കാര്യങ്ങൾ പ്രാവർത്തികമാക്കാൻ ശ്രമിച്ചുകൊണ്ടിരിക്കും. മറ്റുള്ളവരോട് ഉള്ളിലുള്ള ആശയങ്ങൾ പറഞ്ഞു ബോധിപ്പിക്കുക ദുഷ്കരമാവും. എങ്കിലും നാലാം ഭാവാധിപനായ ചന്ദ്രന് ബലമുള്ളതിനാൽ മനസ്സിന് പ്രസന്നത കുറയില്ല. പൊതുവെ പറഞ്ഞാൽ സുഖവും സ്വൈരവും അനുഭവപ്പെടുന്നതാണ്. സ്ത്രീകളുടെ/ സുഹൃത്തുക്കളുടെ പിൻബലം പ്രതീക്ഷിക്കാം. ആറാം ഭാവത്തിലെ കുജൻ എതിർസ്വരങ്ങളെ അവഗണിക്കാൻ കരുത്തേകുന്നതാണ്. വീട്ടിലോ വാഹനത്തിലോ അറ്റകുറ്റം നടത്തി  വീണ്ടും ഉപയോഗത്തിലാക്കും. ഞായർ, തിങ്കൾ ദിവസങ്ങളിൽ കൂടുതൽ ജാഗ്രത വേണ്ടതുണ്ട്.

ഭരണി

വാരാദ്യ ദിവസങ്ങൾക്ക് മേന്മ കുറയാം. നവാരംഭങ്ങൾക്ക് നല്ല ദിവസങ്ങളല്ല. പണമെടപാടുകളിൽ കരുതലുണ്ടാവണം. ദൗത്യങ്ങളിൽ വിജയിക്കാൻ ആവർത്തിത ശ്രമം ആവശ്യമാണ്. മറ്റുദിവസങ്ങളിൽ പ്രായേണ നേട്ടങ്ങൾ ഭവിക്കും. തൊഴിലിടത്തിൽ അംഗീകാരം സ്വീകാര്യതയേറും.  കുടുംബകാര്യങ്ങളിൽ ഔത്സുക്യമുണ്ടാവും. പാരിതോഷികങ്ങൾ ലഭിക്കാനിടയുണ്ട്. പ്രതീക്ഷിച്ച ആദായം വന്നെത്തുന്നതാണ്. ആടയാഭരണങ്ങൾ, ഗൃഹോപകരണങ്ങൾ എന്നിവ വാങ്ങാനിടയുണ്ട്. പ്രണയികൾക്ക് ആഹ്ളാദിക്കാനാവും. വിരുന്നുകളിൽ പങ്കെടുക്കാൻ സന്ദർഭം ലഭിക്കും.

കാർത്തിക

ചെറിയ കാര്യങ്ങൾ നേടാൻ കൂടുതൽ വിയർപ്പൊഴുക്കേണ്ടി വരാം. പുതിയ തലമുറയോട് എങ്ങനെ പെരുമാറണമെന്നറിയാതെ പരിഭ്രമിക്കും. ആത്മവിശ്വാസം കുറയാം. വാഗ്ദാനലംഘനം ശത്രുക്കളെ സൃഷ്ടിക്കുന്നതാണ്. പ്രതീക്ഷിച്ച ധനം കൈവശം എത്തിയേക്കില്ല. ബുധനാഴ്ച വരെ ഏറെക്കുറെ സ്ഥിതിയിതാവും. മറ്റു ദിവസങ്ങളിൽ മനസ്സമാധാനം ഉണ്ടാവുന്നതാണ്. സംഘടനകളിൽ അധികാരം ലഭിക്കാം. പ്രണയികൾക്ക് കാണാനും ഒത്തുചേരാനും സന്ദർഭം വരുന്നതാണ്. കുടുംബകാര്യങ്ങൾ ഭംഗിയായി നടത്താനാവും.

രോഹിണി

ആലോചിച്ചുറച്ച കാര്യങ്ങൾ ഒരുവിധം ഭംഗിയായി സാക്ഷാൽക്കരിക്കാനാവും. നക്ഷത്രാധിപനായ ചന്ദ്രന് പൂർണ്ണബലം വരുന്നതിനാൽ മനസ്സിന് തെളിച്ചം ഉണ്ടാവും. ദേഹസുഖവും പ്രതീക്ഷിക്കാം. വിദ്യാർത്ഥികൾക്ക് പരീക്ഷയ്ക്കായി നന്നായി തയ്യാറെടുക്കാൻ സാധിക്കുന്നതാണ്. കലാകാരന്മാർക്ക് ഉത്സവപരിപാടികൾക്ക് അഡ്വാൻസ് ലഭിക്കാം. ദാമ്പത്യത്തിൽ സമരസം ആവശ്യമായ ഘട്ടമാണെന്നത് ഓർമ്മയിലുണ്ടാവണം. മാസം തോറും അടയ്ക്കേണ്ട വായ്പകൾ മുടങ്ങില്ല. അയൽ തർക്കങ്ങൾക്ക് രമ്യമായ പരിഹാരം ഉണ്ടാവുന്നതാണ്. ബുധനും വ്യാഴനും ശുഭകാര്യങ്ങൾ തുടങ്ങരുത്.

മകയിരം

പരാശ്രയത്വം വേണ്ടി വരാം. കൂടിയാലോചനകളിൽ സഹപ്രവർത്തകരുടെ എതിർപ്പ് നേരിടേണ്ടി വന്നേക്കും. മനസ്സമാധാനം കുറയാനിടയുണ്ട്. നാലിൽ കേതു/ ചൊവ്വ സഞ്ചരിക്കുന്നതിനാൽ ഗൃഹനിർമ്മാണത്തിൽ തടസ്സങ്ങളേർപ്പെടാം. സ്വകാര്യ സ്ഥാപനത്തിൽ ജോലിചെയ്യുന്നവർ ശമ്പള വർദ്ധനവ് പ്രതീക്ഷിക്കുന്നതാണ്. കരാർ പണിയിൽ കിട്ടേണ്ട കുടിശിക തുക കിട്ടാനിടയുണ്ട്. നിക്ഷേപങ്ങൾ പുതുക്കിയേക്കും. ബന്ധുക്കളുടെ സഹായം സ്വീകരിക്കുന്നതാണ്. കൂട്ടരുമൊത്ത് തീർത്ഥാടനത്തിന് പോവും. ഞായർ, തിങ്കൾ, വെള്ളി കൂടുതൽ അനുകൂല ദിനങ്ങൾ.

തിരുവാതിര

പ്രവർത്തനരംഗത്ത് ശുഷ്കാന്തിയുണ്ടാവും. സമയോചിതമായ തീരുമാനങ്ങൾ കൈക്കൊള്ളുന്നതാണ്. സഹപ്രവർത്തകരുടെ നിർദ്ദേശങ്ങൾക്ക് വില കല്പിക്കും. ധനപരമായി സംതൃപ്തി തോന്നും. കച്ചവടത്തിൽ ഉണർവ്വ് അനുഭവപ്പെടുന്നതാണ്. പ്രണയികൾക്ക് പിണക്കം മറന്ന് വീണ്ടും ഒരുമിക്കാനാവും. വീടുമാറ്റം സംബന്ധിച്ച് കുടുംബാംഗങ്ങൾ അനുകൂലിച്ചെന്ന് വന്നേക്കില്ല. വസ്തുക്കച്ചവടത്തിൽ പ്രതീക്ഷിച്ചത്രതന്നെ ലാഭം കിട്ടുന്നതാണ്. ഒന്നിച്ചുപഠിച്ചവർ ഒരുമിച്ച് ഗുരുനാഥനെ കാണാനായി പോവും. താത്കാലിക കോഴ്സുകളിൽ ചേരുവാനയേക്കും. ചെലവിൽ ധൂർത്ത് കടന്നുവരാനിടയുണ്ട്.

പുണർതം

പ്രവർത്തന മികവ് മേലധികാരികളാൽ അഭിനന്ദിക്കപ്പെടും. പല ചോദ്യങ്ങൾക്കും ഉത്തരം കണ്ടെത്തും. സമയോചിതമായ തീരുമാനങ്ങൾ കൈക്കൊള്ളുന്നതാണ്. ചുമതലകൾ പകരക്കാരെ ഏൽപ്പിക്കുന്നത് ഗുണകരമാവില്ല. നിക്ഷേപങ്ങളിൽ നിന്നും ധനാഗമമുണ്ടാവും. ഗൃഹകാര്യങ്ങൾക്ക് സമയം കണ്ടെത്താൻ കഴിഞ്ഞേക്കില്ല. ആയതിനാൽ പരാതി ഉയരുന്നതാണ്. വീട്/വാഹനം ഇവയുടെ മെയിൻ്റനൻസ് ചെലവ് കൂടിയേക്കും. മകൻ്റെ ശ്രേയസ്സിൽ സന്തോഷമുണ്ടാവും. വെള്ളി, ശനി ദിവസങ്ങളിൽ ജാഗ്രതയുണ്ടാവണം.

പൂയം

പലതും ചിന്തിച്ചു കൊണ്ടിരിക്കും. പ്രവർത്തനോത്സുകത കുറയാം. തുടങ്ങിയ കാര്യങ്ങൾ തടസ്സപ്പെട്ടതിൽ ഉൽക്കണ്ഠയുണ്ടാവാം. ജന്മത്തിൽ ആദിത്യൻ ഉള്ളതിനാൽ വിലപിടിച്ച വസ്തുക്കൾ നഷ്ടപ്പെടാതിരിക്കാൻ ജാഗ്രതയുണ്ടാവണം. സുഹൃത്തുക്കൾക്കായി ജാമ്യം നിൽക്കാൻ നിർബന്ധിക്കപ്പെടും.  വിദ്യാർത്ഥികളുടെ പഠന കാര്യത്തിൽ മാതാപിതാക്കൾ ശ്രദ്ധ ചെലുത്തേണ്ടതുണ്ട്. ബന്ധുക്കളുടെ കാര്യത്തിൽ ഇടപെടുന്നത് കരുതലോടെ വേണം. ജോലി ചെയ്യുന്ന സ്വകാര്യ സ്ഥാപനത്തിൽ ജോലിക്കയറ്റത്തിന് അപേക്ഷ നൽകുന്നതാണ്.

ആയില്യം

വാരാദ്യദിവസങ്ങൾക്ക് മേന്മ കുറയുന്നതാണ്. എല്ലാക്കാര്യത്തിലും അസംതൃപ്തിയുണ്ടാവും. അധികാരികളെ ഉപദേശിച്ച് കുഴപ്പത്തിൽ ചാടാനിടയുള്ളതിനാൽ 'മൗനം വിദ്വാന് ഭൂഷണം' എന്ന ചൊല്ല് പിന്തുടരണം. പ്രതീക്ഷിച്ച ധനം കൈവശമെത്തില്ല.  ബുധൻ മുതൽ മനസ്സന്തോഷം ഭവിക്കുന്നതാണ്. തടസ്സപ്പെട്ട കെട്ടിട നിർമ്മാണം പുനരാരംഭിക്കാൻ കഴിഞ്ഞേക്കും. ധനക്ലേശം നീങ്ങും. കമിതാക്കൾക്ക് പരസ്പരം കാണാൻ സൗകര്യമുണ്ടാവും. മെഡിക്കൽ ചെക്കപ്പിൻ്റെ ഫലത്തിൽ ആശങ്കപ്പെടേണ്ടതായി ഒന്നുമില്ലെന്നറിയും. ദാമ്പത്യ ജീവിതത്തിൽ സംതൃപ്തി പ്രതീക്ഷിക്കാം.

Also Read: കർക്കടക മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ

മകം

സ്വതന്ത്രമായി പ്രവർത്തിക്കാൻ സാധിക്കുന്നതാണ്. സ്വന്തം സ്ഥാപനത്തിൽ പുതിയ ജോലിക്കാരെ നിയമിച്ച് വിപുലീകരണം സാധ്യമാക്കും. മത്സരാധിഷ്ഠിത കരാറുകൾക്ക് നിരതദ്രവ്യം കെട്ടിവെക്കുന്നതാണ്. രണ്ടാം ഭാവത്തിൽ ചൊവ്വയുള്ളതിനാൽ ഇ.എൻ.ടി വിഭാഗത്തിൽ പെടുന്ന രോഗങ്ങൾ ആക്രമിക്കാം. ചിലരോട് അറുത്തുമുറിച്ച് സംസാരിക്കേണ്ടതായി വന്നേക്കും.  ധനപരമായി സംതൃപ്തിയുണ്ടാവും. നവീനമായിട്ടുള്ള ഗൃഹോപകരണങ്ങൾ വാങ്ങുന്നതാണ്. വിദ്യാർത്ഥികളുടെ പഠനകാര്യത്തിൽ രക്ഷിതാക്കളുടെ മേൽനോട്ടമുണാവണം.

പൂരം

കാര്യകുശലത അഭിനന്ദിക്കപ്പെടും. തൊഴിൽപരമായി അലച്ചിലുണ്ടായേക്കും. സംരംഭകർക്ക് സർക്കാർ അനുമതിക്കായി പരിശ്രമം തുടരേണ്ടി വരുന്നതാണ്.   പാർട്ണർഷിപ്പ് ബിസിനസ്സിൽ കുടുംബത്തിൽ നിന്നുമുള്ളവരെക്കൂടി ഉൾപ്പെടുത്തും. തൊഴിൽ നിയമങ്ങൾ വ്യക്തമായി മനസ്സിലാക്കാൻ ശ്രമിച്ചേക്കും. ഗാർഹിക ചുമതലകൾ വേണ്ടത്ര ശ്രദ്ധിക്കാൻ കഴിഞ്ഞേക്കില്ല. വാക്കുകൾ ശത്രുക്കളെ സൃഷ്ടിക്കാം. കമിതാവിന് 'സർപ്രൈസ് ഗിഫ്റ്റുകൾ' നൽകുന്നതാണ്.
ബുധനാഴ്ച തൊട്ട് കൂടുതൽ ഗുണമുണ്ടാവും.

ഉത്രം

കൂടുതൽ ചിന്തിക്കും. ചിന്ത കാടുകയറാനുമിടയുണ്ട്. സമയോചിതമായ പ്രവർത്തിയിൽ നിന്നും ഒഴിയാനാവില്ല. സുഹൃത്തുക്കളുടെ ഉപദേശം കണ്ണടച്ച് വിശ്വസിക്കരുത്. സർക്കാർ കാര്യങ്ങൾക്കായി സമയം ചെലവഴിക്കേണ്ടി വന്നേക്കും. ക്ഷേത്രാടനയോഗമുണ്ട്. ആത്മീയ കാര്യങ്ങൾക്ക് സമയം കണ്ടെത്തും. വരവുചെലവുകൾ എഴുതി സൂക്ഷിക്കുന്ന ശീലം തുടങ്ങും. പണവരവ് കൂടില്ല; കുറയുകയുമില്ല. മകൾക്ക് വാഹനം വാങ്ങിക്കൊടുക്കുന്ന കാര്യം സജീവ പരിഗണനയിലാവും. ആരോഗ്യപരിശോധനകളിൽ അലംഭാവമരുത്.

അത്തം

പ്രവർത്തനവേഗം കുറയുന്നതായി തോന്നും. എന്നാൽ ജോലിഭാരം കുറയില്ല. സദുദ്ദേശത്തോടെ ചെയ്യുന്ന കാര്യങ്ങൾ ആവിധം മനസ്സിലാക്കപ്പെടണം എന്നില്ല.  വ്യാപാരികൾ കിടമത്സരം കാരണം വലയും. തിടുക്കം ഉപേക്ഷിക്കണം. മത്സരങ്ങൾക്ക് വേണ്ടവിധം തയ്യാറെടുക്കാനാവും. കാര്യാലോചനകളിൽ കണിശത പാലിക്കും. മകന് നവീന ഇലക്ട്രോണിക് ഉല്പന്നങ്ങൾ വാങ്ങി നൽകുന്നതാണ്. ബന്ധങ്ങൾ ദൃഢമാവാൻ ക്ലേശിച്ചേക്കും. ദാമ്പത്യത്തിലെ അപസ്വരങ്ങൾ പരിഹരിക്കാൻ പിടിവാശി തടസ്സമായേക്കും. മിതവ്യയശീലം പാളുന്നതാണ്.

ചിത്തിര

പിടിവാശികൾ ഉപേക്ഷിക്കാൻ തയ്യാറായേക്കില്ല. തന്മൂലം ഗാർഹിക രംഗത്ത് അലോസരങ്ങൾ ഉയരാം. ധീരമായ തീരുമാനങ്ങൾ കൈക്കൊള്ളുന്നതാണ്. പുതിയ സാങ്കേതിക വിഷയങ്ങൾ ഉൾക്കൊള്ളാൻ ശ്രമമാരംഭിക്കും. കൂട്ടുകച്ചവടത്തിൽ നിന്നും ലാഭമുണ്ടാവും. പ്രൈവറ്റ് സ്ഥാപനത്തിലെ ജോലിയിൽ തൃപ്തി കുറയുന്നതാണ്. പക്ഷേ ജോലി ഉപേക്ഷിച്ചാൽ പുതിയത് ഉടനേ കിട്ടിയേക്കില്ല.  നാട്ടിലുള്ള മാതാപിതാക്കളെ ജോലിസ്ഥലത്ത് കൊണ്ടുവരാനാലോചിക്കുന്നതാണ്. ഞായർ, തിങ്കൾ, വ്യാഴം, ശനി ദിവസങ്ങൾക്ക് മെച്ചം കൂടുതലായിരിക്കും.

ചോതി

ചില കാര്യങ്ങൾ പ്രതീക്ഷിച്ച പോലെ വന്നുഭവിക്കും. ആദരണീയരുടെ പിന്തുണ ലഭിക്കും. എല്ലാ വിവരങ്ങളും ഉൾപ്പെടുത്തിക്കൊണ്ട് ജോലിക്ക് അപേക്ഷിക്കാനാവും. കച്ചവടത്തിൽ കൂടുതൽ ഏകാഗ്രതയുണ്ടാവേണ്ടതുണ്ട്. ഉത്സവക്കാലത്തെ ആവശ്യങ്ങളെക്കുറിച്ച് ആലോചിക്കേണ്ട സന്ദർഭമാണിത്. തടസ്സങ്ങളിൽ സംഭ്രമമരുത്. വീണ്ടും തുടരാനാണ് ശ്രമം വേണ്ടത്. കരാർ ഏറ്റെടുക്കുമ്പോൾ വ്യവസ്ഥകൾ മനസ്സിലാക്കാൻ മറക്കരുത്. അനുരഞ്ജനം ഗാർഹസ്ഥ്യത്തെ മധുരമാക്കും. ഗ്രന്ഥകാരന്മാർക്ക് സ്വച്ഛന്ദമായി എഴുത്തിൽ ഏർപ്പെടാനാവും.

വിശാഖം

പലകാര്യങ്ങളിൽ ശ്രദ്ധയുണ്ടാവും. വിദ്യാഭ്യാസ രംഗത്തെ പ്രവർത്തനങ്ങൾ അംഗീകരിക്കപ്പെടും. പുതുസൗഹൃദങ്ങളുണ്ടാവുന്നതാണ്. ജോലി തേടുന്നവർക്ക് താത്കാലിക ജോലി ലഭിക്കാം. സാമൂഹിക പ്രവർത്തനങ്ങളിൽ നൈതികതയും ന്യായവും പുലർത്താൻ ശ്രമിക്കുന്നതാണ്.  കുടുംബകാര്യങ്ങളിൽ ഏകോപനം കുറയുന്നത് കലഹത്തിനിടവരുത്തും. ദാമ്പത്യത്തിലെ പൊരുത്തക്കേടുകൾ പരിഹരിക്കാൻ ശ്രമം തുടരുന്നതാണ്. ലളിതജീവിതം നയിക്കുവാനാഗ്രഹിക്കും. മിക്കവാറും  സ്വപ്നമായിത്തന്നെ തുടരും. ഉദ്യോഗസ്ഥർ മേലധികാരികളുടെ പ്രീതി നേടും.

അനിഴം
 
പല കാര്യങ്ങളിലും തീരുമാനം കൈക്കൊള്ളാനാകാതെ കുഴയും.  കർമ്മരംഗത്തും പുഷ്ടിക്കുറവ് അനുഭവപ്പെടുന്നതാണ്. ബന്ധുക്കളുടെ വാക്കുകൾ അനിഷ്ടകാരിയാവും. ആഴ്ചയുടെ തുടക്കത്തിൽ വിരുന്നൂണ്, സുഖഭോഗം എന്നിവ പ്രതീക്ഷിക്കാം. പാരിതോഷികങ്ങൾ കിട്ടുക / നൽകുക ഇവയും സാധ്യത. ചൊവ്വയും ബുധനും വ്യാഴവും അലച്ചിലുണ്ടാവും. പല കാര്യങ്ങൾക്കായി ഓടിനടക്കേണ്ടി വരും. സ്വയം തൊഴിലിൽ നിന്നും വരുമാനം ഉണ്ടാവുന്നതാണ്. വെള്ളി, ശനി ദിവസങ്ങളിൽ സഹജസിദ്ധികൾ ഉണർന്നു പ്രവർത്തിക്കും.

തൃക്കേട്ട

പുതിയ കരാറുകൾ നേടാനായി പരിശ്രമിക്കും. ഉന്നത സ്ഥാനത്തുള്ളവരുടെ പരിചയം സമ്പാദിക്കും. സുഹൃൽ സമാഗമം സന്തോഷമേകും. ധനപരമായ സമ്മർദങ്ങളുണ്ടാവില്ല. : കുടുംബസുഖം സമ്മിശ്രമായിരിക്കും. മകൻ്റെ ശാഠ്യശീലം മനക്ലേശമുണ്ടാക്കാം. കലാകാരന്മാരെ അവസരങ്ങൾ തേടി വരുന്നതാണ്. പരീക്ഷാദികൾക്കുള്ള തയ്യാറെടുപ്പ് അഭംഗുരമാവും. ഭൂമിയിടപാടുകൾക്ക് കാത്തിരിപ്പ് ആവശ്യമാണ്. യാത്രകൾ വേണ്ടത്ര പ്രയോജനം ചെയ്യില്ല. ഓൺലൈൻ ബിസിനസ്സിന് ആവശ്യമായ ഒരുക്കം നടത്താനാവും. ഇലക്ട്രോണിക് ഉല്പന്നങ്ങൾ വാങ്ങിയേക്കും.

Also Read: ചൊവ്വ മാറുന്നു, കന്നിരാശിയിലേക്ക്; അശ്വതി മുതൽ രേവതി വരെ

മൂലം

കാര്യനിർവഹണം സുഗമമായിത്തീരും.  ഏകോപനത്തിലെ മിടുക്കും മികവും അഭിനന്ദിക്കപ്പെടുന്നതാണ്. സഹപ്രവർത്തകരെ ചുമതലകളിൽ സഹായിക്കാൻ സന്നദ്ധരാവുന്നതാണ്. അതിഥിയാവാനും ആതിഥേയനാവാനും അവസരം വരും. പുതിയ കാര്യങ്ങളെ പ്രോൽസാഹിപ്പിക്കും. പാരിതോഷികങ്ങൾ ലഭിക്കുന്നതാണ്. നിക്ഷേപങ്ങൾ വിദഗ്ദ്ധോപദേശ പ്രകാരം ചെയ്യണം. പാർട്ണർഷിപ്പ് ബിസിനസ്സിൽ വളർച്ചയുണ്ടാവും. പ്രണയശൈഥില്യത്തെ അതിജീവിക്കുവാൻ സാധിക്കുന്നതാണ്. പ്രവാസികൾക്ക് നാട്ടിൽ നിന്നും ശുഭവാർത്ത കേൾക്കാൻ കഴിയും.

പൂരാടം

സാങ്കേതികമായ വൈദഗ്ദ്ധ്യം ഉള്ളവർക്ക് കൂടുതൽ അവസരങ്ങളുണ്ടാവും. ഉദ്യോഗത്തിൽ നിന്നും വിരമിച്ചവർക്ക് സൗകര്യപ്രദമായ തൊഴിൽ കൈവരും. സമാജങ്ങൾ / സംഘടനകൾ ഇവയിൽ പ്രവർത്തിക്കുന്നവർക്ക് ജോലിഭാരമേറുന്നതാണ്. ഉദ്യോഗസ്ഥർക്ക് അധികച്ചുമതലകൾ ഏറ്റെടുക്കേണ്ടിവരും. പഠനത്തിൽ അലസത അനുഭവപ്പെടുന്നതാണ്. കടം കൊടുത്ത പണം ഭാഗികമായി തിരികെ കിട്ടാം. പൊതുപ്രവർത്തനം പുഷ്പമെത്തയല്ലെന്ന് മനസ്സിലാക്കും. ഉപാസനകൾക്ക് നേരം കണ്ടെത്തുന്നതാണ്. വാരാദ്യത്തിന് മെച്ചം കുറയും. ചൊവ്വയും ബുധനും ഗുണപ്രദങ്ങൾ'

ഉത്രാടം

തൊഴിൽപരമായ ആശങ്കകൾക്ക് അവസാനമാകും. ഉന്മേഷഭാവം പ്രവർത്തനത്തെ സക്രിയമാക്കും. ഭൂമി വ്യാപാരത്തിൽ ലാഭമുണ്ടാവുന്നതാണ്. പണം മുൻകൂർ നൽകി ചെയ്യുന്ന ഏർപ്പാടുകളിൽ മിതത്വം വരുത്തണം. ഉന്നതസ്ഥാനീയരുടെ പിന്തുണ പ്രതീക്ഷിച്ചത്ര ഉണ്ടായേക്കില്ല. കുടുംബകാര്യങ്ങളിൽ ശ്രദ്ധ കുറയരുത്. കലഹങ്ങൾക്ക് തീർപ്പുണ്ടാവുന്നതാണ്. വാരാദ്യം സാമ്പത്തിക ഗുണം പ്രതീക്ഷിക്കാം. സുഖഭക്ഷണം, വിനോദം, വിശ്രമം ഇവ ഭവിക്കുന്നതാണ്. കൈവായ്പകൾ മടക്കിക്കിട്ടും. വാരമധ്യത്തിൽ ചെലവു കൂടുന്നതാണ്. അലച്ചിലുണ്ടാവും.

തിരുവോണം

കർമ്മമേഖലയിൽ തൃപ്തിക്കുറവുണ്ടാവും. ചെയ്തുപോരുന്ന തൊഴിൽ ഉപേക്ഷിച്ചാലോ എന്നാലോചിക്കും. എന്നാൽ സാഹസങ്ങൾ ഇപ്പോൾ പരാജയപ്പെടാം.  അതിനാൽ സുപ്രധാന തീരുമാനങ്ങൾ കൈക്കൊള്ളരുത്. ബന്ധുകലഹം തീർക്കാൻ മുഖ്യപങ്ക്  വഹിക്കുന്നതാണ്. സുഹൃത്തുക്കളുടെ നിർദ്ദേശങ്ങൾ സ്വീകാര്യമാവും. വിരുന്നിൽ പങ്കെടുക്കുന്നതാണ്. വാരാന്ത്യത്തിൽ സാമ്പത്തികാശ്വാസം വന്നെത്തും. കുടുംബത്തിൻ്റെ പിന്തുണ കരുത്താകും. ദൈവാനുകൂല്യം തനിക്കുണ്ടെന്ന് വിശ്വസിക്കും.

അവിട്ടം

കുംഭക്കൂറുകാർക്ക് കൂടുതൽ പ്രവർത്തിക്കേണ്ടി വരുന്ന വാരമാണ്. ആത്മവിശ്വാസത്തോടെ കർമ്മരംഗത്ത് തുടരാൻ കഴിയും. സർക്കാരിൽ നിന്നും ലൈസൻസ്/ രേഖകൾ  ലഭിക്കാം. മേലധികാരി പ്രീതിപ്പെടും. എന്നാൽ ദാമ്പത്യത്തിൽ സ്വൈരക്കേടുണ്ടാവും. തീരുമാനങ്ങളിൽ അനൈക്യം പ്രകടമാവുന്നതാണ്. മകരക്കൂറുകാർക്ക് കിട്ടാക്കടങ്ങൾ കിട്ടുവാൻ വഴിതെളിയും. ജോലിഭാരം കുറയാനിടയില്ല. ബന്ധുവിനെ സഹായിക്കും. വാണിജ്യ മേഖലയിൽ പ്രവേശിക്കുന്ന കാര്യത്തിൽ തീരുമാനം തിടുക്കപ്പെട്ട് കൈക്കൊള്ളാതിരിക്കുക നല്ലത്. പ്രണയത്തിൽ ഗ്ലാനി ഭവിക്കും.

ചതയം

ഉദ്യോഗസ്ഥർക്ക് ഗുണമുള്ള കാലമാണ്. സഹപ്രവർത്തകർക്കിടയിൽ സ്വാധീനം വർദ്ധിക്കും. നിർദ്ദേശങ്ങൾ സ്വീകാര്യമാവും. ന്യായമായ ആവശ്യങ്ങൾ നിറവേറ്റപ്പെടുന്നതാണ്. സദ്ചിന്താഗതി വളരുവാൻ സാഹചര്യമൊരുങ്ങും. പൊതുക്കാര്യങ്ങളിൽ ഇടപെടാനിടയുണ്ടാവും. ചെറുപ്പക്കാരുടെ വാക്കുകൾ അംഗീകരിക്കുന്നതാണ്. ചെറുയാത്രകൾ ആവശ്യമാവും. ജാമ്യം നിൽക്കുമ്പോൾ ജാഗ്രത കൈവിടരുത്. ജീവിതശൈലീ രോഗങ്ങളെ നിയന്ത്രിക്കാൻ കഴിയും. പ്രണയികൾക്കിടയിൽ തെറ്റിദ്ധാരണ ഉണ്ടാവാൻ സാധ്യത കാണുന്നു.

പൂരൂരുട്ടാതി

പല കാര്യങ്ങളിലും അനാവശ്യമായ തിടുക്കം കാണിക്കുന്നത് ദോഷകരമാവും. മിഥ്യാധാരണകൾ വരാം. പ്രൈവറ്റ് സ്ഥാപനത്തിലെ ജോലിയിൽ മടുപ്പുണ്ടായേക്കും. രാഹു ജന്മനക്ഷത്രത്തിൽ സഞ്ചരിക്കുന്നതിനാൽ എല്ലാക്കാര്യത്തിലും ജാഗ്രതയുണ്ടാവേണ്ട സന്ദർഭമാണ്. ചന്ദ്രസഞ്ചാരം അനുകൂലമായതിനാൽ കുറച്ചൊക്കെ മനസ്സുഖമുണ്ടാവും. ബന്ധുസമാഗമം സന്തോഷമേകുന്നതാണ്. സാമ്പത്തിക സ്വസ്ഥത ഭവിക്കും. വായ്പ ഗഡു സമയബന്ധിതമായി അടച്ചുതീർക്കാൻ സാധിക്കും. അനുരഞ്ജനത്തിൻ്റെ പാത സ്വീകരിക്കുന്നത് ദാമ്പത്യ സ്വസ്ഥതയ്ക്ക് കാരണമാകും.

ഉത്രട്ടാതി

അഷ്ടമരാശിക്കൂറ് കഴിയുന്നതിനാൽ തടസ്സങ്ങളകലും. പുതിയ ദൗത്യങ്ങൾ സധൈര്യം ഏറ്റെടുക്കുന്നതാണ്. മത്സരങ്ങളിൽ / അഭിമുഖങ്ങളിൽ ആത്മവിശ്വാസത്തോടെ പങ്കെടുക്കുവാൻ കഴിഞ്ഞേക്കും. കുടുംബ ജീവിതത്തിൽ ചില അലോസരങ്ങൾ വരാനിടയുണ്ട്. വാക്കുകൾ പരുഷങ്ങളാവാതിരിക്കാൻ ശ്രദ്ധിക്കണം. പ്രവാസികളെ തേടി നാട്ടിൽ നിന്നും ശുഭവാർത്തയെത്തും. വീടുപണി ഏതാണ്ട് അവസാന ഘട്ടത്തിലെത്താം. ശത്രുക്കളുടെ പ്രവർത്തനങ്ങൾ മുൻകൂട്ടി മനസ്സിലാക്കും. വ്യഥാസഞ്ചാരത്തിനും ഫലശൂന്യതയും സാധ്യതയാണ്.

രേവതി

ആർജ്ജവശീലം കൊണ്ട് സ്നേഹിതരുടെ വിശ്വാസമാർജ്ജിക്കും. പ്രൈവറ്റ് ജോലിയിൽ സാമാന്യം തൃപ്തി തോന്നും. ഏജൻസി ഏർപ്പാടുകൾ വിപുലീകരിക്കാൻ ശ്രമം നടത്തിയേക്കും. വിദ്യാർത്ഥികൾക്ക് ഏകാഗ്രത പുലർത്താൻ കഴിയും. ഭൂമിയെ സംബന്ധിച്ച വ്യവഹാരം കോടതിക്ക് പുറത്ത് ഒത്തുതീർക്കാൻ ധാരണയാവും. ഊഹക്കച്ചവടത്തിൽ നിന്നും നാമമാത്രമായ ആദായം കൈവരും. ഏഴാം ഭാവത്തിൽ ചൊവ്വയുള്ളതിനാൽ അനുരാഗത്തിൽ തടസ്സങ്ങൾ വന്നേക്കാം. ഉത്സവാഘോഷങ്ങൾക്കായി വസ്ത്രാഭരണങ്ങൾ വാങ്ങാൻ കുടുംബത്തോടൊപ്പം സമയം ചിലവഴിക്കുന്നതാണ്.

Read More: നിങ്ങളുടെ ജീവിതപങ്കാളി എങ്ങനെയുള്ള ആളാവും?