scorecardresearch
Latest News

കൊല്ലവർഷം 1197 കർക്കടകമാസത്തിലെ സമ്പൂർണ നക്ഷത്രഫലം

Astrology Monthly Prediction Karkidakam 2022:

കൊല്ലവർഷം 1197 കർക്കടകമാസത്തിലെ സമ്പൂർണ നക്ഷത്രഫലം
Astrology Monthly Prediction Karkidakam 2022:

Astrology Monthly Prediction Karkidakam 2022: കൊല്ല വർഷം അനുസരിച്ച് അവസാനമാസമാണ് കർക്കടകം. ‘ആണ്ടറുതി മാസം ‘ എന്നാണ് കർക്കടകം അറിയപ്പെടുന്നത്. തൊട്ടടുത്ത ചിങ്ങമാസം തുടങ്ങുന്നതോടെ 1198 എന്ന പുതുവർഷം പിറക്കുകയായി.

ശനി മകരത്തിലും വ്യാഴം മീനത്തിലും രാഹുകേതുക്കൾ യഥാക്രമം മേടം- തുലാം എന്നീ രാശികളിലും തുടരുകയാണ്. മാസമധ്യം വരെ ബുധൻ കർക്കടകത്തിലും തുടർന്ന് ചിങ്ങത്തിലും സഞ്ചരിക്കുന്നു. കർക്കടകം 25 ന് ചൊവ്വ മേടത്തിൽ നിന്നും ഇടവത്തിലോട്ട് പകരുന്നു. 21 ന് മിഥുനത്തിൽ നിന്നും ശുക്രൻ കർക്കടകത്തിലേക്കും സംക്രമിക്കുന്നു. ഒന്നാംതീയതി ചന്ദ്രൻ ചതയത്തിൽ; ഒരു വട്ടം ഭ്രമണം പൂർത്തിയാക്കി മാസാന്ത്യത്തിൽ രേവതിയിൽ സഞ്ചരിക്കുന്നു. സൂര്യൻ ഏതു രാശിയിലൂടെയാണോ കടന്നുപോവുന്നത് ആ രാശിയുടെ പേരാവും ആ മാസത്തിന്!

അശ്വതി മുതൽ രേവതി വരെയുളള 27 നാളുകാരുടെ കർക്കടക മാസഫലം നോക്കാം.

Aswathy Nakshathra Star Predictions in Malayalam: അശ്വതി നക്ഷത്രം

സാമ്പത്തികസ്ഥിതി ഒട്ടൊക്കെ ഭദ്രമായിരിക്കും. നല്ലകാര്യങ്ങൾക്ക് ചെലവേറുമെന്ന് കാണുന്നു. ഉപരിപഠനത്തിന് വിദേശയാത്ര വേണ്ടിവരാം. ചിലരോട് പരുഷമായി പറയേണ്ട സാഹചര്യം ഉദയം ചെയ്യും. മുഖരോഗങ്ങൾ, നേത്രരോഗങ്ങൾ എന്നിവയ്ക്ക് സാധ്യതയുണ്ട്. ബന്ധുസഹായം പ്രതീക്ഷിച്ചത്ര ലഭിച്ചെന്ന് വരില്ല.

Bharani Nakshathra Star Predictions in Malayalam: ഭരണി നക്ഷത്രം

ഏഴിലെ കേതുസ്ഥിതി മൂലം ദാമ്പത്യരംഗം ഒട്ടൊക്കെ അശാന്തമായിരിക്കും. പ്രണയികൾ പിണക്കത്തിന്റെ പാത തേടും. ഊഹക്കച്ചവടം വിജയിക്കും. തറവാട്ട് സ്വത്തിന്മേൽ അർഹതയുള്ള വിഹിതം വന്നുചേരും. കഫരോഗങ്ങൾ ശല്യം ചെയ്തേക്കാം. മാതൃസൗഖ്യം കുറയാനിടയുണ്ട്.

Karthika Nakshathra Star Predictions in Malayalam: കാര്‍ത്തിക നക്ഷത്രം

കൃത്യനിർവഹണത്തിൽ പ്രശംസ നേടും. ആശിച്ചവിധം ഉപരിപഠനം നടത്താൻ അവസരം ലഭിക്കും. തൊഴിൽ തേടുന്നവർക്ക് ചെറിയജോലിയെങ്കിലുംപ്രതീക്ഷിക്കാം. ഗൃഹത്തിൽ അനൈക്യം തലപൊക്കാനിടയുണ്ട്. പൊതുരംഗത്ത് പ്രവർത്തിക്കുന്നവർക്ക് പ്രതിസന്ധികളെ അഭിമുഖീകരിക്കേണ്ടിവരും. ആരോഗ്യ പരിശോധനകളിൽ അലസത അരുത്.

Rohini Nakshathra Star Predictions in Malayalam: രോഹിണി നക്ഷത്രം

യാത്രകൾക്ക് കാലം അനുകൂലമല്ല. യന്ത്രവാഹനാദികൾ ഏറ്റവും കരുതലോടെ കൈകാര്യം ചെയ്യണം. വാക്ക് പാലിക്കാൻ ക്ലേശിക്കും. ധനസ്ഥിതി മെച്ചപ്പെടും. തൊഴിൽരംഗത്ത് ആധിപത്യം ഉറപ്പിക്കാൻ കുറുക്കുവഴികൾ തേടിയേക്കും. മക്കളുടെ നാനാവിധമായ ശ്രേയസ്സ് സന്തോഷമേകുന്നതായിരിക്കും.

Makayiram Nakshathra Star Predictions in Malayalam: മകയിരം നക്ഷത്രം

ശത്രുക്കളുടെ പ്രവർത്തനത്തെ സമർത്ഥമായി പ്രതിരോധിക്കും. വസ്തു / ഭൂമി ഇടപാടുകളിൽ കാലതാമസം ഭവിക്കും. ഉന്നത വ്യക്തികളുടെ പിന്തുണ കരുത്തേകും. വൈദ്യപരിശോധനകളിൽ അമാന്തം അരുത്. വിദേശയാത്രക്ക് കിണഞ്ഞ് പരിശ്രമിക്കും. സാമ്പത്തികരംഗം സമ്മിശ്രമായിരിക്കും.

Thiruvathira Nakshathra Star Predictions in Malayalam: തിരുവാതിര നക്ഷത്രം

പുതുസംരംഭങ്ങളുമായി മുന്നോട്ട് പോകും. സഭകളിലും സമാജങ്ങളിലും നല്ലവാക്കുകൾ പറഞ്ഞ് കൈയ്യടി നേടും. സർക്കാരിൽ നിന്നും പ്രതീക്ഷിക്കുന്ന ആനുകൂല്യത്തിന് കുറച്ചുകാലം കൂടി കാത്തിരിക്കേണ്ടതായി വരും. പാഴ്ച്ചെലവുകളാൽ വിഷമിക്കും. കുടുംബസ്വത്ത് ക്രയവിക്രയം ചെയ്യാൻ തീരുമാനിക്കും. ആരോഗ്യപരമായി മെയ്യമുള്ള കാലമാണ്.

Punartham Nakshathra Star Predictions in Malayalam: പുണര്‍തം നക്ഷത്രം

കിടപ്പ് രോഗികൾക്ക് സമാശ്വാസമുണ്ടാകും. മക്കളുടെ കാര്യത്തിൽ ചില പ്രധാന തീരുമാനങ്ങൾ കൈക്കൊള്ളും. പഠനവിഷയത്തിൽ പുരോഗതിയുണ്ടാകും. ദാമ്പത്യം സുഖോഷ്മളമായി തുടരും. കരാർപണിക്കാർക്ക് പുതിയ കരാറുകൾ ലഭിക്കാൻ സാധ്യത കാണുന്നു. വായ്പ, ചിട്ടി മുതലായവയിൽ നിന്നും ധനാനുകൂല്യം പ്രതീക്ഷിക്കാം.

Pooyam Nakshathra Star Predictions in Malayalam: പൂയം നക്ഷത്രം

ശനിയുടെ ഏഴിലെ സ്ഥിതിയാൽ വീണ്ടും ‘കണ്ടക ശനി’ വന്നിരിക്കുകയാണ്. പ്രണയത്തിൽ, ദാമ്പത്യത്തിൽ പുതുവെല്ലുവിളികൾ ഉദിക്കാം. കൂട്ടുകച്ചവടം പ്രശ്നത്തിലാവാം. ലക്ഷ്യത്തിലെത്താൻ കുറുക്കുവഴികൾ ദുഷ്പ്രേരണയാകും. ആശിച്ച വിഷയത്തിൽ പഠനം തുടരാൻ കഴിയുമോ എന്ന ആശങ്കയുണ്ടാകും. വിദേശയാത്ര തരപ്പെട്ടാലും ഉദ്ദേശിച്ച തൊഴിൽ ലഭിച്ചുകൊള്ളണമെന്നില്ല. ധനപരമായി അല്പം ഭേദപ്പെട്ട കാലമാണ്.

Ayilyam Nakshathra Star Predictions in Malayalam: ആയില്യം നക്ഷത്രം

മനോനിയന്ത്രണത്തിൽ ശ്രദ്ധ ചെലുത്തുന്നത് ഉചിതമാവും. വരവ്-ചെലവ് കണക്കുകൾ സൂക്ഷിക്കുന്നത് പ്രയോജനപ്പെടും. കുടുംബശ്രേയസ്സിനായി വിട്ടുവീഴ്ചക്കൊരുങ്ങും. വിദേശത്ത് നിന്നും ശുഭവാർത്തയെത്തും. ഗൃഹ- വാഹനാദികളുടെ അറ്റകുറ്റപ്പണികൾ വേണ്ടിവരും. സർക്കാരിൽ നിന്നും ധനമോ, അനുമതിപത്രമോ ലഭിക്കാം.

Makam Nakshathra Star Predictions in Malayalam: മകം നക്ഷത്രം

കർമ്മമേഖലയിൽ ശക്തമായ നിലപാടുകൾ കൈക്കൊള്ളും. തർക്കങ്ങളിൽ / വ്യവഹാരങ്ങളിൽ വിജയിക്കും. കടബാധ്യതകൾ തീർക്കാൻ കിണഞ്ഞ് പരിശ്രമിക്കും. കച്ചവടക്കാർക്ക് സർക്കാരിൽ നിന്നും സഹായധനം ലഭിക്കാം. കുടുംബബന്ധങ്ങൾ അത്രമേൽ ഊഷ്മളമായിക്കൊള്ളണമെന്നില്ല. വ്യാഴം മറഞ്ഞിരിക്കുന്ന കാലമാണെന്ന ബോധ്യം എപ്പോഴും ഉള്ളിലുണ്ടാവണം.

Pooram Nakshathra Star Predictions in Malayalam: പൂരം നക്ഷത്രം

സുഖാനുഭവങ്ങൾക്ക് തടസ്സം വരാം. യാത്രകൾ സഫലമാവണമെന്നില്ല. അധികാരികളുമായി തർക്കത്തിലേർപ്പെടാം. ആരോഗ്യസ്ഥിതി മോശമാവില്ല. പാഴ്ച്ചെലവുകൾ അധികരിച്ചേക്കും. സഹോദരരിൽ നിന്നും സുഹൃത്തുക്കളിൽ നിന്നും പ്രതീക്ഷിച്ച പിന്തുണ ലഭിച്ചുകൊള്ളണമെന്നില്ല.

Uthram Nakshathra Star Predictions in Malayalam: ഉത്രം നക്ഷത്രം

ദൂരദിക്കുകളിലേക്ക് പഠനയാത്രകൾ വേണ്ടിവരാം. ഗൃഹനിർമ്മാണം, വാഹനം വാങ്ങുക ഇവയ്ക്ക് ധനം കണ്ടെത്തും. ജീവിതശൈലീ രോഗങ്ങൾ കുറച്ചൊന്ന് അധികരിക്കാം. വിവാഹാർത്ഥികൾക്ക് നല്ല ആലോചനകൾ വന്നെത്തും. തൊഴിൽതേടുന്നവർക്ക് പുതിയ വരുമാനമാർഗങ്ങൾ തുറന്നുകിട്ടുന്നതായിരിക്കും. വ്യവഹാരങ്ങൾക്ക് ഇത് ഒട്ടും അനുകൂലമായ കാലമല്ല.

Atham Nakshathra Star Predictions in Malayalam: അത്തം നക്ഷത്രം

ഉദ്യോഗത്തിൽ ഉയർച്ച വരും. കച്ചവടം, കൃഷി എന്നിവയിൽ നിന്നും ആദായമുയരും. മത്സരങ്ങളിൽ വിജയിക്കും. പ്രണയബന്ധം സഫലമാകാം. പൂർവ്വികസ്വത്തിന്മേലുള്ള തർക്കം അനുകൂലമായിത്തീരും. വിദ്യാർത്ഥികൾക്ക് പാരിതോഷികങ്ങൾ ലഭിക്കും. ന്യായമായ ആവശ്യങ്ങൾ നിറവേറപ്പെടും.

Chithira Nakshathra Star Predictions in Malayalam: ചിത്തിര നക്ഷത്രം

മികച്ച പ്രവർത്തന ശൈലിയിലൂടെ മേലുദ്യോഗസ്ഥരുടെ ആദരം നേടും. കലാ-കായിക രംഗത്തുളളവർ നേട്ടങ്ങൾ കൈവരിക്കും. ശത്രുപക്ഷത്തെ പരാജയപ്പെടുത്തും. മക്കളുടെ അഭ്യുദയത്തിനായി യാത്രകൾ വേണ്ടിവരും. കിടപ്പ് രോഗികൾക്ക് ആശ്വാസമനുഭവപ്പെടും. ധനപരമായി ചില സമ്മർദ്ദങ്ങൾ വന്നുചേരാനിടയുണ്ട്.

Chothi Nakshathra Star Predictions in Malayalam: ചോതി നക്ഷത്രം

അനാവശ്യമായ വിവാദങ്ങളിൽ തലയിടും. അലച്ചിൽ മൂലം ദേഹക്ലേശം വരാം. സുഹൃത്തുക്കളുടെ ഒത്താശയോടെ പുതിയ സംരംഭങ്ങളിൽ ഏർപ്പെടും. മാതാവിന്റെ ആരോഗ്യനില തൃപ്തികരമായിരിക്കും. പഴയ വീടിന്റെ അറ്റകുറ്റപ്പണികൾ തുടങ്ങും. സജ്ജനങ്ങളുമായി പിണങ്ങാനിടയുണ്ട്.

Vishakham Nakshathra Star Predictions in Malayalam: വിശാഖം നക്ഷത്രം

സ്വയം തൊഴിലിൽ ഏർപ്പെട്ടിട്ടുള്ളവർക്ക് നേട്ടങ്ങളുണ്ടാകും. ബാങ്ക്/ സർക്കാർ/സഹകരണസ്ഥാപനം എന്നിവയിൽ നിന്നും വായ്പ ലഭിക്കാം. ഗൃഹസമാധാനം നിലനിർത്താൻ ക്ലേശിക്കും. വിവാഹാർത്ഥികൾക്ക് ഇനിയും കാത്തിരിക്കേണ്ടി വരാം. ആരോഗ്യ പരിശോധനകൾ മുടക്കരുത്. വാഹനം, യന്ത്രം എന്നിവ ഏറെ കരുതലോടെ കൈകാര്യം ചെയ്യണം.

Anizham Nakshathra Star Predictions in Malayalam: അനിഴം നക്ഷത്രം

ആത്മവിശ്വാസം വർദ്ധിക്കും. തൊഴിലിൽ ഉയർച്ച വരും. പിതാവിന് കാലം അനുകൂലമല്ല. സൽകർമ്മങ്ങൾക്ക് മുന്നിട്ടിറങ്ങി സൽപ്പേരുണ്ടാക്കും. വിദേശത്തുനിന്നും ശുഭവാർത്ത വന്നുചേരുന്നതായിരിക്കും. കുടുംബഭദ്രത പ്രതീക്ഷിക്കാം. സന്താനങ്ങൾ മത്സരങ്ങളിൽ വിജയിക്കും.

Thrikketta Nakshathra Star Predictions in Malayalam: തൃക്കേട്ട നക്ഷത്രം

സിനിമ, നാടകം, സാഹിത്യം, മാധ്യമ രംഗം എന്നിവയിൽ പ്രവർത്തിക്കുന്നവർക്ക് നല്ലകാലമാണ്. കീർത്തിയും അംഗീകാരവും ഉണ്ടാവും. മുൻപ് മറ്റുള്ളവർക്കായി ചെലവഴിച്ച ധനം മടക്കിക്കിട്ടും. ഭൂമിയോ വാഹനമോ വാങ്ങാനുള്ള ശ്രമം വിജയത്തിലെത്തും. അനുരാഗികളുടെ ഹൃദയബന്ധം കൂടുതൽ ഊഷ്മളമാകും.

Moolam Nakshathra Star Predictions in Malayalam: മൂലം നക്ഷത്രം

അയൽബന്ധങ്ങൾ ദൃഢമാകും. പൊതുക്കാര്യങ്ങളിൽ സാഹസികമായ ഇടപെടലുകൾ നടത്തും. കുടുംബപ്രശ്നങ്ങൾ പരിഹൃതമാവും. ശിരോരോഗങ്ങൾ അലട്ടാൻ ഇടയുണ്ട്. ധനവിനിയോഗത്തിൽ ശ്രദ്ധ കുറയും. അകന്ന ബന്ധുക്കൾ ഇണങ്ങും. മംഗളകർമ്മങ്ങളിൽ പങ്കെടുക്കും.

Pooradam Nakshathra Star Predictions in Malayalam: പൂരാടം നക്ഷത്രം

സകുടുംബമുള്ള തീർത്ഥയാത്രക്ക് യോഗമുണ്ട്. മക്കളുടെ കാര്യത്തിൽ ആശ്വാസത്തിന് വക കാണുന്നു. ആരോഗ്യപരമായി കാലം അത്ര അനുകൂലമായിരിക്കില്ല. നവീനഗൃഹം വാങ്ങുന്നതിനെക്കുറിച്ച് പര്യാലോചിക്കും. പ്രേമകാര്യങ്ങളിൽ വിജയിക്കും. മാതൃസൗഖ്യം അനുഭവപ്പെടും. വ്യവഹാരങ്ങൾ നീട്ടിവെക്കുന്നതാവും ഉചിതം.

Uthradam Nakshathra Star Predictions in Malayalam: ഉത്രാടം നക്ഷത്രം

മുൻകൂട്ടി തീരുമാനിച്ച പദ്ധതി ഉപേക്ഷിക്കും. പുതിയ ചിലത് സമാരംഭിക്കും. യാത്രകൾ വിജയത്തിലെത്താം. കുടുംബസംഗമത്തിന് നേതൃത്വം വഹിക്കും. ഊഹക്കച്ചവടം ആദായകരമാകും. ആരോഗ്യ വിഷയത്തിൽ ആശങ്കയ്ക്ക് വഴിയില്ല. ഉന്നതവിദ്യാഭ്യാസത്തിന് അവസരം കൈവരും

Thiruvonam Nakshathra Star Predictions in Malayalam: തിരുവോണം നക്ഷത്രം

പ്രവർത്തനങ്ങളിൽ മികവ് പുലർത്തും. വിദേശത്ത് തൊഴിൽ തേടുന്നവർക്ക് നല്ലവാർത്ത വന്നെത്തും. സാമ്പത്തിക ഇടപാടുകളിൽ നേട്ടമുണ്ടാകും. കുറേക്കാലമായി ആസൂത്രണം ചെയ്തിരുന്ന കാര്യങ്ങൾ സാക്ഷാൽക്കരിക്കാനാവും. മാസാന്ത്യത്തിൽ ചില ശാരീരിക വൈഷമ്യങ്ങൾ വരാം. പ്രത്യുല്പന്നമതിത്വത്താൽ അത്യാഹിതങ്ങളെ അതിജീവിക്കും.

Avittam Nakshathra Star Predictions in Malayalam: അവിട്ടം നക്ഷത്രം

വീട്ടിലും തൊഴിലിടത്തിലും പ്രാമാണ്യം വർദ്ധിക്കും. എതിർപ്പുകളെ തൃണവൽഗണിച്ച് മുന്നേറും. കുടുംബപ്രശ്നങ്ങളിൽ നല്ലതീർപ്പുകൾ കണ്ടെത്തും. ചെലവുകൾ വർദ്ധിക്കുന്നത് ആശങ്കയുണ്ടാക്കും. കിടപ്പ് രോഗികൾക്ക് ചികിത്സ മാറ്റുന്നത് വിദഗ്ദ്ധോപദേശ പ്രകാരം വേണ്ടതാണ്. ഉടമ്പടികളിൽ ഒപ്പ് വെക്കുന്നത് നിയമോപദേശത്തിന്റെ പിൻബലത്തിലാവണം.

Chathayam Nakshathra Star Predictions in Malayalam: ചതയം നക്ഷത്രം

കർമ്മരംഗത്ത് നേരിയ പുരോഗതി നേടും. അന്യനാടുകളിൽ തൊഴിൽ സാധ്യതയുണ്ട്. വരവധികരിക്കും; ഒപ്പം ചെലവുമുണ്ടാവും. ആഢംബരത്തിനായി പണം കണ്ടെത്തും. യാത്രകളിൽ കൂടുതൽ ശ്രദ്ധ വേണം. കരാറുകാർക്ക് കൂടുതൽ അവസരങ്ങൾ വന്നെത്തുന്നതായിരിക്കും. ആരോഗ്യകാര്യം സമ്മിശ്രമാണ്.

Pooruruttathi Nakshathra Star Predictions in Malayalam: പൂരൂരുട്ടാതി നക്ഷത്രം

പ്രൊഫഷണലുകൾക്ക് വലിയതോതിൽ മുന്നോട്ടു പോകാൻ കഴിയും. ബുദ്ധിപരമായി ഉണർന്ന് പ്രവർത്തിക്കും. സ്വത്ത് വഴക്കുകളിൽ മേൽക്കൈ നേടും. വിദ്യാർത്ഥികൾക്ക് ഇഷ്ടവിഷയങ്ങളിൽ ഉപരിപഠനം സാധ്യമാകും. മാതാപിതാക്കളുടെ ആരോഗ്യകാര്യത്തിൽ കൂടുതൽ ശ്രദ്ധ വേണം. പൊതുരംഗത്ത് പ്രവർത്തിക്കുന്നവർ വലിയ ഇച്ഛാശക്തി പ്രകടിപ്പിക്കും. പദവികൾ വന്നുചേരാം.

Uthrattathi Nakshathra Star Predictions in Malayalam: ഉത്രട്ടാതി നക്ഷത്രം

പരുഷമായി സംസാരിക്കും. അധികാരസ്ഥാനങ്ങളിൽ ഇരിക്കുന്നവരുമായി സൗഹൃദം സ്ഥാപിക്കും. മക്കളുടെ കാര്യത്തിൽ ചില ഉൽക്കണ്ഠകൾ വരാം. വീഴ്ചയോ മുറിവോ ഉണ്ടാവാനിടയുള്ളതിനാൽ കൂടുതൽ കരുതൽ വേണം. ദൂരയാത്രകൾ മാറ്റിവെക്കുന്നതാവും ഉചിതം. സാമ്പത്തികരംഗത്ത് ചെറിയ നേട്ടമെങ്കിലും വന്നുചേരും. അശനശയനസൗഖ്യം കുറയുമെന്ന് കാണുന്നു.

Revathi Nakshathra Star Predictions in Malayalam: രേവതി നക്ഷത്രം

ദീർഘകാലത്തെ ആഗ്രഹങ്ങൾ നിറവേറാം. വിവാഹകാര്യത്തിൽ ഉചിതതീരുമാനം സ്വീകരിക്കും. വീടുമാറി താമസിക്കുവാനുള്ള ആലോചനയുണ്ടാവാം. ഊഹക്കച്ചവടത്തിൽ മികവുണ്ടാവും. വായ്പകളിൽ അനുകൂലമായ തീർപ്പ് ലഭിക്കും. ജീവിതശൈലിരോഗങ്ങൾ, കഫരോഗങ്ങൾ എന്നിവ ശല്യകാരികളായേക്കാം. എല്ലാക്കാര്യത്തിലും സഹിഷ്ണുത പുലർത്തേണ്ട കാലമാണ്.

Read Here

Stay updated with the latest news headlines and all the latest Horoscope news download Indian Express Malayalam App.

Web Title: Astrology monthly prediction karkidakam 2022