50 വയസിനു മുകളിലുള്ളവർ ന്യൂമോണിയ വാക്സിൻ എടുക്കണം, എന്തുകൊണ്ട്?

വർധിച്ചുവരുന്ന വായു മലിനീകരണം, പ്രവചനാതീതമായ കാലാവസ്ഥ, തിരക്കേറിയ ജീവിത സാഹചര്യങ്ങൾ എന്നിവ കാരണം നമ്മുടെ സമൂഹം, പ്രത്യേകിച്ച് മുതിർന്നവർ, സ്ട്രെപ്റ്റോകോക്കസ് ന്യൂമോണിയ എന്ന ബാക്ടീരിയ മൂലമുണ്ടാകുന്ന ന്യൂമോകോക്കൽ രോഗത്തിന് ഇരയാകാൻ സാധ്യതയുണ്ട്. 50 വയസിന് മുകളിലുള്ളവർക്കും, പ്രമേഹം, ഹൃദ്രോഗം, സിഒപിഡി, ആസ്ത്മ തുടങ്ങിയ വിട്ടുമാറാത്ത ആരോഗ്യപ്രശ്നങ്ങളുള്ളവർക്കും ന്യൂമോകോക്കൽ രോഗം ആശുപത്രിവാസത്തിനും മരണത്തിനും ഒരു പ്രധാന കാരണമായി തുടരുന്നു.

Also Read: ഇരുമ്പിന്റെ കുറവുണ്ടോ? നാവ്, ചെവി, മുടി പോലും നോക്കി തിരിച്ചറിയാം

ഒരു രോഗിയുടെ അനുഭവം

ന്യൂമോകോക്കൽ വാക്സിന്റെ പ്രാധാന്യം ഡോ.രൺദീപ് ഗുലേറിയ തന്റെ ഒരു രോഗിയെ ഉദാഹരണമായി ചൂണ്ടിക്കാട്ടി വ്യക്തമാക്കിയിട്ടുണ്ട്. സിഒപിഡി കാരണം എല്ലാ വർഷവും ശൈത്യകാലത്ത് ആശുപത്രിയിൽ പ്രവേശിപ്പിക്കേണ്ടി വന്നിരുന്ന ഒരു രോഗി, കഴിഞ്ഞ രണ്ട് വർഷമായി സീസണൽ ഫ്ലൂ വാക്സിനും ന്യൂമോകോക്കൽ വാക്സിനും കൃത്യമായി സ്വീകരിച്ചതിന് ശേഷം ആശുപത്രിവാസം ഒഴിവാക്കിയതായി അദ്ദേഹം പറയുന്നു.

ആരൊക്കെ വാക്സിൻ എടുക്കണം?

• വൃദ്ധർ, പ്രത്യേകിച്ച് 60 വയസിന് മുകളിലുള്ളവർ
• പ്രതിരോധശേഷി കുറഞ്ഞവർ
• വിട്ടുമാറാത്ത രോഗങ്ങളുള്ളവർ: സിഒപിഡി, ഹൃദയസ്തംഭനം, വിട്ടുമാറാത്ത വൃക്കരോഗം തുടങ്ങിയവ ഉള്ളവർ

വാക്സിൻ സംരക്ഷണം നൽകുന്ന രോഗങ്ങൾ

• ന്യൂമോണിയ
• മെനിഞ്ചൈറ്റിസ്
• സെപ്സിസ്

Also Read: ഒരു മാസം എല്ലാ രാത്രിയിലും ഒരു അല്ലി വെളുത്തുള്ളി കഴിച്ചാൽ എന്ത് സംഭവിക്കും?

നിലവിലെ ശുപാർശകൾ

നിലവിലെ ഇന്ത്യൻ കൺസെൻസസ് മാർഗനിർദ്ദേശങ്ങൾ അനുസരിച്ച് 50 വയസോ അതിൽ കൂടുതലോ പ്രായമുള്ള എല്ലാ മുതിർന്നവർക്കും ഒരു ഡോസ് PCV20 ശുപാർശ ചെയ്യുന്നു. അപകടസാധ്യതയുള്ള അല്ലെങ്കിൽ ഉയർന്ന അപകടസാധ്യതയുള്ള അവസ്ഥകളുള്ള 18 നും 49 നും ഇടയിൽ പ്രായമുള്ള മുതിർന്നവർക്കും PCV20 ശുപാർശ ചെയ്യുന്നു. ആരോഗ്യവാന്മാരായ യുവജനങ്ങൾ നിലവിൽ ന്യൂമോകോക്കൽ വാക്സിൻ എടുക്കേണ്ട ആവശ്യമില്ല.

ഇന്ത്യയിൽ വാക്സിനേഷൻ കുറവായത് എന്തുകൊണ്ട്?

ഇൻഫ്ലുവൻസ, ന്യൂമോകോക്കൽ തുടങ്ങിയ വാക്സിനുകൾ എടുക്കുന്ന ഇന്ത്യൻ മുതിർന്നവരുടെ എണ്ണം രണ്ട് ശതമാനത്തിൽ താഴെയാണെന്ന് 2023-ലെ ഒരു പഠനം പറയുന്നു. അവബോധമില്ലായ്മയും ലഭ്യതക്കുറവുമാണ് ഇതിനുള്ള പ്രധാന കാരണങ്ങൾ. മുതിർന്നവരുടെ വാക്സിനേഷനെക്കുറിച്ച് ആളുകൾക്കും ആരോഗ്യ പ്രവർത്തകർക്കും ഇടയിൽ തെറ്റിദ്ധാരണകളും അറിവില്ലായ്മയുമുണ്ട്. മുതിർന്നവർക്കുള്ള വാക്സിനേഷൻ പൊതുജനാരോഗ്യ പരിപാടികളിൽ പതിവായി ഉൾപ്പെടുത്തിയിട്ടില്ല. മുതിർന്നവരുടെ വാക്സിനേഷൻ ചെയ്യേണ്ട നല്ലൊരു കാര്യമായി മാത്രം കണക്കാക്കുന്നു, നിർബന്ധമായി കാണുന്നില്ല. വാക്സിനേഷൻ ചെലവ് സ്വയം വഹിക്കേണ്ടിവരുന്നത് പലരെയും പിന്തിരിപ്പിക്കുന്നു.

Also Read: ഹൃദയാഘാതത്തിന് കാരണം മുട്ടയുടെ മഞ്ഞക്കരുവോ? തെറ്റിദ്ധാരണ തിരുത്തി ഡോക്ടർ

ഇപ്പോൾ വാക്സിനേഷൻ പ്രാധാന്യം അർഹിക്കുന്നത് എന്തുകൊണ്ട്?

ജേണൽ ഓഫ് ദി അസോസിയേഷൻ ഓഫ് ഫിസിഷ്യൻസ് ഓഫ് ഇന്ത്യ റിപ്പോർട്ട് ചെയ്തതുപോലെ, കമ്മ്യൂണിറ്റി-അക്വയേർഡ് ന്യൂമോണിയയുടെ (CAP) ആഗോളതലത്തിലെ ഏകദേശം 23% ഇന്ത്യയിലാണ്. ന്യൂമോകോക്കൽ രോഗം ആരോഗ്യത്തിന് മാത്രമല്ല, ഗണ്യമായ സാമ്പത്തിക, വൈകാരിക ദുരിതത്തിനും കാരണമാകുന്നു.

രാജ്യത്തെ ഉയർന്ന മലിനീകരണത്തിന്റെ തോത് ശ്വാസകോശത്തെ ഗുരുതരമായി ബാധിക്കുന്നതിനാൽ, ഉയർന്ന AQI (Air Quality Index) ഉള്ള ദിവസങ്ങളിൽ മാസ്ക് ധരിക്കുക, വീടിനുള്ളിൽ എയർ പ്യൂരിഫയറുകൾ ഉപയോഗിക്കുക, കൂടാതെ മലിനീകരണം വഷളാക്കുന്ന രോഗങ്ങളിൽ നിന്ന് സംരക്ഷണം നൽകുന്ന വാക്സിനുകൾ എടുത്ത് അപ്ഡേറ്റ് ചെയ്യുക തുടങ്ങിയ മുൻകരുതലുകൾ എടുക്കുന്നത് എല്ലാ ഇന്ത്യക്കാർക്കും നിർണായകമാണ്.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: 60 സെക്കൻഡിൽ രക്തത്തിലെ പഞ്ചസാരയുടെ അളവ് കുറയ്ക്കാം; എങ്ങനെ?