പ്രമേഹം നിയന്ത്രിക്കാൻ ഗ്രാമ്പൂ; രക്തത്തിലെ പഞ്ചസാര കുറയ്ക്കാൻ എങ്ങനെ സഹായിക്കും?

പ്രമേഹരോഗികളെ സംബന്ധിച്ചിടത്തോളം രക്തത്തിലെ പഞ്ചസാരയുടെ അളവ് നിയന്ത്രിച്ചു നിർത്തുക എന്നത് വലിയൊരു വെല്ലുവിളിയാണ്. ഭക്ഷണക്രമത്തിൽ വരുത്തുന്ന ചെറിയ മാറ്റങ്ങൾ പോലും വലിയ ഗുണങ്ങൾ നൽകാറുണ്ട്. 

നമ്മുടെ അടുക്കളയിലെ സ്ഥിരം സാന്നിധ്യമായ ഗ്രാമ്പൂ പ്രമേഹ നിയന്ത്രണത്തിന് വളരെയധികം സഹായിക്കുമെന്നാണ് പുതിയ പഠനങ്ങൾ സൂചിപ്പിക്കുന്നത്. ഗ്രാമ്പൂ എങ്ങനെയാണ് പ്രമേഹത്തെ പ്രതിരോധിക്കുന്നതെന്ന് അറിയാം.

ശരീരത്തിലെ ഇൻസുലിൻ സെൻസിറ്റിവിറ്റി വർധിപ്പിക്കാൻ ഗ്രാമ്പൂവിന് സാധിക്കുമെന്ന് വിദഗ്ധർ ചൂണ്ടിക്കാട്ടുന്നു. രക്തത്തിലെ ഗ്ലൂക്കോസിനെ കോശങ്ങളിലേക്ക് എത്തിക്കാനും അതുവഴി പഞ്ചസാരയുടെ അളവ് കുറയ്ക്കാനും ഗ്രാമ്പൂവിലെ ഘടകങ്ങൾ സഹായിക്കുന്നു.

ഭക്ഷണം കഴിച്ച ഉടൻ രക്തത്തിൽ പഞ്ചസാരയുടെ അളവ് പെട്ടെന്ന് ഉയരുന്നത് പ്രമേഹരോഗികളിൽ സാധാരണമാണ്. ഗ്രാമ്പൂ കഴിക്കുന്നതിലൂടെ അന്നജം ഗ്ലൂക്കോസായി മാറുന്ന പ്രക്രിയ സാവധാനത്തിലാകുന്നു. ഇത് പെട്ടെന്നുള്ള ഷുഗർ വർധനവ് തടയാൻ സഹായിക്കും.

ഗ്രാമ്പൂവിൽ അടങ്ങിയിരിക്കുന്ന യൂജിനോൾ, ഫ്ലേവനോയിഡുകൾ തുടങ്ങിയ ഘടകങ്ങൾക്ക് വീക്കം കുറയ്ക്കാനുള്ള ശേഷിയുണ്ട്. പ്രമേഹവുമായി ബന്ധപ്പെട്ടുണ്ടാകുന്ന ഓക്‌സിഡേറ്റീവ് സ്ട്രെസ് കുറയ്ക്കാൻ ഇത് സഹായിക്കുന്നു.

പ്രമേഹരോഗികളിൽ ഹൃദയസംബന്ധമായ പ്രശ്നങ്ങൾക്കും കരൾ രോഗങ്ങൾക്കും സാധ്യത കൂടുതലാണ്. ഗ്രാമ്പൂവിന്റെ ഉപയോഗം ചീത്ത കൊളസ്ട്രോൾ കുറയ്ക്കാനും കരളിന്റെ ആരോഗ്യം സംരക്ഷിക്കാനും സഹായിക്കുമെന്ന് പഠനങ്ങൾ പറയുന്നു.