ദിവസവും 30 ഗ്രാം ഉപ്പ് ചേർക്കാത്ത നട്‌സ് കഴിക്കൂ: മറവി രോഗം 17% വരെ കുറയ്ക്കാം

തലച്ചോറിന്റെയും കുടലിന്റെയും ആരോഗ്യം മെച്ചപ്പെടുത്താൻ സഹായിക്കുന്ന ലളിതമായ ഒരു ഭക്ഷണക്രമം പരിചയപ്പെടുത്തിയിരിക്കുകയാണ് ഗ്യാസ്‌ട്രോഎൻട്രോളജിസ്റ്റ് ഡോ.സൗരഭ് സേഥി. ദിവസേന ഒരു പിടി (30 ഗ്രാം) ഉപ്പ് ചേർക്കാത്ത നട്‌സ് കഴിക്കുന്നത് ദീർഘകാല വൈജ്ഞാനിക ആരോഗ്യത്തിന് എത്രത്തോളം ഗുണകരമാണെന്ന് അദ്ദേഹം വിശദീകരിച്ചിട്ടുണ്ട്.

ദിവസവും 30 ഗ്രാം ഉപ്പ് ചേർക്കാത്ത നട്‌സ് കഴിക്കുന്നവർക്ക്, നട്‌സ് കഴിക്കാത്തവരെ അപേക്ഷിച്ച്, ഡിമെൻഷ്യ വരാനുള്ള സാധ്യത 17 ശതമാനം വരെ കുറയ്ക്കാൻ കഴിയും എന്നാണ് ശാസ്ത്രീയ പഠനങ്ങളെ ഉദ്ധരിച്ച് ഡോ. സേഥി ചൂണ്ടിക്കാട്ടുന്നത്.

നട്‌സുകളെ പോഷകങ്ങളുടെ കലവറ എന്നാണ് ഡോക്ടർ വിശേഷിപ്പിക്കുന്നത്. തലച്ചോറിനും കുടലിനും ഒരുപോലെ ഗുണം ചെയ്യുന്ന പ്രധാന ഘടകങ്ങൾ ഇവയിൽ അടങ്ങിയിരിക്കുന്നു.

ഇവയിലെ ആന്റിഓക്‌സിഡന്റുകൾ കോശങ്ങൾക്ക് നാശമുണ്ടാക്കുന്ന ഫ്രീ റാഡിക്കലുകളെ ചെറുക്കാൻ സഹായിക്കുന്നു. അപൂരിത ഫാറ്റി ആസിഡുകൾ ഹൃദയാരോഗ്യത്തിന് മാത്രമല്ല, തലച്ചോറിന്റെ പ്രവർത്തനത്തിനും നിർണായകമാണ്.

ഫൈബർ കുടലിന്റെ ആരോഗ്യത്തിന് അത്യന്താപേക്ഷിതമാണ്. ഇത് ദഹനവ്യവസ്ഥയെ മെച്ചപ്പെടുത്തുകയും ചെയ്യുന്നു. ഈ ബയോആക്ടീവ് സംയുക്തങ്ങളാണ് നട്‌സുകളെ ദീർഘകാല ആരോഗ്യത്തിന് മികച്ചതാക്കി മാറ്റുന്നത്.

ദിവസവും 30 ഗ്രാം നട്‌സ് കഴിക്കുക എന്നത് പ്രായോഗികമായി എങ്ങനെ നടപ്പാക്കാമെന്നും ഡോ. സേഥി വ്യക്തമാക്കുന്നു. 30 ഗ്രാം എന്നത് ഏകദേശം ഒരു കൈപ്പിടിയിൽ ഒതുങ്ങുന്ന അത്രയും നട്‌സുകളാണ്.