ക്രാഷ് ഡയറ്റുകൾ മറന്നേക്കൂ; 7 ദിവസം കൊണ്ട് 2 കിലോ കുറയ്ക്കാൻ ഇതാ 3 വഴികൾ

ശരീര ഭാരം കുറച്ച് ഫിറ്റ്നസ് നേടാൻ ആഗ്രഹിക്കുന്നവരുടെ എണ്ണം വർധിച്ചു വരുന്ന ഈ കാലത്ത്, ഒരാഴ്ചകൊണ്ട് 2 കിലോ കുറയ്ക്കാം എന്ന ആകർഷകമായ പരസ്യങ്ങൾ കാണുമ്പോൾ പലരും അതിലേക്ക് വീണുപോകാറുണ്ട്. എന്നാൽ പെട്ടെന്നുള്ള ഫലങ്ങൾ നൽകുന്ന ക്രാഷ് ഡയറ്റുകൾ യഥാർത്ഥത്തിൽ കൊഴുപ്പിനെയാണോ ഇല്ലാതാക്കുന്നത്?. ഫിറ്റ്‌നസ് കോച്ചും പോഷകാഹാര വിദഗ്ധനുമായ കുഷ് മൽഹോത്ര ഇതിനെക്കുറിച്ച് പറയുന്ന കാര്യങ്ങൾ ശ്രദ്ധേയമാണ്. അതിവേഗത്തിൽ ഭാരം കുറയ്ക്കാനുള്ള താൽപ്പര്യം ഉപേക്ഷിക്കാനാണ് അദ്ദേഹം ഉപദേശിക്കുന്നത്. കാരണം, പെട്ടെന്ന് വണ്ണം കുറയുന്നത് മിക്കവാറും ശരീരത്തിലെ ജലാംശം മാത്രമായിരിക്കും, അല്ലാതെ കൊഴുപ്പല്ല.

ജലാംശവും യഥാർത്ഥ കൊഴുപ്പും: മിഥ്യയും യാഥാർത്ഥ്യവും

ഭക്ഷണത്തിൽ നിന്ന് കാർബോഹൈഡ്രേറ്റ് പൂർണ്ണമായി ഒഴിവാക്കുക, മണിക്കൂറുകളോളം കാർഡിയോ വ്യായാമം ചെയ്യുക തുടങ്ങിയ കഠിനമായ വഴികൾ സ്വീകരിക്കുമ്പോൾ, ആദ്യ ദിവസങ്ങളിൽ സ്കെയിലിൽ 1.5 മുതൽ 2 കിലോ വരെ കുറവ് കാണാൻ സാധ്യതയുണ്ട്. എന്നാൽ കോച്ച് മൽഹോത്രയുടെ അഭിപ്രായത്തിൽ ഇത് താൽക്കാലികമായ ജലാംശം നഷ്ടമാണ്.

യഥാർത്ഥത്തിൽ ഒരാഴ്ചകൊണ്ട് ആരോഗ്യകരമായി കുറയ്ക്കാൻ കഴിയുന്നത് പരമാവധി 500 ഗ്രാം കൊഴുപ്പ് മാത്രമാണ്. ഇതിനായി, ദിവസവും 500 കാലറിയുടെ കുറവ് ഭക്ഷണക്രമത്തിൽ വരുത്തേണ്ടതുണ്ട്. യഥാർത്ഥത്തിൽ കൊഴുപ്പ് കുറച്ച്, ശരീരത്തിന് ആരോഗ്യകരമായ രൂപമാറ്റം വരുത്താൻ ആഗ്രഹിക്കുന്നവർക്കായി കോച്ച് കുഷ് മൽഹോത്ര 3 ടിപ്സുകൾ പങ്കുവച്ചിട്ടുണ്ട്.

Also Read: വയർ വൃത്തിയാക്കി മലശോധന സുഗമമാക്കും; മലബന്ധം അകറ്റാൻ ഇത് വെറും ഒരു പിടി മതി

കൊഴുപ്പ് കുറയ്ക്കാൻ ശ്രദ്ധിക്കേണ്ട 3 കാര്യങ്ങൾ

താൽക്കാലിക ഫലങ്ങൾക്കുവേണ്ടി ക്രാഷ് ഡയറ്റുകളെ ആശ്രയിക്കുന്നതിന് പകരം, ഈ മൂന്ന് കാര്യങ്ങളിൽ ശ്രദ്ധയൂന്നുകയാണെങ്കിൽ ആരോഗ്യകരമായ ശരീരഭാരം നിലനിർത്താൻ സാധിക്കും.

1. കാലറി കുറവ് നിലനിർത്തുക

ശരീരത്തിന് ആവശ്യമായതിനേക്കാൾ കുറവ് കാലറി ദിവസവും കഴിക്കുന്നത് കൊഴുപ്പ് കുറയ്ക്കാൻ അത്യാവശ്യമാണ്. ദിവസവും 250 മുതൽ 500 കാലറി വരെ കുറവ് വരുത്തിക്കൊണ്ട് ആഹാരം ക്രമീകരിക്കുക. ഇത് ശേഖരിച്ചുവെച്ച കൊഴുപ്പിനെ ഊർജത്തിനായി ഉപയോഗിക്കാൻ ശരീരത്തെ നിർബന്ധിതമാക്കുകയും, സുരക്ഷിതമായി ഭാരം കുറയ്ക്കാൻ സഹായിക്കുകയും ചെയ്യും.

Also Read: വീട്ടിലുണ്ടാക്കുന്ന നാടൻ ഭക്ഷണങ്ങൾ; 45-ാം വയസിലും കരീനയുടെ ഫിറ്റ്നസ് രഹസ്യം

2. ആവശ്യത്തിന് പ്രോട്ടീൻ കഴിക്കുക

കൊഴുപ്പ് കുറയ്ക്കാൻ ശ്രമിക്കുമ്പോൾ പേശികൾ നഷ്ടപ്പെടാതെ സംരക്ഷിക്കാൻ പ്രോട്ടീൻ അത്യന്താപേക്ഷിതമാണ്. ശരീരഭാരത്തിന്റെ ഓരോ കിലോയ്ക്കും 1 മുതൽ 1.5 ഗ്രാം വരെ പ്രോട്ടീൻ കഴിക്കാൻ ശ്രദ്ധിക്കുക. പ്രോട്ടീൻ അടങ്ങിയ ഭക്ഷണം കഴിക്കുമ്പോൾ വയർ നിറഞ്ഞ പ്രതീതി കൂടുതൽ നേരം നിലനിർത്താനും വിശപ്പ് നിയന്ത്രിക്കാനും സഹായിക്കും.

3. സ്ഥിരമായി വെയ്റ്റ് ട്രെയിനിങ് ചെയ്യുക

കൊഴുപ്പ് കുറയ്ക്കുന്നതിന് കാർഡിയോ വ്യായാമങ്ങൾ പോലെ തന്നെ പ്രധാനപ്പെട്ടതാണ് വെയ്റ്റ് ട്രെയിനിങ് അഥവാ ഭാരം ഉപയോഗിച്ചുള്ള പരിശീലനം. ആഴ്ചയിൽ നാലോ അഞ്ചോ തവണ സ്ഥിരമായി ഭാരം ഉപയോഗിച്ചുള്ള വ്യായാമങ്ങൾ ചെയ്യുക. ഇത് പേശികളെ ബലപ്പെടുത്താനും, മെറ്റബോളിസം വർധിപ്പിക്കാനും, അതുവഴി കൂടുതൽ കാലറി കത്തിച്ചു കളയാനും സഹായിക്കും.

Also Read: 'ശരീരഭാരം കുറയ്ക്കാൻ ഒരേയൊരു വഴി മാത്രം'; 40 കിലോ കുറച്ച ഡോക്ടർ പങ്കുവച്ച രഹസ്യം

View this post on Instagram

A post shared by Kush Malhotra | FITNESS | NUTRITION | MINDSET (@malhotrakush)

ഏറ്റവും പ്രധാനം: മനഃസ്ഥിതി മാറ്റുക

കൊഴുപ്പ് കുറയ്ക്കുന്നതിലെ ഏറ്റവും പ്രധാനപ്പെട്ട ഘടകം, പെട്ടെന്നുള്ള ഫലങ്ങൾക്കായുള്ള ചിന്താഗതി ഉപേക്ഷിക്കുക എന്നതാണ്. ഒരു ദിവസം കൊണ്ടോ ഒരാഴ്ച കൊണ്ടോ ശരീരത്തിൽ കൊഴുപ്പ് വന്നടിഞ്ഞതല്ല. അതുപോലെ, അത് ഒറ്റ ദിവസം കൊണ്ട് ഇല്ലാതാവുകയുമില്ല. സ്ഥിരതയും ക്ഷമയുമാണ് യഥാർത്ഥ കൊഴുപ്പ് കുറയ്ക്കാനുള്ള ഏക മാർഗം.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ശ്വാസകോശത്തെ സംരക്ഷിക്കാൻ ഈ ഒരൊറ്റ അടുക്കള ചേരുവ മതി; എങ്ങനെ ഉപയോഗിക്കണം?