കൊളസ്ട്രോൾ കുറയ്ക്കണോ? ഭക്ഷണത്തിലും ജീവിതശൈലിയിലും ഈ മാറ്റങ്ങൾ വരുത്തൂ

കൊളസ്‌ട്രോൾ എന്നത് ഇന്നത്തെ തിരക്കിട്ട ജീവിതശൈലിയിൽ സാധാരണമായിക്കൊണ്ടിരിക്കുന്ന ഒരു ആരോഗ്യപ്രശ്‌നമാണ്. പലപ്പോഴും 'നിശബ്ദനായ കൊലയാളി' എന്നറിയപ്പെടുന്ന ഇതിന് വേണ്ട ശ്രദ്ധ കൊടുത്തില്ലെങ്കിൽ ഹൃദയാഘാതം, പക്ഷാഘാതം തുടങ്ങിയ ഗുരുതരമായ അവസ്ഥകളിലേക്ക് നയിച്ചേക്കാം.

ശരീരത്തിൽ എൽഡിഎൽ വർധിക്കുമ്പോൾ, അത് ധമനികളിൽ അടിഞ്ഞുകൂടി രക്തയോട്ടം തടസപ്പെടുത്തുന്നു. നിങ്ങൾക്ക് ഉയർന്ന കൊളസ്‌ട്രോൾ ഉണ്ടെന്ന് കണ്ടെത്തിയാൽ, ഭക്ഷണക്രമത്തിലും ജീവിതശൈലിയിലും മാറ്റങ്ങൾ വരുത്തേണ്ടത് അത്യാവശ്യമാണ്.

Also Read: അരക്കെട്ട് ഒതുങ്ങി ഭംഗിയാകും; വയറിലെ കൊഴുപ്പ് വേഗത്തിൽ ഉരുക്കാൻ ഈ കാര്യങ്ങൾ മറക്കാതിരിക്കൂ

1. ഹൃദയാരോഗ്യം മെച്ചപ്പെടുത്തുന്ന ഭക്ഷണം ശീലമാക്കുക

കൊളസ്‌ട്രോൾ നിയന്ത്രിക്കുന്നതിൽ ഭക്ഷണത്തിനാണ് പ്രഥമസ്ഥാനം. നാരുകൾ ധാരാളമടങ്ങിയ പഴങ്ങളും പച്ചക്കറികളും ദൈനംദിന ഭക്ഷണത്തിൽ ഉൾപ്പെടുത്തുക. മുഴുവൻ ധാന്യങ്ങൾ, പയർവർഗ്ഗങ്ങൾ എന്നിവ കൂടുതലായി കഴിക്കുന്നത് എൽഡിഎൽ കൊളസ്‌ട്രോളിനെ കുറയ്ക്കാൻ സഹായിക്കും. ഒലിവ് ഓയിൽ, അവക്കാഡോ, നട്‌സ് എന്നിവയിലുള്ള മോണോസാച്ചുറേറ്റഡ് കൊഴുപ്പുകൾ തിരഞ്ഞെടുക്കുക. മത്സ്യങ്ങളിലും, ഫ്ളാക്സ് സീഡുകളിലും അടങ്ങിയിട്ടുള്ള ഒമേഗ-3 ഫാറ്റി ആസിഡുകൾ ഉൾപ്പെടുത്തുക. റെഡ് മീറ്റ്, സംസ്കരിച്ച ഭക്ഷണങ്ങൾ, ചില പാലുൽപ്പന്നങ്ങൾ എന്നിവയിലുള്ള പൂരിത കൊഴുപ്പുകളുടെ ഉപയോഗം പരിമിതപ്പെടുത്തുക.

2. പതിവായ വ്യായാമം നിർബന്ധമാക്കുക

വ്യായാമം ചെയ്യുന്നത് എൽഡിഎൽ കൊളസ്‌ട്രോളിനെ നീക്കം ചെയ്യാൻ സഹായിക്കുന്ന എച്ച്ഡിഎൽ വർധിപ്പിക്കാൻ സഹായിക്കും. ആഴ്ചയിൽ കുറഞ്ഞത് 150 മിനിറ്റ് മിതമായ വ്യായാമം അല്ലെങ്കിൽ 75 മിനിറ്റ് തീവ്രമായ വ്യായാമം ലക്ഷ്യമിടുക. നടത്തം, ജോഗിങ്, നീന്തൽ തുടങ്ങിയ പ്രവർത്തനങ്ങൾ തിരഞ്ഞെടുക്കുന്നത് ഹൃദയാരോഗ്യത്തിന് ഉത്തമമാണ്.

Also Read: രക്തത്തിലെ പഞ്ചസാരയുടെ അളവ് കുറയ്ക്കാം; ഇവയിലൊന്ന് കുടിക്കൂ

3. ആരോഗ്യകരമായ ശരീരഭാരം നിലനിർത്തുക

അമിതഭാരം കൊളസ്‌ട്രോൾ വർധിപ്പിക്കാൻ സാധ്യതയുണ്ട്. ശരീരഭാരത്തിൽ നിന്ന് ചെറിയൊരു ശതമാനം കുറയ്ക്കുന്നത് പോലും എൽഡിഎൽ കൊളസ്‌ട്രോളിന്റെ അളവ് കുറയ്ക്കാനും മൊത്തത്തിലുള്ള ഹൃദയാരോഗ്യം മെച്ചപ്പെടുത്താനും സഹായിക്കും.

4. പുകവലിയും മദ്യപാനവും നിയന്ത്രിക്കുക

പുകവലി പൂർണ്ണമായും ഒഴിവാക്കുന്നത് എച്ച്ഡിഎൽ കൊളസ്‌ട്രോളിന്റെ അളവ് മെച്ചപ്പെടുത്താനും ഹൃദയ സംബന്ധമായ അപകടസാധ്യത കുറയ്ക്കാനും സഹായിക്കും. അമിതമായ മദ്യപാനം ഹൃദയാരോഗ്യത്തെ ദോഷകരമായി ബാധിക്കും. മദ്യത്തിന്റെ ഉപഭോഗം നിയന്ത്രിക്കുന്നത് നല്ലതാണ്.

Also Read: 50 വയസിനു മുകളിലുള്ളവർ ന്യൂമോണിയ വാക്സിൻ എടുക്കണം, എന്തുകൊണ്ട്?

5. മാനസിക സമ്മർദം കുറയ്ക്കുക

നിയന്ത്രണാതീതമായതും വിട്ടുമാറാത്തതുമായ മാനസിക സമ്മർദം കൊളസ്‌ട്രോൾ അളവ് വർധിപ്പിച്ചേക്കും. യോഗ, ധ്യാനം, ഇഷ്ടപ്പെട്ട ഹോബികളിൽ ഏർപ്പെടുക തുടങ്ങിയ സമ്മർദം കുറയ്ക്കുന്നതിനുള്ള വിദ്യകൾ പരിശീലിക്കുക.

6. കൊളസ്‌ട്രോൾ നില പതിവായി നിരീക്ഷിക്കുക

പ്രത്യേകിച്ചും പ്രായമാകുമ്പോഴോ അല്ലെങ്കിൽ കുടുംബത്തിൽ ഹൃദ്രോഗ ചരിത്രം ഉണ്ടെങ്കിലോ, ഡോക്ടറുമായി ആലോചിച്ച് കൊളസ്‌ട്രോൾ നില പതിവായി പരിശോധിക്കുന്നത് അത്യാവശ്യമാണ്. ജീവിതശൈലി മാറ്റങ്ങൾ മതിയാകാതെ വരുന്ന സന്ദർഭങ്ങളിൽ, ഡോക്ടറുടെ നിർദേശപ്രകാരം മരുന്നുകൾ ആവശ്യമായി വന്നേക്കാം.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഇരുമ്പിന്റെ കുറവുണ്ടോ? നാവ്, ചെവി, മുടി പോലും നോക്കി തിരിച്ചറിയാം