ഭക്ഷണമോ സമ്മർദമോ അല്ല; 90% ഹൃദയാഘാതങ്ങൾക്കും പിന്നിൽ 'രാവിലെത്തെ ഈ ശീലം'

ലോകമെമ്പാടും മരണകാരണമാകുന്ന രോഗങ്ങളിൽ ഹൃദയസംബന്ധമായ അസുഖങ്ങൾ മുൻപന്തിയിലാണ്. സാധാരണയായി ഭക്ഷണരീതിയെയും മാനസിക സമ്മർദത്തെയുമാണ് ഹൃദയാഘാതത്തിന് പ്രധാന കാരണമായി നാം കരുതുന്നത്. എന്നാൽ നമ്മുടെ ഒരു സാധാരണ പ്രഭാത ശീലം 90 ശതമാനം ഹൃദയാഘാതങ്ങൾക്കും കാരണമായേക്കാമെന്ന് ഡോക്ടർമാർ മുന്നറിയിപ്പ് നൽകുന്നു.

പ്രശസ്ത ഡോക്ടറായ സന സദോക്സായ് ഇൻസ്റ്റാഗ്രാമിലൂടെ പങ്കുവെച്ച വിവരങ്ങൾ പ്രകാരം, ഉറക്കമുണർന്നാലുടൻ ശാരീരികമായി സജീവമാകാത്തതാണ് പ്രധാന വില്ലൻ. ഉറക്കമുണർന്ന ഉടൻ ബെഡിൽ തന്നെ ഇരുന്നോ കിടന്നോ മൊബൈൽ ഫോൺ ഉപയോഗിക്കുന്നതും, അതിനുശേഷം വ്യായാമമില്ലാതെ ദീർഘനേരം ഇരിക്കുന്നതും ശരീരത്തിൽ വീക്കംവർധിപ്പിക്കുന്നു.

ഈ ശീലം ശരീരത്തിലെ ഇൻസുലിൻ പ്രതിരോധം വർധിപ്പിക്കാനും, വയറിലെ കൊഴുപ്പ്, ഉയർന്ന രക്തസമ്മർദം, മെറ്റബോളിക് തകരാറുകൾ എന്നിവയ്ക്കും കാരണമാകുന്നു. അമിതഭാരമുള്ളവരിലും പ്രമേഹമുള്ളവരിലും ഇത് നേരത്തെയുള്ള ഹൃദയാഘാത സാധ്യത വൻതോതിൽ വർധിപ്പിക്കുന്നുവെന്ന് ഡോ.സന വ്യക്തമാക്കുന്നു.

രാവിലെ ഉണർന്നാലുടൻ ചെറിയ രീതിയിലുള്ള ചലനങ്ങൾ പോലും വലിയ മാറ്റമുണ്ടാക്കും. അഞ്ചു മുതൽ ഏഴ് മിനിറ്റ് വരെ നീണ്ടുനിൽക്കുന്ന നടത്തം, സ്ട്രെച്ചിങ് അല്ലെങ്കിൽ ശ്വസന വ്യായാമങ്ങൾ എന്നിവ ശരീരത്തിലെ രക്തചംക്രമണം വർധിപ്പിക്കുകയും ഉപാപചയ പ്രവർത്തനങ്ങളെ ഉത്തേജിപ്പിക്കുകയും ചെയ്യുന്നു. ഇത് രക്തത്തിലെ പഞ്ചസാരയുടെ അളവ് ക്രമീകരിക്കാനും സഹായിക്കും.

അമിതമായ വയറിലെ കൊഴുപ്പ്, എപ്പോഴും അനുഭവപ്പെടുന്ന തളർച്ച, പ്രമേഹം, അൽപം നടക്കുമ്പോഴേക്കും ഉണ്ടാകുന്ന ശ്വാസംമുട്ടൽ എന്നിവ ഹൃദയാരോഗ്യം അപകടത്തിലാണെന്നതിന്റെ ആദ്യകാല സൂചനകളാകാമെന്ന് ഡോക്ടർ ഓർമ്മിപ്പിക്കുന്നു.

ഹൃദയപേശികളിലേക്കുള്ള രക്തപ്രവാഹം തടസ്സപ്പെടുമ്പോഴാണ് ഹൃദയാഘാതം സംഭവിക്കുന്നത്. നെഞ്ചുവേദനയാണ് പ്രധാന ലക്ഷണമെങ്കിലും 10 മുതൽ 15 ശതമാനം വരെ ആളുകളിൽ (പ്രത്യേകിച്ച് പ്രമേഹമുള്ളവരിലും പ്രായമായവരിലും) യാതൊരു ലക്ഷണവും പ്രകടമാകാതെ ഹൃദയാഘാതം സംഭവിക്കാറുണ്ട്.