ഒരു മാസം പൊക്കിൾ വൃത്തിയാക്കിയില്ലെങ്കിൽ എന്ത് സംഭവിക്കും?

ശരീരത്തിന്റെ മൊത്തത്തിലുള്ള ആരോഗ്യത്തിന് ശുചിത്വം അത്യന്താപേക്ഷിതമാണ്. ദിവസവും കുളിക്കുന്നത് വൃത്തിയായിരിക്കാൻ സഹായിക്കുമെങ്കിലും, ശരീരത്തിലെ ചില ഭാഗങ്ങൾക്ക് നമ്മൾ പ്രത്യേക ശ്രദ്ധ നൽകേണ്ടതുണ്ട്. കക്ഷം, കാൽവിരലുകൾക്കിടയിലെ ഭാഗം എന്നിവ പോലെ, നമ്മുടെ പൊക്കിളും സ്ഥിരമായ ശുചിത്വം ആവശ്യമുള്ള ഒരിടമാണ്.

വൃത്തിയാക്കാതിരുന്നാൽ ഒരു മാസം കൊണ്ട് പൊക്കിളിൽ എന്തൊക്കെ സംഭവിക്കുമെന്നും അത് എങ്ങനെ ആരോഗ്യപ്രശ്നങ്ങളുണ്ടാക്കുമെന്നും ഡെർമറ്റോളജിസ്റ്റ് ഡോ.രശ്മി ശർമ്മ വിശദീകരിച്ചിട്ടുണ്ട്.

വൃത്തിയാക്കാതിരുന്നാൽ ഉണ്ടാകുന്ന പ്രശ്നങ്ങൾ

പൊക്കിൾ ചെറിയൊരു ഭാഗമാണ്. ഇവിടെ വിയർപ്പ്, മൃതകോശങ്ങൾ, സ്വാഭാവിക എണ്ണകൾ എന്നിവ എളുപ്പത്തിൽ അടിഞ്ഞുകൂടുന്നു. ആഴ്ചകളോളം വൃത്തിയാക്കാതിരുന്നാൽ, ഈ മാലിന്യം അടിഞ്ഞുകൂടുകയും താഴെ പറയുന്ന അസ്വസ്ഥതകൾക്ക് കാരണമാവുകയും ചെയ്യും.

Also Read: ഹൃദയാഘാതത്തിന് കാരണം ബ്ലോക്കുകളല്ല; യഥാർത്ഥ വില്ലനെ ചൂണ്ടിക്കാട്ടി കാർഡിയോളജിസ്റ്റ്

ദുർഗന്ധം: അടിഞ്ഞുകൂടിയ മാലിന്യം കാരണം ദുർഗന്ധം ഉണ്ടാകാം.

ചൊറിച്ചിലും ചുവപ്പും: ചർമ്മത്തിൽ അസ്വസ്ഥത ഉണ്ടാക്കുകയും ചൊറിച്ചിലിനും ചുവപ്പ് നിറത്തിനും കാരണമാവുകയും ചെയ്യും.

ഡിസ്ചാർജ്: ചിലപ്പോൾ മെഴുകുപോലെയോ കുഴമ്പ് പോലെയോ ഉള്ള സ്രവം പുറത്തേക്ക് വരാം.

അണുബാധ: പൊക്കിളിലെ ഈർപ്പമുള്ള അന്തരീക്ഷം ബാക്ടീരിയകളുടെയോ യീസ്റ്റിന്റെയോ വളർച്ചയെ പ്രോത്സാഹിപ്പിക്കുന്നു, ഇത് അണുബാധയിലേക്ക് നയിച്ചേക്കാം.

കൂടുതൽ ഗുരുതരമായ സാഹചര്യങ്ങളിൽ, അടിഞ്ഞുകൂടിയ ഈ മാലിന്യം കട്ടിയായി നേവൽ സ്റ്റോൺ എന്നറിയപ്പെടുന്ന അവസ്ഥയിലേക്ക് മാറിയേക്കാം. ഇത് വേദനയുണ്ടാക്കുകയും ചിലപ്പോൾ ഡോക്ടറുടെ സഹായത്തോടെ നീക്കം ചെയ്യേണ്ടതായും വരും.

Also Read: മലബന്ധം കുറയ്ക്കും, രോഗങ്ങളെ ചെറുക്കും; ഒരു സ്പൂൺ നെയ്യ് തരും ഈ ആരോഗ്യ ഗുണങ്ങൾ

പൊക്കിൾ എങ്ങനെ വൃത്തിയായി സൂക്ഷിക്കാം?

അസ്വസ്ഥതകൾ ഒഴിവാക്കാൻ പൊക്കിൾ വൃത്തിയായി സൂക്ഷിക്കേണ്ടത് അത്യാവശ്യമാണ്. അതിനായുള്ള ലളിതവും സൗമ്യവുമായ മാർഗ്ഗങ്ങൾ ഡോ. ശർമ്മ നിർദേശിച്ചിട്ടുണ്ട്.

• കുളിക്കുന്ന സമയത്ത് മിതമായ സോപ്പും ചൂടുവെള്ളവും ഉപയോഗിക്കുക.
• വിരലുകൾ കൊണ്ടോ മൃദുവായ ഒരു തുണി ഉപയോഗിച്ചോ പൊക്കിൾ വൃത്തിയാക്കുക.
• സോപ്പിന്റെ അംശം ഉള്ളിൽ തങ്ങി നിന്നാൽ ചർമ്മത്തിൽ അസ്വസ്ഥത ഉണ്ടാകാൻ സാധ്യതയുണ്ട്. അതിനാൽ നന്നായി കഴുകി കളയുക.
• ഈർപ്പം തങ്ങിനിൽക്കുന്നത് യീസ്റ്റ് വളരാൻ കാരണമാകും. അതിനാൽ, ടവ്വൽ ഉപയോഗിച്ച് മൃദുവായി ഒപ്പിയെടുക്കുകയോ അല്ലെങ്കിൽ നന്നായി ഉണങ്ങാൻ അനുവദിക്കുകയോ ചെയ്യുക.
• ആഴത്തിൽ വൃത്തിയാക്കാൻ, ചൂടുവെള്ളത്തിലോ അൽപം സോപ്പിലോ മുക്കിയ കോട്ടൺ സ്വാബ് വളരെ മൃദുവായി ഉപയോഗിക്കാവുന്നതാണ്.
• ശക്തമായി ഉരസുകയോ മൂർച്ചയുള്ള വസ്തുക്കൾ ഉപയോഗിക്കുകയോ ചെയ്യുന്നത് പൂർണ്ണമായും ഒഴിവാക്കണം.

Also Read: തൊലിയോടെയോ അതോ തൊലിയില്ലാതെയോ? പേരയ്ക്ക എങ്ങനെ കഴിക്കണം

ഡോക്ടറെ കാണേണ്ടത് എപ്പോൾ?

വൃത്തിയാക്കലിന് ശേഷവും ചുവപ്പ്, വേദന, മാറാത്ത ദുർഗന്ധം, സ്രവം എന്നിവ അനുഭവപ്പെടുന്നുണ്ടെങ്കിൽ അണുബാധയുടെ സൂചനയാകാം. അങ്ങനെയെങ്കിൽ, സ്വയം ചികിത്സിക്കാൻ ശ്രമിക്കാതെ ഒരു ആരോഗ്യ വിദഗ്ധനെ കാണുന്നതാണ് ഉചിതം. ലളിതവും പതിവായതുമായ ഈ ശുചിത്വ രീതികൾ പൊക്കിളിനെ ആരോഗ്യകരമായി നിലനിർത്താനും മാസങ്ങൾ നീണ്ടുനിൽക്കുന്ന മാലിന്യം അടിഞ്ഞുകൂടി പ്രശ്നങ്ങളുണ്ടാകുന്നത് തടയാനും സഹായിക്കും.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഗ്രീൻ ടീ കുടിക്കാൻ ഏറ്റവും നല്ല സമയം ഏതാണ്?