ആറുമാസം പാൽ കാപ്പിക്ക് പകരം കട്ടൻ കാപ്പി കുടിച്ചാൽ എന്ത് സംഭവിക്കും?

പാൽ ചേർത്ത കാപ്പി ഒഴിവാക്കി കട്ടൻ കാപ്പി കുടിച്ചു തുടങ്ങുമ്പോൾ ശ്രദ്ധിക്കപ്പെടുന്ന ആദ്യ മാറ്റം പ്രതിദിന കാലറി ഉപഭോഗം കുറയുന്നതാണെന്ന് താനെയിലെ കിംസ് ഹോസ്പിറ്റലിലെ ചീഫ് ഡയറ്റീഷ്യൻ ഡി.ടി.അംറീൻ ഷെയ്ഖ് പറയുന്നു. “പാൽ ചേർത്ത കാപ്പിയിൽ, പ്രത്യേകിച്ച് പഞ്ചസാരയും കൂടെ ചേരുമ്പോൾ, പാലിന്റെ കൊഴുപ്പിൽ നിന്നും ലാക്ടോസിൽ നിന്നും കാലറി വർധിക്കുന്നു. ഇതിനു വിപരീതമായി, കട്ടൻ കാപ്പി കാലറി തീരെ കുറഞ്ഞ ഒന്നാണ്. കൂടാതെ, പാലിനോട് അലർജിയോ അസ്വസ്ഥതയോ ഉള്ളവർ, കട്ടൻ കാപ്പിയിലേക്ക് മാറുന്നതോടെ ഏതാനും ആഴ്ചകൾക്കുള്ളിൽ വയറിലെ വീക്കവും അസ്വസ്ഥതകളും മാറി ശരീരത്തിന് ലഘുത്വം അനുഭവപ്പെടുന്നതായി റിപ്പോർട്ട് ചെയ്യാറുണ്ട്,” അവർ പറഞ്ഞു.

ഈ മാറ്റം ശരീരഭാരം നിയന്ത്രിക്കാൻ സഹായിക്കുമോ?

തീർച്ചയായും സഹായിക്കുമെന്ന് ഷെയ്ഖ് ഉറപ്പിച്ചു പറയുന്നു. "ആറ് മാസക്കാലയളവിൽ കാപ്പിയിൽ നിന്ന് പാലും പഞ്ചസാരയും ഒഴിവാക്കുന്നത് കാലറി ഉപഭോഗത്തിൽ ചെറിയ തോതിലുള്ളതും എന്നാൽ സ്ഥിരവുമായ കുറവുണ്ടാക്കും. കട്ടൻ കാപ്പി കുടിക്കുന്നത് കൊണ്ട് മാത്രം ശരീരഭാരം കുറയില്ലെങ്കിലും, സമീകൃതാഹാരത്തോടും വ്യായാമത്തോടും ഒപ്പം ചേർക്കുമ്പോൾ അത് ഭാരം നിയന്ത്രിക്കാൻ സഹായിക്കും. കൂടാതെ, കഫീൻ ഉപാപചയ നിരക്ക് അൽപം വർധിപ്പിക്കാനും വ്യായാമ വേളയിൽ കൊഴുപ്പ് ഊർജമായി ഉപയോഗിക്കുന്നത് മെച്ചപ്പെടുത്താനും സഹായിച്ചേക്കാം."

Also Read: രാത്രിയിൽ തൈര് കഴിക്കാമോ? നമ്മൾ വിശ്വസിക്കുന്ന 7 തെറ്റായ കാര്യങ്ങൾ

പാൽ കാപ്പിയെ അപേക്ഷിച്ച് കട്ടൻ കാപ്പി ദഹനത്തെ എങ്ങനെ ബാധിക്കുന്നു?

ഷെയ്ക്കിന്റെ അഭിപ്രായത്തിൽ, കട്ടൻ കാപ്പി ഗ്യാസ്ട്രിക് ആസിഡിന്റെ ഉത്പാദനത്തെ ഉത്തേജിപ്പിക്കുന്നു, ഇത് ചിലരിൽ ദഹനം മെച്ചപ്പെടുത്താൻ സഹായിച്ചേക്കാം. "എങ്കിലും, അസിഡിറ്റിയോ ആസിഡ് റിഫ്ലക്സോ ഉള്ളവർക്ക് വെറും വയറ്റിൽ കട്ടൻ കാപ്പി കുടിക്കുന്നത് അസ്വസ്ഥതയുണ്ടാക്കിയേക്കാം. പാൽ ചേർക്കുന്നത് സാധാരണയായി അസിഡിറ്റി കുറയ്ക്കാൻ സഹായിക്കും. അതിനാൽ പാൽ ഒഴിവാക്കുകയാണെങ്കിൽ, കട്ടൻ കാപ്പി രാവിലെ കുടിക്കുന്നതിന് പകരം ഭക്ഷണത്തിന് ശേഷം കുടിക്കുന്ന രീതിയിലേക്ക് സമയം മാറ്റേണ്ടി വരും," അവർ ഇന്ത്യൻ എക്സ്പ്രസിനോട് പറഞ്ഞു.

രക്തത്തിലെ പഞ്ചസാര നിയന്ത്രണത്തിന് എന്തെങ്കിലും ഗുണങ്ങളുണ്ടോ?

“ഇൻസുലിൻ പ്രതിരോധം ഉള്ളവർക്കോ പ്രീഡയബറ്റിസ് ഉള്ളവർക്കോ ഈ മാറ്റം രക്തത്തിലെ പഞ്ചസാരയുടെ അളവ് മെച്ചപ്പെട്ട രീതിയിൽ നിയന്ത്രിക്കാൻ സഹായിക്കും. കാലക്രമേണ, പഞ്ചസാരയുടെ മൊത്തത്തിലുള്ള ഉപയോഗം കുറയുന്നത് ഇൻസുലിൻ സെൻസിറ്റിവിറ്റി വർധിപ്പിക്കാനും സഹായിച്ചേക്കാം,” ഷെയ്ഖ് പറഞ്ഞു.

Also Read: കൂടുതൽ തവണ മൂത്രമൊഴിക്കുക, തണുപ്പ് അനുഭവപ്പെടുക: വണ്ണം കുറയുമ്പോൾ ശരീരം കാണിക്കുന്ന 'വിചിത്രമായ' ലക്ഷണങ്ങൾ

കട്ടൻ കാപ്പി ഊർജനിലയെ വ്യത്യസ്തമായി ബാധിക്കുമോ?

പലർക്കും കട്ടൻ കാപ്പി കുടിക്കുമ്പോൾ കൂടുതൽ വ്യക്തവും ഉന്മേഷദായകവുമായ ഊർജം ലഭിക്കുന്നതായി അനുഭവപ്പെടാറുണ്ട്. "പാലും പഞ്ചസാരയും ചേർക്കാത്തതിനാൽ, ഊർജനില പെട്ടെന്ന് താഴാതെ സ്ഥിരമായി നിൽക്കുന്നു. കട്ടൻ കാപ്പി രക്തത്തിലെ പഞ്ചസാരയുടെ അളവിൽ പെട്ടെന്നുള്ള മാറ്റങ്ങൾ വരുത്താത്തതാണ് ഇതിന് കാരണം."

Also Read: പോക്കറ്റും കീറില്ല, ആരോഗ്യവും കൂടും; ബ്ലൂബെറിയെ വെല്ലുന്ന നമ്മുടെ സ്വന്തം 'സൂപ്പർ ഫ്രൂട്ട്'

കാപ്പിയിൽ നിന്ന് പാൽ ഒഴിവാക്കുന്നത് പോഷകാഹാരക്കുറവിന് കാരണമാകുമോ?

ഷെയ്ഖ് പറയുന്നത് പ്രകാരം, പാൽ കാൽസ്യവും പ്രോട്ടീനും നൽകുന്നു. അതിനാൽ കാപ്പിയിൽ നിന്ന് പാൽ ഒഴിവാക്കുമ്പോൾ, ആ പോഷകങ്ങൾ തൈര്, പനീർ, പരിപ്പുവർഗങ്ങൾ, സീഡ്സുകൾ അല്ലെങ്കിൽ ഇലക്കറികൾ തുടങ്ങിയ മറ്റ് ഭക്ഷണങ്ങളിൽ നിന്ന് ലഭിക്കേണ്ടതുണ്ട്. "മിതമായ അളവിൽ കഴിക്കുമ്പോൾ ബ്ലാക്ക് കോഫിയിൽ അടങ്ങിയിരിക്കുന്ന ആന്റിഓക്സിഡന്റുകൾ ഹൃദയത്തിന്റെയും മെറ്റബോളിസത്തിന്റെയും ആരോഗ്യത്തെ സഹായിക്കുന്നു," ഷെയ്ഖ് പറഞ്ഞു.

കട്ടൻ കാപ്പി എല്ലാവർക്കും അനുയോജ്യമാണോ?

ഗ്യാസ്ട്രൈറ്റിസ്, ഉത്കണ്ഠാ രോഗങ്ങൾ, അല്ലെങ്കിൽ ഉറക്കമില്ലായ്മ തുടങ്ങിയ പ്രശ്നങ്ങളുള്ളവർ കാപ്പിയുടെ അളവ് നിയന്ത്രിക്കേണ്ടതുണ്ട്. “സാധാരണഗതിയിൽ കട്ടൻ കാപ്പി മിതമായ അളവിൽ മാത്രമേ കുടിക്കാവൂ, ദിവസം 1 മുതൽ 2 കപ്പ് വരെ. അത് വൈകുന്നേരങ്ങളിൽ ഒഴിവാക്കുകയും വേണം,” ഷെയ്ഖ് പറഞ്ഞു.

DISCLAIMER: മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: കാപ്പി കുടിക്കുന്നത് അമിതമാണോ? കാത്തിരിക്കുന്നത് ഒട്ടേറെ പ്രശ്നങ്ങൾ