ദിവസവും രാവിലെ പേരയിലകൾ ചവയ്ക്കാം, 6 ആരോഗ്യ ഗുണങ്ങൾ കിട്ടും

പേരയുടെ ഇലകൾ ആരോഗ്യഗുണങ്ങളാൽ നിറഞ്ഞിരിക്കുന്നു. ആന്റിഓക്‌സിഡന്റുകൾ, വിറ്റാമിനുകൾ, ആന്റി-ഇൻഫ്ലമേറ്ററി ഗുണങ്ങൾ എന്നിവയാൽ ഇവ നിറഞ്ഞിരിക്കുന്നു. ഇവയ്ക്ക് ഔഷധ ഗുണങ്ങളുമുണ്ട്. പല അവശ്യ വിറ്റാമിനുകളുടെയും ബയോ ആക്റ്റീവ് സംയുക്തങ്ങളുടെയും സമ്പന്നമായ ഉറവിടമാണ് പേരയിലയെന്ന് ഡയറ്റീഷ്യൻ കനിക മൽഹോത്ര പറഞ്ഞു.

വിറ്റാമിൻ സിയുടെ ഏറ്റവും സമ്പന്നമായ ഉറവിടങ്ങളിലൊന്നാണ് പേരയില. രോഗപ്രതിരോധ പ്രവർത്തനത്തിനും ചർമ്മത്തിന്റെ ആരോഗ്യത്തിനും വിറ്റാമിൻ സി ഗുണം ചെയ്യും. വിറ്റാമിൻ ബി ഊർജ ഉപാപചയത്തിനും വൈജ്ഞാനിക ആരോഗ്യത്തിനും ഗുണം ചെയ്യുമെന്ന് അവർ പറഞ്ഞു. വിറ്റാമിനുകൾക്ക് പുറമേ, കാൽസ്യം, പൊട്ടാസ്യം, മഗ്നീഷ്യം, ഇരുമ്പ് തുടങ്ങിയ ധാതുക്കളുടെ നല്ല ഉറവിടമാണ് പേരയില. അസ്ഥികളുടെ ആരോഗ്യത്തിലും ഹൃദയ പ്രവർത്തനത്തിലും ഈ പോഷകങ്ങൾ പങ്ക് വഹിക്കുന്നുണ്ട്.

പേരയിലകളിൽ ക്വെർസെറ്റിൻ, കാറ്റെച്ചിൻ, ഗാലിക് ആസിഡ് തുടങ്ങിയ പോളിഫെനോളിക് സംയുക്തങ്ങൾ അടങ്ങിയിട്ടുണ്ട്. ഓക്സിഡേറ്റീവ് സമ്മർദവും വീക്കവും ലഘൂകരിക്കുന്ന ശക്തമായ ആന്റിഓക്‌സിഡന്റുകളാണിവയെന്ന് മൽഹോത്ര പറഞ്ഞു. പേരയിലയുടെ ഇലകൾ ദിവസവും ചവയ്ക്കുന്നത് നിരവധി ആരോഗ്യ ഗുണങ്ങൾ നൽകും.

• പേരയിലയിൽ ആന്റി ബാക്ടീരിയൽ ഗുണങ്ങളും ഉയർന്ന നാരുകളും ഉണ്ട്. ഇവ കുടലിന്റെ ആരോഗ്യം കൂട്ടുകയും മലബന്ധം ഒഴിവാക്കുകയും ചെയ്യുന്നു. ഈ ഇലകൾ രക്തത്തിലെ ഗ്ലൂക്കോസിന്റെ അളവ് സ്ഥിരപ്പെടുത്താൻ സഹായിക്കുന്നു, പ്രമേഹമുള്ളവർക്ക് ഭക്ഷണത്തിന് ശേഷം രക്തത്തിലെ പഞ്ചസാരയുടെ വർധനവ് തടയുന്നതിലൂടെ ഗുണം ചെയ്യുന്നു.
• പേരയിലകൾ രോഗപ്രതിരോധ സംവിധാനത്തെ ശക്തിപ്പെടുത്തുന്നു. ഉയർന്ന അളവിൽ ആന്റിഓക്‌സിഡന്റുകളും വിറ്റാമിൻ സിയും അടങ്ങിയിരിക്കുന്നതിനാൽ അണുബാധകളെയും രോഗങ്ങളെയും ചെറുക്കാൻ ശരീരത്തെ സഹായിക്കുന്നു.
• നല്ല കൊളസ്‌ട്രോൾ (എച്ച്‌ഡിഎൽ) കൂട്ടുന്നതിനൊപ്പം ചീത്ത കൊളസ്‌ട്രോൾ (എൽഡിഎൽ) കുറയ്ക്കാൻ പേരയിലയ്ക്ക് കഴിയും. അതിലൂടെ ഹൃദയാരോഗ്യം വർധിപ്പിക്കുകയും ഹൃദ്രോഗ സാധ്യത കുറയ്ക്കുകയും ചെയ്യുന്നു.
• പേരയിലയിലെ ആന്റിഓക്‌സിഡന്റുകൾ ഫ്രീ റാഡിക്കലുകളെ നിർവീര്യമാക്കാൻ സഹായിക്കും. കോശങ്ങളുടെ കേടുപാടുകൾ തടയുന്നതിലൂടെ കാൻസർ സാധ്യത കുറയ്ക്കും.
• ആർത്തവ വേദന കുറയ്ക്കാൻ പേരയിലയ്ക്ക് കഴിയുമെന്ന് തെളിയിക്കപ്പെട്ടിട്ടുണ്ട്.

പേരയില ദൈനംദിന ഭക്ഷണത്തിൽ ഉൾപ്പെടുത്തുന്നതിന് മുമ്പ്, നിരവധി മുൻകരുതലുകൾ എടുക്കണം. ആദ്യമായി കഴിക്കുന്ന അളവ് പ്രധാനമാണ്. പേരയിലയിൽ ധാരാളം നാരുകൾ അടങ്ങിയിരിക്കുന്നതിനാൽ കൂടുതൽ കഴിക്കുന്നത് വയറിളക്കം, ഗ്യാസ് ഉൾപ്പെടെയുള്ള ദഹനപ്രശ്നങ്ങൾക്ക് കാരണമാകും. ഗർഭിണികളും മുലയൂട്ടുന്ന സ്ത്രീകളും പേരയില കഴിക്കുന്നതിന് മുമ്പ് ഒരു ആരോഗ്യ വിദഗ്ധനെ സമീപിക്കണം.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• നിറത്തിലല്ല ഗുണത്തിലാണ് കാര്യം, ഊർജവും ഉന്മേഷവും ലഭിക്കാൻ ഈ ജ്യൂസ് കുടിക്കൂ
• കൊളസ്ട്രോൾ കുറയ്ക്കണോ? ഇഞ്ചി പൊടിച്ചെടുത്ത് കഴിക്കാം
• രക്തക്കുറവാണോ പ്രശ്നം? ഇവയിൽ ഏതെങ്കിലും ഭക്ഷണത്തിൽ ഉൾപ്പെടുത്തൂ
• പ്രമേഹം തടയണോ? ഡാർക്ക് ചോക്ലേറ്റ് കഴിച്ചോളൂ