ആപ്പിളും അവോക്കാഡോയുമല്ല; പോഷകഗുണങ്ങളിൽ മുന്നിൽ ഈ നാടൻ സൂപ്പർഫ്രൂട്ട്

ഇറക്കുമതി ചെയ്ത വിദേശ പഴങ്ങൾക്കും വിലകൂടിയ സപ്ലിമെന്റുകൾക്കും പിന്നാലെ പോകുന്ന മലയാളിക്ക് നമ്മുടെ തൊടിയിലെ 'നെല്ലിക്കയുടെ' പ്രാധാന്യം പലപ്പോഴും മനസ്സിലാകാറില്ല. ആപ്പിളിനേക്കാളും അവോക്കാഡോയേക്കാളും പോഷകഗുണങ്ങൾ നൽകാൻ നമ്മുടെ ഈ കുഞ്ഞൻ നെല്ലിക്കയ്ക്ക് സാധിക്കുമെന്ന് പഠനങ്ങൾ വ്യക്തമാക്കുന്നു.

വെബ്എംഡി റിപ്പോർട്ട് പ്രകാരം, വെറും 100 ഗ്രാം നെല്ലിക്കയിൽ അടങ്ങിയിരിക്കുന്ന വൈറ്റമിൻ സി ഏതാണ്ട് 20 ഓറഞ്ചുകൾക്ക് തുല്യമാണ്. കൃത്രിമ വൈറ്റമിൻ ഗുളികകളേക്കാൾ ശരീരം എളുപ്പത്തിൽ ആഗിരണം ചെയ്യുന്നത് നെല്ലിക്കയിലെ പ്രകൃതിദത്തമായ പോഷകങ്ങളാണ്.

വൈറ്റമിൻ സി കൂടാതെ ആന്റിഓക്‌സിഡന്റുകൾ, പോളിഫെനോൾസ് എന്നിവ നെല്ലിക്കയിൽ ധാരാളമുണ്ട്. ഇത് ശരീരത്തിലെ കോശങ്ങൾക്കുണ്ടാകുന്ന നാശത്തെ തടയുകയും ഹൃദ്രോഗം, പ്രമേഹം എന്നിവയുടെ സാധ്യത കുറയ്ക്കുകയും ചെയ്യുന്നു.

നെല്ലിക്കയിലെ നാരുകൾ രക്തത്തിലെ പഞ്ചസാരയുടെ അളവ് പെട്ടെന്ന് കൂടുന്നത് തടയാൻ സഹായിക്കുന്നു. ടൈപ്പ് 2 പ്രമേഹമുള്ളവർക്ക് ഇത് ഏറെ ഫലപ്രദമാണെന്ന് ഗവേഷണങ്ങൾ സൂചിപ്പിക്കുന്നു.

ദഹനസംബന്ധമായ പ്രശ്നങ്ങൾക്കും മലബന്ധത്തിനും നെല്ലിക്ക പരിഹാരമാണ്. ഇതിലെ വൈറ്റമിൻ എ കാഴ്ചശക്തി വർധിപ്പിക്കാനും കണ്ണുകളെ അണുബാധയിൽ നിന്ന് സംരക്ഷിക്കാനും സഹായിക്കുന്നു.

വിലകൂടിയ വിദേശ പഴങ്ങൾ വാങ്ങി കീശ കാലിയാക്കുന്നതിനേക്കാൾ നല്ലത്, നമ്മുടെ പറമ്പിലെ ഈ അമൃത് ശീലമാക്കുന്നതല്ലേ? ദിവസവും ഒരു നെല്ലിക്ക എന്ന ശീലം ശരീരത്തിന് നൽകുന്നത് വലിയ കരുത്താണ്.