scorecardresearch

കൊളസ്ട്രോൾ കുറയ്ക്കാം, ഈ പ്രോട്ടീൻ അടങ്ങിയ ഭക്ഷണങ്ങൾ കഴിച്ചോളൂ

നിങ്ങളൊരു നോൺ-വെജിറ്റേറിയൻ ആണെങ്കിൽ, മാംസത്തിനു പകരം മത്സ്യം തിരഞ്ഞെടുക്കുക

കൊളസ്ട്രോൾ കുറയ്ക്കാം, ഈ പ്രോട്ടീൻ അടങ്ങിയ ഭക്ഷണങ്ങൾ കഴിച്ചോളൂ

നിങ്ങൾ എന്ത് ഭക്ഷണമാണോ കഴിക്കുന്നത്, എന്താണോ ഒഴിവാക്കുന്നത്, ഇവ രണ്ടും ഹൃദയാരോഗ്യത്തെ സ്വാധീനിക്കുന്നുണ്ട്. പ്രത്യേകിച്ച് ശരീരത്തിൽ ‘മോശം’ കൊളസ്‌ട്രോൾ അടിഞ്ഞുകൂടുമ്പോൾ, ഭക്ഷണക്രമത്തിൽ ചില മാറ്റങ്ങൾ വരുത്തേണ്ടതുണ്ട്. കൊഴുപ്പ് കൂടിയ ഭക്ഷണങ്ങൾ കഴിക്കുന്നത് കുറയ്ക്കുക, ഒമേഗ -3 ഫാറ്റി ആസിഡുകളും ലയിക്കുന്ന നാരുകളും അടങ്ങിയ ഭക്ഷണങ്ങൾ കഴിക്കുക, പാലുൽപ്പന്നങ്ങളിൽ കാണപ്പെടുന്ന വേ (whey) പ്രോട്ടീൻ ഭക്ഷണത്തിൽ ചേർക്കുക എന്നിവ ഇതിൽ ഉൾപ്പെടുന്നു.

ചില പ്രോട്ടീനുകൾ ഹൃദയത്തിന് ആരോഗ്യകരമാണെന്നും ശരീരത്തിൽ നിന്ന് ഉയർന്ന കൊളസ്ട്രോൾ കുറയ്ക്കാനോ ഇല്ലാതാക്കാനോ സഹായിക്കുമെന്നും വിദഗ്ധർ വിശ്വസിക്കുന്നു. പ്രോട്ടീൻ വളരെ പ്രധാനപ്പെട്ട ഒരു മാക്രോ ന്യൂട്രിയന്റാണ്, അത് ഊർജനില വർധിപ്പിക്കുന്നതിന് അത്യന്താപേക്ഷിതമാണ്. മാംസം, കോഴി, മത്സ്യം, മുട്ട, പാലുൽപ്പന്നങ്ങൾ എന്നിവയുൾപ്പെടെ വിവിധ ഭക്ഷണങ്ങളിൽ പ്രോട്ടീനുണ്ട്.

ശരീരത്തിലെ ഉയർന്ന കൊളസ്‌ട്രോളിന്റെ അപകടസാധ്യത കുറയ്ക്കുന്നതിന് ആരോഗ്യകരമായ ഭക്ഷണങ്ങൾ കഴിക്കണം. എല്ലാ മാംസങ്ങളിലും പ്രോട്ടീൻ അടങ്ങിയിട്ടുണ്ടെങ്കിലും എല്ലാം ആരോഗ്യകരമല്ല. ബേക്കൺ, സോസേജ് തുടങ്ങിയ സംസ്കരിച്ച മാംസങ്ങളിൽ എൽഡിഎൽ കൊളസ്ട്രോളിന്റെ അളവ് കൂടുതലാണ്, ഇത് ഹൃദയത്തിന് ദോഷകരമാണെന്ന് പറയപ്പെടുന്നു. കൊളസ്ട്രോൾ കുറയ്ക്കുന്നതിനുള്ള ആരോഗ്യകരമായ പ്രോട്ടീൻ ഉറവിടങ്ങളിൽ ചിലത് ഇവയാണ്.

കടൽ ഭക്ഷണം

നിങ്ങളൊരു നോൺ-വെജിറ്റേറിയൻ ആണെങ്കിൽ, മാംസത്തിനു പകരം മത്സ്യം തിരഞ്ഞെടുക്കുക. റെഡ് മീറ്റ് ആരോഗ്യകരമായ ഒരു ബദലാണ്. എല്ലാ മത്സ്യങ്ങളിലും കുറച്ച് കൊളസ്ട്രോൾ അടങ്ങിയിട്ടുണ്ടെങ്കിലും, ശരീരത്തിലെ കൊളസ്ട്രോൾ അളവ് നിയന്ത്രിക്കാൻ സഹായിക്കുന്ന കൊഴുപ്പുകളും അവയിൽ അടങ്ങിയിട്ടുണ്ട്. സാൽമൺ, അയല, ട്യൂണ എന്നിവയിൽ ഒമേഗ-3 ഫാറ്റി ആസിഡുകൾ ധാരാളം അടങ്ങിയിട്ടുണ്ട്, അവ ട്രൈഗ്ലിസറൈഡിന്റെ അളവ് കുറയ്ക്കുന്നതിലൂടെ ആരോഗ്യകരമായ കൊളസ്ട്രോൾ നില നിലനിർത്താൻ സഹായിക്കുന്ന ഭക്ഷണ കൊഴുപ്പുകളാണ്.

പയർവർഗ്ഗങ്ങൾ

പയർവർഗ്ഗങ്ങൾ സസ്യാധിഷ്ഠിത പ്രോട്ടീൻ ഭക്ഷണങ്ങളാണ്, അവയിൽ നാരുകൾ കൂടുതലാണ്. രക്തത്തിലെ കൊളസ്ട്രോൾ കുറയ്ക്കാൻ അവ സഹായിക്കുന്നു. പയർവർഗ്ഗങ്ങളിലെ നാരുകൾ കുടലിലെ കൊളസ്ട്രോൾ ആഗിരണം കുറയ്ക്കാൻ സഹായിക്കുന്നു. ആരോഗ്യകരമായ കുടൽ ബാക്ടീരിയകളുടെ വളർച്ചയെ പ്രോത്സാഹിപ്പിക്കുകയും ദഹനത്തിന്റെ ആരോഗ്യം മെച്ചപ്പെടുത്തുകയും ചെയ്യുന്നു. കൂടുതൽ പയർവർഗ്ഗങ്ങളും ബീൻസും കഴിക്കുന്നത് രക്തത്തിലെ പഞ്ചസാരയുടെ അളവ് കുറയ്ക്കുന്നു.

നട്സുകളും വിത്തുകളും

ബദാം, പിസ്ത, വാൽനട്ട്, ഫ്ളാക്സ് സീഡുകൾ, എള്ള് എന്നിവയുൾപ്പെടെയുള്ള നട്സുകളും വിത്തുകളും ഹൃദയത്തെ സംരക്ഷിക്കാനും ശരീരത്തിൽ ‘മോശം’ എൽഡിഎൽ കൊളസ്ട്രോൾ അടിഞ്ഞുകൂടുന്നത് കുറയ്ക്കാനും സഹായിക്കുന്നു. ഇവയിൽ ഭൂരിഭാഗവും ആരോഗ്യകരമായ കൊഴുപ്പുകളും ഹൃദയത്തിന് ആവശ്യമായ പോഷകങ്ങളും അടങ്ങിയിട്ടുണ്ട്. ഇവയിൽ നാരുകളുമുണ്ട്, ഇത് ദഹനവ്യവസ്ഥയെ സഹായിക്കും.

മുഴുവൻ ധാന്യങ്ങൾ

മുഴുവൻ ധാന്യങ്ങളായ ഗോതമ്പ്, ക്വിനോവ എന്നിവയൊക്കെ പ്രോട്ടീന്റെ സമ്പന്നമായ ഉറവിടങ്ങളാണ്. വിറ്റാമിനുകൾ, ധാതുക്കൾ, പ്രോട്ടീൻ, നാരുകൾ, മറ്റ് ആരോഗ്യകരമായ സസ്യ സംയുക്തങ്ങൾ എന്നിവയുൾപ്പെടെ വിവിധ പ്രധാന പോഷകങ്ങളും അവയിൽ അടങ്ങിയിട്ടുണ്ട്. ഉയർന്ന കൊളസ്ട്രോൾ ഉള്ള ആളുകൾക്ക് ധാന്യങ്ങൾ അടങ്ങിയ ഭക്ഷണം കഴിക്കുന്നത് വളരെ നല്ലതാണെന്ന് കണ്ടെത്തിയിട്ടുണ്ട്. ഇത് ഹൃദയത്തിന് അങ്ങേയറ്റം ഹാനികരമായ എൽഡിഎൽ കൊളസ്ട്രോൾ കുറയ്ക്കുമെന്ന് പറയപ്പെടുന്നു. കൂടാതെ, ഇവ നാരുകളുടെ മികച്ച ഉറവിടങ്ങളാണ്, ഇത് കുടലിന്റെ ആരോഗ്യം മെച്ചപ്പെടുത്താൻ മാത്രമല്ല, ശരീരഭാരം കുറയ്ക്കാനും സഹായിക്കുന്നു.

ആരോഗ്യകരവും പോഷകസമൃദ്ധവുമായ ഭക്ഷണക്രമം കൂടാതെ, പതിവായി വ്യായാമം ചെയ്യുകയും വേണമെന്ന് വിദഗ്ധർ പറയുന്നു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Stay updated with the latest news headlines and all the latest Health news download Indian Express Malayalam App.

Web Title: How to lower cholesterol the best protein sources

Best of Express