പ്രമേഹം പാരമ്പര്യമാണോ? മരുന്നില്ലാതെ നിയന്ത്രിക്കാനാകുമോ? അറിഞ്ഞിരിക്കേണ്ട കാര്യങ്ങൾ

ജീവിതശൈലി രോഗങ്ങളിൽ ഏറ്റവും മുൻപന്തിയിലാണ് പ്രമേഹം അഥവാ ഡയബറ്റിസ്. പ്രമേഹം ബാധിച്ചാൽ പിന്നെ ആയുഷ്കാലം മുഴുവൻ മരുന്ന് കഴിക്കണമെന്നും ഭക്ഷണപ്രിയമെല്ലാം ഉപേക്ഷിക്കണമെന്നും കരുതുന്നവരാണ് ഭൂരിഭാഗവും. എന്നാൽ പ്രമേഹത്തെക്കുറിച്ച് സമൂഹത്തിൽ നിലനിൽക്കുന്ന പല ധാരണകളും വെറും മിഥ്യകളാണെന്ന് ഗ്യാസ്ട്രോ എൻട്രോളജിസ്റ്റ് ഡോ. മാണിക്യം വ്യക്തമാക്കുന്നു.

പലരും വിശ്വസിക്കുന്നത് പ്രമേഹം പാരമ്പര്യമായതുകൊണ്ട് അതിൽ തങ്ങൾക്ക് ഒന്നും ചെയ്യാനില്ലെന്നാണ്. എന്നാൽ ഡോക്ടർ പറയുന്നത്, കുടുംബപരമായി നിങ്ങൾക്ക് പ്രമേഹസാധ്യത ഉണ്ടായേക്കാം, എന്നാൽ അത് രോഗമായി മാറണമെന്നോ അല്ലെങ്കിൽ ഒരിക്കലും ഭേദമാവില്ലെന്നോ അർത്ഥമില്ല. കൃത്യമായ ഉറക്കം, മാനസിക സമ്മർദം കുറയ്ക്കുക, കുടലിന്റെ ആരോഗ്യം സംരക്ഷിക്കുക എന്നിവയിലൂടെ ഇൻസുലിൻ റെസിസ്റ്റൻസ് മറികടക്കാൻ സാധിക്കും. പാരമ്പര്യം എന്നത് ഒരു സാധ്യത മാത്രമാണ്.

രാവിലെ വെറും വയറ്റിൽ എടുക്കുന്ന രക്തപരിശോധനയിൽ അളവ് കൃത്യമാണെന്നു കണ്ട് പലരും ആശ്വസിക്കാറുണ്ട്. എന്നാൽ ഇത് അപകടകരമാണ്. പലരിലും വെറും വയറ്റിലെ അളവ് സാധാരണ നിലയിലായിരിക്കുമെങ്കിലും ഭക്ഷണത്തിന് ശേഷമുള്ള ഷുഗർ നില വളരെ കൂടുതലായിരിക്കും.

ഇൻസുലിൻ എടുത്ത് തുടങ്ങിയാൽ പിന്നെ അത് നിർത്താൻ കഴിയില്ല എന്നത് പ്രമേഹരോഗികൾക്കിടയിലെ ഏറ്റവും വലിയ പേടിയാണ്. എന്നാൽ ശാസ്ത്രീയമായ രീതിയിൽ ജീവിതശൈലി ക്രമീകരിച്ചാൽ വർഷങ്ങളോളം ഇൻസുലിൻ എടുത്തവർക്ക് പോലും അത് സുരക്ഷിതമായി ഒഴിവാക്കാൻ സാധിക്കുമെന്ന് ഡോ. മാണിക്യം ചൂണ്ടിക്കാട്ടുന്നു.

രോഗത്തിന്റെ ലക്ഷണത്തിനല്ല, മറിച്ച് അതിന്റെ മൂലകാരണത്തിനാണ് ചികിത്സ നൽകേണ്ടത്. ശരിയായ ഭക്ഷണക്രമവും വ്യായാമവും വഴി ശരീരത്തിലെ ഇൻസുലിൻ പ്രവർത്തനം മെച്ചപ്പെടുത്തിയാൽ മരുന്നുകളെ ആശ്രയിക്കുന്നത് കുറയ്ക്കാൻ സാധിക്കും.

പ്രമേഹത്തെ നിയന്ത്രിക്കുന്നത് മരുന്നുകൾ മാത്രമല്ല, മറിച്ച് ദിവസേനയുള്ള ശീലങ്ങളാണ്. ശാസ്ത്രീയമായ ഭക്ഷണക്രമം, കൃത്യമായ വ്യായാമം, മാനസികാരോഗ്യം എന്നിവയിലൂടെ പ്രമേഹത്തെ ഫലപ്രദമായി പ്രതിരോധിക്കാനും നിയന്ത്രിക്കാനും ഓരോരുത്തർക്കും സാധിക്കും.