തൈറോയ്ഡ് തകരാറിലായോ? ഈ 5 ശീലങ്ങൾ ഉടൻ മാറ്റിക്കോളൂ

ശരീരത്തിലെ ഉപാപചയ പ്രവർത്തനങ്ങളെയും ഹോർമോൺ സന്തുലിതാവസ്ഥയെയും നിയന്ത്രിക്കുന്നതിൽ നിർണായക പങ്കുവഹിക്കുന്ന ഒന്നാണ് തൈറോയ്ഡ് ഗ്രന്ഥി. എന്നാൽ നമ്മുടെ ചില ജീവിതശൈലീ മാറ്റങ്ങൾ ഈ കൊച്ചു ഗ്രന്ഥിയുടെ പ്രവർത്തനത്തെ താളംതെറ്റിച്ചേക്കാം. തൈറോയ്ഡ് ആരോഗ്യം സംരക്ഷിക്കാൻ ഒഴിവാക്കേണ്ട 5 പ്രധാന ശീലങ്ങളെക്കുറിച്ച് ഭുവനേശ്വർ മണിപ്പാൽ ഹോസ്പിറ്റലിലെ എൻഡോക്രൈനോളജിസ്റ്റ് ഡോ. അങ്കിത തിവാരി വിശദീകരിച്ചിട്ടുണ്ട്.

ഉറക്കമില്ലായ്മ (7 മണിക്കൂറിൽ താഴെയുള്ള ഉറക്കം)

ശരീരത്തിലെ ഹോർമോണുകൾ പുനരുജ്ജീവിപ്പിക്കപ്പെടുന്നത് നാം ഉറങ്ങുമ്പോഴാണ്. ദിവസവും കൃത്യമായ സമയത്ത് ഉറങ്ങാതിരിക്കുന്നതും 7 മണിക്കൂറിൽ കുറവ് ഉറങ്ങുന്നതും തൈറോയ്ഡ് ഹോർമോണിന്റെ ഉത്പാദനത്തെ ബാധിക്കും. ഫോൺ ഉപയോഗം കുറച്ച് കൃത്യമായ ഉറക്കക്രമം പാലിക്കുന്നത് ഹോർമോൺ നില മെച്ചപ്പെടുത്താൻ സഹായിക്കും.

വിട്ടുമാറാത്ത മാനസിക സമ്മർദം

ഇന്നത്തെ കാലത്ത് സ്ട്രെസ് ഒഴിവാക്കുക പ്രയാസമാണെങ്കിലും, വിട്ടുമാറാത്ത മാനസിക സമ്മർദം തൈറോയ്ഡ് പ്രവർത്തനത്തെ സാരമായി ബാധിക്കും. സ്ട്രെസ് വർധിക്കുമ്പോൾ ശരീരം നൽകുന്ന സിഗ്നലുകൾ മാറുകയും ഇത് ഹോർമോൺ ഉത്പാദനത്തിൽ വ്യതിയാനങ്ങൾ വരുത്തുകയും ചെയ്യുന്നു.

ഭക്ഷണം ഒഴിവാക്കുന്നത്

ശരീര ഭാരം കുറയ്ക്കാനോ മറ്റോ വേണ്ടി പ്രഭാതഭക്ഷണമോ ഉച്ചഭക്ഷണമോ ഒഴിവാക്കുന്ന ശീലം തൈറോയ്ഡ് രോഗികൾക്ക് ദോഷകരമാണ്. കാലറി വളരെ കുറഞ്ഞ ഡയറ്റുകൾ സ്വീകരിക്കുമ്പോൾ, ഊർജം ലാഭിക്കാനായി ശരീരം മെറ്റബോളിസം കുറയ്ക്കാൻ തുടങ്ങും. ഇത് തൈറോയ്ഡ് ഗ്രന്ഥിയുടെ പ്രവർത്തനവേഗത കുറയ്ക്കും. കൂടാതെ സംസ്കരിച്ച ഭക്ഷണങ്ങൾ, അമിത മധുരം എന്നിവ ഒഴിവാക്കാനും ഡോക്ടർ നിർദ്ദേശിക്കുന്നു.

ഡോക്ടറുടെ നിർദേശമില്ലാതെയുള്ള സപ്ലിമെന്റുകൾ

വണ്ണം കുറയ്ക്കാനോ ഊർജം വർധിപ്പിക്കാനോ വേണ്ടി പലരും ഡോക്ടറുടെ നിർദേശമില്ലാതെ സപ്ലിമെന്റുകൾ വാങ്ങി ഉപയോഗിക്കാറുണ്ട്. ഇത് ഗുണത്തേക്കാളേറെ ദോഷം ചെയ്യും. കൃത്യമായ വൈദ്യപരിശോധനയില്ലാതെ കഴിക്കുന്ന ഇത്തരം മരുന്നുകൾ ഹോർമോൺ നില തകിടം മറിക്കാൻ കാരണമാകും.

വ്യായാമമില്ലായ്മ

ശാരീരിക അധ്വാനത്തിന്റെ കുറവ് ശരീരത്തിൽ വീക്കം ഉണ്ടാകാനും മെറ്റബോളിസം മന്ദഗതിയിലാകാനും കാരണമാകും. ഇത് പരോക്ഷമായി തൈറോയ്ഡ് ആരോഗ്യത്തെ നശിപ്പിക്കുന്നു. നിത്യവും ലളിതമായ വ്യായാമങ്ങളെങ്കിലും ശീലമാക്കുന്നത് ഹോർമോൺ സന്തുലിതാവസ്ഥ നിലനിർത്താൻ സഹായിക്കും.