പാലും പഴങ്ങളും ഒന്നിച്ച് കഴിക്കാമോ? സത്യാവസ്ഥ വെളിപ്പെടുത്തി ഫിറ്റ്‌നസ് കോച്ച്

നമ്മുടെ ദൈനംദിന ഭക്ഷണക്രമത്തിൽ പാലും പഴങ്ങളും ചേർത്തുള്ള വിഭവങ്ങൾ (ഉദാഹരണത്തിന് മിൽക്ക് ഷേക്കുകൾ, സ്മൂത്തികൾ) വളരെ സാധാരണമാണ്. എന്നാൽ പാലും പഴങ്ങളും ഒന്നിച്ച് കഴിക്കുന്നത് ആരോഗ്യത്തിന് ദോഷകരമാണെന്ന തരത്തിലുള്ള ചർച്ചകൾ സോഷ്യൽ മീഡിയയിലും മറ്റും സജീവമാണ്. പഴങ്ങളിലെ ആസിഡ് പാലിനെ ദഹിപ്പിക്കാൻ പ്രയാസമുണ്ടാക്കുമെന്നും വയറ്റിൽ പാൽ പിരിയുന്നതിന് കാരണമാകുമെന്നുമാണ് പലരുടെയും ആശങ്ക.

എന്നാൽ ഈ വിഷയത്തിൽ പുതിയൊരു കാഴ്ചപ്പാടുമായി രംഗത്തെത്തിയിരിക്കുകയാണ് ഫിറ്റ്‌നസ് കോച്ചായ റാൽസ്റ്റൺ ഡിസൂസ. ഇൻസ്റ്റാഗ്രാമിലൂടെ അദ്ദേഹം പങ്കുവെച്ച വീഡിയോയിൽ ഈ ഭക്ഷണരീതിയെക്കുറിച്ചുള്ള ഭയത്തെ അദ്ദേഹം ദൂരീകരിക്കുന്നു.

Also Read: ജിമ്മിൽ പോകാതെ 18 കിലോ കുറച്ച് ആമിർ ഖാൻ; 'മാജിക്' കാട്ടിയത് ആഹാരക്രമത്തിലെ ഈ മാറ്റം

പാൽ പിരിയുന്നത് സ്വാഭാവിക പ്രക്രിയ

പഴങ്ങളിലെ അസിഡിറ്റി കാരണം പാൽ പിരിയുന്നതിനെ ഭയക്കേണ്ടതില്ലെന്ന് റാൽസ്റ്റൺ പറയുന്നു. "നാരങ്ങ നീരോ വിനാഗിരിയോ പാലിൽ ചേർത്താൽ പാലിന്റെ പിഎച്ച് നില താഴുകയും അതിലെ കസീൻ പ്രോട്ടീനുകൾ തമ്മിൽ കൂടിച്ചേർന്ന് പാൽ പിരിയുകയും ചെയ്യുന്നു. ഇത് കാണുമ്പോൾ നമുക്ക് പേടി തോന്നാം. എന്നാൽ നാം പാൽ മാത്രം കുടിച്ചാലും നമ്മുടെ വയറ്റിലെ സ്വാഭാവികമായ ആസിഡുമായി കലരുമ്പോൾ ഈ പ്രക്രിയ അവിടെയും നടക്കുന്നുണ്ട്," അദ്ദേഹം വിശദീകരിച്ചു.

ഇതൊരു മോശം ഭക്ഷണരീതിയാണോ?

പഴങ്ങളും പാലും ചേർത്ത് കഴിക്കുന്നത് ആരോഗ്യത്തിന് ഹാനികരമല്ലെന്നാണ് റാൽസ്റ്റണിന്റെ അഭിപ്രായം. പാൽ പിരിയുന്നത് ഒരു സ്വാഭാവിക പ്രക്രിയയാണെന്നും അത് ദഹനത്തിന് തടസമാകുന്നില്ലെന്നും അദ്ദേഹം വ്യക്തമാക്കുന്നു. പഴങ്ങൾക്കൊപ്പം പാൽ കഴിക്കുന്നത് പ്രഭാതഭക്ഷണത്തിലും മറ്റും ഉൾപ്പെടുത്തുന്നത് കൊണ്ട് ദോഷമില്ല.

Also Read: ജോൺ എബ്രഹാമിന് ഈ രണ്ട് പച്ചക്കറികൾ കഴിക്കാനാവില്ല; പിന്നിലെ കാരണം വെളിപ്പെടുത്തി ട്രെയിനർ

View this post on Instagram

A post shared by Ralston D'Souza (@ral.livezy)

ശ്രദ്ധിക്കേണ്ട കാര്യങ്ങൾ

എങ്കിലും എല്ലാവരുടെയും ദഹനവ്യവസ്ഥ ഒരേപോലെയല്ല. പാലും പഴങ്ങളും ചേർത്തുള്ള സ്മൂത്തികളോ ഷേക്കുകളോ കഴിക്കുമ്പോൾ ചില കാര്യങ്ങൾ ശ്രദ്ധിക്കുന്നത് നന്നായിരിക്കും. സിട്രസ് പഴങ്ങൾ (നാരങ്ങ, ഓറഞ്ച് തുടങ്ങിയവ) പാലിനൊപ്പം ചേർക്കുന്നത് ചിലരിൽ വയറിലെ അസ്വസ്ഥതകൾക്ക് കാരണമായേക്കാം. 

Also Read: ഒരു മാസം ദിവസവും 3 ലിറ്റർ വെള്ളം കുടിച്ചാൽ ശരീരത്തിന് എന്ത് സംഭവിക്കും?

മധുരമുള്ള പഴങ്ങളാണ് (നേന്ത്രപ്പഴം, മാമ്പഴം തുടങ്ങിയവ) പാലിനൊപ്പം ചേർക്കാൻ കൂടുതൽ അനുയോജ്യം. വയറിൽ ഗ്യാസ്, അസിഡിറ്റി തുടങ്ങിയ പ്രശ്നങ്ങൾ പതിവായി ഉള്ളവർ പാലും പഴങ്ങളും വേവ്വേറെ കഴിക്കുന്നതാണ് ഉചിതം. പാൽ തിളപ്പിച്ച ശേഷം തണുപ്പിച്ച് മാത്രം പഴങ്ങളുമായി മിക്സ് ചെയ്യാൻ ശ്രദ്ധിക്കുക.

പാലും പഴങ്ങളും ഒന്നിച്ച് കഴിക്കുന്നത് വലിയ ആരോഗ്യപ്രശ്നങ്ങൾ ഉണ്ടാക്കുമെന്ന പ്രചാരണം വാസ്തവവിരുദ്ധമാണ്. നിങ്ങളുടെ ദഹനപ്രക്രിയക്ക് അനുയോജ്യമാണെങ്കിൽ ധൈര്യമായി ഈ കോംബോ ഭക്ഷണത്തിൽ ഉൾപ്പെടുത്താവുന്നതാണ്.

DISCLAIMER: മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഡയറ്റും വ്യായാമവും ചെയ്തിട്ടും എന്തുകൊണ്ട് ഷുഗർ കുറയുന്നില്ല?