പഴങ്ങളിലെ പഞ്ചസാര ദോഷകരമോ? തെറ്റിദ്ധാരണ തിരുത്തി ഡോക്ടർ

ശരീര ഭാരം കുറയ്ക്കാനോ പ്രമേഹം നിയന്ത്രിക്കാനോ ശ്രമിക്കുന്നവർ ഭക്ഷണക്രമത്തിൽ നിന്ന് ആദ്യം ഒഴിവാക്കുന്നത് മധുരമാണ്. എന്നാൽ ഇക്കൂട്ടത്തിൽ പഴങ്ങൾ ഉൾപ്പെടുത്താമോ എന്ന കാര്യത്തിൽ പലരിലും ആശയക്കുഴപ്പം നിലനിൽക്കുന്നുണ്ട്. പഴങ്ങളിലും പഞ്ചസാര (ഫ്രക്ടോസ്) അടങ്ങിയിട്ടുള്ളതിനാൽ, 'ഷുഗർ-ഫ്രീ' ചലഞ്ചുകൾ ഏറ്റെടുക്കുന്നവർ പലപ്പോഴും പഴങ്ങൾ പൂർണമായും ഒഴിവാക്കാറാണ് പതിവ്. എന്നാൽ ഈ ധാരണ തെറ്റാണെന്ന് വ്യക്തമാക്കിയിരിക്കുകയാണ് ഹാർവാർഡ് സർവകലാശാലയിലെ ഗ്യാസ്ട്രോഎൻട്രോളജിസ്റ്റ് ഡോ.സൗരഭ് സേത്തി.

Also Read: പേരയ്ക്ക തൊലി കളഞ്ഞ് കഴിക്കൂ; പ്രമേഹവും കൊളസ്ട്രോളും നിയന്ത്രിക്കാമെന്ന് പുതിയ പഠനം

എന്തുകൊണ്ട് പഴങ്ങൾ ഒഴിവാക്കേണ്ടതില്ല? 

പഴങ്ങളിൽ അടങ്ങിയിരിക്കുന്ന സ്വാഭാവിക പഞ്ചസാരയും മിഠായികളിലും സോഫ്റ്റ് ഡ്രിങ്കുകളിലും അടങ്ങിയിരിക്കുന്ന 'ആഡഡ് ഷുഗറും' തമ്മിൽ വലിയ വ്യത്യാസമുണ്ടെന്ന് ഡോ.സേത്തി ചൂണ്ടിക്കാട്ടുന്നു. പഴങ്ങൾ കഴിക്കുമ്പോൾ അതിലെ പഞ്ചസാരയ്‌ക്കൊപ്പം ശരീരത്തിന് ആവശ്യമായ നാരുകൾ, വൈറ്റമിനുകൾ, ധാതുക്കൾ, ആന്റിഓക്‌സിഡന്റുകൾ എന്നിവയും ലഭിക്കുന്നു.

പഴങ്ങളിലെ നാരുകൾ പഞ്ചസാരയെ ശരീരം സാവധാനം ആഗിരണം ചെയ്യാൻ സഹായിക്കുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയുന്നു. എന്നാൽ പ്രോസസ്സ് ചെയ്ത ഭക്ഷണങ്ങളിലെ പഞ്ചസാര രക്തത്തിൽ പെട്ടെന്ന് കലരുകയും ഇൻസുലിൻ അളവ് വർധിപ്പിക്കുകയും ചെയ്യുന്നു.

Also Read: ദഹനക്കേടാണെന്നു കരുതി തള്ളിക്കളയരുത്; ഈ ലക്ഷണങ്ങൾ ഫാറ്റി ലിവറിന്റെ മുന്നറിയിപ്പാകാം

ഒരു 14 ദിവസത്തെ ഷുഗർ-ഫ്രീ ചലഞ്ച് നടത്തുന്നവർക്ക് പോലും ദിവസവും ഒന്നോ രണ്ടോ പഴങ്ങൾ കഴിക്കാമെന്ന് അദ്ദേഹം പറയുന്നു. ഇതിനായി ചില നിർദേശങ്ങളും അദ്ദേഹം മുന്നോട്ട് വച്ചിട്ടുണ്ട്. ജ്യൂസുകളോ ഉണക്കിയ പഴങ്ങളോ ഒഴിവാക്കി പഴങ്ങൾ നേരിട്ട് കഴിക്കുന്നതാണ് ഉത്തമം. ജ്യൂസുകളിൽ നാരുകൾ നഷ്ടപ്പെടുന്നതിനാൽ പഞ്ചസാരയുടെ അളവ് കൂടാൻ സാധ്യതയുണ്ട്.

ആപ്പിൾ, ബെറികൾ, നാരങ്ങ വർഗത്തിൽപ്പെട്ട പഴങ്ങൾ, പിയർ എന്നിവ നാരുകളാൽ സമ്പന്നമായതിനാൽ ഇവ മികച്ച ഓപ്ഷനുകളാണ്. പഴങ്ങൾ തനിയെ കഴിക്കുന്നതിന് പകരം അൽപം പ്രോട്ടീനോ (ഉദാഹരണത്തിന് നട്സ്) നല്ല കൊഴുപ്പോ അടങ്ങിയ ഭക്ഷണത്തിനൊപ്പം കഴിക്കുന്നത് രക്തത്തിലെ പഞ്ചസാരയെ കൂടുതൽ നിയന്ത്രിക്കാൻ സഹായിക്കും.

View this post on Instagram

A post shared by Saurabh Sethi MD MPH | Gastroenterologist (@doctor.sethi)

Also Read: കറിവേപ്പിലയും മല്ലിയിലയും: ആരോഗ്യ ഗുണങ്ങളിൽ മുന്നിൽ ആര്?

എങ്കിലും പ്രമേഹം നിയന്ത്രണാതീതമായവർ, ഫാറ്റി ലിവർ പ്രശ്നമുള്ളവർ, ഇൻസുലിൻ പ്രതിരോധം ഉള്ളവർ എന്നിവർ പഴങ്ങൾ തിരഞ്ഞെടുക്കുമ്പോൾ ഡോക്ടറുടെ ഉപദേശം തേടേണ്ടതാണെന്നും അദ്ദേഹം ഓർമ്മിപ്പിക്കുന്നു. ആരോഗ്യകരമായ ഒരു ജീവിതശൈലിക്ക് പഴങ്ങൾ വില്ലനല്ല, മറിച്ച് ശരിയായ അളവിൽ കഴിച്ചാൽ അവ മധുരത്തോടുള്ള ആസക്തി കുറയ്ക്കാനും ശരീരത്തിന് ഊർജം നൽകാനും സഹായിക്കും.

DISCLAIMER: മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: പ്രമേഹരോഗികൾക്ക് ബാർലി ഗുണകരമാണോ? അറിയാം ഗുണങ്ങളും പാർശ്വഫലങ്ങളും