കറിവേപ്പിലയും മല്ലിയിലയും: ആരോഗ്യ ഗുണങ്ങളിൽ മുന്നിൽ ആര്?

നമ്മുടെ അടുക്കളയിലെ ഒഴിവാക്കാനാവാത്ത രണ്ട് ചേരുവകളാണ് കറിവേപ്പിലയും മല്ലിയിലയും. രുചിക്കും മണത്തിനും അപ്പുറം ഇവ രണ്ടും ആരോഗ്യത്തിന്റെ കാര്യത്തിൽ വലിയ പങ്കുവഹിക്കുന്നുണ്ട്. ഇന്ത്യൻ വിഭവങ്ങളിൽ കറിവേപ്പിലയും മല്ലിയിലയും കേവലം അലങ്കാരത്തിനുള്ള ഇലകൾ മാത്രമല്ല, അവ ഔഷധഗുണങ്ങളുടെ കലവറ കൂടിയാണ്. എന്നാൽ ഇവയിൽ ഏതാണ് കൂടുതൽ ഗുണകരം?. ഇവയുടെ ഗുണങ്ങളും ദോഷങ്ങളും ഒന്ന് പരിശോധിക്കാം.

Also Read: പ്രമേഹരോഗികൾക്ക് ബാർലി ഗുണകരമാണോ? അറിയാം ഗുണങ്ങളും പാർശ്വഫലങ്ങളും

കറിവേപ്പില

കറിവേപ്പിലയിൽ ധാരാളം ഇരുമ്പ്, കാൽസ്യം, ഫൈബർ, ആന്റിഓക്‌സിഡന്റുകൾ എന്നിവ അടങ്ങിയിരിക്കുന്നു. ഇൻസുലിൻ ഉൽപ്പാദിപ്പിക്കുന്ന കോശങ്ങളെ സംരക്ഷിക്കുന്നതിലൂടെ രക്തത്തിലെ പഞ്ചസാരയുടെ അളവ് കുറയ്ക്കാൻ കറിവേപ്പില സഹായിക്കുന്നു. വിഷാംശങ്ങളിൽ നിന്നും ഓക്സിഡേറ്റീവ് സമ്മർദത്തിൽ നിന്നും കരളിനെ സംരക്ഷിക്കാൻ ഇവയ്ക്ക് കഴിവുണ്ട്. അകാല നര തടയുന്നതിനും മുടിയുടെ ആരോഗ്യത്തിനും കറിവേപ്പില എണ്ണയിൽ ചേർത്ത് ഉപയോഗിക്കുന്നത് ഗുണകരമാണ്.

മല്ലിയില

വൈറ്റമിൻ കെ, വൈറ്റമിൻ സി, ഫോളേറ്റ് എന്നിവയാൽ സമ്പന്നമാണ് മല്ലിയില. ചീത്ത കൊളസ്ട്രോൾ കുറയ്ക്കാനും നല്ല കൊളസ്ട്രോൾ വർധിപ്പിക്കാനും മല്ലിയില സഹായിക്കുന്നു. ദഹന എൻസൈമുകളെ ഉത്തേജിപ്പിക്കുന്നത് വഴി ഗ്യാസ്, വയറു വീർക്കൽ തുടങ്ങിയ പ്രശ്നങ്ങൾ പരിഹരിക്കാൻ ഇത് സഹായിക്കും. ശരീരത്തിലെ ഘനലോഹങ്ങളെ നീക്കം ചെയ്യാനുള്ള പ്രത്യേക കഴിവ് മല്ലിയിലയ്ക്കുണ്ട്.

Also Read: 69-ലും തളരാത്ത ഊർജം; ജാക്കി ഷെറഫിന്റെ ആരോഗ്യത്തിന് പിന്നിൽ ഈ പാനീയം

എങ്ങനെ ഉപയോഗിക്കണം?

കറിവേപ്പില സാധാരണയായി എണ്ണയിൽ വഴറ്റിയാണ് ഉപയോഗിക്കുന്നത്. ഇത് അതിലെ പോഷകങ്ങൾ ശരീരത്തിന് ആഗിരണം ചെയ്യാൻ എളുപ്പമാക്കുന്നു. എന്നാൽ മല്ലിയില പച്ചയ്ക്ക് ഉപയോഗിക്കുന്നതാണ് കൂടുതൽ നല്ലത്, കാരണം ചൂടാക്കുമ്പോൾ അതിലെ വൈറ്റമിൻ സി നഷ്ടപ്പെടാൻ സാധ്യതയുണ്ട്. കറിവേപ്പിലയിലെ ഇരുമ്പ് സത്ത് ശരീരം നന്നായി ആഗിരണം ചെയ്യാൻ മല്ലിയിലയിലെ വൈറ്റമിൻ സി സഹായിക്കും. അതിനാൽ ഇവ രണ്ടും ചേർത്ത് ചമ്മന്തിയായോ മറ്റോ ഉപയോഗിക്കുന്നത് ഇരട്ടി ഗുണം നൽകും.

Also Read: ചോറും ചപ്പാത്തിയും ഒഴിവാക്കാതെ വണ്ണം കുറയ്ക്കാം; 85 കിലോ കുറച്ച യുവതിയുടെ രഹസ്യം

ശ്രദ്ധിക്കേണ്ട കാര്യങ്ങൾ

കറിവേപ്പില അമിതമായി കഴിക്കുന്നത് വയറുവേദനയ്ക്ക് കാരണമായേക്കാം. പ്രമേഹത്തിന് മരുന്ന് കഴിക്കുന്നവർ ശ്രദ്ധിക്കണം, കാരണം ഇത് രക്തത്തിലെ പഞ്ചസാരയുടെ അളവ് പെട്ടെന്ന് കുറച്ചേക്കാം. മല്ലിയില ചിലർക്ക് മല്ലിയില കഴിക്കുന്നത് സൂര്യപ്രകാശത്തോടുള്ള ചർമ്മത്തിന്റെ സംവേദനക്ഷമത വർധിപ്പിക്കാൻ ഇടയാക്കും. പച്ചയ്ക്ക് ഉപയോഗിക്കുന്നതിനാൽ മല്ലിയില ഉപ്പുവെള്ളത്തിൽ നന്നായി കഴുകി മാത്രം ഉപയോഗിക്കുക.

ദീർഘകാല ആരോഗ്യത്തിനും പ്രമേഹം, കരൾ സംരക്ഷണം എന്നിവയ്ക്കും കറിവേപ്പില മികച്ചതാണ്. എന്നാൽ പെട്ടെന്നുള്ള ഊർജത്തിനും വൈറ്റമിനുകൾക്കും ദഹനത്തിനും മല്ലിയിലയാണ് നല്ലത്. രണ്ടും നമ്മുടെ ഭക്ഷണക്രമത്തിൽ ഉൾപ്പെടുത്തുന്നതാണ് ഏറ്റവും ഉചിതം.

DISCLAIMER: മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഓട്സ് കഴിക്കുന്നത് കൊളസ്ട്രോൾ കുറയ്ക്കാൻ സഹായിക്കുമോ? ഈ 3 കാര്യങ്ങൾ ശ്രദ്ധിക്കൂ