തണുപ്പുകാലത്ത് കടല മിഠായി കഴിക്കാം, ഇരട്ടി ഗുണങ്ങൾ

തണുപ്പുകാലത്ത് ശരീരത്തിന് പ്രതിരോധശേഷിയും ഊർജവും നൽകാൻ നമ്മുടെ പഴമക്കാർ എന്നും നിർദേശിച്ചിട്ടുള്ള ഒന്നാണ് കപ്പലണ്ടിയും ശർക്കരയും ചേർത്തുള്ള വിഭവങ്ങൾ. കടല മിഠായി രൂപത്തിലോ അല്ലാതെയോ ഇവ കഴിക്കുന്നത് വെറുമൊരു ശീലമല്ല, മറിച്ച് വലിയൊരു ആരോഗ്യ രഹസ്യം കൂടിയാണെന്ന് പോഷകാഹാര വിദഗ്ധർ പറയുന്നു. ഈ തണുപ്പുകാലത്ത് എന്തുകൊണ്ട് കപ്പലണ്ടിയും ശർക്കരയും ഭക്ഷണത്തിൽ ഉൾപ്പെടുത്തണമെന്ന് നോക്കാം.

പ്രകൃതിദത്തമായ ഊർജം

തണുപ്പുകാലത്ത് ശരീരത്തിന് സാധാരണയേക്കാൾ കൂടുതൽ ഊർജം ആവശ്യമാണ്. നിലക്കടലയിൽ അടങ്ങിയിരിക്കുന്ന പ്രോട്ടീനും ആരോഗ്യകരമായ കൊഴുപ്പും ശർക്കരയിലെ കാർബോഹൈഡ്രേറ്റും ചേരുമ്പോൾ ശരീരത്തിന് പെട്ടെന്ന് ഊർജം ലഭിക്കുന്നു. പകൽ സമയങ്ങളിലെ ക്ഷീണം അകറ്റാൻ ഇതൊരു മികച്ച ലഘുഭക്ഷണമാണ്.

പ്രതിരോധശേഷി വർധിപ്പിക്കുന്നു

പലപ്പോഴും തണുപ്പുകാലം ജലദോഷത്തിന്റെയും പനിയുടെയും സമയമാണ്. ശർക്കരയിൽ അടങ്ങിയിരിക്കുന്ന സിങ്ക്, സെലീനിയം തുടങ്ങിയ ധാതുക്കളും നിലക്കടലയിലെ ആന്റിഓക്സിഡന്റുകളും ശരീരത്തിന്റെ പ്രതിരോധ സംവിധാനത്തെ ശക്തിപ്പെടുത്താൻ സഹായിക്കുന്നു.

ദഹനത്തെ സഹായിക്കുന്നു

ശർക്കര ദഹന എൻസൈമുകളെ ഉത്തേജിപ്പിക്കാൻ കഴിവുള്ള ഒന്നാണ്. ഭക്ഷണത്തിന് ശേഷം ഒരു കഷ്ണം ശർക്കരയോ അല്ലെങ്കിൽ ശർക്കര ചേർത്ത കടല മിഠായിയോ കഴിക്കുന്നത് ഗ്യാസ് സംബന്ധമായ പ്രശ്നങ്ങൾക്കും മലബന്ധത്തിനും ആശ്വാസം നൽകും.

രക്തക്കുറവ് പരിഹരിക്കുന്നു

ശർക്കര ഇരുമ്പിന്റെ കലവറയാണ്. നിലക്കടലയിലാകട്ടെ ഫോളേറ്റും അടങ്ങിയിരിക്കുന്നു. ഇവ രണ്ടും ചേരുന്നത് ശരീരത്തിലെ ഹീമോഗ്ലോബിന്റെ അളവ് വർധിപ്പിക്കാനും വിളർച്ച തടയാനും സഹായിക്കും. കുട്ടികൾക്കും ഗർഭിണികൾക്കും ഇത് ഏറെ ഗുണകരമാണ്.

ചൂട് നിലനിർത്തുന്നു

ആയുർവേദ പ്രകാരം ശർക്കരയും നിലക്കടലയും 'താപ ഗുണമുള്ള' ഭക്ഷണങ്ങളാണ്. ഇത് തണുപ്പിനെ പ്രതിരോധിക്കാനും ശരീരത്തിനുള്ളിലെ ഊഷ്മാവ് കൃത്യമായി നിലനിർത്താനും സഹായിക്കുന്നു.