ഉലുവ വെള്ളം, കറുവാപ്പട്ട, യോഗ; പ്രമേഹം നിയന്ത്രിക്കുന്നതിനുള്ള 7 വഴികൾ

രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിന് ഭക്ഷണക്രമത്തിൽ മാറ്റം വരുത്തേണ്ടതുണ്ട്. ഭക്ഷണക്രമത്തിൽ മാറ്റം വരുത്താത്തതു കാരണം രക്തത്തിലെ പഞ്ചസാരയുടെ അളവ് അതിവേഗം വർധിച്ചുകൊണ്ടിരിക്കുകയാണെങ്കിൽ, ഇൻസുലിൻ പ്രതിരോധം ഉണ്ടാകാനും തുടർന്ന് പ്രമേഹം വരാനുമുള്ള സാധ്യതയും കൂടുതലാണ്.

ദി ലാൻസെറ്റ് ഗ്ലോബൽ ഹെൽത്തിൽ പ്രസിദ്ധീകരിച്ച ഒരു പഠനത്തിൽ, 45 വയസിനു മുകളിലുള്ള 5 പേരിൽ ഒരാൾക്ക് പ്രമേഹമുണ്ടെന്ന് കണ്ടെത്തി. മാത്രമല്ല, ഗ്രാമപ്രദേശങ്ങളെ അപേക്ഷിച്ച് നഗരപ്രദേശങ്ങളിൽ പ്രമേഹ നിരക്ക് ഇരട്ടിയായിരുന്നു. പ്രമേഹ വ്യാപനത്തിൽ സമകാലിക ജീവിതശൈലിയുടെ പങ്കിനെ ഈ പഠനം സൂചിപ്പിക്കുന്നു. ആഗോള പ്രമേഹ ബാധിതരുടെ എണ്ണത്തിൽ വലിയൊരു പങ്ക് ഇന്ത്യയിലാണെന്നും പഠനം എടുത്തുകാണിക്കുന്നു. 

പ്രമേഹം പ്രായമായവരുടെ മാത്രം പ്രശ്നമല്ല. ഇന്ത്യക്കാരിൽ യുവാക്കളിലും ഇത് കണ്ടെത്തിയിട്ടുണ്ട്. 2024 ൽ പ്രസിദ്ധീകരിച്ച ഒരു പഠനത്തിൽ, ഇന്ത്യയിലെ യുവാക്കളിൽ പ്രമേഹം വളരെ സാധാരണമാണെന്ന് കണ്ടെത്തി. 35 വയസിന് താഴെയുള്ളവരിൽ 17 ശതമാനം പേർക്ക് ഇതിനകം പ്രമേഹമുണ്ട്. കുടുംബത്തിൽ പ്രമേഹ ചരിത്രമുണ്ടെങ്കിൽ 40 ശതമാനം പേർക്കും ഇത് സാധാരണമാണ്.

Also Read: 14 ദിവസം, 14 മുട്ട; രണ്ടാഴ്ചത്തേക്ക് ദിവസം കഴിക്കുമ്പോൾ ശരീരത്തിന് എന്ത് സംഭവിക്കും?

പ്രമേഹം കണ്ടെത്തുന്നതിനുള്ള പ്രധാന മാർഗം നേരത്തെയുള്ള പരിശോധനയാണ്. എങ്കിലും, ശരിയായ പോഷകാഹാരം, പതിവ് വ്യായാമം, മാനസിക സമ്മർദ നിയന്ത്രണം തുടങ്ങിയ ആരോഗ്യകരമായ ജീവിതശൈലി ശീലങ്ങൾ സ്വീകരിക്കുന്നത് രോഗം തടയാൻ സഹായിക്കുന്നു. രക്തത്തിലെ പഞ്ചസാരയുടെ അളവ് സ്വാഭാവികമായി എങ്ങനെ നിയന്ത്രിക്കാം എന്നതാണ് ആദ്യം നോക്കേണ്ടത്. രക്തത്തിലെ പഞ്ചസാരയുടെ അളവ് സ്വാഭാവികമായി നിയന്ത്രിക്കാൻ കഴിയുന്ന 7 വഴികളുണ്ട്. എന്നാൽ, അവ മരുന്നുകൾക്ക് പകരമാവില്ല, പ്രത്യേകിച്ച് പ്രമേഹമുള്ളവർക്കോ ഉയർന്ന അപകടസാധ്യതയുള്ളവരോ ആയവർക്ക് എന്ന കാര്യവും ശ്രദ്ധിക്കണം.

1. ഭക്ഷണത്തിൽ കറുവാപ്പട്ട ഉൾപ്പെടുത്തുക

കറുവാപ്പട്ട ആന്റിഓക്‌സിഡന്റുകളാൽ സമ്പന്നമാണ്. ടൈപ്പ് 2 പ്രമേഹമുള്ളവരിൽ കറുവാപ്പട്ടയ്ക്ക് ഫാസ്റ്റിങ് ബ്ലഡ് ഗ്ലൂക്കോസ് അളവ് കുറയ്ക്കാൻ കഴിയും. ഓട്സ് അല്ലെങ്കിൽ സ്മൂത്തികൾ പോലുള്ള ഭക്ഷണങ്ങളിൽ ചേർക്കുക.

2. ജലാംശം നിലനിർത്തുക

നിർജലീകരണം മൂലമുണ്ടാകുന്ന ഗ്ലൂക്കോസ് കുതിച്ചുചാട്ടം തടയുന്നതിലൂടെ രക്തത്തിലെ പഞ്ചസാരയുടെ അളവ് നിയന്ത്രിക്കാൻ ജലാംശം സഹായിക്കുന്നു. മൊത്തത്തിലുള്ള ജലാംശത്തെയും ഉപാപചയ പ്രക്രിയകളെയും പിന്തുണയ്ക്കുന്നതിന് നിറയെ വെള്ളം കുടിക്കാൻ ശ്രമിക്കുക. എന്നാൽ, അമിതമായി വെള്ളം കുടിക്കുന്നത് ദോഷകരമാണ്, അതിനാൽ മിതമായി വെള്ളം കുടിക്കുക.

Also Read: ദഹനം നന്നായി നടക്കണോ? ഭക്ഷണം കഴിച്ച ഉടനെ ഉറങ്ങരുത്

3. ഉലുവ

ഉലുവയിൽ ലയിക്കുന്ന നാരുകൾ അടങ്ങിയിട്ടുണ്ട്. ഇത് ദഹനത്തെയും കാർബോഹൈഡ്രേറ്റിന്റെ ആഗിരണത്തെയും മന്ദഗതിയിലാക്കുന്നു. അവ രക്തത്തിലെ പഞ്ചസാരയുടെ നിയന്ത്രണം മെച്ചപ്പെടുത്തുകയും ഫാസ്റ്റിങ്ങിലെ ഗ്ലൂക്കോസിന്റെ അളവ് കുറയ്ക്കുകയും ചെയ്യുന്നു.

4. യോഗയും ശ്വസന വ്യായാമവും

പതിവായി യോഗ പരിശീലിക്കുന്നതും ശ്വസന വ്യായാമവും രക്തത്തിലെ പഞ്ചസാരയെ ബാധിക്കുന്ന സമ്മർദ ഹോർമോണായ കോർട്ടിസോളിന്റെ അളവ് കുറയ്ക്കും. ഈ പരിശീലനങ്ങൾ വിശ്രമം നൽകുകയും ഗ്ലൈസെമിക് നിയന്ത്രണം മെച്ചപ്പെടുത്തുകയും ചെയ്യുന്നു.

Also Read: മുട്ട, ചിക്കൻ,പനീർ: പ്രോട്ടീൻ അടങ്ങിയ ഭക്ഷണം ഏതാണെന്ന് അറിയാമോ?

5. ഭക്ഷണത്തിന് മുമ്പ് വിനാഗിരി

വിനാഗിരി, പ്രത്യേകിച്ച് ആപ്പിൾ സിഡെർ വിനെഗർ, ആമാശയം ശൂന്യമാക്കുന്നതിന്റെ നിരക്ക് മന്ദഗതിയിലാക്കുന്നതിലൂടെ ഇൻസുലിൻ സെൻസിറ്റിവിറ്റി വർധിപ്പിക്കുന്നു. ഇത് ഭക്ഷണത്തിനു ശേഷമുള്ള ഗ്ലൂക്കോസിന്റെ അളവ് കുറയ്ക്കാൻ സഹായിക്കും. വിനാഗിരി ഭക്ഷണത്തിനു ശേഷമുള്ള രക്തത്തിലെ പഞ്ചസാരയുടെ വർധനവ് നിയന്ത്രിക്കാൻ സഹായിക്കും.

6. പ്രതിരോധശേഷിയുള്ള അന്നജം

ലയിക്കുന്ന നാരുകൾക്ക് സമാനമായി പ്രതിരോധശേഷിയുള്ള അന്നജം പ്രവർത്തിക്കുന്നു, മെച്ചപ്പെട്ട ഇൻസുലിൻ സംവേദനക്ഷമത ഉൾപ്പെടെ നിരവധി ആരോഗ്യ ഗുണങ്ങൾ നൽകുന്നു. ഇത് ഇൻസുലിൻ സംവേദനക്ഷമത മെച്ചപ്പെടുത്താൻ സഹായിക്കുന്നു, കാലക്രമേണ മികച്ച ഗ്ലൈസെമിക് നിയന്ത്രണത്തിന് കാരണമാകും. റോബസ്റ്റ പഴം, പയർവർഗ്ഗങ്ങൾ, തവിട്ട് അരി തുടങ്ങിയ ഭക്ഷണങ്ങളിൽ പ്രതിരോധശേഷിയുള്ള അന്നജം കാണപ്പെടുന്നു.

7. മഗ്നീഷ്യം അടങ്ങിയ ഭക്ഷണങ്ങൾ

ഗ്ലൂക്കോസ് മെറ്റബോളിസത്തിലും ഇൻസുലിൻ പ്രവർത്തനത്തിലും മഗ്നീഷ്യം നിർണായക പങ്ക് വഹിക്കുന്നു. ഇലക്കറികൾ, നട്സ് തുടങ്ങിയ മഗ്നീഷ്യം കൂടുതലുള്ള ഭക്ഷണങ്ങൾ ഇൻസുലിൻ സംവേദനക്ഷമത മെച്ചപ്പെടുത്താൻ സഹായിക്കും, അതുവഴി ടൈപ്പ് 2 പ്രമേഹ സാധ്യത കുറയ്ക്കും.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: വൈകിട്ട് 6.45 ന് അത്താഴം, രാത്രിയിൽ കറുവാപ്പട്ട വെള്ളം; പ്രായം 41 ലും ഡയറ്റ് വിടാതെ പ്രിയാമണി