സെർവിക്കൽ കാൻസർ, തിരിച്ചറിയേണ്ട 6 പ്രധാന ലക്ഷണങ്ങൾ ഇതാ

സെർവിക്സിലെ ആരോഗ്യകരമായ കോശങ്ങൾ അനിയന്ത്രിതമായി വളരുമ്പോഴാണ് സെർവിക്കൽ കാൻസർ ആരംഭിക്കുന്നത്. ഹ്യൂമൻ പാപ്പിലോമ വൈറസ് (HPV) മൂലമുണ്ടാകുന്ന തുടർച്ചയായ അണുബാധയാണ് ഇതിന് പ്രധാന കാരണം.സെർവിക്കൽ ക്യാൻസർ ശ്രദ്ധേയമായ ലക്ഷണങ്ങളൊന്നും ഉണ്ടാക്കിയെന്നു വരില്ല. എങ്കിലും പലപ്പോഴും ശ്രദ്ധിക്കപ്പെടാതെ പോകുന്ന ലക്ഷണങ്ങളുമുണ്ട്. മയോ ക്ലിനിക് അത്തരം ലക്ഷണങ്ങൾ വ്യക്തമാക്കുന്നുണ്ട്.

അമിതമായ ആർത്തവ രക്തസ്രാവം

സെർവിക്കൽ കാൻസർ നിങ്ങളുടെ സാധാരണ ആർത്തവ ചക്രത്തിൽ മാറ്റങ്ങൾ വരുത്തിയേക്കാം. മറ്റ് കാരണങ്ങളൊന്നുമില്ലാതെ തന്നെ നിങ്ങളുടെ ആർത്തവസമയത്ത് രക്തസ്രാവം പതിവിലും കൂടുതലാവുകയോ അല്ലെങ്കിൽ കൂടുതൽ ദിവസം നീണ്ടുനിൽക്കുകയോ ചെയ്യുന്നുണ്ടെങ്കിൽ, ഒരു ഡോക്ടറെ കണ്ട് ഈ മാറ്റം പരിശോധിക്കേണ്ടതാണ്.

അസാധാരണമായ യോനിയിലെ രക്തസ്രാവം

സെർവിക്കൽ കാൻസറിന്റെ ഏറ്റവും സാധാരണമായ ലക്ഷണങ്ങളിലൊന്നാണ് അസാധാരണമായ യോനിയിലെ രക്തസ്രാവം. ആർത്തവ ചക്രങ്ങൾക്കിടയിലുള്ള സമയത്തോ, ലൈംഗിക ബന്ധത്തിന് ശേഷമോ, അല്ലെങ്കിൽ ആർത്തവവിരാമത്തിന് ശേഷമോ ഉണ്ടാകുന്ന രക്തസ്രാവം ഇതിൽ ഉൾപ്പെടുന്നു. ഇത്തരം അപ്രതീക്ഷിത രക്തസ്രാവങ്ങൾ സെർവിക്സിലെ കോശങ്ങളിൽ എന്തോ തകരാറുണ്ടെന്നതിന്റെ ആദ്യകാല സൂചനയാകാം.

ലൈംഗിക ബന്ധത്തിലേർപ്പെടുമ്പോൾ വേദന

സെർവിക്കൽ കാൻസർ പുരോഗമിക്കുമ്പോൾ ചില സ്ത്രീകൾക്ക് ലൈംഗിക ബന്ധത്തിനിടെ വേദനയോ അസ്വസ്ഥതയോ അനുഭവപ്പെടാറുണ്ട്. ലൈംഗിക വേളയിലെ വേദനയ്ക്ക് പല കാരണങ്ങൾ ഉണ്ടാകാമെങ്കിലും, വിട്ടുമാറാത്തതോ വിശദീകരിക്കാനാകാത്തതോ ആയ വേദന വൈദ്യസഹായം അർഹിക്കുന്നു.

പെൽവിക്സിൽ വേദന (ഇടുപ്പ് വേദന)

അടിവയറ്റിലെ വിട്ടുമാറാത്ത വേദന, അല്ലെങ്കിൽ അവിടെ അനുഭവപ്പെടുന്ന മർദ്ദം എന്നിവ സെർവിക്കൽ കാൻസർ അടുത്തുള്ള കോശങ്ങളെ ബാധിക്കുമ്പോൾ ഉണ്ടാകാം. അസാധാരണമായതോ തനിയെ മാറാത്തതോ ആയ വേദന ഒരു ആരോഗ്യ വിദഗ്ധനെക്കൊണ്ട് പരിശോധിപ്പിക്കേണ്ടതാണ്.

യോനിയിൽ നിന്നുള്ള സ്രവം

സാധാരണയിൽ കവിഞ്ഞ അളവിലോ, രക്തം കലർന്നതോ, കഠിനമായ ദുർഗന്ധമുള്ളതോ ആയ യോനീസ്രവം മറ്റൊരു ലക്ഷണമാണ്. ഇത് സാധാരണ യോനീസ്രവത്തിൽ നിന്ന് വ്യത്യസ്തമായിരിക്കും കൂടാതെ ഗർഭാശയ ഗളത്തിലെ അസാധാരണമായ മാറ്റങ്ങളെ സൂചിപ്പിക്കുകയും ചെയ്യുന്നു.

അവസാന ഘട്ടത്തിലെ ലക്ഷണങ്ങൾ

രോഗം കൂടുതൽ വ്യാപിക്കുന്ന ഘട്ടങ്ങളിൽ, സെർവിക്കൽ കാൻസർ മൂത്രമൊഴിക്കുമ്പോൾ വേദന, നടുവേദന, തളർച്ച, അല്ലെങ്കിൽ കാലുകളിൽ വീക്കം എന്നിവയ്ക്ക് കാരണമായേക്കാം. പ്രാരംഭ ഘട്ടത്തിൽ ഈ ലക്ഷണങ്ങൾ അത്ര സാധാരണമല്ലെങ്കിലും രോഗം മറ്റ് അവയവങ്ങളെ ബാധിക്കുമ്പോൾ ഇവ പ്രകടമാകാം.

Disclaimer

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.