മലബന്ധത്തെ പേടിക്കണ്ട; വയർ ക്ലിയർ ആകാൻ അതിരാവിലെ ഇത് കുടിക്കൂ

അതിരാവിലെ കുടിക്കുന്ന ചില പാനീയങ്ങൾ വഴി മലബന്ധ പ്രശ്നത്തിന് ഒരു പരിധിവരെ പരിഹാരം കാണാൻ സാധിക്കുമെന്നാണ് ആരോഗ്യവിദഗ്ധർ പറയുന്നത്. മലബന്ധം കുറയ്ക്കാൻ സഹായിക്കുന്ന 4 പ്രഭാത പാനീയങ്ങൾ അറിയാം.

ചെറുചൂടുവെള്ളം

ഏറ്റവും ലളിതവും എന്നാൽ ഫലപ്രദവുമായ വഴിയാണിത്. രാത്രി മുഴുവൻ നീണ്ടുനിൽക്കുന്ന ഉറക്കത്തിനുശേഷം ശരീരത്തിന് ജലാംശം ആവശ്യമാണ്. രാവിലെ എഴുന്നേറ്റയുടൻ ചെറുചൂടുവെള്ളം കുടിക്കുന്നത് മലം മൃദുവാക്കാനും കുടലിലെ ചലനങ്ങൾ സുഗമമാക്കാനും സഹായിക്കുന്നു.

നാരുകൾ അടങ്ങിയ പാനീയങ്ങൾ

ചിയ സീഡ്സ് പോലുള്ളവ രാത്രി വെള്ളത്തിൽ കുതിർത്തു വച്ച് രാവിലെ കുടിക്കുന്നത് വളരെ നല്ലതാണ്. നാരുകൾ ധാരാളമായി അടങ്ങിയ ഇവ കുടലിലൂടെയുള്ള വിസർജ്യങ്ങളുടെ പോക്ക് എളുപ്പമാക്കുന്നു.

പുളിപ്പിച്ച പാനീയങ്ങൾ

മോര് പോലെയുള്ള പ്രോബയോട്ടിക് പാനീയങ്ങൾ കുടലിലെ നല്ല ബാക്ടീരിയകളുടെ വളർച്ചയ്ക്ക് സഹായിക്കുന്നു. ആവർത്തിച്ചുള്ള ആന്റിബയോട്ടിക്കുകളുടെ ഉപയോഗം മൂലമോ തെറ്റായ ഭക്ഷണക്രമം മൂലമോ ഉണ്ടാകുന്ന മലബന്ധം പരിഹരിക്കാൻ ഇത്തരം പാനീയങ്ങൾ ഉത്തമമാണ്.

ഹെർബൽ ചായകൾ

ദഹനത്തെ പ്രോത്സാഹിപ്പിക്കുന്ന ചിലതരം ഹെർബൽ ഇൻഫ്യൂഷനുകൾ കുടിക്കുന്നത് ഗുണകരമാണ്. ഇവ കുടലിലെ സ്വാഭാവിക ചലനങ്ങളെ ഉത്തേജിപ്പിക്കുകയും ഗ്യാസ് സംബന്ധമായ പ്രശ്നങ്ങൾ കുറയ്ക്കുകയും ചെയ്യുന്നു.

ഈ പാനീയങ്ങൾക്കൊപ്പം വ്യായാമവും നാരുകൾ അടങ്ങിയ ഭക്ഷണവും ശീലമാക്കേണ്ടത് അത്യന്താപേക്ഷിതമാണ്. മലബന്ധം വിട്ടുമാറുന്നില്ലെങ്കിലോ മലത്തിൽ രക്തം കാണപ്പെടുകയോ ചെയ്താൽ വൈകാതെ തന്നെ ഒരു ഡോക്ടറെ കണ്ട് വിദഗ്ധോപദേശം തേടേണ്ടതാണ്.