ചിയാ സീഡ്‌സ് എല്ലാവർക്കും നല്ലതല്ല; ഈ 4 രോഗാവസ്ഥയുള്ളവർ സൂക്ഷിക്കണം

ചിയാ സീഡ്സുകൾ ഇന്ന് ആരോഗ്യപ്രേമികൾക്കിടയിലെ ഒരു വലിയ തരംഗമാണ്. ശരീരഭാരം കുറയ്ക്കാനും ദഹനം മെച്ചപ്പെടുത്താനും സഹായിക്കുന്ന ഈ 'സൂപ്പർ ഫുഡ്' ഗുണങ്ങളാൽ സമ്പന്നമാണെന്നതിൽ തർക്കമില്ല. എന്നാൽ എല്ലാവർക്കും ചിയാ സീഡ്സ് ഒരുപോലെ അനുയോജ്യമല്ല.

ചില പ്രത്യേക ആരോഗ്യപ്രശ്നങ്ങളുള്ളവർ ചിയാ സീഡ്സ് ഉപയോഗിക്കുമ്പോൾ അതീവ ജാഗ്രത പാലിക്കണമെന്നും, അല്ലെങ്കിൽ അത് ദോഷകരമായി ബാധിക്കുമെന്നും മുന്നറിയിപ്പ് നൽകുകയാണ് ഡൽഹി ഫോർട്ടിസ് ഹോസ്പിറ്റലിലെ ഗ്യാസ്‌ട്രോഎൻട്രോളജിസ്റ്റ് ഡോ. ശുഭം വത്സ്യ. പ്രധാനമായും 4 വിഭാഗത്തിലുള്ള ആളുകളാണ് ചിയാ സീഡ്സ് ഒഴിവാക്കേണ്ടത്.

കുറഞ്ഞ രക്തസമ്മർദമുള്ളവർ

ചിയാ സീഡ്സുകളിൽ പൊട്ടാസ്യവും ഒമേഗ-3 ഫാറ്റി ആസിഡുകളും ധാരാളമായി അടങ്ങിയിട്ടുണ്ട്. ഇവ സ്വാഭാവികമായും രക്തസമ്മർദം കുറയ്ക്കാൻ സഹായിക്കുന്ന ഘടകങ്ങളാണ്. അതിനാൽ നേരത്തെ തന്നെ ലോ ബിപി ഉള്ളവർ ചിയാ സീഡ്സ് അമിതമായി കഴിക്കുന്നത് രക്തസമ്മർദം അപകടകരമായ രീതിയിൽ താഴാൻ കാരണമായേക്കാം. ഇത് തലകറക്കം, ക്ഷീണം എന്നിവയിലേക്ക് നയിക്കാം.

രക്തം കട്ടപിടിക്കാതിരിക്കാൻ മരുന്ന് കഴിക്കുന്നവർ

ഹൃദ്രോഗത്തിനോ മറ്റ് ആരോഗ്യപ്രശ്നങ്ങൾക്കോ വേണ്ടി ആസ്പിരിൻ പോലുള്ള മരുന്നുകൾ കഴിക്കുന്നവർ ചിയാ സീഡ്സിന്റെ കാര്യത്തിൽ ശ്രദ്ധിക്കണം. ചിയാ സീഡ്സിലെ ഒമേഗ-3 രക്തം കൂടുതൽ നേർപ്പിക്കാൻ കാരണമാകും. ഇത് മുറിവുകളുണ്ടായാൽ രക്തം നിലയ്ക്കാതിരിക്കാനും ആന്തരിക രക്തസ്രാവത്തിനുള്ള സാധ്യത വർധിപ്പിക്കാനും ഇടയാക്കും.

ദഹനസംബന്ധമായ പ്രശ്നങ്ങളുള്ളവർ

നാരുകൾ ധാരാളമുള്ള ഭക്ഷണമാണ് ചിയാ സീഡ്സ്. എന്നാൽ ഗ്യാസ്, വയർ വീർക്കൽ, ഇറിറ്റബിൾ ബവൽ സിൻഡ്രോം തുടങ്ങിയ പ്രശ്നങ്ങളുള്ളവർക്ക് ഇത് വിനയാകും.

വൃക്കരോഗികൾ

ചിയാ സീഡ്സുകളിൽ പൊട്ടാസ്യം, ഫോസ്ഫറസ്, ഓക്സലേറ്റ് എന്നിവ ഉയർന്ന അളവിൽ അടങ്ങിയിട്ടുണ്ട്. വൃക്കകളുടെ പ്രവർത്തനം തകരാറിലായവർക്ക് ഈ ധാതുക്കളെ ശരീരത്തിൽ നിന്ന് പുറന്തള്ളാൻ ബുദ്ധിമുട്ടായിരിക്കും. ഇത് വൃക്കയിൽ കല്ലുകൾ ഉണ്ടാകാനും വൃക്കരോഗം സങ്കീർണ്ണമാകാനും കാരണമാകും. അതിനാൽ വൃക്കരോഗമുള്ളവർ ഡോക്ടറുടെ നിർദ്ദേശമില്ലാതെ ചിയാ സീഡ്സ് ഉപയോഗിക്കരുത്.