10 മിനിറ്റ് തികച്ച് വേണ്ട ഈ വൈറൽ ചട്നി തയ്യാറാക്കാൻ

എളുപ്പത്തിൽ തയ്യാറാക്കാവുന്ന സ്വാദിഷ്ടമായ വിഭവങ്ങളും രുചികളും ഏവരും അന്വേഷിക്കുന്ന ഒന്നാണ്. അത്തരം വിഭവങ്ങളുടെ റെസിപ്പികൾ വളരെ പെട്ടെന്ന് തന്നെ സമൂഹമാധ്യമങ്ങളിൽ വൈറലാവാറുമുണ്ട്. അത്തരത്തിൽ ഇൻസ്റ്റഗ്രാമിൽ താരമായ ഒരു ചട്നിയുടെ റെസിപ്പി പരിയപ്പെടുത്തുകയാണ് അമാനാസ് റെസിപ്പീസ് എന്ന ഇൻസ്റ്റഗ്രാം പേജ്. ദോശയ്ക്കും ഇഡ്ഡലിയ്ക്കുമൊപ്പം പരീക്ഷിക്കാവുന്ന, എളുപ്പത്തിൽ തയ്യാറാക്കാവുന്ന തക്കാളി കൊണ്ടുള്ള ഈ ചട്നി തയ്യാറാക്കാനും വളരെ കുറച്ച് ചേരുവകൾ മാത്രം മതി.

ചേരുവകൾ:

• നടുമുറിച്ച തക്കാളി- 6 എണ്ണം
• വെളുത്തുള്ളി- 8 അല്ലി
• പച്ചമുളക് പൊടിയായി അരിഞ്ഞത്- 1 സ്പൂൺ
• സവാള അരിഞ്ഞത്- 1
• ഉപ്പ്
• മുളകുപൊടി
• മല്ലിയില
• നാരങ്ങ നീര്

തയ്യാറാക്കുന്ന വിധം

• ഒരു പാനെടുത്ത് അൽപ്പം വെളിച്ചെണ്ണ തൂവി നടുമുറിച്ച തക്കാളികൾ അതിലേക്ക് ഇറക്കിവച്ച് പാത്രം അടച്ചുവച്ച് വേവിക്കുക.
• ഒരു പാനിൽ വെളുത്തുള്ളി വറുത്തെടുക്കുക.
• വെന്ത തക്കാളിയുടെ തോൽ നീക്കം ചെയ്തതിനു ശേഷം അതിലേക്ക് വറുത്തെടുത്ത വെളുത്തുള്ളി ചേർത്ത് രണ്ടും നന്നായി ഉടച്ചെടുക്കുക. ഇതിലേക്ക് പച്ചമുളക്, സവാള, ഉപ്പ്, മുളകുപൊടി, മല്ലിയില, നാരങ്ങാനീര് എന്നിവ ചേർത്ത് നന്നായി ഇളക്കി യോജിപ്പിക്കുക. സ്വാദിഷ്ടമായ ചട്നി തയ്യാർ.