അടുക്കളയിലെ ദുർഗന്ധം മുതൽ തുണിയിലെ കറ അകറ്റാൻ വരെ; ഒരു മുറി നാരങ്ങയുടെ ഈ ഉപയോഗങ്ങൾ അറിയാമോ?

നിങ്ങളുടെ പ്രിയപ്പെട്ട തുണിയിൽ പറ്റിപ്പിടിച്ചിരിക്കുന്ന കറകൾ നീക്കം ചെയ്യാൻ നാരങ്ങ ഉപയോഗിക്കാം എന്ന് നിങ്ങൾക്ക് അറിയാമോ? കറയുള്ള ഭാഗത്ത് നാരങ്ങ നീര് ഒഴിക്കാം. അതിനു മുകളിലേയ്ക്ക് ഉപ്പ് ചേർക്കാം. കുറച്ചു മണിക്കൂറുകൾക്കു ശേഷം സ്ഥിരം ഉപയോഗിക്കുന്ന ഡിറ്റർജൻ്റ് ഉയോഗിച്ച് കഴുകി കളയാം. കറി, കാപ്പി, കെച്ചപ്പ് തുടങ്ങിവയുടെ കറകൾ നീക്കം ചെയ്യാൻ ഇത് സഹായിക്കും.

പഴങ്ങളും പച്ചക്കറികളും മാസവും മീനും സൂക്ഷിക്കുന്ന ഫ്രിഡ്ജിലെ ദുർഗന്ധം അകറ്റാൻ നാരങ്ങ നീരിന് കഴിയും. ഒരു പഞ്ഞി നാരങ്ങ നീരിൽ മുക്കി ഫ്രിഡ്ജിനുള്ളിൽ വയ്ക്കാം. ഇത് ദുർഗന്ധം അകറ്റാൻ സഹായകരമാകും.

ആപ്പിൾ പോലെയുള്ള പഴങ്ങൾ ചെറിയ കഷ്ണങ്ങളാക്കി വച്ച് കുറച്ച സമയത്തിനകം തവിട്ടു നിറമാകുന്നത് ശ്രദ്ധിച്ചിട്ടുണ്ട്. എന്നാൽ അതിലേയ്ക്ക് കുറച്ച് നാരങ്ങ നീര് പിഴിഞ്ഞൊഴിച്ചാൽ ഇത് തടയാൻ സാധിക്കും.

നാരങ്ങ നീരിലേയ്ക്ക് വെള്ളം ഒഴിക്കാം, അൽപം വിനാഗിരി കൂടി ചേർത്തിളക്കി യോജിപ്പിക്കാം. ഈ മിശ്രിതം ഉപയോഗിച്ച് മുറിയും അടുക്കളയും തുടയ്ക്കുന്നത് ദുർഗന്ധം അകറ്റി സുഗന്ധം നിറയ്ക്കാൻ സഹായിക്കും.

നാരങ്ങയുടെ തൊലി ഉണക്കിയെടുത്ത് മുറിക്കുള്ളിലും മറ്റും സൂക്ഷിച്ചാൽ പാറ്റ, പല്ലി തുടങ്ങിയവയും ശല്യം കുറയ്ക്കാൻ സഹായിക്കും.