പാചകത്തിനു ശേഷവും അടുക്കളയിലെ മീൻ മണം പോകുന്നില്ലേ? എങ്കിൽ ഇങ്ങനെ ചെയ്തു നോക്കൂ

മീൻ വാങ്ങിയാൽ ഉടൻ കഴുകി വൃത്തിയാക്കി വെട്ടിയെടുത്ത് സൂക്ഷിക്കാം. ഫ്രിഡ്ജിലാണ് സൂക്ഷിക്കുന്നതെങ്കിൽ നന്നായി പൊതിഞ്ഞ് വായുസഞ്ചാരമില്ലാത്ത പ്രത്യേക പാത്രത്തിൽ വയ്ക്കാൻ ശ്രദ്ധിക്കാം. ആഴ്ചകളോളം മീനും മാംസവും ഫ്രിഡ്ജിൽ സൂക്ഷിക്കരുത്.

അടുക്കള സിങ്കിലാണ് മീൻ കഴുകിയ വെള്ളം ഒഴിക്കുന്നതെങ്കിൽ അതിൻ്റെ അവശിഷ്ടങ്ങൾ തങ്ങി നിന്ന് ദുർഗന്ധം ഉണ്ടായേക്കും. സിങ്കിലേയ്ക്ക് കുറച്ച് ബേക്കിങ് സോഡ ഇടാം. ശേഷം ചെറുചൂടുള്ള വെള്ളത്തിൽ അൽപം വിനാഗിരി ചേർത്ത് അതിലേയ്ക്ക് ഒഴിക്കാം.

മീൻ കഴുകി വൃത്തിയാക്കിയ ഇടത്ത് കുറച്ച് ബേക്കിങ് സോഡ ഉടൻ തന്നെ വിതറിയിടുന്നത് കൂടുതൽ ദുർഗന്ധം വമിക്കുന്ന സാഹചര്യം ഒഴിവാക്കാൻ സഹായിക്കും.

മീൻ വൃത്തിയാക്കാൻ ഉപയോഗിച്ച പാത്രം, കത്തി, എന്നിവ ഒരു ചെറുനാരങ്ങയുടെ പകുതി കൊണ്ട് ഉരച്ചതിനു ശേഷം കഴുകിയെടുക്കാം.

മീൻ വിഭവങ്ങൾ തയ്യാറാക്കിയതിനു ശേഷം ചെറിയ പാനിൽ വെള്ളം ഒഴിച്ച് കറുവാപ്പട്ട, ഗ്രാമ്പൂ, ഏലയ്ക്ക തുടങ്ങിയ സുഗന്ധവ്യജ്ഞനങ്ങൾ ചേർത്തു തിളപ്പിക്കാം. വെള്ളം നന്നായി തിളച്ചു വരുമ്പോൾ നല്ലൊരു ഗന്ധം മുറിയിൽ പരക്കും. ഇതേ വെള്ളം ഉപയോഗിച്ച് അടുക്കളയിലെ സ്ലാബും, സ്റ്റൗവും തുടക്കാം.