ചിരവ വേണ്ട, ഞൊടിയിടയിൽ തേങ്ങ ചിരകിയെടുക്കാൻ ഇത്രമാത്രം ചെയ്താൽ മതി

തേങ്ങ ചേർക്കാത്ത കറികൾ മലയാളികൾക്കിടയിൽ കുറവാണ്. എന്നാൽ വിപണയിൽ ഇപ്പോൾ തേങ്ങയ്ക്ക് തീപിടിച്ച വിലയാണ്. ഉള്ളത് കൊണ്ട് ഓണം പോലെ എന്നതാണ് ഇപ്പോഴത്തെ അവസ്ഥ. കൈയ്യിലുള്ള തേങ്ങ ചിരകിയെടുത്തു ആവശ്യത്തിനു മാത്രം ഉപയോഗിക്കാം. എന്നാൽ ചിരവ ഇല്ലാതെ എങ്ങനെ തേങ്ങ ചിരകും. അതിന് ചില വഴികൾ പരിചയപ്പെടാം.

തേങ്ങാ മുറി സ്റ്റൗവിനു മുകളിൽ വച്ച് രണ്ട് മിനിറ്റോളം ചൂടാക്കാം. നന്നായി ചൂടായതിനു ശേഷം തണുക്കാൻ മാറ്റി വയ്ക്കാം. തേങ്ങ പൂർണമായും ചിരട്ടിയിൽ നിന്നും അടർന്നിട്ടുണ്ടാകും. അത് വേർപെടുത്തിയെടുത്ത ചെറിയ കഷ്ണങ്ങളാക്കി മിസ്കിയിൽ അരച്ചെടുക്കാം.

ആദ്യം തേങ്ങ പൊട്ടിച്ച് ഫ്രീസറിൽ വച്ച് തണുപ്പിക്കാം. നന്നായി തണുത്ത ശേഷം ചിരട്ടയിൽ നിന്ന് തേങ്ങ മാത്രമായി മുറിച്ചെടുക്കാവുന്നതാണ്. തേങ്ങാ പൂള് കട്ടി കുറഞ്ഞ കഷ്ണങ്ങളാക്കി മുറിച്ചെടുക്കാം. ശേഷം ഇത് മിക്സിയിലിട്ട് പൊടിച്ചെടുക്കാം. വായു കയറാത്ത കണ്ടെയ്‌നറിൽ സൂക്ഷിച്ച് ഫ്രിഡ്ജിൽ വയ്ക്കാവുന്നതാണ്.

തേങ്ങാമുറികൾ ഇഡ്ഡലി പാത്രത്തിൽ വച്ച് ആവിയിൽ വേവിക്കാം. ആവി കയറ്റുമ്പോൾ തേങ്ങ ചിരട്ടയിൽ നിന്നും അതിവേഗം വേർപെടുത്തിയെടുക്കാം. ഇത് ചെറിയ കഷ്ണങ്ങളാക്കി മിസ്കി ഉപയോഗിച്ച് ചതച്ചെടുക്കാം.

ഒരു തവണ ചിരകിയെടുത്ത തേങ്ങ വായുവും ഈർപ്പവും കയറാത്ത പാത്രത്തിലോ സിപ് ബാഗിലോ വച്ച് ഫ്രീസറിൽ സൂക്ഷിച്ചാൽ മാസങ്ങളോളം കേടുകൂടാതിരിക്കും.