വലിയ വില കൊടുത്ത് മായം കലർന്നവ വാങ്ങേണ്ട, വെളിച്ചെണ്ണ ശുദ്ധമാണോ എന്ന് അറിയാൻ ഇതാ പൊടിക്കൈകൾ

നമ്മുടെ അടുക്കളകളിൽ ഒഴിവാക്കാൻ കഴിയാത്ത ഒന്നാണ് പാചക എണ്ണ. ഭക്ഷണത്തിന് രുചി നൽകുന്നതിനോടൊപ്പം തന്നെ ആരോഗ്യ കാര്യത്തിലും എണ്ണയ്ക്ക് പ്രധാന പങ്കുണ്ട്. എന്നാൽ ഇന്ന് വിപണിയിൽ ലഭ്യമാകുന്ന പല ബ്രാൻഡ് എണ്ണകളിലും വൻതോതിൽ മായം കലരുന്നുണ്ടെന്ന വാർത്തകൾ വായനക്കാരെ ആശങ്കയിലാഴ്ത്തുന്നതാണ്. ലാഭം കൊയ്യാൻ വേണ്ടി വെളിച്ചെണ്ണയിലും മറ്റ് പാചക എണ്ണകളിലും വില കുറഞ്ഞ മിനറൽ ഓയിലുകളും പാം ഓയിലുകളും കലർത്തുന്നത് പതിവാകുകയാണ്. ഇത്തരം മായം കലർന്ന എണ്ണയുടെ ഉപയോഗം ഹൃദ്രോഗം, ദഹനപ്രശ്നങ്ങൾ, ചർമ്മരോഗങ്ങൾ തുടങ്ങിയ ഗുരുതരമായ ആരോഗ്യ പ്രശ്നങ്ങൾക്ക് കാരണമാകുന്നു.

ഒരു സാധാരണക്കാരന് ലാബുകളുടെ സഹായമില്ലാതെ തന്നെ വീട്ടിലെ ലളിതമായ മാർഗ്ഗങ്ങളിലൂടെ എണ്ണയിലെ മായം തിരിച്ചറിയാൻ സാധിക്കും. അതിന് ചില പൊടിക്കൈകളുണ്ട്.

Also Read: ഒരു തവണ പാചകത്തിന് ഉപയോഗിച്ച എണ്ണ വീണ്ടും ഉപയോഗിക്കരുത്, ഇതാണ് കാരണം

മണം ശ്രദ്ധിക്കുക

ശുദ്ധമായ എണ്ണയ്ക്ക് അതിന്റേതായ തനതായ മണമുണ്ടാകും. ഉദാഹരണത്തിന്, വെളിച്ചെണ്ണയ്ക്ക് നേരിയ തേങ്ങാ മണവും നല്ലെണ്ണയ്ക്ക് എള്ളിന്റെ മണവും ഉണ്ടാകും. എണ്ണയ്ക്ക് അസ്വാഭാവികമായോ രൂക്ഷമായോ ഒരു ഗന്ധം തോന്നുന്നുണ്ടെങ്കിൽ അത് മായം കലർന്നതാകാൻ സാധ്യതയുണ്ട്. ചിലപ്പോൾ രാസവസ്തുക്കളുടെ മണവും അനുഭവപ്പെട്ടേക്കാം

നിറം നിരീക്ഷിക്കാം

ഓരോ എണ്ണയ്ക്കും അതിൻ്റേതായ നിറമുണ്ട്. ശുദ്ധമായ വെളിച്ചെണ്ണക്ക് തെളിഞ്ഞ വെള്ള നിറമോ നേരിയ മഞ്ഞ നിറമോ ആയിരിക്കും. കടുകെണ്ണയ്ക്ക് കടും മഞ്ഞ നിറമായിരിക്കും. എണ്ണയുടെ നിറം സാധാരണയിൽ കവിഞ്ഞോ വളരെ ഇളം നിറത്തിലോ കാണുകയാണെങ്കിൽ അതിൽ മായം കലരാൻ സാധ്യതയുണ്ട്. ഉദാഹരണത്തിന്, സസ്യ എണ്ണയിൽ പലപ്പോഴും രാസവസ്തുക്കൾ ചേർത്ത് നിറം മാറ്റാറുണ്ട്.

Also Read: പച്ചക്കറികൾ കൂടുതൽ രുചികരമാകും, ഇങ്ങനെ ചെയ്തെടുക്കൂ

തണുപ്പിച്ച് നോക്കാം

വെളിച്ചെണ്ണയിലെ മായം കണ്ടെത്താൻ വളരെ എളുപ്പമുള്ളൊരു മാർഗ്ഗമാണിത്. ഒരു ചെറിയ അളവ് വെളിച്ചെണ്ണ ഒരു ഗ്ലാസ് പാത്രത്തിലെടുത്ത് ഫ്രിഡ്ജിൽ 30 മിനിറ്റ് വെക്കുക. ശുദ്ധമായ വെളിച്ചെണ്ണ മുഴുവനായും ഉറച്ച് കട്ടിയാകും. എന്നാൽ, മായം കലർന്ന വെളിച്ചെണ്ണയാണെങ്കിൽ അടിഭാഗം മാത്രം ഉറക്കുകയും മുകൾഭാഗം ദ്രാവകാവസ്ഥയിൽ തുടരുകയും ചെയ്യും.

Also Read: അഴുകി പോകില്ല മുളയ്ക്കില്ല, ഉരുളക്കിഴങ്ങ് കൂടുതൽ കാലം കേടാകാതിരിക്കാൻ ഇങ്ങനെ സൂക്ഷിക്കാം

ജലപരിശോധന

ഒരു ഗ്ലാസ് വെള്ളമെടുത്ത് അതിലേക്ക് ഒരു സ്പൂൺ എണ്ണ ഒഴിക്കുക. ശുദ്ധമായ എണ്ണ വെള്ളത്തിൽ ലയിക്കില്ല, അത് മുകളിൽ പാടപോലെ പൊങ്ങിക്കിടക്കും. എണ്ണ വെള്ളത്തിൽ കലരുകയോ, വെള്ളത്തിന് അടിയിൽ ചെറിയ തരികളായി അടിഞ്ഞുകൂടുകയോ ചെയ്യുകയാണെങ്കിൽ അത് മായം കലർന്ന എണ്ണയാണ്.

തിളപ്പിച്ച് നോക്കാം

ഒരു ചെറിയ അളവ് എണ്ണ ചൂടാക്കുക. എണ്ണ പെട്ടെന്ന് പുകയുകയോ പതിവില്ലാത്ത രീതിയിൽ ശബ്ദമുണ്ടാക്കുകയോ ചെയ്യുന്നുവെങ്കിൽ അതിൽ മായം കലർന്നിട്ടുണ്ടെന്ന് സംശയിക്കാം.

Read More: പച്ചക്കായ ഒരു ദിവസം കൊണ്ട് പഴുക്കും, ഈ വിദ്യകൾ പരീക്ഷിച്ചു നോക്കൂ