അധികം ചേരുവകളോ മസാലകളോ ആവശ്യമില്ല; എളുപ്പത്തിൽ തയ്യാറാക്കാം ഈ ഉള്ളി കോഴി

ലോകത്ത് ഏറ്റവും കൂടുതൽ പാചകപരീക്ഷണങ്ങൾ നടക്കുന്നത് ചിക്കൻ വിഭവങ്ങളുടെ കാര്യത്തിലാണെന്ന് പറയാം. ഇന്റർനെറ്റിൽ ഒന്നു സെർച്ച് ചെയ്താൽ എണ്ണിയാലൊടുങ്ങാത്ത ചിക്കൻ വിഭവങ്ങൾ സ്ക്രീനിൽ തെളിഞ്ഞുവരും. അധികം ചേരുവകളോ മസാലകളോ ഇല്ലാതെ വളരെ എളുപ്പത്തിലും അതേ സമയം സ്വാദിഷ്ടമായും തയ്യാറാക്കാവുന്ന ഒരു ചിക്കൻ വിഭവം പരിചയപ്പെടുത്തുകയാണ് ഫുഡ് വ്ളോഗേഴ്സായ യോഗേഷും ശ്രീയും.

ഉള്ളി കോഴി എന്നു പേരിട്ടിരിക്കുന്ന ഈ വിഭവം വളരെ എളുപ്പത്തിൽ തന്നെ തയ്യാറാക്കി എടുക്കാൻ സാധിക്കും.

ചേരുവകൾ

• ചിക്കൻ: അര കിലോ
• കശ്മീരി മുളകുപൊടി: 1 ടേബിൾ സ്പൂൺ
• മഞ്ഞൾപൊടി- കാൽ ടീസ്പൂൺ
• ഉപ്പ്- ആവശ്യത്തിന്
• നാരങ്ങാനീര്- അര നാരങ്ങയുടെ നീര്
• വെളിച്ചെണ്ണ- 3 ടേബിൾ സ്പൂൺ
• കറിവേപ്പില- 4 തണ്ട്
• ചെറിയ ഉള്ളി- 30 എണ്ണം (അരിഞ്ഞത്)
• മുളക് ചതച്ചത്- 2 ടേബിൾ സ്പൂൺ

തയ്യാറാക്കുന്ന വിധം:

• ചിക്കൻ കഷ്ണങ്ങളിലേക്ക് ഉപ്പ്, മഞ്ഞൾ, മുളകുപൊടി, നാരങ്ങാനീര് എന്നിവ ചേർത്ത് നന്നായി മാരിനേറ്റ് ചെയ്യുക. 45 മിനിറ്റ് മാറ്റിവയ്ക്കുക.
• ചീനച്ചട്ടിയെടുത്ത് അടുപ്പിൽ വച്ച് വെളിച്ചെണ്ണ ചൂടാക്കി കറിവേപ്പിലയും ചെറിയ ഉള്ളിയും ചേർത്ത് നന്നായി വഴറ്റുക.
• ചെറിയ ഉള്ളി ബ്രൗൺ നിറമാവുമ്പോൾ ചതച്ചുവച്ച വറ്റൽ മുളക് ചേർക്കുക.
• ഇതിലേക്ക് മാരിനേറ്റ് ചെയ്ത ചിക്കൻ ചേർക്കുക. ആവശ്യത്തിന് ഉപ്പ് ചേർത്ത് ഇളക്കി മൂടി വച്ച് വേവിക്കുക.
• ഇടയ്ക്ക് ഇളക്കി കൊടുക്കുക, ആവശ്യമെങ്കിൽ അര ഗ്ലാസ് വെള്ളം കൂടി ചേർത്തിളക്കി വേവിക്കുക.