കുട്ടികുറുമ്പന്മാരെയും കുറുമ്പികളെയും ഭക്ഷണം കഴിപ്പിക്കുക എന്നു പറയുന്നത് പലപ്പോഴും ബുദ്ധിമുട്ടേറിയ കാര്യമാണ്. സ്വാദിഷ്ടമായതും വ്യത്യസ്തമായതുമായ ഭക്ഷണങ്ങളാവും പലപ്പോഴും കുട്ടികൾക്ക് ഇഷ്ടപ്പെടുക. കുട്ടിക്കൂട്ടത്തെ കയ്യിലെടുക്കാൻ സഹായിക്കുന്ന, വളരെ എളുപ്പത്തിൽ തയ്യാറാക്കാവുന്ന ഒരു സ്നാക്സ് റെസിപ്പി പരിചയപ്പെടാം.
ചേരുവകൾ
- പപ്പടം- 1 പാക്ക്/ 10 എണ്ണം
- മുട്ട- 2 എണ്ണം
- വെളുത്തുള്ളി- 4 അല്ലി
- കറിവേപ്പില- ആവശ്യത്തിന്
- ചെറിയ ഉള്ളി- ആവശ്യത്തിന്
- പച്ചമുളക്- 4
- മഞ്ഞൾപ്പൊടി- അര ടീസ്പൂൺ
- കശ്മീരി മുളകുപൊടി- 1 ടീസ്പൂൺ
- ഉണക്കമുളക്ക്- ആവശ്യത്തിന്
- തേങ്ങ ചിരകിയത്- ആവശ്യത്തിന്
- ഉപ്പ്- ആവശ്യത്തിന്
തയ്യാറാക്കുന്ന വിധം
- പപ്പടം ചെറിയ കഷ്ണങ്ങളായി മുറിക്കുക.
- ഒരു ചട്ടിയെടുത്ത് എണ്ണ ചൂടാക്കി മുറിച്ചുവച്ച പപ്പടകഷ്ണങ്ങൾ വറുത്തുകോരുക. ശേഷം മാറ്റിവയ്ക്കുക.
- പാനിലേക്ക് വെളുത്തുള്ളി, കറിവേപ്പില, പച്ചമുളക്, ചെറിയ ഉള്ളി അരിഞ്ഞത്, ഉപ്പ് എന്നിവ ചേർത്ത് നന്നായി വഴറ്റിയെടുക്കുക.
- ആവശ്യാനുസരണം മഞ്ഞൾപ്പൊടി, കശ്മീരി മുളകുപൊടി എന്നിവ ചേർക്കുക.
- ഇതിലേക്ക് മുട്ട പൊട്ടിച്ച് ഒഴിച്ച് നന്നായി ചിക്കിയെടുക്കുക.
- ശേഷം വറുത്തുവച്ച പപ്പടം ചേർത്തിളക്കുക.
- ഉണക്കമുളക് ചതച്ചത് ചേർക്കുക
- തേങ്ങ ചിരകിയതും ചേർത്ത് നന്നായി ഇളക്കിയെടുക്കുക
