എലിക്കെണി വേണ്ട, ഒരു നുള്ള് ഗോതമ്പ് പൊടി കൊണ്ട് തുരത്താം സ്ഥിരം ശല്യക്കാരായ എലികളെ

വീടിനുള്ളിൽ എലികൾ കയറിക്കൂടിയാൽ അത് വരുത്തിവെക്കുന്ന വിനകൾ ചെറുതല്ല. ഭക്ഷണസാധനങ്ങൾ കാർന്നുതിന്നും, വസ്ത്രങ്ങളും വിലപിടിപ്പുള്ള രേഖകളും നശിപ്പിച്ചും എലികൾ ഉണ്ടാക്കുന്ന നാശനഷ്ടങ്ങൾ ഏതൊരു വീട്ടുടമസ്ഥനെയും വല്ലാതെ ബുദ്ധിമുട്ടിക്കുന്ന കാര്യമാണ്. വെറുമൊരു ശല്യം എന്നതിലുപരി, പ്ലേഗ്, എലിപ്പനി തുടങ്ങിയ ഗുരുതരമായ ആരോഗ്യപ്രശ്നങ്ങൾക്കും ഇവ കാരണമാകാറുണ്ട്.

അടുക്കളയിലെ പാത്രങ്ങളിലും മറ്റും എലികൾ കയറുന്നത് വഴി സാംക്രമിക രോഗങ്ങൾ പടരാനുള്ള സാധ്യത വളരെ കൂടുതലാണ്.

വിപണിയിൽ ലഭ്യമാകുന്ന എലിവിഷങ്ങളും കെണികളും പലപ്പോഴും വീടിനുള്ളിൽ ഉപയോഗിക്കാൻ ഭയപ്പെടാറുണ്ട്; പ്രത്യേകിച്ച് ചെറിയ കുട്ടികളും വളർത്തുമൃഗങ്ങളും ഉള്ള വീടുകളിൽ. ഇത്തരം കെമിക്കലുകൾ ആരോഗ്യത്തിന് ഹാനികരമാകാൻ സാധ്യതയുണ്ട്. എന്നാൽ പ്രകൃതിദത്തമായ മാർഗങ്ങളിലൂടെ എലികളെ തുരത്താം.

ചേരുവകൾ

ഗോതമ്പ് പൊടി- 1 സ്പൂൺ, കടലമാവ്- 1സ്പൂൺ, പച്ചമുളക്- 4, വാഷിംഗ് പൗഡർ, വെള്ളം

തയ്യാറാക്കുന്ന വിധം

ഒരു പഴയ പ്ലാസ്റ്റിക് ബൗളിലേയ്ക്ക് രണ്ട് സ്പൂൺ ഗോതമ്പ് പൊടിയെടുക്കാം. അതിലേയ്ക്ക് ഒരു സ്പൂൺ കടലമാവും കുറച്ച് വാഷിംഗ് പൗഡറും ചേർത്തിളക്കി യോജിപ്പിക്കാം. ശേഷം നാല് പച്ചമുളക് ചതച്ചതു കൂടി ചേർത്തിളക്കി യോജിപ്പിക്കാം. ആവശ്യത്തിന് വെള്ളവും ഇതിൽ ഒഴിക്കാം. കുഴച്ചെടുത്ത മാവ് ചെറിയ ഉരുളകളാക്കിയെടുക്കാം. ഇവ എലി ശല്യം രൂക്ഷമായ ഇടങ്ങളിൽ വയ്ക്കാം. എലിക്കെണി, കേക്ക്, തുടങ്ങി എലികളെ തുരത്താൻ നിരവധി മാർഗങ്ങളുണ്ട്. എന്നാൽ ഇവയ്ക്കു പകരം ഈ വിദ്യ ഉപയോഗിക്കാം.