ബാക്കി വന്ന ചോറ് കൊണ്ട് ഒരു കൊറിയൻ സ്നാക്, സിംപിളാണ് റെസിപ്പി

കുറച്ചധികം ചോറ് ബാക്കി വന്നാൽ അത് കളയേണ്ട കാര്യമില്ല. അടുക്കളയിലെ ഭക്ഷണ പരീക്ഷണങ്ങൾക്കായി അത് ഉപയോഗിക്കാം. ഇനി അങ്ങനെ ഒരു സാഹചര്യം ഉണ്ടായാൽ ഈ കൊറിയൻ റെസിപ്പി ട്രൈ ചെയ്തോളൂ.

ചേരുവകൾ

ചോറ്- 2 കപ്പ്, മോസറ്റില്ല ചീസ്- 1/2 കപ്പ്, കാരറ്റ്- 1/4 കപ്പ്, കിംചി- 1/4 കപ്പ്, ഉള്ളിത്തണ്ട്- 1/4 കപ്പ്, എള്ളെണ്ണ- 1 ടീസ്പൂൺ, ഉപ്പ്- ആവശ്യത്തിന്, കുരുമുളകുപൊടി- ആവശ്യത്തിന്

തയ്യാറാക്കുന്ന വിധം

പച്ചക്കറികൾ വൃത്തിയായി കഴുകി ചെറിയ കഷ്ണങ്ങളാക്കിയെടുക്കാം. ഒരു വലിയ ബൗളിലേയ്ക്ക് രണ്ട് കപ്പ് ചോറെടുക്കാം. അതിലേയ്ക്ക് അരിഞ്ഞെടുത്ത പച്ചക്കറികളും, ഒരു ടീസ്പൂൺ എള്ളെണ്ണയും, ആവശ്യത്തിന് ഉപ്പും കുരുമുളകുപൊടിയും ചേർത്തിളക്കി യോജിപ്പിക്കാം.

ഇതിലേയ്ക്ക് കിംചി അല്ലെങ്കിൽ കാബേജും ലെറ്റ്യൂസും ചേർത്ത് നന്നായി ഇളക്കിയെടുക്കാം.

ഇതിൽ നിന്നും ചെറിയ ഉരുളകളുണ്ടാക്കി ഉള്ളിൽ ചീസ് വച്ചെടുക്കാം. ഒരു പാത്രത്തിൽ എള്ളെടുത്ത് അതിൽ ഉരുളകൾ മുക്കി മാറ്റി വയ്ക്കാം.

തയ്യാറാക്കിയ ഉരുളകൾ ആവിയിൽ വേവിച്ചെടുക്കാം. ഇവ സോയ സോസിലോ ചില്ലി സോസിലോ മുക്കി കഴിച്ചു നോക്കൂ.