മാവ് പുളിപ്പിക്കാതെ തന്നെ നല്ല മൊരിഞ്ഞ ദോശ തയ്യാറാക്കാം, ഒരു കപ്പ് റവ മതി

രാവിലെ തിരക്കിനിടയിൽ പ്രഭാതഭക്ഷണം എന്തുണ്ടാക്കും എന്നാലോചിച്ച് വിഷമിക്കേണ്ടതില്ല. ദോശമാവ് അരച്ച് പുളിപ്പിക്കാൻ വയ്ക്കാൻ സമയമില്ലാത്തവർക്ക് പെട്ടെന്ന് തയ്യാറാക്കാവുന്ന ഒന്നാണ് ഇൻസ്റ്റന്റ് തക്കാളി ചില്ലി ദോശ. സാധാരണ ദോശയിൽ നിന്നും വ്യത്യസ്തമായി തക്കാളിയുടെയും വറ്റൽ മുളകിന്റെയും സ്വാദ് ചേരുന്ന ഈ ദോശ കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടും. മാവ് പുളിപ്പിക്കാതെ തന്നെ നല്ല മൊരിഞ്ഞ ദോശകൾ തയ്യാറാക്കാം. സ്നേഹ തൻ്റെ ഇൻസ്റ്റഗ്രാം പേജിലൂടെയാണ് ഇത് തയ്യാറാക്കുന്ന വിധം പരിചയപ്പെടുത്തി തരുന്നത്.

Also Read: 10 മിനിറ്റിൽ തയ്യാറാക്കാം ക്രിസ്പി കടലപ്പം; റെസിപ്പി ഇതാ

ചേരുവകൾ 

• റവ– 1 കപ്പ്
• തൈര്– ½ കപ്പ്
• കുതിർത്ത അവൽ – 3 ടേബിൾ സ്പൂൺ
• തക്കാളി – 2 ഇടത്തരം
• വറ്റൽ മുളക് – 2-3 എണ്ണം (ചൂടുവെള്ളത്തിൽ കുതിർത്തത്)
• ഉപ്പ് – പാകത്തിന്
• ബേക്കിംഗ് സോഡ – ¼ ടീസ്പൂൺ

Also Read: മൈദ വേണ്ട ഓവനും വേണ്ട; ഇത് ഒരു കപ്പുണ്ടെങ്കിൽ മിനിറ്റുകൾക്കുള്ളിൽ കുക്കീസ് വീട്ടിൽ തയ്യാറാക്കാം

View this post on Instagram

A post shared by Sneha Nathan Jyothir (@the_hungry_bun_)

Also Read: ഒരു പഴം മതി, 10 മിനിറ്റിൽ ഹെൽത്തി ബ്രേക്ക്ഫാസ്റ്റ് റെഡി

തയ്യാറാക്കുന്ന വിധം 

• ആദ്യം മിക്സിയുടെ ജാറിലേക്ക് ഒരു കപ്പ് റവ, അര കപ്പ് തൈര്, കുതിർത്തുവെച്ച അവൽ എന്നിവ ചേർക്കുക. ഇതിലേക്ക് അരിഞ്ഞ തക്കാളിയും ചൂടുവെള്ളത്തിൽ കുതിർത്തു വെച്ചിരിക്കുന്ന വറ്റൽ മുളകും ചേർക്കാം. മുളക് കുതിർക്കുന്നത് നല്ല നിറവും മയവും കിട്ടാൻ സഹായിക്കും.
• ഈ ചേരുവകൾ ആവശ്യത്തിന് വെള്ളം ചേർത്ത് നന്നായി അരച്ചെടുക്കുക. സാധാരണ ദോശമാവിന്റെ പരുവത്തിലായിരിക്കണം ഇത്.
• അരച്ചെടുത്ത മാവ് ഒരു പാത്രത്തിലേക്ക് മാറ്റി പാകത്തിന് ഉപ്പ് ചേർത്ത് നന്നായി ഇളക്കുക. ദോശ ചുടുന്നതിന് തൊട്ടുമുൻപായി കാൽ ടീസ്പൂൺ ബേക്കിംഗ് സോഡ ചേർത്ത് പതപ്പിക്കുക. ഇത് ദോശയ്ക്ക് നല്ല മൃദുത്വം നൽകും.
• ദോശക്കല്ല് അടുപ്പത്തുവെച്ച് നന്നായി ചൂടാകുമ്പോൾ അല്പം എണ്ണ തടവുക. ഒരു തവി മാവ് ഒഴിച്ച് കനം കുറച്ച് പരത്തുക. ചുറ്റും അല്പം നെയ്യോ എണ്ണയോ ഒഴിച്ചു കൊടുക്കാം.
• ദോശയുടെ ഒരു വശം നന്നായി മൊരിഞ്ഞു വരുമ്പോൾ തിരിച്ചിടുകയോ അല്ലെങ്കിൽ മടക്കിയെടുക്കുകയോ ചെയ്യാം. തക്കാളിയുടെയും മുളകിന്റെയും അംശം ഉള്ളതിനാൽ ഇതിന് മനോഹരമായ ഒരു ചുവപ്പ് നിറമുണ്ടാകും.
• ചൂടുള്ള തക്കാളി ചില്ലി ദോശ തേങ്ങാ ചമ്മന്തിക്കൊപ്പമോ സാമ്പാറിനൊപ്പമോ കഴിക്കാവുന്നതാണ്.

Read More: മധുരമല്ല, നല്ല എരിവുള്ള ചിക്കൻ അട; ഇഫ്താർ മേശയിലെ പുതിയ താരം