അരിയും ഉഴുന്നും അരക്കാതെ 10 മിനിറ്റിൽ സൂപ്പർ ദോശ തയ്യാറാക്കാം

മലയാളികളുടെ പ്രിയപ്പെട്ട പ്രഭാതഭക്ഷണങ്ങളിൽ ഒന്നാണ് ദോശ. ദോശയും സാമ്പാറും, ദോശയും ചമ്മന്തിയും, ദോശയും ചട്നി പൊടിയും- എന്നിങ്ങനെ വ്യത്യസ്ത കോമ്പിനേഷനുകൾ ഇഷ്ടപ്പെടുന്നവരും ഏറെയാണ്. കഴിക്കാൻ ഇഷ്ടമാണെങ്കിലും ദോശയ്ക്കുള്ള മാവ് ഒരുക്കുക എന്നത് അൽപ്പം ബുദ്ധിമുട്ടുള്ള പണിയാണ്. തലേ ദിവസം തന്നെ ഉഴുന്നും അരിയും വെള്ളത്തിലിട്ട് അരച്ചെടുത്ത് പുളിപ്പിച്ചെടുത്തുവേണം ദോശമാവ് തയ്യാറാക്കാൻ. എന്നാൽ ഇത്ര ബുദ്ധിമുട്ടൊന്നുമില്ലാതെ ഇൻസ്റ്റന്റായി ദോശ ഉണ്ടാക്കാവുന്ന ഒരു റെസിപ്പി പരിചയപ്പെടാം.

അരിയും ഉഴുന്നും അരക്കാതെ പലതരം പച്ചക്കറികൾ ചേർത്ത് ഉണ്ടാക്കാവുന്ന സ്വാദിഷ്ടമായ ദോശയുടെ റെസിപ്പി പരിചയപ്പെടുത്തുന്നത് മലനാടൻ അടുക്കള എന്ന യൂട്യൂബ് ചാനലാണ്.

ചേരുവകൾ:

• അരിപ്പൊടി- 1 കപ്പ്
• തക്കാളി- അര കഷ്ണം
• കാരറ്റ്- കാൽ കഷ്ണം
• സവാള- അര കഷ്ണം
• പച്ചമുളക്-2 എണ്ണം
• മല്ലിയില- 3 തണ്ട്
• ജീരകം- 1 ടേബിൾ സ്പൂൺ
• ഉപ്പ്- ആവശ്യത്തിന്
• വെള്ളം- ആവശ്യത്തിന്

തയ്യാറാക്കുന്ന വിധം:

• അരിപ്പൊടി, തക്കാളി, കാരറ്റ്, സവാള, പച്ചമുളക്, മല്ലിയില, ജീരകം , ഉപ്പ് എന്നിവ ചേർത്ത് വെള്ളമൊഴിച്ച് നന്നായി മിക്സ് ചെയ്തെടുക്കുക.
• സാധാരണ ദോശമാവിന്റെ അത്ര കട്ടി വേണ്ട. അൽപ്പം ലൂസായി വേണം മാവ് തയ്യാറാക്കാൻ.
• ചേരുവകൾ എല്ലാം ചേർത്ത് നന്നായി മിക്സ് ചെയ്ത് അഞ്ചുമിനിറ്റ് വയ്ക്കുക.
• ഒരു പാനിൽ നെയ് ഒഴിച്ച് അതിലേക്ക് മാവ് ഒഴിച്ച് ആറു മിനിറ്റോളം വേവിക്കുക. നല്ല ക്രിസ്പി പരുവമാവുമ്പോൾ ദോശ തവി കൊണ്ട് കോരിയെടുക്കാം.
• തക്കാളി ചട്നിയ്ക്ക് ഒപ്പം കഴിക്കാവുന്ന സ്വാദിഷ്ടമായ ദോശയാണിത്.